Faaaliga 20:11–15

O Le Faamasinoga Mulimuli

Pe na i ai se taimi na e mafaufau ai pe o le a faape’i le Faamasinoga Mulimuli? Na valoia e le Aposetolo o Ioane lena aso tele. O lenei lesona ua faamoemoe e fesoasoani e te malamalama atili ai i le Faamasinoga Mulimuli ma saunia ai ia maua se aafiaga matagofie o le tulai ai i luma o Iesu Keriso i lena aso.

O Le Faamasinoga Mulimuli

Vaai i le ata o loo faatusa i ai le Faamasinoga Mulimuli o loo i le amataga o le lesona.

• O le a sau vaai faalemafaufau i lagona o tagata eseese i le Faamasinoga Mulimuli? Aisea?

• O le a sou manatu o le a le mea e filimaoti i ai le saunia o se tasi mo lena aso?

• O a ni auala ua ofo mai e Iesu Keriso e fesoasoani ai ia i tatou e saunia mo lena aso?

I lau api faamaumau mo suesuega, tusi ai mea ua e faamoemoe e te mafaufau i ai ma lagona i le taimi e te tu ai i luma o le Atua ina ia faamasinoina. O a ni ou lagona e tusa ai ma lou saunia lelei?E alolofa le Tama Faalelagi ma Iesu Keriso ia i tatou ma e finagalo ia faatumulia i tatou i le filemu ma le olioli i le Aso o le Faamasinoga. La te saunoa mai ia i tatou e ala mai i tusitusiga paia ma e ala mai i taitai o le Ekalesia i ona po nei e aoao i tatou pe o le a faape’i le Faamasinoga ma pe faapefea ona saunia i ai.

Ina ua uma ona vaai i se faaaliga o le Meleniuma (tagai i le Faaaliga 20:1–3) ma le Toetutu o e amiotonu (tagai i le Faaaliga 20:4–6), sa vaai Ioane i le Faamasinoga Mulimuli. Faitau le Faaaliga 20:11–12 , ma vaavaai mo mea na faaali mai e le Atua i le Aposetolo o Ioane e uiga i le Faamasinoga Mulimuli.

Faaaliga 20:12O le o se fuaitau o le atamai i aoaoga faavae. Mafaufau e maka fuaitau o le atamai i aoaoga faavae i se ala iloga ina ia mafai ai ona e mauagofie.

• O a upumoni na e aoaoina mai ia Ioane e uiga i le Faamasinoga Mulimuli?

O Fesili e uiga i le Faamasinoga Mulimuli

I lau api faamaumau mo suesuega, tusi i lalo ni au fesili e uiga i lenei fuaitau po o isi mea e te manao e malamalama atili i ai e uiga i le Faamasinoga Mulimuli.

Faaalu ni nai minute e saili ai mo ni tali i au fesili. Atonu e te filifili e saili mo upu autu i le Taiala i Autu po o le Taiala i Tusitusiga Paia, po o le Lomifefiloi o le Tusi Paia. Pe e mafai foi ona e saili i luga o le ChurchofJesusChrist.org po o le polokalama o le Potutusi o le Talalelei. O ni isi nei o fesili ma punaoa fautuaina e mafai ona e faaaofia i lau suesuega:

1. O a ni isi o tusi na vaai Ioane o faaaoga e le Alii e faamasino ai?

Taiala i Tusitusiga Paia po o le Lomifefiloi o le Tusi Paia , “Tusi o le Ola”

Mataupu Faavae ma Feagaiga 128:6–7

3 Nifae 27:24–26

2. O ai, tonu lava, o le a avea ma o tatou Faamasino, ma aisea ua avea ai o Ia ma tagata sili ona lelei e faamasinoina i tatou?

