Faatomuaga o le Tusi Lesona o le Feagaiga Fou a le Faiaoga Seminare

O le Faamoemoega o Seminare ma Inisitituti o Mataupu Faalelotu o le “fesoasoani lea i le autalavou ma talavou matutua ia malamalama ma faalagolago i aoaoga ma le Togiola a Iesu Keriso, ia agavaa mo faamanuiaga o le malumalu, ma ia saunia i latou lava, o o latou aiga, ma isi mo le ola e faavavau faatasi ma lo latou Tama o i le Lagi” (Aoao Atu ma le Aoaoina Mai o le Talalelei: O Se Tusitaulima mo Faiaoga ma Taitai i Seminare ma Inisitituti o Mataupu Faalelotu [2012], x, ChurchofJesusChrist.org).

O lesona ma isi punaoa i lenei tusi lesona ua mamanuina e fesoasoani ia te oe e ausia ai lenei faamoemoega. E mafai ona latou fesoasoani ia te oe e aoao atu e ala i le Agaga, taulai atu ia Iesu Keriso, aoao atu Ana aoaoga faavae e pei ona maua i tusitusiga paia ma upu a perofeta, ma valaaulia tagata aoga e aoao ma le filiga. A o e faia ia mea, e mafai ona e fesoasoani i tagata aoga ia faalolotoina lo latou liua ia Iesu Keriso ma Lana talalelei.

Meafaigaluega e Fesoasoani ia te Oe e Saunia ai e Aoao Atu

O Tusitusiga PaiaO le suesue faatasi ma le poloka mau o le Sau, Mulimuli Mai ia te A’u o se auala taua lea e saunia ai e aoao atu tagata aoga. O lesona o loo i ai i lenei tusi lesona e manaomia ai se faiaoga musuia e suesue e le aunoa i tusitusiga paia ma sailia le mafutaga a le Agaga Paia. A o e suesue e le aunoa i tusitusiga paia, e mafai ona e mautinoa o le a musuia oe e le Tama Faalelagi e ala i Lona Agaga i le auala e fetuunai ai nei anomea i manaoga o au tagata aoga.

Vaaiga Aoao Faalevaiaso

O lenei tusi lesona ua faatulagaina e tusa ai ma poloka o tusitusiga paia faalevaiaso o le Sau, Mulimuli Mai ia te A’u. Mo poloka o tusitusiga paia faalevaiaso taitasi, e saunia e lenei tusi lesona se vaaiga aoao faalevaiaso e sosoo ai ma lesona e lima. O le vaaiga aoao faalevaiaso e tuuina atu ai se aotelega o anomea faafaiaoga mo lena vaiaso faapea foi ma faamatalaga patino o lesona e fesoasoani ia te oe e saunia ai e aoao atu. O le a e maua faamatalaga nei mo lesona taitasi:

• faamoemoega o le lesona

• manatu mo sauniuniga a tagata aoga

• o se lisi o lesona faitino, pepa e tufa atu, ata, vitio, po o isi anomea e ono manaomia ona muai saunia

• fautuaga mo le aoaoina atu o le vitio (pe afai e maua le anotusi e ala i le polokalama o le Potutusi o le Talalelei po o le Potutusi o le Talalelei i le upega tafailagi i le ChurchofJesusChrist.org)

O le iloiloina o le vaaiga aoao faalevaiaso i le amataga o vaiaso taitasi e mafai ona fesoasoani ia te oe e filifili ai po o le fea lesona e aoao atu ma po o a anomea e aoina mai pe saunia mamao i ai.

Saili le vaaiga aoao faalevaiaso mo lesona o le isi vaiaso o le a e aoaoina atu. O a faamatalaga ua e maua iinei e aoga mo oe e te muai iloa? E ono mafai faapefea ona e faaaogaina lenei faamatalaga a o e sauni e aoao atu?

Motugaafa Faafaiaoga

O fautuaga faafaiaoga e faamalamalama ai faiga ma mataupu faavae fautuaina faafaiaoga e mafai ona fesoasoani ia te oe e faaleleia ai o se faiaoga. O lesona taitasi o loo i ai se motugaafa faafaiaoga o loo tuuina atu ina ia sosoo loa lava ma le faatomuaga o le lesona. E mafai ona e maua ni faatinoga faaopoopo faafaiaoga ma mataupu faavae i le potutusi o tomai o le atinaega o faiaoga o loo maua i le ChurchofJesusChrist.org. A e lagonaina ua e saunia, taumafai e faaaoga nei fautuaga a o e aoao atu. A o e faia, o le a e maitauina ni faasiliga i lou tomai e aoao atu ai.

