Kinsa ang nahimo nimong maayo nga ehemplo sa matarong nga pagpakabuhi? Sa unsang paagi nga ang ilang ehemplo nakatabang kanimo nga mapaduol sa Dios? Pagkahuman sa pagtudlo bahin sa mga tawo nga bulahan, nga nakatabang kanato sa pagsabot sa kinaiya ug karakter sa Dios, gitudlo ni Jesukristo nga ang atong matarong nga mga ehemplo makapanalangin sa uban. Kini nga leksiyon gituyo aron sa pagtabang kanimo nga magamit kini nga kamatuoran ug masukod ang imong mga aksiyon ug hiyas aron mas mapakita ang kahayag ni Jesukristo.
Asin sa katawhan
Ang Manluluwas kanunay nga migamit og mga pagkompara o mga sambingay aron itudlo ang mga yanong ideya nga adunay lawom nga mga kahulogan. Samtang magtuon ka niini nga leksiyon, hunahunaa kon sa unsang paagi ang mga butang nga nahisgotan ni Jesus makatabang kanimo sa pagsabot kon unsa ang Iyang gitudlo.
Basaha ang Mateo 5:13, nga mangita kon giunsa paghulagway ni Jesukristo ang Iyang mga disipulo.
Sa unsang paagi nga nakaapekto ang asin sa timpla sa pagkaon?
Gawas pa sa paggamit niini aron mopalami sa timpla sa atong pagkaon, para sa unsa pa ang paggamit sa asin?
Ang asin dugay nang gigamit aron sa pagpreserba, pagtimpla, ug pagpalimpyo. Ang asin adunay relihiyoso usab nga kahulogan para sa mga Israelita. … Kon ang asin mawagtangan sa iyang kaparat, dili na kini epektibo, o “wala nay kapuslanan” (Mateo 5:13). Kini mahitabo kon kini masagolan o mahogawan sa laing mga elemento.
(Dali, Sunod Kanako—Alang sa mga Indibidwal ug mga Pamilya: Bag-ong Tugon [2019], 31)
1. Tubaga ang mosunod nga mga pangutana diha sa imong journal sa pagtuon:
Unsa sa imong hunahuna ang igitudlo sa Manluluwas pinaagi sa pagkompara sa Iyang mga disipulo ngadto sa asin?
Unsa ang pipila ka piho nga mga butang nga espirituhanong makahugaw kanato?
Paggahin og panahon aron makapamalandong diha sa imong kasingkasing kon sa unsang paagi nga ikaw, isip asin sa katawhan, makatabang sa mga tawo sa imong palibot nga mahimong labing maayo kutob sa ilang mahimo. Ikonsiderar usab kon unsa nga mga tintasyon ang imong giatubang ug unsaon nimo sa pagpabiling putli ang imong kaugalingon. Kon nagtugot ka og bisan unsang mga hugaw nga mosulod sa imong kinabuhi, mahimo kining tangtangon pinaagi sa gasa sa paghinulsol nga anaa pinaagi kang Jesukristo.
Kahayag sa Kalibotan
Basaha ang Mateo 5:14–16, nga mangita kon unsa ang gilaoman ni Jesukristo kanato isip Iyang mga disipulo.
Ang Mateo 5:14–16 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an.
Unsa nga baroganan sa kamatuoran ang imong maila gikan sa Mateo 5:14–16?
Gikan sa Mateo 5:14–16 mahimo nga imo nang nailhan ang usa ka baroganan nga pareho niini: Ang atong matarong nga ehemplo makaawhag sa uban nga himayaon ang Langitnong Amahan.
Unsa sa imong hunahuna ang gipasabot sa paghimaya sa Langitnong Amahan?
Sa dihang ang nabanhaw nga Manluluwas kauban sa mga Nephite, Siya mitudlo kanila og dugang pa mahitungod sa kahayag nga kinahanglang huptan sa Iyang mga disipulo. Ikonsiderar ang pag-cross reference o pag-link sa Mateo 5:14–16 ngadto sa 3 Nephi 18:24–25 (tan-awa sa Mateo 5:16, footnote a).
Basaha ang 3 Nephi 18:24–25, nga mangita sa kahayag nga kinahanglang huptan sa tinuod nga mga disipulo.
