Si Jesukristo mitubag sa mga pangutana ug mitudlo sa kamatuoran mahitungod sa kaminyoon ug diborsyo. Kini nga leksiyon makatabang nimo sa pagsabot giunsa paghatag sa Langitnong Amahan ug ni Jesukristo og paagi aron ikaw makabaton og malipayon mahangturon nga kaminyoon sa umaabot.
Ang kaminyoon usa ka bahin sa plano sa Dios
Imahe
A bicycle wheel photographed against a white background.
Unsa kahay mahitabo niining ligid sa bisekleta kon ang ehe (ang sentro sa ligid) tangtangon?
Kami, ang Unang Kapangulohan ug Konseho sa Napulog Duha ka mga Apostoles sa Ang Simbahan ni Jesukristo sa mga Santos sa Ulahing mga Adlaw, sa maligdong nga paagi mopahayag nga ang kaminyoon tali sa usa ka lalaki ug usa ka babaye gi-orden sa Dios ug ang pamilya mahinungdanon ngadto sa plano sa Tiglalang alang sa walay katap[o]san nga destinasyon sa Iyang mga anak.
Sa unsang paagi ang tahas sa mga pamilya sa plano sa Dios ikatandi ngadto sa ehe sa usa ka ligid?
Unsa kaha’y gipasabot sa giingon nga ang kaminyoon “gi-orden sa Dios”?
Asa dinhi sa mosunod ang naghulagway sa imong gibati karon mahitungod sa kaminyoon? (Pilia ang tanan nga magamit.)
Lipay kaayo—“Ako nagpaabot niini kon anaa na sa hustong panahon.”
Nakulbaan—“Makakita ba kaha ko og mahangtorong kompanyon?”
Nabalaka—“Nakakita ko og daghang kaminyoon nga wala nagmalipayon ug mga pagdeborsyo.”
Naglibog—“Adunay daghang nagkalainlaing opinyon mahitungod sa kaminyoon.”
Ang kaminyoon gituyo nga mahimong mahangtoron
Sa kapanahonan sa Bag-ong Tugon, adunay pipila ka tawo nakiglalis nga ang balaod ni Moises naghatag og katarongan sa pakigdeborsyo bisan sa ginagmay ra o hinakog nga mga rason. Ang Manunubos nagtudlo og mahinungdanong mga kamatuoran mahitungod sa kaminyoon agig tubag sa mga pangutana gikan sa mga Pariseo mahitungod sa pakigdeborsyo. Samtang ikaw magtuon sa Iyang mga pagtulon-an, pamalandongi unsaon nimo sa pagsalig sa unsay gitudlo sa Manluluwas mahitungod sa kaminyoon bisan pa og lahi kini gikan sa unsay gitudlo sa kalibotan.
Basaha ang Mateo 19:3–8 . Markahi ang mga pulong o hugpong sa mga pulong nga nagpakita unsay pagtan-aw sa Ginoo sa kaminyoon. Timan-i nga ang “makabulag” dinhi niini nga mga bersikulo nagpasabot og deborsyo, ang “bulagon” nagpasabot nga ilahi, ug ang “sa sinugdanan” nagpasabot nga gipasiugdahan sa Dios panahon sa paghimo sa kalibotan.
1. Tubaga ang mosunod nga mga pangutana diha sa imong journal sa pagtuon:
Unsa nga mga kamatuoran ang gitudlo ni Jesukristo mahitungod sa kaminyoon ug pakigdiborsyo nga panghinaot nimong masabtan sa katawhan sa kalibotan? Ngano man?
Unsa nga pihong hugpong sa mga pulong dinhi niini nga tudling ang nakatabang nimo sa pagsabot sa gitudlo ni Jesus?
Kon imong mapangutana ang Manluluwas mahitungod sa kaminyoon ug pamilya sama sa gibuhat sa mga tawo diha sa Mateo19 , unsa man ang gusto nimong mahibaw-an?
Usa sa mga kamatuoran nga atong makat-onan gikan sa pagtulon-an sa Manluluwas mao nga ang kaminyoon taliwala sa usa ka lalaki ug usa ka babaye sagrado nga relasyon nga giestablisar sa Dios ug tuyo nga molungtad sa kahangtoran.
Sa unsang paagi kaha kini nga kamatuoran makatabang sa pagtubag sa pipila sa imong mga pangutana o sa pangutana sa ubang tawo sa kalibotan mahitungod sa kaminyoon?