Toe faamanatu le motugaafa faafaiaoga i se lesona a sau o le a e aoaoina atu. E ono mafai faapefea ona e taumafai e faataitai lenei fautuaga i le lesona?

Faatonuga mo le Aoao Atu

O faatonuga faafaiaoga ua mamanuina e fesoasoani ia te oe e saunia ai e aoao atu. O nei faatonuga e ono faamalamalama ai faamoemoega o gaoioiga o lesona pe ofo atu ni fautuaga i le auala e fetuunai ai le anotusi o le lesona ina ia ausia lelei ai manaoga o tagata aoga. O nei fautuaga e mafai ona aofia ai isi auala faaleoleo, fesili, po o gaoioiga e fesoasoani ia te oe e fetuunai ai anotusi ma gaoioiga pe a manaomia.

Toe faamanatu nisi o faatonuga faafaiaoga i se lesona o le a e aoaoina atu i se taimi lata mai. O a fetuunaiga e ono mafai ona e faia e faavae i faatonuga faafaiaoga e te maua?

Sauniuniga a le Tagata Aoga

O lesona taitasi e aofia ai se fautuaga mo le fesoasoani i tagata aoga e saunia o latou mafaufau ma loto mo le aafiaga e aoao ai. O vaaiga aoao faalevaiaso taitasi e lisi ai manatu mo sauniuniga a tagata aoga mo lesona e lima o lena vaiaso. E mafai ona e vaavaai i nei manatu i le amataga o le vaiaso ma filifili ma le agaga tatalo po o a manatu e te lagona o le a sili ona fesoasoani ai i au tagata aoga. E le manaomia ona e faaaogaina fautuaga uma mo sauniuniga a tagata aoga. E mafai ona e fetuunaia pe fatu ni ou lava manatu. O le tele o nei fautuaga ua mamanuina ina ia muai tuuina atu i tagata aoga i se aso po o se taimi mamao ao lumanai ai le aafiaga e aoao ai.

Toe faamanatu le vaega sauniuni a tagata aoga i lau lesona o le a sosoo ai, ma mafaufau pe o le a e faaaogaina, fetuunai, pe le faaaogaina sauniuniga fautuaina a tagata aoga. Afai e te filifili e valaaulia au tagata aoga e saunia, e faapefea ona e faasoa atu lenei manatu mo sauniuniga ia i latou? E mafai ona e faasoaina i le talanoa pe faaali atu i le faaiuga o le vasega talu ai pe auina atu e ala i le imeli po o se polokalama mo feau tusitusi, pe a talafeagai ai.

Gaoioiga E Ono Mafai Ona Aoao Mai AiO le vaega lenei o le lesona e aofia ai ni auala talafeagai e mafai ona e taulimaina ai le aafiaga e aoao ai. E le manaomia ona e faaaogaina uma lenei anotusi i lesona e te aoaoina atu. Mo au tagata aoga ina ia maua le aafiaga sili ona lelei, e tatau ona e faaaogaina le anotusi i le vaega lenei e fai ma taiala nai lo se tusiga tautu. Afai faatoa e amata o se faiaoga seminare, atonu e sili atu le amata i le mulimuli ma le toto’a i gaoioiga e aoao ai ua fautuaina atu. A o e alualu i luma o se faiaoga, o le a e masani i manaoga o au tagata aoga ma faaleleia lou tomai e maua ai musumusuga. O le a sili atu ona mafai ona e fetuunaia le anotusi o lenei tusi lesona e tuuina atu ai i au tagata aoga ni aafiaga e aoao e liua ai ma ia talafeagai.

