Juan 7

Buhata ang Kabubut-on sa Dios aron Masayod sa Iyang Doktrina

Sa panahon sa Kasaulogan sa mga Balongbalong [Tabernacle] didto sa Jerusalem, gipasabot ni Jesus unsaon pagkasayod sa tanan nga ang doktrina nga Iyang gitudlo naggikan sa Langitnong Amahan. Kini nga leksiyon makatabang kaninyo sa pagdiskobre unsa ang inyong buhaton aron masayod sa kamatuoran mahitungod sa mga pagtulon-an sa Langitnong Amahan ug ni Jesukristo.

Mga nagkalainlain nga gituohan mahitungod kang Jesukristo

• Unsa ang uban nga gituohan sa mga tawo mahitungod sa kon kinsa si Jesukristo?

• Nganong mahinungdanon man nga imong masayran ang tinuod mahitungod kang Jesukristo bisan unsa pay mahunahuna sa uban?

Gahini og panahon ang paghunahuna kon unsa ang nakaimpluwensya sa imong mga gituohan mahitungod kang Jesukristo. Ilha unsa nga mga tinubdan ang imong kaadtoan alang sa kamatuoran, ug pamalandongi kon sa unsang paagi kini nakaimpluwensya sa imong mga gituohan. Samtang ikaw magtuon karon, tan-awa kon unsay imong mabuhat aron masayran ang kamatuoran mahitungod kang Jesukristo ug sa Iyang mga pagtulon-an.

Tungod kay daghan man sa Jerusalem ang gustong mopatay kang Jesus, Siya mitambong sa Kapistahan sa mga Balongbalong diha sa hilom (tan-awa sa Juan 7:1, 10). Samtang ang mga Judeo nangita kang Jesus, ug sa kinatibuk-an sa kapistahan, ang mga tawo nagpaambit sa usa’g usa sa nagkalainlain nga mga hunahuna mahitungod sa kon kinsa si Jesus.

Aron mahibaloan unsa ang gisulti sa mga tawo mahitungod kang Jesus, pagpili og duha o tulo sa sunod nga mga pakisayran, og tubaga ang mga pangutana nga mosunod.

Juan 7:12, 40–41	Unsa ang anaa nga managlahing ideya sa katawhan mahitungod sa kon si kinsa si Jesus?
Juan 7:31	Nganong ang uban nga mga tawo mituo man ni Jesus?
Juan 7:41–42, 52	Nganong gihisgotan man sa mga tawo kon diin gikan si Jesus?
Juan 7:45–46	Unsa man nga butang mahitungod kang Jesus ang nakat-onan sa mga opisyal nga gisugo sa pagdakop Kaniya?
Juan 7:47	Giunsa sa mga Pariseo sa paghulagway ang tawo kinsa nga mituo kang Jesus?

• Unsa ang mga rason nga gihatag sa katawhan nga sila mituo o wala motuo kang Jesukristo?

• Unsa ang pipila ka hunahuna sa mga tawo mahitungod kang Jesukristo ug sa Iyang mga pagtulon-an karon?

• Unsaon nato pagkasayod sa kamatuoran mahitungod kang Jesukristo ug sa Iyang mga gitudlo?

Pagkasayod sa kamatuoran mahitungod kang Jesukristo ug sa Iyang mga pagtulon-an

Sa panahon sa Kapistahan sa mga Balongbalong, si Jesus miadto sa templo aron manudlo. Iyang gipasabot sa katawhan didto nga ang doktrina nga Iyang gitudlo ug Siya Mismo naggikan sa Langitnong Amahan (tan-awa sa Juan 7:14, 16–18, 28–29)

Juan 7:17Ang usa ka tudling sa doktrinal nga kahanas. Ikonsiderar ang pagmarka niini sa lahi nga paagi aron mas dali ra nimo kining makit-an. Makakat-on ka og daghan pa mahitungod niini nga tudling sa doktrinal nga kahanas sa sunod nga leksiyon.

Basaha ang Juan 7:17, nga mangita kon unsa ang giingon ni Jesus nga mahimong buhaton sa katawhan aron sila masayod nga ang gitudlo ni Jesus tinuod ug nga Siya ang gipadala sa Langitnong Amahan.