Ang Langitnong Amahan nagtinguha nga ang kaminyoon molungtad hangtod sa kahangtoran. Samtang sa karon nga kalibotan komon ang pakigdiborsyo, si Presidente Dallin H. Oaks mitudlo nga, “Sa kadaghanan sa mga problema sa kaminyoon, ang sulbad dili ang diborsyo kondili ang paghinulsol” (“Deborsyo,” Liahona, Mayo 2007, 71). Ang atong Langitnong Amahan mihimong posible nga ang mga kaminyoon mahimong mahangturon ug nga ang mga kapikas magmalipayon ug makalampos samtang sila maningkamot sa pagtuman sa ilang mga pakigsaad, sa pagsunod sa mga pagtulon-an sa Manluluwas, ug paggamit kanunay sa mga baroganan sa paghinulsol. Sa kasubo, usahay gikinahanglan ang pakigdiborsyo. Sigon sa gipasabot ni Presidente Gordon B. Hinckley (1910–2008) nga, “Tingale karon ug sa sunod usab adunay lehitimong hinungdan ang pagdeborsyo” (“ What God Hath Joined Together,” Ensign, Mayo 1991, 74). Samtang kinahanglan natong undangon ang pagpanghukom sa mga desisyon sa uban, ang tagsa-tagsa kanato mahimong mag-andam sa atong kaugalingon alang sa umaabot nga kaminyoon nga molungtad sa kahangtoran pinaagi sa pagsalig sa Langitnong Amahan ug sa Iyang Anak ug pagkat-on sa pagsunod Kanila sa kinatibuk-an sa atong kasingkasing.
Unsa ang imong nakat-onan mahitungod sa Langitnong Amahan pinaagi sa pagkahibalo nga gusto Niyang molungtad ang mga kaminyoon sa kahangtoran?
Gamita ang pipila sa mosunod nga mga kapanguhaan aron sa pagpangita og dugang nga mga kamatuoran nga makatabang sa pagtubag sa imo o sa mga pangutana sa uban mahitungod sa kaminyoon. Pamalandongi kon sa unsang paagi ang imong kahibalo sa plano sa kaluwasan makatabang sa pagtubag sa pipila ka pangutana. Mangandam sa pagpakigbahin sa unsay imong nakat-onan.
Mga pakigpulong sa kinatibuk-ang komperensiya o mga video sa Simbahan nga nagtudlo mahitungod sa kaminyoon (pangitaa sa ChurchofJesusChrist.org o sa mga indeks sa mga hilisgotan sa kinatibuk-ang komperensiya nga mga isyu sa Liahona)
Usa ka sinaligang minahal sa kinabuhi kinsa nagmalipayon sa kaminyoon nga mahimo nimong kontakon panahon sa leksiyon
Mga pahayag diha sa “Opsiyonal: Gustong Makakat-on pa og Dugang?” nga seksiyon sa leksiyon
2. I-rekord sa imong journal sa pagtuon ang labing menos duha ka dugang nga kamatuoran nga imong nakit-an ug unsa nga mga pangutana ang matubag sa maong mga kamatuoran.
Ang pagkat-on gikan sa matarong nga mga sanglitanan
Gihisgotan ni Pablo ang gugma sa Manluluwas alang sa Simbahan isip sanglitanan sa gugma nga angay sa kaminyoon. Basaha ang Mga Taga-Efeso 5:25 , ug handurawa unsa kaha ang kaminyoon kon ang bana ug ang asawa nagpakabana sa usag usa sama sa pagpakabana sa Manluluwas sa mga miyembro sa Iyang Simbahan.
Ang pagtutok sa mga sanglitanan sa matarong nga mga kaminyoon makapalig-on sa atong hugot nga pagtuo nga ang Dios mohatag niini nga panalangin ngadto sa tanang nagmatinud-anon sa pagtinguha niini, bisan kon ang uban kinahanglan pang maghulat hangtod matapos ang ilang mortal nga kinabuhi alang niini nga panalangin.
Mahimo nimong tan-awon ang video nga “Ang Mahangturong mga Panalangin sa Kaminyoon” (time code 6:23–8:40), nga anaa sa ChurchofJesusChrist.org, nga mangita sa kalipay nga mabatonan pinaagi sa usa ka mahigugmaon ug matarong nga kaminyoon.
Imahe
A bicycle wheel photographed against a white background.
Kinsa man ang nahimo nimong sanglitanan bahin sa paghimo og malipayon, matarong nga kaminyoon? Unsang susama kang Kristo nga mga hiyas ang nakatabang nila sa pagpalambo sa kaminyoon nga ilang gitagamtam?
Nganong mahinungdanon man kanimo ang pag-andam karon alang sa umaabot nga kaminyoon?
Pamalandongi unsa ang imong nakat-onan niini nga leksiyon mahitungod sa tahas sa kaminyoon diha sa plano sa Dios ug unsa ang imong gibati samtang ikaw naglantaw sa imong kaugmaon.
Unsa man ang imong buhaton karon aron maandam ang imong kaugalingon alang sa mahangtoron nga kaminyoon?
Unsa ang imong mabuhat aron maandam sa pagdawat sa tabang gikan sa Manluluwas?
Opsiyonal: Gustong Makakat-on pa og Dugang?
Unsa ang mahitabo sa mga tawo nga matinud-anon kinsa walay kahigayonan sa mahangtoron nga kaminyoon niining kinabuhia?
Si Elder D. Todd Christofferson sa Korum sa Napulog Duha ka Apostoles miingon:
Imahe
Portrait of Elder D. Todd Christofferson. Photographed in March 2020.