Talatalaga ma Faamatalaga o TalaagaO le tele o lesona o loo i ai se vaega o “Talatalaga ma Faamatalaga o Talaaga” i le faaiuga o le lesona. O lenei vaega o loo aofia ai faamatalaga faaopoopo e mafai ona fesoasoani e faaloloto ai le aoaoina. E mafai ona e maua tali talafeagai i fesili e ono i ai i tagata aoga pe sue ai ni faamatalaga mai taitai o le Ekalesia atonu e te manao e faaaofia i le lesona. O le vaega lenei e faatoa e maua ma avanoa pe afai o loo e mauaina le tusi lesona a le faiaoga e ala i le polokalama o le Gospel Library po o le Potutusi o le Talalelei i le upega tafailagi i le ChurchofJesusChrist.org. O le tele o faamatalaga i lenei vaega o loo aofia ai foi i le mataupu aoaoina a le seminare i le upega tafailagi ma i le tusi lesona a le tagata aoga (i lalo o le ulutala “Tuu i le Faitalia: O e Manao e Aoao Atili?”) pe afai e maua e ala i le polokalama o le Potutusi o le Talalelei po o le Potutusi o le Talalelei i luga o le upega tafailagi. O “Talatalaga ma Faamatalaga o Talaaga” e le o aofia ai i le lomiga PDF a le o le faiaoga po o le tusi lesona a le tagata aoga.

Vaai pe o le lesona o loo e aoaoina atu e sosoo ai e aofia ai le “Talatalaga ma Faamatalaga o Talaaga.” Pe o i ai ni fesili, tali, po o saunoaga a taitai o le Ekalesia e ono aoga e faasoa atu i au tagata aoga?

Galuega Faatino Faaopoopo e Aoao Mai AiO lenei vaega, o loo aofia ai foi i le faaiuga o le lesona, o loo i ai ni manatu faaopoopo mo le taulai atu i le aafiaga e aoao ai. O gaoioiga faaopoopo e aoao ai e na o le tusi lesona a le faiaoga e aofia ai pe afai o loo e mauaina e ala i le polokalama o le Potutusi o le Talalelei po o le Potutusi o le Talalelei i le upega tafailagi i ChurchofJesusChrist.org. O lenei vaega e le o aofia ai i le lomiga PDF o le tusi lesona a le faiaoga po o le tusi lesona a le tagata aoga.

Afai o lau lesona o le a sosoo ai e aofia ai se vaega o “Galuega Faatino Faaopoopo e Aoao Mai Ai”, iloilo gaoioiga nei. Pe o i ai nisi e te manatu o le a aoga e faaaoga faatasi ma au tagata aoga e faaopoopo i ai po o le sui ai o gaoioiga e aoao ai o loo aofia ai i le lesona autu?

Atamai i Aoaoga Faavae

O se faamuamua taua mo oe o se faiaoga o le fesoasoani lea i tagata aoga ia ausia taunuuga o le atamai i aoaoga faavae. O nei taunuuga e aofia ai le fesoasoani i tagata aoga e

• aoao ma faaaoga mataupu faavae paia mo le mauaina o le malamalama faaleagaga ma

• atamai i fuaitau filifilia o tusitusiga paia ma le aoaoga faavae o le talalelei a Iesu Keriso o loo latou aoaoina atu.

O le gafataulimaina o fuaitau filifilia ma le aoaoga faavae o le talalelei a Iesu Keriso lea e aoao mai e nei fuaitau o lona uiga o tagata aoga o le a

• iloa ma malamalama i le aoaoga faavae o loo aoao atu i fuaitau o tusitusiga paia mo le atamai i aoaoga faavae;

• faamatala manino le aoaoga faavae e faaaoga ai fuaitau o mau mo le atamai i aoaoga faavae e o faatasi;

• faaaoga le aoaoga faavae o le talalelei a Iesu Keriso ma mataupu faavae o le mauaina o le malamalama faaleagaga i a latou filifiliga mo aso taitasi ma a latou tali i faafitauli ma fesili tau aoaoga faavae, faaletagata lava ia, faaagafesootai, ma talafaasolopito ma fesili; ma

• manatua ma maua ia fuaitau o le atamai i aoaoga faavae ma tauloto o latou fasifuaitau autu o mau.

Atonu e iai le lagona lofituina i le taimi muamua, ae e mafai ona e maua le mautinoa o lenei tusi lesona o le a fesoasoani ia te oe e fesoasoani ai i au tagata aoga ia ausia le atamai i aoaoga faavae. I seti uma o lesona e lima i lenei tusi lesona, o le a e maua ai se lesona e fesoasoani i tagata aoga e faataunuu ai nei taunuuga. O nei lesona a le o lesona o fuaitau o le atamai i aoaoga faavae po o lesona e toe faamanatu ai le atamai i aoaoga faavae.Lesona o Fuaitau o le Atamai i Aoaoga FaavaeO lesona o fuaitau o le atamai i aoaoga faavae—faapea foi le lesona faatatau e muamua atu i fuaitau taitasi—e tatau ona mafaufau i ai e taua. O lesona taitasi o fuaitau o le atamai i aoaoga faavae e tatau ona aoao atu i le faasologa o le tausaga aoga, e aofia ai lesona na misi ina ua le i faia le seminare. O nei lesona taua e aofia ai:

