Faaaliga 15–19

“E Manumalo le Tamai Mamoe”

O le a le mea e oo mai i lou mafaufau pe a e mafaufau i aso e gata ai na valoiaina? Na valiina e Ioane le Talifaaaliga se ata manino o le faatafunaga ma le amioleaga o le a faatumulia ai le lalolagi. Ae o nei tulaga o le a le tumau. O Iesu Keriso “a e manumalo … aua o le Alii ia o alii ma le Tupu o tupu” (Faaaliga 17:14). O lenei lesona e mafai ona fesoasoani ia te oe e faalagolago atili ai ia Iesu Keriso ma le mautinoa a o e feagai ma luitau o aso e gata ai.

Mala, tofotofoga, ma le faatuatua i le Alii

I le avea o se vaega o le faaaliga a Ioane, na faaali atu ai e le Alii ia Ioane agelu e toafitu o loo sasaa mai mala eseese i luga o e amioleaga i aso e gata ai. O nei mala na aofia ai papala, o le vai na liu toto, o le mu tele, pogisa, tiga, faititili ma uila, o se mafuie, ma se uatoa tetele (tagai i le Faaaliga 16).

Mafaufau loloto i fesili nei:

• O a ni isi mea ua e iloa e uiga i tofotofoga ma le amioleaga o aso amuli? O le a sou lagona e uiga i nei tofotofoga?

• O le a lou mautinoa e mafai e le Alii ona fesoasoani ia te oe i soo se tofotofoga e ono feagai ma oe? Aisea?

A o lei tusi Ioane e uiga i le faatafunaga ma tofotofoga o le a malaia ai tagata o le lalolagi i aso e gata ai, sa ia faamatalaina se isi mea. Faitau le Faaaliga 15:2–4 ma taumafai e vaai faalemafaufau i mea na vaai i ai Ioane.

• Aisea e ono fesoasoani ai le aoao e uiga i le Au Paia faaeaina o loo nonofo i le afioaga o le Atua a o lei faitau e uiga i mala na faamatalaina e Ioane?

A o faaauau lau suesuega, saili le taitaiga a le Agaga Paia e fesoasoani ia te oe ia iloa ma malamalama e mafai ona e liliu atu i le Alii mo se fesoasoani i le taimi o luitau o aso e gata ai. Ina ia fesoasoani ia e malamalama atili i mea o loo aoaoina i mataupu taitasi o le a e suesueina, mafaufau e faitau faaulutala o mataupu a o lei faitauina ia fuaiupu.

1. Faamaea se lua o gaoioiga nei i lau api faamaumau mo suesuega:

Filifiliga A: Agelu ma mala

O le mafaufau ai e uiga i mala na vaai i ai Ioane i le Faaaliga 16 e mafai ona mafua ai ona tatou popole. Peitai, o le faateleina o lo tatou faatuatua ia Iesu Keriso e mafai ona fesoasoani ia i tatou e faatoilalo ai o tatou popolega. E taua le maitau faapea a o liligi mai e agelu o latou mala, sa latou molimau mai i uiga o le Alii. O le iloaina o Ona uiga e mafai ona fesoasoani ia i tatou e faateleina ai lo tatou faatuatua ia te Ia.

Tusi se ata faigofie o se agelu. Ona faitau lea o le Faaaliga 16:5, 7 , ma vaavaai pe na faapefea ona faamatala e agelu le Alii ma Ana faamasinoga. Tusi i autafa o lau ata tusi mea e te lagona na fai mai ai agelu.

• Aisea e ono fesoasoani ai mo i tatou le malamalama i uiga o le Alii a o tatou aoao e uiga i Lana faamasinoga?

• O le a se taimi o lou olaga sa fesoasoani ai e te malamalama pe faape’i le Atua? E mafai faapefea e le manatuaina o uiga o Iesu Keriso ona fesoasoani ia te oe e faalagolago ai ia te Ia?

Filifiliga E: O le amioleaga ma le mana o le Faaola

Mafaufau i ni faataitaiga o le amioleaga i le lalolagi ma pe faapefea ona aafia ai i tatou.

• Afai e te mafaufau i se mea e faatusa i ai le amioleaga o le lalolagi, mata o le a lena mea? Aisea?

