Sione 18:33–40; Luke 23:8–11

Ko e ʻAhiʻahiʻi mo e Fakamamahiʻi ʻo Sīsuú

Hili hono puke pōpula mo fakamaauʻi hala ʻo Sīsū ʻi he ʻao ʻo e kau taki ʻo e kau Siú, naʻe ʻoatu Ia ke fakamāuʻi ʻi he ʻao ʻo Pailató, ʻa ia naʻá ne maʻu ʻa e mafai ki he kakai Lomá. Naʻe fakavaivai angamalū ʻa e Fakamoʻuí ki he kakai Lomá pea naʻe fakamamahi hono taaʻi mo tauteaʻi ke maté. ʻOku fakataumuʻa ʻa e lēsoni ko ʻení ke tokoniʻi koe ke ke ako lahi ange fekauʻaki mo e ʻofa ʻa e Fakamoʻuí ki he kakai kotoa pē pea mo Hono ʻulungaanga haohaoá mo e founga te ke lava ai ʻo muimui lelei ange ki Heʻene sīpingá.

Ongoʻi ngaohikovia

• Ko e hā ha ngaahi tūkunga angamaheni ʻe lava ke manukiʻi, tukuakiʻi loi, pe ngaohikovia ai ha taha taʻu hongofulu tupu?

• Ko e hā ha ngaahi founga ʻe ala tali ʻaki ʻe ha tokotaha taʻu hongofulu tupu ʻa e faʻahinga ʻulungaanga peheé?

ʻE lava ke ʻiate kitautolu ʻa e ʻEikí mo tokoniʻi kitautolu ke tau tupulaki mei he ngaahi aʻusia faingataʻá. Te Ne lava ʻo tokoniʻi kitautolu ke tau tali ʻa e faingataʻá mo e fakafepakí ʻi ha ngaahi founga faka-Kalaisí. Fakakaukau ki he ngaahi meʻa naʻá ke aʻusia fakataautaha ʻi hano manukiʻi, tukuakiʻi loi, pe ngaohikovia koe, kau ai e founga naʻá ke tali ʻakí mo hono ʻuhingá.

ʻI he fakaofi atu ʻa Sīsū Kalaisi ki he ngaahi meʻa fakaʻosi ne hoko ʻi Heʻene moʻuí, naʻe manukiʻi, tukuakiʻi loi, pea ngaohikovia Ia. ʻI hoʻo ako e ngaahi meʻa fakaʻosi ko ʻeni naʻe hoko ʻi he moʻui ʻa e Fakamoʻuí, kumi ha ngaahi ʻulungaanga naʻá ne tokoniʻi Ia ke Ne kātekina faivelenga pea fakakakato Hono misioná. Fakakaukauʻi foki ʻi he faʻa lotu ʻa e founga te ke lava ai ʻo muimui ʻi Heʻene sīpingá.

Ko e fakamaauʻi taʻetotonu mo tautea mate ʻa Sīsuú

Hili e mamahi ʻa Sīsū ʻi he Ngoue ko Ketisemaní, naʻe puke pōpula Ia, pea naʻe fakamaauʻi taʻetotonu Ia ʻe he kau taki ʻo e kau Siú (Sanitaliné) mo fakahalaiaʻi Ia ki he mate. Ka neongo ia, koeʻuhí naʻe puleʻi ʻe he kau Lomá ʻa ʻIsileli, naʻe toki lava pē ke fakamafaiʻi ʻe he kau Lomá ʻa hono tauteaʻí. ʻI he ʻuhinga ko ʻení, naʻe fekauʻi atu ai ʻe he kau Siú ʻa Sīsū kia Pailato, ko e taki Loma ʻi Siuteá, ʻo tukuakiʻi Ia ki he angatuʻu ki he puleʻanga Lomá ʻi Heʻene pehē “ko e Tuʻi [Ia] ʻo e kakai Siú” (vakai, Maʻake 15:2). Naʻe fekauʻi atu ʻe Pailato ʻa Sīsū kia Hēlota ʻAnitipasi, ʻa ia naʻe ʻi Selusalema ki he Kātoanga ʻo e Laka Atú, mo ʻamanaki ʻe fakamaauʻi Ia ʻe Hēlota ʻi Kāleli, ka naʻe toe fakafoki mai ʻe Hēlota ʻa Sīsū kia Pailato.

Lau ha fakamatala ʻe ua pe lahi ange mei he ngaahi fakamatala ko ʻení, ʻa ia ʻoku fakamatala ki he founga naʻe tukuakiʻi taʻetotonu ai ʻa Sīsuú pea iku ʻo fakahalaiaʻi. ʻI hoʻo laú, kumi ki he tali ʻa Sīsū ʻi he ngaahi tūkunga takitaha ko ʻení. Manatuʻi naʻá Ne maʻu ʻa e mālohi ke fakatauʻatāinaʻi Ia mei he ngaahi tūkunga ko ʻení (vakai, Mātiu 26:52–54).

1. Ko e fakafehuʻi ʻe he Sanitaliné ʻa Sīsū. Lau ʻa e Mātiu 26:57–68 , pe mamataʻi e foʻi vitiō “Fakamāuʻi ʻo Sīsū ʻe Kaiafasí, Fakafisingaʻi ʻe Pita ʻOkú ne ʻIloʻi Iá” mei he taimi 0:00 ki he 1:39. ʻOku lava ke maʻu ʻa e vitioó ni ʻi he ChurchofJesusChrist.org.

nbsp;

3. Ko e hā ʻa Sīsū kia Hēlotá. Lau ʻa e Luke 23:8–11 .

4. Ko e kaumaeaʻi ʻe he kau sōtia Lomá ʻa Sīsuú pea toe fakafehuʻi tuʻo ua ʻe Pailató. Mahalo ʻe tokoni ke ʻiloʻi ko e kaumaeá ko ha uipi ia naʻe faʻa fakapipiki ki ai ha ʻū meʻa māsila (hangē ko ha kongokonga maka, ukamea, pe hui) ʻo haʻi ki ha niʻihi ʻo e ngaahi foʻi maeá. Ne ʻi ai ha kakai tokolahi ne ʻikai ke nau moʻui hili hono tā kinautolú koeʻuhi ko e lahi fau ʻo e mamahi fakaesino naʻá ne fakatupú.