• Faatomuaga i le Atamai i Aoaoga Faavae

• Mauaina o le Malamalama Faaleagaga, Vaega 1, 2, ma le 3

• o le lesona faatatau e muamua atu i lesona taitasi e 24 o le fuaitau o le atamai i aoaoga faavae

• 24 lesona o fuaitau o le atamai i aoaoga faavae (mo se faataitaiga, “Atamai i Aoaoga Faavae: Luka 2:10–12” po o le “Atamai i Aoaoga Faavae: Ioane 3:5”)

O lesona o fuaitau o le atamai i aoaoga faavae e fesoasoani i tagata aoga e

• tauloto le tusi faasino ma le fasifuaitau autu o le mau,

• faamatala atu le aoaoga faavae, ma

• faataitai le faaaogaina o mataupu faavae mo le mauaina o le malamalama faaleagaga ma le aoaoga faavae o loo aoaoina i le fuaitau.

Mo nisi faamatalaga e uiga i le auala e fesoasoani ai i tagata aoga e faataunuu ia taunuuga o le atamai i aoaoga faavae, tagai i le aoaoga “Atamai i Aoaoga Faavae” o loo i ChurchofJesusChrist.org.

Lesona Toe Faamanatu o le Atamai i Aoaoga Faavae O lesona e toe faamanatu ai le atamai i aoaoga faavae e maua ai avanoa e toe faamanatu ai (po o nisi taimi, ia faailoa atu ia) nisi o fuaitau o le atamai i aoaoga faavae ma galue agai i taunuuga o le atamai i aoaoga faavae. O lesona e toe faamanatu ai le atamai i aoaoga faavae e tuu i le faitalia. Afai e misia e tagata aoga se lesona o le fuaitau o le atamai i aoaoga faavae ona e le o faia le vasega, e mafai ona e aoao atu le lesona ua misi e sui ai se lesona toe faamanatu o le atamai i aoaoga faavae.

Fesoasoani i Tagata Aoga e Iloilo Lo Latou Aoaoina

O le iloiloga o se vaega taua o le aoaoina. O avanoa e tu ma tomanatu ai i le aoaoina e mafai ona avea o se aafiaga lelei mo tagata aoga ma uunaia ai i latou i lo latou tuputupu ae faifai pea ma le atinaega agai atu i le avea atili ai e faapei o le Tama Faalelagi ma Iesu Keriso. Na tuuina mai e Elder Jeffrey R. Holland o le Korama a Aposetolo e Toasefululua le fautuaga poto lenei mo faiaoga:

“Manatua o se tagata aoga e le o se koneteina e faatumuina; o se tagata aoga o se afi e ao ona tutuina”

(“Angels and Astonishment” [Faasalalauga a le Ekalesia mo Faiga Faaleaoaoga], Iuni 12, 2019, broadcasts.ChurchofJesusChrist.org).

O le tuuina atu i tagata aoga o avanoa e iloilo ai lo latou aoaoina o se tasi lea o auala e faaaoga ai le fautuaga a Elder Holland. O le iloiloina ai o lo latou aoaoina, e avea ai tagata aoga ma tagata auai malolosi i le faagasologa o le aoaoina ma ia sili atu ona tali atu mo lo latou aoaoina. E tele ni aafiaga e aoao ai o loo aofia i lenei mataupu aoaoina ua mamanuina e tuuina atu ai i tagata aoga ni avanoa e toe manatunatu ai i mea o loo latou aoaoina ma le auala o loo latou tuputupu ae ai o se soo o Iesu Keriso.

Lesona o le “Iloilo Lou Aoaoina” O lenei tusi lesona e aofia ai se numera o lesona o le “Iloilo lou aoaoina”. O nei lesona e tuuina atu ai i tagata aoga ni avanoa e faamatala ai aoaoga faavae autu mai le Feagaiga Fou, mafaufau i o latou uiga faaalia ma manaoga, ma faasoa atu lo latou alualu i luma i le atiina ae o amioga e fesoasoani ia i latou e avea atili ai ma soo tuuto o Iesu Keriso. O nei lesona e mafai ona fesoasoani i tagata aoga ia lagona le olioli a o latou iloaina lo latou tuputupu ae ma faailoa mai vaega i le lumanai mo se alualu i luma faaopoopo.

