Kini nga leksiyon mopaila kanimo sa doktrinal nga kahanas ug kon sa unsang paagi nga makapanalangin kini sa imong kinabuhi ug makatabang nimo sa pagpalig-on sa imong espirituhanong pundasyon diha ni Jesukristo.
Pagtukod og pundasyon diha kang Jesukristo
Imahe
buhawi
Si Elder Neil L. Andersen sa Korum sa Napulog Duha ka Apostoles mipasidaan bahin sa espirituhanong mga alimpulos:
Imahe
Elder Neil L. Andersen
Dugang pa sa mga gipanagna nga mga linog ug mga gubat [sa ulahing mga adlaw] mao ang espirituhanong mga alimpulos nga makaibot kaninyo gikan sa inyong espirituhanon nga mga pundasyon ug mopadpad sa inyong espiritu ngadto sa mga dapit nga wala ninyo dahoma, usahay dili kaayo ninyo mamatngonan nga naalsa na kamo.
Unsa ang pipila ka espirituhanon nga mga alimpulos nga mosulay sa pag-ibot kanato gikan sa atong espirituhanon nga mga pundasyon?
Hunahunaa ang mahitungod sa usa ka espirituhanon nga alimpulos nga mahimong imong giatubang. Basaha ang Helaman 5:12 ug pangita og mga paagi nga makasugakod niini nga alimpulos.
Unsa ang imong namatikdan nga makatabang nimo nga makasugakod sa espirituhanon nga mga alimpulos?
Unsa sa imong hunahuna ang gipasabot sa pagtukod og pundasyon diha kang Jesukristo?
Sa unsa nga mga paagi nga personal kang makabenepisyo sa pagtukod og lig-on nga pundasyon diha kang Jesukristo?
Ang akong espirituhanon nga pundasyon
Hunahunaa ang imong espirituhanong pundasyon ug gradohi ang imong kaugalingon sa mosunod nga mga pamahayag pinaagi sa “Uyon,” “Medyo Uyon,” “Medyo Dili Uyon,” o “Dili Uyon.”
Nagtukod ako og lig-on nga pundasyon diha kang Jesukristo ug sa Iyang ebanghelyo.
Gidugangan nako ang akong kahibalo mahitungod kang Jesukristo ug sa Iyang doktrina.
Komportable ako sa paggamit sa mga kasulatan aron ipasabot ang doktrina ni Jesukristo.
Ako makahimo sa pagpangita og mga tubag sa akong mga pangutana o sa ubang mga tawo mahitungod sa ebanghelyo.
Doktrinal nga kahanas
Ang seminary makatabang kanimo sa pagtukod sa imong pundasyon diha kang Jesukristo samtang ikaw magkat-on sa Iyang doktrina, moduol ngadto Kaniya, ug mahimong Iyang disipulo (tan-awa sa 3 Nephi 11:39). Basaha ang unang duha ka parapo diha sa “Pasiuna sa Doktrinal nga Kahanas” nga kapitulo sa Mahinungdanon nga Dokumento sa Doktrinal nga Kahanas (2022), mangita og mga paagi nga ang seminary makatabang nimo sa pagtukod sa imong pundasyon diha kang Jesukristo.
Unsa man ang imong nakit-an?
Adunay duha ka nag-una nga mga sangpotanan alang sa doktrinal nga kahanas nga makatabang kanimo sa pagtukod sa imong pundasyon diha kang Jesukristo. Basaha ang duha ka sangpotanan alang sa doktrinal nga kahanas diha sa “Pasiuna sa Doktrinal nga Kahanas” nga kapitulo sa Mahinungdanon nga Dokumento sa Doktrinal nga Kahanas.
Matag semana diha sa seminary buhaton nimo ang doktrinal nga kahanas. Sa kasagaran niini nga mga leksiyon, imong tun-an ang usa sa 24 ka mga tudling sa kasulatan gikan sa Bag-ong Tugon nga nailhan isip mga tudling sa doktrinal nga kahanas. Ang mosunod nga diagram naghulagway sa unsay imong buhaton diha sa mga leksiyon sa doktrinal nga kahanas.
Sa nahaunang bahin sa leksiyon imong gisukod imong kaugalingon kon unsa ka kakomportable sa paggamit sa mga kasulatan aron sa pagpasabot sa doktrina ni Jesukristo. Dili igsapayan kon giunsa nimo pagsukod imong kaugalingon, ang pagtuon sa doktrinal nga kahanas modugang sa imong kahibalo sa Manluluwas ug sa Iyang doktrina. Molambo ang imong abilidad sa pagpasabot sa Iyang doktrina gamit ang mga kasulatan.
Tan-awa ang lista sa mga tudling sa doktrinal nga kahanas sa Bag-ong Tugon ug sa mahinungdanong hugpong sa mga pulong sa kasulatan niini. Mahimo nimong makit-an kini nga lista inig dayong tapos sa Mahinungdanon nga Dokumento sa Doktrinal nga Kahanas. Pagpili og usa sa mga tudling nga nakapainteres nimo, makatabang sa usa ka personal nga panginahanglan, o makatabang sa usa ka pangutana nga aduna ka.
1. Tubaga ang mosunod nga mga pangutana diha sa imong journal sa pagtuon:
Unsa nga tudling sa kasulatan ang imong gipili?