Sa unsang paagi nga ang mga pagtulon-an sa Manluluwas diha sa 3 Nephi 18:24–25 nakaimpluwensya sa imong pagsabot sa Mateo 5:14–16?
Si Jesukristo mao ang tinuod nga Kahayag sa Kalibotan, ug samtang mosunod kita Kaniya ug mahimong mas mahisama Kaniya, atong pamalandongan ang kahayag nga Iyang gihatag kanato. (Tan-awa sa Juan 1:4, 9; 8:12; Doktrina ug mga Pakigsaad 50:24; 93:2.)
Simbolismo nga gigamit sa Manluluwas
Ang mosunod nga mga pangutana makatabang kanimo nga mas lawom nga maghunahuna mahitungod sa simbolismo nga gigamit sa Manluluwas sa Mateo 5:14–16.
2. Pagpili og usa sa mosunod nga mga sambingay gikan sa Mateo 5:14–16, ug tubagi ang tukma nga mga pangutana diha sa imong journal sa pagtuon.
Usa ka siyudad nga anaa sa bungtod:
Imahe
siyudad nga anaa sa bungtod
Sa unsang paagi nga ang pagsunod kang Jesukristo lisod itago, nahisama sa siyudad nga anaa sa bungtod?
Sa karaan, gitukod ang mga siyudad sa ibabaw sa mga bungtod aron makahatag og proteksyon batok sa posibleng mga pag-atake. Sa unsang paagi nga ang dayag nga pagpakabuhi sa ebanghelyo makahatag og proteksiyon batok sa dili maayong mga impluwensiya?
Unsa ang gitudlo niini nga sambingay kanimo mahitungod kon unsa ang gilaoman sa Manluluwas kanimo, isip Iyang mga disipulo, sa pagpakabuhi?
Usa ka kandila:
Imahe
gidagkotan nga kandila
Sa unsang paagi nga ikaw nahisama sa usa ka kandila diha sa ngitngit nga kwarto ug mopadan-ag sa kahayag sa Manluluwas ngadto sa tanan?
Unsa kaha ang hinungdan nga itago sa pipila ka tawo sa ilawom sa basket (gantangan) ang kahayag nga gihatag sa Dios kanila?
Unsa ang gitudlo niini nga sambingay kanimo mahitungod kon unsa ang gilaoman sa Manluluwas kanimo, isip iyang disipulo, sa pagpakabuhi?
Basaha ang mosunod nga pamahayag gikan ni Presidente Dieter F. Uchtdorf, kanhi sa Unang Kapangulohan, nga mangita unsay imong makat-onan mahitungod sa kahayag ni Jesukristo.
Imahe
Elder Dieter F. Uchtdorf
Matag higayon nga ibalik ninyo ang inyong kasingkasing sa Dios sa mapaubsanong pag-ampo, masinati ninyo ang Iyang kahayag. Matag higayon nga tinguhaon ninyo ang Iyang pulong ug kabubut-on diha sa mga kasulatan, ang kahayag mosanag. Matag higayon nga makabantay mo nga dunay nanginahanglan ug mosakripisyo sa inyong kaugalingong kaharohay aron makatabang uban sa gugma, modako ug mosanag ang kahayag. Matag higayon nga isalikway ninyo ang tentasyon ug pilion ang kaputli, matag higayon nga mangita o mohatag kamo og kapasayloan, maisogong mopamatuod sa kamatuoran, ang kahayag mopuli sa kangitngit ug modani usab sa uban nga nangita og kahayag ug kamatuoran.
(Elder Dieter F. Uchtdorf, “Mga Tighupot sa Langitnong Kahayag,” Liahona, Nob. 2017, 80)
Sa unsa kaha nga paagi nga kini nga pamahayag may kalabotan sa Mateo 5:14–16?
Hinumdomi nga gitudloan kita ni Jesus nga mahimong “asin sa katawhan” ug “kahayag sa kalibotan” pagkahuman mismo sa pagtudlo Niya sa Kabulahanan—ang mga kinaiya nga sama kang Kristo nga makatabang kanato nga mahimong mas mahisama Kaniya (tan-awa sa Mateo 5:3–12).
