Seminelí
Fakahā 12

Fakahā 12

“Tau ‘i he Langí”

illustration of the earth from space

Naʻá ke haʻu mei fē kimuʻa pea fānauʻi koe ki he māmaní? ʻE tokoniʻi fēfē hoʻo moʻuí ʻi hoʻo ʻilo ʻení? Lolotonga hono fakamatalaʻi ʻe Sione ʻene vīsone ki he “ngaahi meʻa ʻoku totonu ke hoko ʻamuí” ( Fakahā 4:1) fekauʻaki mo e ngaahi ʻaho fakaʻosí mo e Hāʻele ʻAnga Ua Mai ʻa Sīsū Kalaisí, naʻe vahevahe foki ʻe Sione ha ngaahi fakaikiiki ʻo ʻetau moʻui ʻi he maama fakalaumālié, kau ai ha “tau ʻi he langí”” ( Fakahā 12:7) mo e fakafepaki ʻa Sētane ki he kau muimui ʻo Sīsū Kalaisi ʻi he moʻui fakamatelié. ʻOku fakataumuʻa ʻa e lēsoni ko ʻení ke tokoni ke fakatupulaki hoʻo tukupā ke muimui kia Sīsū Kalaisí ʻaki hono tokoniʻi koe ke mahino hoʻo fili ʻi he maama fakalaumālié ke muimui ki he Fakamoʻuí pea fakafisingaʻi ʻa Sētane.

Ko e hā ha liliu ʻe hoko ai?

ʻI ha fakataha lotu fakaemāmani lahi maʻá e toʻu tupú, naʻe vahevahe ai ʻe Sisitā Uenitī W. Nalesoni, ko e uaifi ʻo Palesiteni Lāsolo M. Nalesoní, ʻa e lea ko ʻení. Feinga ke ke fakakaukauloto ki he meʻa ʻokú ne fakaafeʻi koe ke ke fakakaukauloto mo ongoʻí. Mahalo te ke fie mamata ʻi he “‘Amanakiʻanga ‘o ‘Isilelí,” (1:01:34), ʻoku maʻu ʻi he ChurchofJesusChrist.org, mei he taimi 20:52–21:37, pe lau ʻa e fakamatala ko ʻení.

2:3

Fakataha Lotu Fakaemāmani Lahi maʻá e Toʻu tupú ki he 2018

Ko e lea ʻa Palesiteni Russell M. Nelson mo Sisitā Wendy Nelson ʻi he Fakataha Lotu Fakaemāmani Lahi maʻá e Toʻu tupú ʻi he ʻaho 3 ʻo Sune, 2018

Ko e Tau ʻi he Langí ʻi he maama fakalaumālié

Ke tokoniʻi koe ke ke teuteu ke ako e ngaahi akonaki ʻa Sione fekauʻaki mo e Tau ʻi he Langí, ʻe ala tokoni ke ke ako ʻa e Fakahā 12:1–5 pea vakai leva ki he fakatātā ʻi laló ʻokú ne fakahaaʻi ha niʻihi ʻo e ngaahi fakataipe ʻi he ngaahi veesi ko ʻení. Fakaʻaongaʻi ʻa e saati ko ʻení ke tokoni ke mahino kiate koe ʻa e meʻa ʻoku fakafofongaʻi ʻe he ngaahi fakataipe ko ʻení.

Book of Revelation Transparencies

Fakataipé

Ko e meʻa ‘oku fakafofongaʻí

Ko ha fefine ( Fakahā 12:1)

“Ko e siasi ʻo e ʻOtuá” (vakai ki he Liliu ‘a Siosefa Sāmitá, Fakahā 12:7 [ʻi he Liliu ʻa Siosefa Sāmitá])

Ko e tama ʻa e fefiné ( Fakahā 12:2)

Ko e “puleʻanga ʻo [hotau] ʻOtuá mo hono Kalaisí” (vakai ki he Liliu ‘a Siosefa Sāmitá, Fakahā 12:7 [ʻi he Liliu ʻa Siosefa Sāmita])

Ko ha ngata ( Fakahā 12:3)

Sētane (vakai ki he Liliu ʻa Siosefa Sāmita, Fakahā 12:8 [‘i he Liliu ʻa Siosefa Sāmitá])