Lesona Faamanatu o le Iloiloina o le AoaoinaI le faaiuga o afa taitasi o le kosi, o le a e tuuina atu ai i tagata aoga se iloiloga o le aoaoina e fesoasoani ai ia i latou e iloilo lo latou tomai e ausia ai taunuuga o le atamai i aoaoga faavae. O se lesona toe faamanatu o le iloiloga o le aoaoina e tatau ona aoao atu i le periota o le vasega i se taimi a o lei faia le iloiloga. O lesona e toe faamanatu ai le iloiloga o le aoaoina o loo maua i le vaega faaopoopo o lenei tusi lesona. O nei lesona e aofia ai gaoioiga toe faamanatu na e fesoasoani i tagata aoga e toe faamanatu ai le aoaoga faavae, tusi faasino o mau, ma fasifuaitau autu o mau mo fuaitau taitasi o le atamai i aoaoga faavae sa latou suesueina i le afa muamua po o le lona lua o le kosi. O nei lesona o le a fesoasoani i tagata aoga e toe faamanatu ai mataupu faavae o le mauaina o le malamalama faaleagaga.

Iloiloga o le AoaoinaO iloiloga o le aoaoina mo le afa muamua ma le lona lua o le kosi e taulai atu i le atamai i aoaoga faavae ma o loo aofia ai i le faaopoopoga o lenei tusi lesona. E mafai e tagata aoga ona fai se iloiloga i le taimi o se vasega ona faasa‘o lea i le vasega faatasi ai ma le fesoasoani a lo latou faiaoga ma isi tagata o le vasega. Ina ia maua togi mo lenei kosi o le seminare, o le a manaomia e tagata aoga ona maua le togi o le 75% pe maualuga atu i iloiloga taitasi o le aoaoina. E mafai ona toe sue tagata aoga i le iloiloga pe faafia lava taimi e manaomia ai.

Mo nisi faamatalaga i le auala e faaaoga ai lenei tusi lesona e fesoasoani ai e iloilo le aoaoina o tagata aoga, tagai i le aoaoga “Aoaoga mo Iloiloga” o loo maua i le ChurchofJesusChrist.org.

Faiaoga Seminare i Upega Tafailagi

Afai o oe o se faiaoga seminare i luga o le upega tafailagi, e mafai ona e iloa e aoga le faafesootai o le anotusi i le tusi lesona a le faiaoga seminare a o e saunia lesona. E ui o lesona o i lenei tusi lesona ma mea o loo i le mataupu aoaoina a le seminare i le upega tafailagi e aofia ai le tele o anotusi lava e tasi, o le tusi lesona a le faiaoga seminare e aofia ai foi faatonuga faafaiaoga ma gaoioiga faaopoopo e aoao ai. O nei punaoa e mafai ona fesoasoani ia te oe e tali ai fesili a tagata aoga, fetuunai anotusi o mataupu aoaoina i luga o le upega tafailagi, ma saunia ai mo vasega auai (pe auai pe fesootai faatekonolosi).

E faaopoopo atu i lenei tusi lesona ma le mataupu aoaoina a le seminare i le upega tafailagi, o loo i ai foi se punaoa faaopoopo e fesoasoani ia te oe e aoao atu ai le seminare i le upega tafailagi. O vaiaso taitasi o mataupu aoaoina i le seminare i le upega tafailagi e aofia ai se itulau e lei lolomiina mo faiaoga ua faaulutalaina “Fautuaga mo Faiaoga i le Upega Tafailagi.” O lenei itulau o loo aofia ai ni fautuaga eseese e fesoasoani ia te oe ia atili anoa ai aafiaga e aoao ai i luga o le upega tafailagi mo au tagata aoga. O nei fautuaga e mafai ona aofia ai mea nei:

• fesoasoani faafaiaoga i luga o le upega tafailagi

• faamoemoega o lesona

• manatu mo sauniuniga a tagata aoga

• fautuaga faafaiaoga mo fesootaiga i vitio

• fautuaga mo le fetuunaiga o anotusi i luga o upega tafailagi

O loo fautuaina oe e fetuunai anotusi tau seminare i luga o upega tafailagi e ausia ai manaoga o lau vasega. O itulau uma i le mataupu aoaoina a le seminare i le upega tafailagi e mafai ona faasa’oina ma suia. O nisi o fetuunaiga atonu e te faia i mataupu aoaoina i luga o le upega tafailagi e mafai ona aofia ai le

