Pinadayag 20:11–15

Ang Kataposang Paghukom

Nakahunahuna ka na ba sukad kon unsa kaha ang Katapusang Paghukom? Si Apostol Juan nanagna nianang dakong adlaw. Kini nga leksiyon gituyo aron matabangan ka nga mas makasabot sa Kataposang Paghukom ug maandam aron makaangkon og usa ka talagsaon nga kasinatian sa pagbarog atubangan ni Jesukristo nianang adlawa.

Ang Kataposang Paghukom

Tan-awa ang hulagway nga nagrepresentar sa Kataposang Paghukom sa sinugdanan sa leksiyon.

• Sa unsang paagi nimo mahanduraw ang bation sa nagkalain-laing mga tawo sa Kataposang Paghukom? Ngano man?

• Unsa sa imong hunahuna ang nag-ila kon ang usa ka tawo andam alang nianang adlawa?

• Sa unsa nga mga paagi si Jesukristo nagtanyag sa pagtabang kanato sa pagpangandam alang niana nga adlaw?

Sa imong journal sa pagtuon, isulat ang gilauman nimo nga mahunahunaan ug mabati sa higayon nga magbarog ka sa atubangan sa Dios aron hukman. Pamati nimo unsa ka kaandam?Ang Langitnong Amahan ug si Jesukristo naghigugma kanato ug gusto nga kita mapuno sa kalinaw ug kalipay sa Adlaw sa Paghukom. Namulong sila kanato pinaagi sa mga kasulatan ug pinaagi sa modernong mga lider sa Simbahan aron sa pagtudlo kanato kon sama sa unsa ang Paghukom ug unsaon sa pagpangandam alang niini.

Human makakita og usa ka panan-awon sa Milenyum (tan-awa ang Pinadayag 20:1–3) ug sa Pagkabanhaw sa mga matarong (tan-awa ang Pinadayag 20:4–6), nakita ni Juan ang Kataposang Paghukom. Basaha ang Pinadayag 20:11–12 , nga mangita sa unsay gipadayag sa Dios ngadto kang Apostol Juan mahitungod sa Kataposang Paghukom.

Pinadayag 20:12Ang usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas sayon nimo kining makit-an.

• Unsa nga mga kamatuoran ang imong nakat-onan gikan ni Juan mahitungod sa Kataposang Paghukom?

Mga pangutana mahitungod sa Kataposang Paghukom

Sa imong journal sa pagtuon, isulat ang imong mga pangutana mahitungod niini nga tudling o ang ubang mga butang nga gusto nimong mas masabtan mahitungod sa Kataposang Paghukom.

Paggahin og pipila ka minuto sa pagpangita og mga tubag sa imong mga pangutana. Mahimo nimong pilion ang pagpangita sa mahinungdanong mga pulong diha sa Giya ngadto sa mga Kasulatan. O mahimo nimong pangitaon sa ChurchofJesusChrist.org o sa Gospel Library nga app. Ang mosunod mao ang pipila ka mga pangutana ug gisugyot nga mga kapanguhaan nga mahimo nimong iapil sa imong pagtuon:

1. Unsa ang pipila sa mga basahon nga nakita ni Juan nga gigamit sa Ginoo sa paghukom?

Giya ngadto sa mga Kasulatan , “Basahon sa Kinabuhi”

Doktrina ug mga Pakigsaad 128:6–7

3 Nephi 27:24–26

2. Kinsa, ang tukma, nga mahimong atong Maghuhukom, ug nganong Siya ang labing maayo nga mohukom kanato?

Juan 5:22

3 Nephi 27:14–15

1 Samuel 16:7

3. Sa unsa man kita pagahukman?

Doktrina ug mga Pakigsaad 137:9

Mosiah 4:30

Tan-awa ang pamahayag ni Presidente Dallin H. Oaks sa Unang Kapangulohan diha sa seksiyon sa “Komentaryo ug Background nga Impormasyon” sa leksiyon.

4. Sa unsa nga paagi ako makaandam sa Kataposang Paghukom?

3 Nephi 27:16–20

Pinadayag 20:13, 15 ; 22:11–12

1. Tubaga ang labing minos duha sa mosunod nga mga pangutana diha sa imong journal sa pagtuon:

• Unsa ang imong nakat-onan mahitungod sa Kataposang Paghukom?

• Sa unsang paagi nga ang pagsabot ug pagtuo niini nga doktrina makaapekto sa atong mga aksiyon?

• Hain sa mga kinaiya sa Manluluwas ang makatabang nimo sa pagsalig Kaniya isip imong Maghuhukom? Sa unsa nga paagi Siya makatabang kanimo sa pag-andam alang sa Kataposang Paghukom?

Ang Imong Basahon sa Kinabuhi

Basaha ang Pinadayag 20:12 og usab ug ikonsiderar ang pagmarka sa hugpong nga “ang basahon sa kinabuhi.” Sa usa ka pagsabot, ang basahon sa kinabuhi maoy talaan sa kinabuhi sa matag tawo.

Isulat ang ulohan nga “Akong Basahon sa Kinabuhi” sa ibabaw nga bahin sa may blangko nga pahina sa imong journal sa pagtuon, ug dayon bahina ang pahina ngadto sa duha ka kolum. Isulat sa wala nga kolum nga “Nalipay ko nga nabuhat nako,” ug paghimo og lista dinha niana nga kolum sa piho nga mga butang nga nagmapasalamaton ka nga makabaton dinha sa imong basahon sa kinabuhi. Mahimong maglakip kini sa:

• Mga ordinansa nga imong nadawat.