Usa ka baroganan nga atong makat-onan niini nga bersikulo mao nga kon atong buhaton ang kabubut-on sa Langitnong Amahan, kita masayod nga ang Iyang doktrina tinuod.

Ang pagbuhat sa kabubut-on sa Langitnong Amahan nagpasabot nga kita magpakabuhi sigon sa Iyang gusto nga pamaagi. Ang Manluluwas nga si Jesukristo kanunay nga nagpakabuhi ug nagtudlo sa kabubut-on sa Langitnong Amahan.

• Unsa ang mga pananglitan nga inyong mapaambit bahin ni Jesus nga nagbuhat sigon sa kabubut-on sa Amahan?

• Unsa ang nakalisod sa pagsunod og usa ka baroganan nga wala pa nato mahibaloi nga tinuod?

Si Presidente Bonnie L. Oscarson, kanhi Kinatibuk-ang Presidente sa Young Women, mihatag sa mosunod nga tambag mahitungod sa pagkahibalo sa kamatuoran:

Usahay bali ang atong buhaton. Pananglit, atong gamiton kini nga paagi: Malipay kong magsunod sa balaod sa ikapulo, apan kinahanglan ko unang mahibaloan nga kini tinuod. Tingali mag-ampo kita aron makaangkon og pagpamatuod sa balaod sa ikapulo ug nanghina[o]t nga ang Ginoo mopanalangin kanato niana nga pagpamatuod sa dili pa gay[o]d kita makasulat diha sa resibo sa ikapulo. Kini dili gay[o]d mosalir. Ang Ginoo nagpaab[o]t nga kita mopakita og hugot nga pagtuo. Kinahanglan kanunay kitang mobayad og hingpit ug tinud-anay nga ikapulo aron makaangkon og pagpamatuod sa ikapulo. Kining sama nga sumbanan magamit ngadto sa tanang mga bar[o]ganan sa ebanghelyo, mabalaod man sa kaputli, sa bar[o]ganan sa hustong pagsinina, sa Pulong sa Kaalam, o sa balaod sa puasa.

(Bonnie L. Oscarson, “Magpakabig Kamo,” Liahona, Nob. 2013, 77)

• Sa inyong hunahuna ngano kaha nga si Jesukristo gusto nga kita mahibalo nga ang Iyang doktrina naggikan sa Langitnong Amahan ug nga kini tinuod?

• Sa unsang paagi nga ang pagkahibalo nga ang doktrina ni Jesukristo tinuod nga makatabang usab kanato sa pagkaila Kaniya?

Pagpili og usa sa mga pagtulon-an sa Ginoo nga imong gustong gamiton alang sa pagpalig-on sa imong pagmatuod. Alang sa pipila ka ideya bahin sa Iyang mga pagtulon-an, mahimo nimong tan-awon ang mga pakigpulong nga gipamulong ngadto sa kabatan-onan sa bag-o lang milabay nga kinatibuk-ang komperensiya. Mahimo usab kang mangita og mga ideya sa Alang sa Kalig-on sa mga Kabatan-onan (2011) nga booklet o sa Alang sa Kalig-on sa mga Kabatan-onan nga magasin. Dapita ang Espiritu nga tabangan ka sa pagpili og usa sa mga pagtulon-an sa Ginoo nga imong pagatutokan nga makapanalangin kaayo kanimo niining panahona sa imong kinabuhi.

1. Kompletoha ang mosunod nga kalihokan sa imong journal sa pagtuon:

Isulat ang pagtulon-an nga imong napili sa ibabaw sa blangko nga panid sa imong journal sa pagtuon o sa imong usa ka blangko nga papel. Karon paghunahuna og yanong imahe o butang nga mahimo nimong idrowing aron sa pagrepresenta niini nga doktrina, ug idrowing kini sa tunga sa imong papel.

Pananglitan, tingali napili nimo nga palig-onon ang imong pagpamatuod bahin sa Basahon ni Mormon isip pulong sa Dios. Mahimo kang magdrowing og yanong hulagway sa Basahon ni Mormon.