Writing on a piece of paper with a pen or pencil. 1. Fakakakato ‘a e ʻekitivitī ko ʻení, kau ai hono faʻu mo fakafonu ‘a e sātí mo tali e ngaahi fehuʻí:

Ke ako fekauʻaki mo e Tau ʻi he Langí, faʻu ha saati hangē ko ʻení ʻi hoʻo tohinoa akó. Lau ‘a e Liliu ʻa Siosefa Sāmitá, Fakahā 12:7–11 (ʻi he Liliu ʻa Siosefa Sāmitá). Fakatokangaʻi ange ko “Maikeli mo ʻene kau ʻāngeló” ( Fakahā 12:7) ko ʻĀtama ia mo e fānau fakalaumālie māʻoniʻoni kehe ʻa e ʻOtuá.

Ko e Tau ʻi he Langí

Liliu ʻa Siosefa Sāmita, Fakahā 12:7–11 (ʻi he Liliu ʻa Siosefa Sāmitá Fakamatala Fakalahí)

Naʻá ku ako ko Sētane …

Naʻá ku ako ko Sīsū Kalaisi …

Naʻá ku ako ʻoku ou …

Fakakaukau ki he meʻa kuó ke laú mo e meʻa kuó ke tohi ʻi hoʻo sātí.

  • Ko e hā e meʻa ne mahuʻinga kiate koé? Ko e hā ha ngaahi fehuʻi ‘oku ke maʻu?

  • Ko e hā ʻoku tokoni atu ʻa e veesi 11 ke mahino kiate koe fekauʻaki mo e meʻa naʻá ke ʻi ai ʻi he maama fakalaumālié? Ko e hā e fatongia ʻo e Fakamoʻuí ʻi hono tokoniʻi koe ke ke ikunaʻi ʻa Sētané?

ʻI hono akoʻi fekauʻaki mo e moʻui ʻi he maama fakalaumālié mo ʻetau ngaahi ngāue ʻi aí, naʻe fakamamafaʻi ʻe Palesiteni Tāleni H. ʻOakesi ʻo e Kau Palesitenisī ʻUluakí ʻa e meʻá ni:

Official Portrait of President Dallin H. Oaks taken March 2018.

ʻI he Fakataha Lahi ʻi he Langí, ne fakafeʻiloaki ki he fānau fakalaumālie kotoa ʻa e ʻOtuá e palani ʻa e Tamaí ʻo kau ai e ngaahi nunuʻa mo e faingataʻa fakamatelié, ʻa e ngaahi tokoni fakalangí mo hono ikuʻanga nāunauʻiá. Naʻa tau ʻiloʻi e ngataʻangá mei he kamataʻangá. Ne fili e kakai kehekehe kotoa kuo fanauʻi mai ki he māmaní ki he palani ʻa e Tamaí mo taukapoʻi ia ʻi he feʻauʻauhi fakalangi ne hoko mai aí.

(Dallin H. Oaks, “Ko e Palani Lahí,” Ensign pe Liahona, Mē 2020, 93)

  • Ko e hā ʻokú ke ako te ne lava ʻo fakatupulaki hoʻo tui kia Sīsū Kalaisí mo tokoniʻi koe ke ke muimui kiate Iá?

Ko e moʻoni ʻe taha te ke lava ʻo ako mei hoʻo akó naʻá ke ikunaʻi ʻa Sētane ʻi he moʻui ʻi he maama fakalaumālié ʻo fakafou ʻi he Fakalelei ʻa Sīsū Kalaisí pea mo hoʻo tuʻu maʻu ʻi hoʻo fakamoʻoní.

Writing on a piece of paper with a pen or pencil. 2.Tali e ongo fehuʻi ko ʻení:

  • ʻOku tākiekina fēfē ʻe he mahino ki he moʻoni ko ʻení ʻa e anga hoʻo vakai kiate koe mo e niʻihi kehé?

  • Ko e hā ʻoku tokoni atu e moʻoni ko ʻení ke mahino kiate koe fekauʻaki mo e mālohi ʻo e Fakamoʻuí mo ʻEne Fakaleleí?

Manatuʻi hili e angatuʻu ʻa Sētané, naʻe “lī ia ki tuʻa ki he fonuá” ʻa ia mo hono kau muimuí ( Fakahā 12:9). Lau ʻa e Fakahā 12:12, 17 , ʻo kumi pe ko hai naʻe ʻalu ʻa Sētane ke tauʻi hili hono kapusi ia ki tuʻa mei he langí. Fakakaukau ke tānaki atu hoʻo ngaahi fakakaukaú ki he saati naʻá ke faʻú.