3. Tubaga ang bisan usa lamang sa mosunod nga mga pangutana diha sa imong journal sa pagtuon:
Sa unsang paagi nga ang pagkahisama kang Kristo diha sa atong mga aksiyon ug pamatasan makatabang kanato sa pagdasig sa uban nga mopaduol sa Langitnong Amahan?
Unsa ang pipila ka butang nga mabuhat nimo aron mahimong usa ka matarong nga ehemplo sa Manluluwas ngadto sa ubang tawo?
Kon mopili ka og usa sa Kabulahanan sa miaging leksiyon nga gamiton sa imong kinabuhi, sa unsang paagi nga makatabang kanimo kana nga kinaiya nga mahimong asin sa katawhan o kahayag sa kalibotan?
Opsiyonal: Gustong Makakat-on pa og Dugang?
Sa unsang paagi nga makaapekto ang akong mga aksiyon isip asin sa katawhan?
Si Presidente James E. Faust (1920–2007) sa Unang Kapangulohan mitudlo:
Imahe
Presidente James E. Faust
Ang mga espirituhanon nga mga sustansiya, nga nakapahimo kanato nga himsog sa espiritu, mahimo nga mawad-an sa gahom ug kalig-on kon dili kita magpuyo nga takos sa balaanon nga giya nga atong gikinahanglan. … Kinahanglan nga ipabilin nato ang atong mga hunahuna ug mga lawas nga limpyo gikan sa tanang mga matang sa adiksiyon ug polusyon. Dili gayod kita mopili nga mokaon og pan-os o nahugawan nga pagkaon. Sa mao gihapon nga paagi sa pagpili, kinahanglan nga magbantay kita nga dili mobasa o motan-aw og bisan unsa nga dili maayo. Kadaghanan sa espirituhanon nga polusiyon nga moabot sa atong mga kinabuhi moabot pinaagi sa Internet, mga dula sa kompyuter, mga salida sa telebisyon ug mga sine nga hilabihan nga makapaaghat o tataw kaayo nga naghulagway sa malaw-ay nga mga kinaiya sa mga tawo. Tungod kay nagpuyo kita sa sama nga palibot, kinahanglan nga dugangan nato ang atong espirituhanon nga kalig-on.
(James E. Faust, “Spiritual Nutrients,” LiahonaNob. 2006, 55)
Unsaon nako nga mapausbaw akong kahayag?
Si Presidente Henry B. Eyring nagtudlo:
Imahe
Presidente Henry B. Eyring
Matag higayon nga kamo mopili sa pagsulay sa pagpakabuhi sama sa Manluluwas, inyong mapalig-on ang inyong pagpamatuod. Moabot ang panahon nga kamo makahibalo sa inyong kaugalingon nga Siya ang Kahayag sa Kalibotan. Kamo mobati nianang kahayag nga motubo sa inyong kinabuhi. Kini dili moabot nga walay pagpaningkamot. Apan kini moabot samtang ang inyong pagpamatuod motubo ug inyong gipili ang pag-alima niini. Ania ang siguradong saad gikan sa Doktrina ug mga Pakigsaad: “Kana nga gikan sa Dios mao ang kahayag; ug siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtud sa hingpit nga adlaw” [Doktrina ug mga Pakigsaad 50:24]. Kamo ang mahimong kahayag sa kalibotan samtang inyong ipaambit ang inyong pagpamatuod sa uban. Kamo ang mopaaninag ngadto sa uban nianang Kahayag ni Kristo sa inyong kinabuhi. Ang Ginoo mangita og pamaagi para nianang kahayag nga mohikap niadtong inyong gimahal.
(Henry B. Eyring, “Usa ka Buhing Pagpamatuod,” Liahona, Mayo 2011, 125)
Si Presidente Thomas S. Monson mitudlo:
Imahe
Presidente Thomas S. Monson
Matag usa kanato mianhi sa yuta nga gihatagan sa Kahayag ni Kristo. Sa atong pagsunod sa ehemplo sa Manluluwas ug magpuyo sama sa Iyang pagpuyo ug sa Iyang pagtudlo, kana nga kahayag mosanag diha sa atong kaugalingon ug modan-ag sa dalan alang sa uban.
(Thomas S. Monson, “Pagpakita og Ehemplo ug Kahayag,” Liahona, Nob. 2015, 86)