Ioane 5:22

3 Nifae 27:14–15

1 Samuelu 16:7

3. O a mea o le a faamasinoina ai i tatou?

Mataupu Faavae ma Feagaiga 137:9

Mosaea 4:30

4. E mafai faapefea ona ou saunia mo le Faamasinoga Mulimuli?

3 Nifae 27:16–20

Faaaliga 20:13, 15 ; 22:11–12

1. Tali ia le itiiti ifo ma le lua o fesili nei i lau api faamaumau mo suesuega:

• O le a se mea sa e aoaoina e uiga i le Faamasinoga Mulimuli?

• E mafai faapefea e le malamalama ma le talitonu i lenei aoaoga faavae ona aafia ai a tatou faatinoga?

• O le fea o uiga o le Faaola e fesoasoani ia te oe e te faatuatuaina ai o Ia e avea o lou Faamasino? E mafai faapefea ona Ia fesoasoani ia te oe e saunia mo le Faamasinoga Mulimuli?

O lau tusi o le ola

Toe faitau le Faaaliga 20:12 ma mafaufau e faailoga le fasifuaitau “o le tusi o le ola.” I se tasi itu, o le tusi o le ola o se faamaumauga o olaga o tagata taitoatasi.

Tusi le ulutala “O La’u Tusi o le Ola” i le pito i luga o se itulau avanoa i lau api faamaumau mo suesuega, ona vaevae lea o le itulau i ni koluma se lua. Faaigoa le koluma agavale “Ua ou fiafia sa ou faia,” ma fai se lisi i lena koluma o mea patino e te faafetai ai i le i ai i lau tusi o le olaga. O lenei mea e mafai ona aofia ai:

• Sauniga ua e mauaina.

• O galuega lelei ua e faia.

• O ou manaoga amiotonu.

• O le atinaaega o lau sootaga ma Iesu Keriso.

Vaai faalemafaufau i le logolelei o le a i ai se aso e toe faamanatu ai e le Faaola faatasi ma oe le talafaamaumau o lou amiotonu!

Faaigoa nei loa le koluma taumatau o le itulau “O le a ou manao e.” Tusi i lalo pe mafaufau loloto i galuega amiotonu ma sauniga e te manao e faaopoopo i lau tusi a o lei oo i le Faamasinoga. Ia aofia ai foi filifiliga ma uiga e te manao e tapeese mai le tusi o le ola e ala i le Togiola a Iesu Keriso.

Ua faia e le Faaola ia mafai ona fetuunai mea ua faamaumauina e uiga ia te oe i le tusi o le ola. Faitau i le Mataupu Faavae ma Feagaiga 58:42–43 i folafolaga na Ia faia ia i latou o e salamo faamaoni.

• E faapefea e nei folafolaga ona aafia ai ou lagona e uiga i le Faamasinoga Mulimuli ma e uiga i lo tatou Faamasino?

Sa saunoa mai Peresitene Dieter F. Uchtdorf, a o i ai i le Au Peresitene Sili:

O le Aso o le Faamasinoga o le a avea ma se aso o le alofa mutimutivale ma le alofa—o se aso e faamaloloina ai loto nutimomoia, o le a suia ai loimata faanoanoa i loimata o le lotofaafetai, o le taimi o le a faia ai mea uma ia tonu.

Ioe, o le a i ai le faanoanoa matuitui ona o le agasala. Ioe, o le a i ai faanoanoaga e oo foi i le tiga ona o o tatou masei, lo tatou valea, ma lo tatou lotomaaa na mafua ai ona tatou le mauaina o avanoa mo se lumanai matua sili atu ona lelei.

Ae e ia te a’u le mautinoaga o le a le gata ina faamalieina i tatou i le faamasinoga a le Atua; ae o le a tatou ofo ma maofa foi i Lona alofa tunoa le i’u, alofa mutimutivale, agalelei ma le alofa mo i tatou, o Lana fanau.

(Dieter F. Uchtdorf, “E, Le Silisiliese Na’uā o le Fuafuaga a lo Tatou Atua!” Ensign po o le Liahona, Nov. 2016, 21)

Mafaufau loloto i mea ua musuia oe e fai e saunia ai e tulai i luma o le Faaola i le Aso o le Faamasinoga.