Unsa ang gitudlo niini nga tudling kanimo mahitungod ni Jesukristo o sa Iyang doktrina?
Sa unsa nga mga paagi ang pagkahibalo unsaon sa pagpasabot sa doktrina gikan niini nga tudling makapanalangin sa imong kinabuhi?
Pag-angkon og espirituhanong kahibalo
Diha sa mga leksiyon sa doktrinal nga kahanas, ikaw adunay kahigayonan sa pagkat-on og dugang mahitungod sa ug pagbansay gamit ang mga baroganan sa pag-angkon og espirituhanon nga kahibalo aron sa pagtabang nimo sa pagtubag sa personal ug sosyal nga mga pangutana ingon man sa mga pangutana mahitungod sa doktrina, mga binuhatan, o kasaysayan sa Simbahan. Ang pagkat-on mahitungod sa ug paggamit niini nga mga baroganan motabang nimo sa pagtukod sa imong pundasyon diha sa Manluluwas ug modangop ngadto Kaniya kon ikaw adunay mga pangutana. Tulo sa mga baroganan sa pag-angkon og espirituhanon nga kahibalo nga imong bansayon sa paggamit diha sa seminary mao ang:
Lihok inubanan sa hugot nga pagtuo.
Susiha ang mga konsepto ug mga pangutana nga adunay mahangtorong panglantaw.
Pagtinguha pa og dugang nga panabot pinaagi sa balaanong gitudlo nga mga tinubdan.
Kon ikaw dili pamilyar niini nga mga baroganan, mahimong gusto nimong basahon ang mga parapo 5–12 diha sa “Pag-angkon og Espirituhanong Kahibalo” nga kapitulo sa Mahinungdanon nga Dokumento sa Doktrinal nga Kahanas.
2. Tubaga ang labing minos duha sa mosunod nga mga pangutana diha sa imong journal sa pagtuon:
Unsa ang imong nahibaloan mahitungod niini nga baroganan?
Unsa nga mga kasinatian nga ikaw aduna niini nga mga baroganan?
Sa unsa nga mga paagi sa imong hunahuna kini nga mga baroganan makatabang nimo sa pagtukod sa imong pundasyon diha kang Kristo ug makasugakod sa espirituhanon nga mga alimpulos?
Mga tudling sa kasulatan sa doktrinal nga kahanas
Matag tuig diha sa seminary ikaw pagaawhagon sa pagsag-ulo og usa ka mahinungdanong hugpong sa mga pulong sa kasulatan alang sa 24 ka tudling sa kasulatan sa doktrinal nga kahanas.
Si Elder Richard G. Scott (1928–2015) sa Korum sa Napulog Duha ka Apostoles mitudlo mahitungod sa pagsag-ulo sa mga kasulatan.
Imahe
Elder Richard G. Scott
Talagsaong gahom moabot gikan sa pagmemorya og mga kasulatan. Ang pagmemorya og kasulatan mao ang paghulma og bag-ong pakighigala. Sama kini sa pagdiskobre og bag-ong tawo nga makatabang sa panahon sa panginahanglan, makahatag og inspirasyon ug kahupayan, ug mahimong tinubdan sa kadasig sa gikinahanglan nga kausaban.
Ngano kaha sa imong hunahuna nga makatabang nga masag-ulo ang nagkadaiyang mga tudling sa kasulatan?
Sa unsa nga paagi nga ang pagsag-ulo sa mga kasulatan makatabang kanimo sa pagtukod sa imong pundasyon diha kang Jesukristo ug makasugakod sa espirituhanong mga alimpulos?
Gahini og pipila ka gutlo ang pagrebyo sa 24 ka tudling sa doktrinal nga kahanas ug sa mahinungdanon nga hugpong sa mga pulong sa kasulatan alang sa kurso sa Bag-ong Tugon. Mahimo nimong gamiton ang Doctrinal Mastery nga app o ang Mahinungdanon nga Dokumento sa Doktrinal nga Kahanas. Mahimong gusto nimong magsugod sa pagsag-ulo sa pakisayran ug mahinungdanong hugpong sa mga pulong sa kasulatan alang sa tudling nga imong nang gipili.
Opsiyonal: Gustong Makakat-on pa og Dugang?
Nganong importante man ang doktrinal nga kahanas?
Si Presidente M. Russell Ballard sa Korum sa Napulog Duha ka Apostoles mitudlo:
Imahe
Presidente M. Russell Ballard
Ang [doktrinal nga kahanas] magtutok sa pagpalambo ug pagpalig-on sa hugot nga pagtuo sa atong mga estudyante diha kang Jesukristo ug pagdugang sa ilang abilidad nga masunod ug magamit ang ebanghelyo sa ilang kinabuhi. Pinaagi sa paggamit sa mga kasulatan ug sa pulong sa mga propeta, makat-onan nila unsaon sa paglihok uban sa hugot nga pagtuo diha kang Kristo sa pag-angkon og espirituhanon nga kahibalo ug panabot sa Iyang ebanghelyo. Ug may mga oportunidad sila sa pagkat-on unsaon sa paggamit sa doktrina ni Kristo ug mga baroganan sa ebanghelyo diha sa mga pangutana ug mga hagit nga ilang madungog ug makita kada adlaw taliwala sa ilang mga higala ug sa social media.