Writing on a piece of paper with a pen or pencil. 3. Tali e ongo fehuʻi ko ʻení ʻi hoʻo tohinoa akó:

  • ʻOkú ke vakai fēfē ki he hoko atu he ʻahó ni ʻa e tau naʻe kamataʻi ʻe Sētane mo e kau muimui ʻo Kalaisí?

  • ʻE tokoniʻi fēfē koe ʻi hono ʻiloʻi e ngaahi moʻoni naʻá ke ako fekauʻaki mo e Tau ʻi he Langí ʻi he maama fakalaumālié ʻi he tau ko ʻeni mo Sētane he ʻaho ní?

Toe vakaiʻi ʻa e meʻa kuó ke lisi ʻi hoʻo tohinoa akó, pea fakakaukau ke fakalaulauloto fakalongolongo mo lotua hoʻo tui fakataautaha ki hoʻo moʻui ʻi he maama fakalaumālié pea mo e ngaahi moʻoni ʻo e tau ʻa Sētane mo kinautolu ʻoku muimui kia Sīsū Kalaisí. Fakakaukau ki he founga ʻe lava ke tokoniʻi ai koe ʻe he meʻa kuó ke ako he ʻaho ní ke mahino lelei ange kiate koe hoʻo falala kia Sīsū Kalaisi ʻi he maama fakalaumālié. Te ke lava fēfē ʻo falala kakato ange kiate Ia ʻi he moʻui fakamatelié ni? Lekooti hoʻo ngaahi fakakaukaú mo e ueʻi fakalaumālié ʻi hoʻo tohinoa akó.

Fili Pē: Fie Ako Lahi Ange?

Naʻá ku ikunaʻi fēfē ʻa Sētane ʻi he Tau ʻi he Langí ʻi he maama fakalaumālié?

Naʻe vahevahe ʻe Palesiteni Henelī B. ʻAealingi ʻo e Kau Palesitenisī ʻUluakí ʻa e meʻa ko ʻení:

2:3

Ko e Mālohi ʻi he Poupou ʻa e Tuí

Ko e fakaafeʻi kitautolu ʻe Palesiteni ʻAealingi ke tau hikinimaʻi mo poupouʻi hotau kau taki ʻi he Siasí.

Official Portrait of President Henry B. Eyring taken March 2018.

Toe fakakaukau angé ki he meʻa ne tau ʻilo ki he maama fakalaumālié kimuʻa ʻi he moʻui fakamatelié. Naʻe fakahā ʻe heʻetau Tamai Hēvaní ha palani maʻa ʻEne fānaú. Ne tau ʻi ai. … Naʻe fakafepakiʻi ʻe hotau tokoua fakalaumālie ko Lusifaá ʻa e palani te ne ʻomai ʻa e tauʻatāina ke filí. Naʻe poupouʻi ʻe Sihova, ko e ʻAlo ʻOfaʻanga ʻo e Tamai Hēvaní, ʻa e palaní. Naʻe taki ai ʻe Lusifā ha fakafepaki. Naʻe ikuna e leʻo faipoupoua ʻo Sihová, pea loto-fiemālie ai ke hoko ko hotau Fakamoʻui.

ʻOku fakapapauʻi ʻe he foʻi moʻoni ʻoku mou ʻi he moʻui fakamatelié he taimi ní, naʻa mou poupouʻi ʻa e Tamaí mo e Fakamoʻuí. Naʻe lava ʻi he tui kia Sīsū Kalaisí ke poupouʻi e palani ʻo e fiefiá pea mo e tuʻunga ʻo Sīsū Kalaisi ʻi aí ʻi he taimi naʻe siʻi ai hoʻo ʻilo ki he ngaahi faingataʻa te ke fehangahangai mo ia ʻi he moʻui fakamatelié.

(Henry B. Eyring, “Ko e Mālohi ʻo e Poupou ʻi he Tuí,” Ensign pe Liahona, Mē 2019, 58)

Naʻe vahevahe ʻe Brother ʻĀmati S. Kopiti, ko e Tokoni ʻUluaki ʻi he Kau Palesitenisī Lahi ʻo e Kau Talavoú, ʻa e meʻá ni:

10:53

Te ke Lava ke Tānaki ʻa ʻIsileli!