Aron matabangan ka sa paghunahuna unsa ang angay buhaton aron makadawat og pagpamatuod sa pagtulon-an nga imong napili, paghunahuna ug lainlain nga mga buhat nga tingali maoy gusto sa Langitnong Amahan nga imong buhaton nga may kalabotan sa maong pagtulon-an. Pagsulat ug labing minos tulo ka buhat palibot sa litrato nga imong gidrowing.

Hunahunaa kon sa unsang paagi kaha nga ang pagbaton ug mas lig-on nga pagmatuod niini nga doktrina makaimpluwensiya sa imong relasyon ngadto sa Langitnong Amahan ug kang Jesukristo.

2. Diha dapit sa ubos sa imong gidrowing, tubaga ang mosunod nga mga pangutana:

• Unsa ang mga babag nga posibleng makapugong kanimo sa pagsunod niini nga doktrina? Sa unsang paagi nimo mabuntog kini nga mga babag?

• Unsa ka mahinungdanon ang pagsabot mahitungod sa panahon ug paningkamot nga angay buhaton aron maila nga kining doktrina gikan sa Dios?

Mahimo nimong ipaambit ang imong mga plano ngadto sa miyembro sa pamilya kinsa makatabang kanimo sa pagsunod sa doktrina ug mahibalo nga gikan kini sa Dios.

Opsiyonal: Gustong Makahibalo pa og Dugang?

Juan 7:2. Unsa ang Kapistahan sa mga Balongbalong?

Ang Kapistahan sa mga Balongbalong (nga gitawag usab og Kasaulogan sa mga Balongbalong o sa mga Payag) magsugod ug mahuman panahon sa Igpapahulay ug mahuman sulod sa gidugayon nga walo ka adlaw. Ang usa ka bahin niini nga kasaulogan naglakip sa pagtukod ug temporaryong mga balongbalong nga gihimo gikan sa mga sanga sa kahoy. Ang mga tawo nagpabilin niini nga mga payag panahon sa kasaulogan aron mapahinumdoman sila nga ang Dios mipanalangin sa Iyang katawhan sulod sa 40 ka tuig samtang sila nagpuyo sa kamingawan sa Sinai.

Juan 7:17. Unsa ang bili sa pagpangita sa kamatuoran pinaagi sa pagkamasulundon?

Ang Manluluwas miingon sa Iyang mga tinun-an nga kadtong magpadayon pagsunod sa Iyang mga pagtulon-an mahibalo sa kamatuoran ug ang kamatuoran maghatag kanila og kagawasan (tan-awa sa Juan 8:31–32).Si Presidente Dieter F. Uchtdorf sa Korum sa Napulog-duha ka Apostoles mipasabot nganong kita kinahanglan nga mohimo og lakang aron makadawat og personal nga pagpamatuod sa kamatuoran.

Ang uban moingon nga lis[o]d ra kaayo ang mga lakang o dili kini motugbang sa paningkamot. Apan moingon ko nga kining personal nga pagpamatuod sa ebanghelyo ug sa Simbahan maoy pinakaimportante nga inyong maangkon niini nga kinabuhi. Dili lamang kini mopanalangin ug mogiya ninyo niining kinabuhia, apan may direkta kining epekto sa inyong kinabuhi hangt[o]d sa kahangtoran.

(Dieter F. Uchtdorf, “Pagdawat og usa ka Pagpamatuod sa Kahayag ug Kamatuoran,” Liahona, Nob. 2014, 22)

Juan 7:39. Nganong miingon man si Juan nga “niadtong higayona wala pa ikahatag ang Espiritu [Santo]”?

Si Juan nagpasabot “lamang sa gasa sa Espiritu Santo nga wala nianang panahona, tungod kay ang gahom sa Espiritu Santo naglihok sa panahon sa mga pagpangalagad ni Juan Bautista ug ni Jesus; kay kon dili man wala untay bisan usa nga nakadawat og pagpamatuod sa mga kamatuoran nga gitudlo niining mga tawhana [Mateo 16:16–17; tan-awa usab sa 1 Mga Taga-Corinto. 12:3]” (Giya ngadto sa mga Kasulatan, “Espiritu Santo”).