Ang uban ninyo nahikawan sa panalangin sa kaminyoon sa mga rason nga naglakip sa kakulang sa tak[o]s nga kaminy[o]an, pagkaibog sa managsama og sekso, pisikal o mental nga kakulangan, o kahadlok nga mapakyas nga, sa pagkakaron, nakababag sa pagtuo. …
… Uban sa pagsalig kami mopamatuod nga ang Pag-ula ni Jesukristo nagpaab[o]t ug, sa katap[o]san, mobayad sa tanang paghikaw ug nawala alang niadtong modang[o]p ngadto Kaniya. Walay usa nga gitakda nang daan nga makadawat og min[o]s pa kay sa tanan nga aduna ang Amahan alang sa Iyang mga anak.
(D. Todd Christofferson, “Nganong Kaminyoon, Nganong Pamilya,” Liahona, Mayo 2015, 52)
Unsa ang gitudlo sa Ginoo mahitungod sa paghimong legal sa pagminyo sa sama nga sekso?
Si Presidente Russell M. Nelson mitudlo:
Imahe
Official portrait of President Russell M. Nelson taken January 2018
Isip mga miyembro sa Simbahan, atong gitahod ang mga balaod sa yuta, lakip na ang sibil nga kaminyoon. Ang kamatuoran mao, nga sa sinugdanan—sa sinugdanan—ang kaminyoon gi-orden sa Dios! Ug hangtod karon kini gihulagway Niya nga tali sa usa ka lalaki ug usa ka babaye. Ang Dios wala mousab sa Iyang kahulogan sa kaminyoon.
(Russell M. Nelson, “The Love and Laws of God” [Brigham Young University devotional, Sept. 17, 2019], speeches.byu.edu)
Unsa ang akong mahimo karon aron makakita og maayong kapikas kon anaa na sa hustong panahon?
Si Presidente Tad R. Callister, kanhi Kinatibuk-ang Presidente sa Sunday School, mipaambit og usa ka posibleng paagi sa pagtubag niini nga pangutana pinaagi sa butang nga gitudlo sa iyang inahan kaniadtong mga 17 anyos pa siya:
Imahe
Brother Tad R. Callister, Sunday school General President. Official Portrait 2018.
Miingon siya, “Tad, mihangyo ka ba sa Ginoo nga tabangan ka sa pagpangita og buotang asawa?”
… mitubag ko, “Wala,” diin mitubag siya, “Kinahanglan gy[o]d, Anak; mao kini ang labing importanting desisyon nga imong himoon.” Kadtong mga pulong mituhop gay[o]d sa akong kasingkasing, ug busa pagkasunod unom ka tuig nag-ampo ko nga ang Dios motabang nako nga makakita og buotang asawa. Ug, gitubag gay[o]d Niya kana nga pag-ampo.
(Tad R. Callister, “Mga Ginikanan: Ang Nag-unang mga Magtutudlo sa Ebanghelyo sa Ilang mga Anak,” Liahona, Nob. 2014, 33)
Mateo 19:9 . OK ra ba ang pagminyo og usab human sa pakigdibosyo?
Si Presidente Dallin H. Oaks sa Unang Kapangulohan miingon:
Imahe
Brother Tad R. Callister, Sunday school General President. Official Portrait 2018.
Ang matang sa kaminyoon nga gikinahanglan sa kahimayaan—mahangt[o]ron ang gidugayon ug diosnon ang kahimili—dili makahunahuna og diborsyo. … [Apan] tungod “sa pagkatig-a sa [atong] mga kasingkasing” [ Mateo 19:8 ], ang Ginoo sa pagkakaron wala mopatuman og sangp[o]tanan sa celestial nga sumbanan. Siya mitugot sa diborsyado nga tawo sa pagminyo pag-usab nga walay mansa sa pagkamakasasala nga gihisg[o]tan sa kinatas-ang balaod.
(Dallin H. Oaks, “D[i]borsyo,” Liahona, Mayo 2007, 70)
Sa unsang paagi ang akong hugot nga pagtuo sa Manluluwas makatabang kanako sa akong pagpangita og mahangtorong kompanyon?
Si Elder Jeffrey R. Holland sa Korum sa Napulog Duha ka Apostoles mitudlo:
Imahe
Official Portrait of Elder Jeffrey R. Holland. Photographed January 2018.
Tuohi nga ang inyong hugot nga pagtuo adunay mahinungdanong papel sa inyong paghigugmaay, tungod kay kini aduna gayod. Ang imong pagbulag sa pakig date gikan sa imong pagkadisipulo nagbutang kanimo sa peligro. O, sa mas positibo nga pagsaysay niana, si Jesukristo, ang Kahayag sa Kalibotan, mao ang bugtong lampara diin imong makita ang dalan paingon sa gugma ug kalipay nga para kanimo ug sa imong pinalangga.
(Jeffery R. Holland, “How Do I Love Thee?” [Brigham Young University devotional, Feb. 15, 2000], speeches.byu.edu)