ʻOku akoʻi mai ʻe Misa Kōpiti ʻe lava ke tokoni ʻa e toʻu tupu ʻo e Siasí ki hono tānaki ʻo ʻIsilelí ʻi heʻenau ʻiloʻi honau tuʻunga totonú mo honau mālohi makehé.

The official portrait of Ahmad Corbitt.

ʻI he taimi naʻe palōmesi ai ʻa Sīsū Kalaisi [‘i he maama fakalaumālié] ʻe hifo mai ki he moʻui fakamatelié ʻo foaki ʻEne moʻuí ke tānaki mo fakahaofi kitautolú, naʻe ʻikai ke ke tui ʻataʻatā pē kiate Ia. Ko kimoutolu ko e “ngaahi laumālie fakaʻeiʻeiki” naʻa mou “fuʻu tui lahi” ʻo mou mamata ai ki Heʻene talaʻofá ʻo fakapapauʻi [Russell M. Nelson mo Wendy W. Nelson, “ʻAmanakiʻanga ʻo ʻIsilelí,” 8; ʻAlamā 13:3 ]. He ʻikai lava ke Ne loi, pea ne mou mamata kiate Ia ʻo hangē kuó Ne ʻosi lilingi Hono taʻataʻá maʻamoutolu, kimuʻa ʻaupito pea toki ʻaloʻi Iá. …

… Kimuʻa pea fanauʻi kimoutolu ko e ngaahi laumālie fakaʻeiʻeikí, ne mou ako ke vakai ki he ngaahi talaʻofa ʻa Kalaisí ʻi he founga paú ni, mo ʻosi aʻusia ʻEne fakamoʻuí. ʻOku hangē hoʻo tui lahí ha ngaahi uoua ʻoku toe mālohi mo lalahi ange ʻi he lahi ange hoʻo fakamālohisinoʻi kinautolú, ka kuo nau ʻosi ʻi loto pē ʻiate kimoutolu.

(Ahmad S. Corbitt, “Te Ke Lava ke Tānaki ʻa ʻIsileli!,” Liahona, Mē 2021, 62)

Ko e fē te u ako lahi ange mei ai fekauʻaki mo ʻetau moʻui ʻi he maama fakalaumalié?

Fakakaukau ke ako ha niʻihi ʻo e ngaahi maʻuʻanga tokoni ko ʻení:

Mōsese 4:1–4

Ngaahi Tefito ʻo e Ongoongoleleí, “Tau ʻi he Langí,” topics.ChurchofJesusChrist.org

Fakahinohino ki he Ngaahi Folofolá, “ Tau ʻi he Langí ,” scriptures.ChurchofJesusChrist.org

 

 

3:23

Naʻa Tau Haʻú Mei fē?

Kimuʻa e fanauʻi maí, ne ʻi he ʻOtuá e kakaí ko e ʻū laumālie. ʻIkai ke tau manatuʻi ia he ko e moʻuí ni e taimi ke siviʻi ʻetau tui ʻOtuá mo ʻetau holi ke moʻui ʻaki ʻEne ngaahi fekaú. ʻE toki mahino mei heʻetau filí pē te tau toe nofo mo e ʻOtuá.

Ko e faʻahinga tau fēfē ʻa e Tau naʻe fai ʻi he Langí?

Naʻe fakamatalaʻi ʻe ʻEletā Pulusi R. Makongikī (1915–1985) ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻa e tau naʻe fai ‘i langí.

Head and shoulders portrait of Elder Bruce R. McConkie.

Ko e tau fēfē? Tatau pē mo ia ʻoku hoko ʻi māmaní; ʻa e faʻahinga tau pē ʻe taha ʻoku lava ke fakahoko ʻe Sētane mo e ngaahi laumālié—ko ha fetauʻi lea, ko ha fepaki ʻo e ngaahi fakakaukaú; ko ha tau ʻi he vā ʻo e moʻoní mo e halá, māmá mo e poʻulí. … Pea ʻoku kei hokohoko atu pē ʻa e taú. ʻOku hoko ia ʻi he māmaní he taimí ni ʻo hangē ko ia naʻe hoko ʻi he langí; kuo pau ke fili ʻe he tangata kotoa pē pe ko e fē seniale ʻe muimui ki aí.

(Bruce R. McConkie, Doctrinal New Testament Commentary [1973], 3:518)