• toe faamanatuina o se gaoioiga i le lesona ina ia sili atu ona talafeagai ma manaia i tagata aoga,

• tapeina o nisi anotusi atonu e tele naua pe faigata tele mo tagata aoga ona malamalama i ai,

• suia o anotusi i se vitio na pueina o oe po o se isi tagata o molimau mai e uiga i se mataupu faavae po o se aoaoga faavae i tusitusiga paia po o le faasoa atu o se aafiaga patino, po o le

• suia o se upusii i se upusii sa tuuina atu talu ai nei pe faigofie atu foi ona malamalama i ai tagata aoga.

O le a manaomia e faiaoga seminare i le upega tafailagi ona fetuunai le faasologa o ni nai lesona i le mataupu aoaoina a le seminare i le upega tafailagi e mulimuli i taiala o le faagasologa i le lotoifale.

Faiaoga Seminare mo Suesuega e Fai i le Aiga

Afai o oe o se faiaoga seminare mo i latou e suesue i le fale, o le a manaomia e tagata aoga ona i ai se kopi o le tusi lesona a tagata aoga seminare pe mafai foi ona maua i luga o le polokalama o le Potutusi o le Talalelei po o le Potutusi o le Talalelei i luga o le upega tafailagi, lea o loo maua i le ChurchofJesusChrist.org. O le a manaomia ona e fesootai ma tagata aoga po o a lesona o le a latou suesueina i le fale ma po o a lesona o le a e suesueina faatasi i le faatekinolosi po o le auai foi o le vasega. O lesona o i le tusitaiala a le tagata aoao e ogatusa ma lesona lava e tasi i le tusi lesona a le faiaoga.

Pe a filifili po o le fea lesona e aoao atu i se vasega e auai, mafaufau po o le fea lesona o le a sili ona aoga i se nofoaga faatulagaina mo ni vaega. E mafai ona e tuuina atu valaaulia i tagata aoga o le a fesoasoani ia i latou e saunia ai mo le vasega. O fautuaga mo sauniuniga a tagata aoga o loo aofia i le amataga o lesona taitasi e mafai ona tuuina atu ia te oe ni nai manatu e uiga i le ala e faia ai lenei mea. A o e fuafuaina aafiaga e aoao ai o vasega e auai, faaaoga sina taimi i le vasega e toe faamanatu ai tusi faasino ma fasifuaitau autu o mau o fuaitau o le atamai i aoaoga faavae na suesueina talu ai nei e tagata aoga.

E tatau i tagata aoga ona faamaea galuega atofa faanumeraina mai le tusi lesona a le tagata aoga ma tuu atu ia te oe ia le itiiti ifo ma le ta’i vaiaso. E mafai e tagata aoga ona auina atu faaeletonika a latou galuega (e ala i le imeli, se polokalama o faaaliga, po o se polokalama faapena) po o se api faamaumau mo suesuega. Afai o auina atu e tagata aoga a latou galuega i se api faamaumau mo suesuega, e tatau ona lua a latou api faamaumau mo suesuega ina ia mafai ai ona latou tuua le tasi ma oe pe a manaomia ma faaauau pea ona galulue i le isi, ma fesuiai api faamaumau i taimi taitasi tou te potopoto faatasi ai.

A o e iloiloina le galuega a tagata aoga, tuuina atu ni manatu faaalia e patino ma anoa. Saili ni auala e uunaia ai au tagata aoga ma fesoasoani ia i latou ia tuputupu ae i lo latou aoaoina. E mafai foi ona fesoasoani i tagata aoga pe a e maua ni auala e fesootai ai ma i latou i le faagasologa o le vaiaso. Mo se faataitaiga, afai o loo e suesueina lesona i lenei tusi lesona a o faamaeaina e tagata aoga ia lesona lava e tasi i le fale, atonu e musuia oe e faasoa atu se fesili, fautuaga i le vitio, po o isi punaoa mai lenei tusi lesona faatasi ma tagata aoga e ala i le imeli, feau tusitusi faalevaega, po o nisi auala e fesootai atu ai. E mafai foi ona e tuuina atu i tagata aoga ni faamanatu po o se faamalosiauga ina ia fesoasoani e fausia le lotogatasi o le vasega ma fesoasoani i tagata aoga ia lagonaina se lagona o le auai ai a o latou suesue i le talalelei ma tuputupu ae faatasi.