• Mga maayong buhat nga imong nahimo.

• Ang imong matarong nga mga tinguha.

• Ang kalamboan sa imong relasyon kang Jesukristo.

Hunahunaa kon unsa ka nindot ang bation usa ka adlaw nga ang Manluluwas morebyo kanimo sa rekord sa imong pagkamatarong!

Karon markahi ang tuo nga kolum sa panid nga “Gusto ko.” Isulat o palandonga lang ang matarong nga mga buhat ug mga ordinansa nga gusto nimong idugang sa imong libro sa dili pa ang Paghukom. Ilakip usab ang mga pagpili ug mga kinaiya nga gusto nimong papason gikan sa basahon sa kinabuhi pinaagi sa Pag-ula ni Jesukristo.

Ang Manluluwas mihimo nga posible sa pag-adjust sa unsay narekord mahitungod kanimo diha sa basahon sa kinabuhi. Basaha sa Doktrina ug mga Pakigsaad 58:42–43 ang mga saad nga Iyang gihimo niadtong sinsero nga naghinulsol.

• Sa unsang paagi kini nga mga saad makaapekto sa imong mga pagbati mahitungod sa Kataposang Paghukom ug mahitungod sa atong Maghuhukom?

Si Presidente Dieter F. Uchtdorf, kanhi sakop sa Unang Kapangulohan, miingon:

Kanang Adlaw sa Paghukom mahimong usa ka adlaw sa kaluoy ug gugma—usa ka adlaw diin ang masub-anong mga kasingkasing mahupay, diin ang mga luha sa kasubo mailisan og mga luha sa pasalamat, diin ang tanan mahimong husto.

Oo, adunay hilabihan nga kasubo tungod sa sala. Oo, magmahay kita ug gani masubo tungod sa atong mga sayop, sa atong mga kabuang, ug sa atong kagahi og ulo nga maoy hinungdan nga mawad-an kita sa mga oportunidad alang sa mas nindot nga kaugmaon.

Apan masaligon ko nga dili lang kita matagbaw sa paghukom sa Dios; matingala usab kita ug mapuno sa Iyang walay kinutuban nga grasya, kaluoy, kamanggihatagon, ug gugma alang kanato, nga Iyang mga anak.

(Dieter F. Uchtdorf, “O Unsa Kamahinungdanon sa Laraw sa Atong Dios!” Liahona, Nob. 2016, 21)

Pamalandongi kon unsay imong gibati nga nadasig nga buhaton sa pag-andam sa pagbarog atubangan sa Manluluwas sa Adlaw sa Paghukom.

Opsiyonal: Gustong Makakat-on pa og Dugang?

Unsaon nako pag-andam ang akong kaugalingon alang sa paghukom nga akong gilauman?

Si Presidente Russell M. Nelson mipasabot:

Matag usa kaninyo pagahukman sumala sa inyong indibidwal nga mga binuhatan ug sa mga tinguha sa inyong mga kasingkasing. … Ang umaabot ninyong pagkahimutang sa celestial, terrestrial, o telestial nga gingharian dili itino pinaagi sa sulagma. Mihatag ang Ginoo og walay pagkausab nga mga rekisito alang sa matag usa. Mahimo nimong mahibaloan kon unsa ang gitudlo sa mga kasulatan, ug sunda ang imong kinabuhi sumala niana.

(Russell M. Nelson, “Constancy amid Change,” Ensign, Nob. 1993, 35)

Si Presidente Dallin H. Oaks sa Unang Kapangulohan miingon:

Ang Kataposang Paghukom dili lamang usa ka pagtimbang-timbang sa gidaghanon sa maayo ug sa dautan nga mga buhat—unsa ang atong nahimo. Kini maoy usa ka pagdawat sa kataposang sangputanan sa atong mga buhat ug mga hunahuna—unsa ang atong gidangatan. Dili igo alang ni bisan kinsa nga mosunod sa mga sugo nga dili kinasingkasing. Ang mga sugo, mga ordinansa, ug mga pakigsaad sa ebanghelyo dili listahan sa mga nahimo isip rekisito aron adunay mapundo didto sa langit. Ang ebanghelyo ni Jesukristo usa ka plano nga nagpakita kanato kon unsaon nga mamahimo sa unsay gitinguha sa atong Langitnong Amahan nga kita mamahimo.

(Dallin H. Oaks, “The Challenge to Become,” Ensign, Nob. 2000, 32)

Unsa man ang nakapasarang ni Jesukristo aron mahimo natong Maghuhukom?

Si Elder Richard G. Scott (1928–2015) sa Korum sa Napulog Duha ka Apostoles mitudlo:

Ako mopamatuod nga sa dili mahulagway nga pag-antos ug panghingutas sa dili makalkulo nga bili, ang Manluluwas nakaangkon sa Iyang katungod nga mahimo natong Manunubos, atong Tigpataliwala, atong Kataposan nga Maghuhukom.

(Richard G. Scott, “Ang Pag-ula Makasiguro sa Inyong Kalinaw ug Kalipay,” Liahona, Nob. 2006, 40–42)