Anomea o le Faatomuaga

Vaaiga Aoao

I lenei tausaga i le seminare, o le a e suesueina ai le Feagaiga Fou. O lesona i lenei vaiaso o le a fesoasoani ia te oe e sauni ai e aoao e uiga ia Iesu Keriso e ala i le mana o le Agaga Paia a o e suesue i lenei tausaga.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

Faatomuaga i le Feagaiga Fou

Faamoemoega o le lesona: Fesoasoani i tagata aoga e o mai ia Iesu Keriso ma mulimuli ia te Ia a o latou suesue i le Feagaiga Fou.

Sauniuniga a le tagata aoga: Valaaulia tagata aoga e mafaufau pe aisea o le a aoga ai le suesueina o le Feagaiga Fou i lenei tausaga. Atonu e aoga le valaaulia o i latou e fesili atu i ni nai tagata o o latou aiga pe aisea latou te manatu ai o le a aoga [ia suesuega].

Anomea mo tagata aoga: Ia mautinoa ua tofu tagata aoga taitasi ma se api talaaga mo le suesueina o tusitusiga paia ma maua se kopi faatekonolosi o le Feagaiga Fou pe o se lomiga mamanu (o se lomiga a le Au Paia o Aso e Gata Ai e i ai vaefaamatalaga, faasino upu, ma isi mea faapena, pe afai e maua i lau gagana).

Fautuaga faafaiaoga faavitio: Mafaufau e faaalu sina taimi a o lei amataina le lesona e faailoa atu ai oe lava i tagata aoga ma fesoasoani ia i latou ia iloa e le tasi le isi.

Suesueina o Tusitusiga Paia

Faamoemoega o le lesona: Fesoasoani i tagata aoga ia o mai ia Keriso ma iloa atili o Ia e ala i lo latou suesueina o le afioga a le Atua e ala i le atiinaaeina o tomai mo le suesueina o tusitusiga paia ma le faatuina o sini mo le suesueina o tusitusiga paia.

Sauniuniga a le tagata aoga: Afai e mafai, tuu atu i tagata aoga e faamaea le iloiloga o le suesueina o tusitusiga paia i ni nai aso a o lei amataina le vasega. Mafaufau e fai lenei mea i se mamanu faaeletonika po o le tuuina atu i tagata aoga o le pepa e tufa atu o le iloiloga e faatumu e aunoa ma le faailoaina mai o i latou ona tuuina mai lea a o lei faia lenei lesona.

Aoaoina e ala i le Agaga

Faamoemoega o le lesona: Fesoasoani i tagata aoga ia malamalama pe faapefea ona fesoasoani le Agaga Paia ia i latou e aoao upumoni ma maua faaaliga faaletagata lava ia.

Sauniuniga a le tagata aoga: Valaaulia tagata aoga e faitau le Ioane 14:26–27 ma mafaufau e uiga i aafiaga na latou lagonaina pe aoaoina ai se mea mai le Agaga Paia i auala na faamatala mai e le Faaola i nei fuaiupu.

Fautuaga faafaiaoga faavitio: Mafaufau e faaaoga le vaega o le laupapa paepae ina ia mafai ai e tagata aoga ona lisi ni auala o loo faamatalaina ai le Agaga Paia i mau o loo lisi atu i le lesona.

Aoaoina e ala i le Faatuatua ia Iesu Keriso

Faamoemoega o le lesona: Fesoasoani i tagata aoga ia malamalama i le taua o le faatinoina ma le faatuatua ia Iesu Keriso a o latou aoao i le seminare.

Sauniuniga a le tagata aoga: Valaaulia tagata aoga e mafaufau loloto i le fesili lenei: O le a se mea ua e faia e sili ona fesoasoani ia te oe i lou aoaoina o le talalelei?

Vitio: Sauni e faaali atu i le vasega le “Tumau i le Malosi Faaleagaga” (3:30), “Ole Atu i le Atua (2017 Autu o le Mutuale)” (3:21), po o le “E Mafai e le Seminare ona Suia Olaga” (4:13). O loo maua nei vitio i luga o le ChurchofJesusChrist.org.
Anomea mo tagata aoga: Mo tagata aoga taitasi, aumai se laupepa ia lava le telē e vaevae i ni koluma se tolu.

Faatomuaga i le Atamai i Aoaoga Faavae

Faamoemoega o le lesona: Faailoa atu i tagata aoga le atamai i aoaoga faavae ma pe mafai faapefea ona faamanuiaina ai o latou olaga ma fesoasoani ia i latou e fausia o latou faavae faaleagaga i luga o Iesu Keriso.

Sauniuniga a le tagata aoga: Valaaulia tagata aoga e filifili se tasi o fuaitau o le atamai i aoaoga faavae latou te maua e manaia, e mafai ona fesoasoani i se manaoga patino, pe tali se fesili o ia i latou. O loo i ai se lisi o fuaitau i le polokalama o le Atamai i Aoaoga Faavae pe latalata i le faaiuga o le Pepa Autu o le Atamai i Aoaoga Faavae.
Fautuaga faafaiaoga faavitio: Mafaufau e faaaoga potu malolo e fesoasoani ai i tagata aoga e talanoaina se fesili se tasi pe sili atu o loo i le lesona.

Pepa e tufa atu: Saunia le pepa e tufa atu “O Lo’u Faavae Faaleagaga” mo tagata aoga taitasi.
Anotusi e faaali atu: Sauni e faaali atu le ata e faapupula mai ai elemene o lesona o le atamai i aoaoga faavae.