• Afai e te mafaufau i se faatusa migao po o se faalagiga e fai ma sui o le Faaola ma le ala e mafai ai ona Ia fesoasoani ia i tatou e faatoilalo lenei amioleaga, o le a lena mea? Aisea?

Vaelua tutusa se itulau o lau api talaaga. Faitau le Faaaliga 17:3–7, 14 , ma vaai faalemafaufau i faatusa na faaaoga e Ioane i nei fuaiupu. I le tasi itu o le itulau ua vaevaeina i lau api talaaga tusi ai i lalo upu autu po o fasifuaitau na faaaoga e faamatala ai le amioleaga. I le isi itu, tusi ai faailoga e faatusa ia Iesu Keriso ma e amiotonu. Atonu e aoga upu fesoasoani nei:

Faitaaga ( Faaaliga 17:4): amioga feusuai le mama. E mafai foi ona avea “o se faatusa mo le liliuese” (O Le Taiala i Tusitusiga Paia, “ Faitaaga ,” scriptures.ChurchofJesusChrist.org)

Papelonia ( Faaaliga 17:5): o le igoa o se aai ua lauiloa mo lona amioleaga, sa faaaoga o se faatusa mo le amioleaga ma mea faalelalolagi

Fafine talitane ( Faaaliga 17:5): o se tasi e faia amioga le mama faalefeusuaiga mo tupe po o fefaatauaiga

Faamemelo ( Faaaliga 17:6): ofo, faagaeetia (tagai i le fuaiupu 6 , vaefaamatalaga i)

• O a mea na e aoao mai i faatusa sa e faitau i ai?

• O a mea o fesoasoani atu ai faalagiga mo Iesu Keriso i le fuaiupu 14 e te malamalama ai e uiga ia te Ia?

• O a mea o e iloa e uiga i le ala na manumalo ai le Tamai Mamoe, po o Iesu Keriso i amioleaga uma? (Tagai i le Taiala i Tusitusiga Paia, “ Tamai Mamoe a le Atua ,” scriptures.ChurchofJesusChrist.org.) O le a le uiga o lenei mea ia te oe?

Filifiliga I: Faaipoipoga a le Tamai Mamoe

• O a ni isi o mafuaaga e masani ona faamanatu ai e aiga ia faaipoipoga?

Sa faaaoga e Ioane le faatusa o se faaipoipoga e aoao ai i tatou e uiga i aso e gata ai. O lenei faaipoipoga na ia tusia e uiga i ai e faatusaina i le Afio Mai Faalua o le Faaola.

Tusi se ata faigofie o se tamaitai ma se alii faaipoipo ma tusi mea ua e aoaoina e uiga ia i laua taitoatasi a o e suesue.

Faitau le Faaaliga 19:7–9 e iloa ai pe o faapefea ona uunaia i tatou e le Alii ia lagona e uiga i lenei faaipoipoga. O le tamaitai faaipoipo i nei fuaiupu o se faatusa o tagata o le Ekalesia a le Alii o e o loo sauniuni i latou lava mo le toe afio mai o Keriso.

• E tusa ma le fuaiupu 8 , e faapefea ona tatou saunia mo lenei faaipoipoga? Mata o le a le uiga o lena mea mo oe?

• O a auala ua avea ai se faaipoipoga o se faatusa talafeagai mo la tatou sootaga i feagaiga ma Iesu Keriso?

• E faapefea ona avea le toe afio mai o le Faaola o se taimi o le olioli mo oe?

Faitau mau nei ma mafaufau e uiga i mea e mafai ona e faia e saunia ai mo le taimi e toe afio mai ai Iesu Keriso. Atonu e te manao e faailoga mea e te maua i au tusitusiga paia pe tusi e uiga i ai i lau api talaaga.

Faaaliga 7:13–14

3 Nifae 27:19–21

• O a ni ou lagona e uiga ia Iesu Keriso ma mea ua Ia faia e saunia ai oe mo Lona afio mai?

2. Tali fesili nei i totonu o lau api faamaumau mo suesuega:

• Mai mea na e suesueina i le aso, o le a se mea na e aoaoina e fesoasoani ia te oe e faalagolago ai ia Iesu Keriso?

• O le a se mea e te manao e manatua pe faia?

• E te manatu e ono fesoasoani faapefea lenei mea ia te oe i taimi o tofotofoga o aso e gata ai?