Suesueina o Tusitusiga Paia

Faalogoina o le Siufofoga o le Alii e ala i Tusitusiga Paia

A row of hands holding scriptures or electronic devices.

Sa aoao mai Iesu e molimau tusitusiga paia ia te Ia (tagai Ioane 5:39). E mafai ona fesoasoani lenei lesona ia te oe e te sau ai ia Keriso ma iloa atili o Ia e ala i le suesueina o le afioga a le Atua e ala i le fesoasoani e atiae ou tomai e suesue ai tusitusiga paia ma faatutu ia sini e suesue ai tusitusiga paia.

Gaoioiga e Mafai Ona Aoao Mai Ai

Aisea e suesue ai tusitusiga paia?

Mafaufau e faatino e tagata aoga le ata faataitai lenei i ni paga po o se vasega foi e faateleina ai le galulue faatasi.

Mafaufau faapea na fai mai se tasi o au uo, “E leai so’u taimi e suesue ai tusitusiga paia ona o isi au mau mea o loo fai. Ou te le malamalama foi i ai!”

O le a lau tala o le a fai atu i lau uo?
O a nisi o mafuaaga e ono le suesuea ai e tagata ia tusitusiga paia i aso taitasi?

Mafaufau e faaaoga le iloiloga mai le gaoioiga o tapenaga a le tagata aoga e fesoasoani ai i tagata aoga e toe iloilo pe o faapefea mai i latou ma a latou lava suesuega o tusitusiga paia.

Fai le iloiloga o suesuega o tusitusiga paia. O le a e toe tepa i au tali i se taimi mulimuli i le vasega.

Tali i fesili nei i lau api talaaga o suesuega.

O le a se mea o sologa lelei i lau suesuega o tusitusiga paia? O le a se isi mea e mafai ona faaleleia atili ai?

Faaali faamatalaga nei ma fesili na e mulimuli mai ai. Atonu e aoga i tagata aoga mai le taliina o fesili i totonu o a latou api talaaga ao lei tali mai i luma o le vasega. Fai fesili e tuli tatao ai tagata aoga o loo faasoa mai aafiaga e valaaulia ai ia faasoa atili mai.

Faitau le faamatalaga lenei mai ia Peresitene Russell M. Nelson, ma vaavaai mo mea e mafai ona tatou aoaoina e uiga i le mafuaaga e aoga ai le taimi ma taumafaiga e suesue ai e le aunoa i tusitusiga paia.

Ao tatou sailiili ia avea ma soo o Iesu Keriso, o a tatou taumafaiga efaalogo ia te Ia e manaomia ona loto atili i ai. E manaomia ai taumafaiga mataalia ma le faifaipea e faatumu ai o tatou olaga i aso taitasi i Ana afioga, Ana aoaoga, Ana upumoni. …

…O fea e mafai ona tatou o i ai e faalogo ai ia te Ia?

E mafai ona tatou ō i tusitusiga paia. Latou te a’oa’o mai i tatou e uiga ia Iesu Keriso ma Lana talalelei, le silisili ese o Lana Togiola, ma le fuafuaga sili a lo tatou Tama o le fiafia ma le togiolaina. O le faatofuina i aso taitasi i le afioga a le Atua e taua tele mo le ola faaleagaga, ae maise i nei aso o le faatupulaia o le le mautonu. A tatou aai i afioga a Keriso i aso taitasi, o le a tau mai e afioga a Keriso pe faapefea ona tali atu i faafitauli tatou te lei mafaufauina o le a tatou fetaia’i. …

O le a le mea o le a tupu ao e faalogo atili atu ma le loto i ai, faalogo, ma ua’i atu i mea ua fetalai mai e le Faaola ma mea o loo Ia fetalaia mai nei e ala mai i Ana perofeta? Ou te folafola atu o le a faamanuiaina outou i le mana faaopoopo e taulimaina ai faaosoosoga, faigata, ma vaivaiga. Ou te folafola atu vavega i a outou faaipoipoga, mafutaga faaleaiga, ma galuega i aso taitasi. Ma ou te folafola atu o le a faateleina lou malosiaga e lagonaina ai le fiafia tusa lava pe faatupulaia le tele o faigata i lou olaga.

Russell M. Nelson, “Lagona o Ia,” Ensign po o le Liahona, Me 2020, 89, 90

O le a se mea na e aoaoina mai lenei faamatalaga e uiga i le auala e mafai ai e le Faaola ona faamanuia oe a o e suesue i tusitusiga paia?
O a faamanuiaga ua e mauaina, a o e suesue e le aunoa i tusitusiga paia?
O le a se mea na fesoasoani pe e mafai ona fesoasoani pea lava ia te oe e suesue ai tusitusiga paia?

Mafaufau e fai se gaoioiga faatasi ma tagata aoga e fesoasoani ai ia i latou e atiae se tomai e suesue ai tusitusiga paia. O le gaoioiga lenei e fesoasoani ia i latou e aoao ai pe faapefea ona faaaoga lelei ia vaefaamatalaga, ae afai e aoga ia i latou se isi tomai, mafaufau i se isi gaoioiga o le a faateleina ai lo latou gafatia e suesue ai i tusitusiga paia. E mafai ona maua nisi manatu i anomea faaopoopo i le faaiuga o le lesona.

E mafai faapefea ona ou faaaogaina lelei ia vaefaamatalaga?

O se tasi o auala e mafai ona e maua ai se suesuega atili faagaeetia o tusitusiga paia o le faaaoga lea o vaefaamatalaga. O loo maua vaefaamatalaga i le pito i lalo o le itulau o tusitusiga paia lolomi, ma i tusitusiga paia faaeletonika e ala i le oomi o tamai mataitusi o loo i autafa o nisi o upu i fuaiupu. O nei faamaumauga o loo i ai mau faasino i isi fuaiupu po o meafaigaluega faaopoopo e mafai ona fesoasoani ia te oe ia malamalama atili ai i mea na aoao atu.

A portion of a page from the Bible. Line art for seminary manual

O le a e vaai soo i faamatalaga o le Faaliliuga a Iosefa Samita i vaefaamatalaga o le Feagaiga Fou. O le Faaliliuga a Iosefa Samita o se toe faafouga musuia po o le faaliliuga o le Tusi Paia na faamae’aina e Iosefa Samita. Ua toe fuatai ai upumoni na leiloloa mai le Tusi Paia ma faaopoopo ai le manino i aoaoga faatusi paia. E ala i musumusuga, na faasa’o ai e le Perofeta le silia ma le 3,400 fuaiupu i le Tusi Paia, o le tele e mafai ona maua i vaefaamatalaga o lomiga o le Tusi Paia a le Au Paia o Aso e Gata Ai, ae o nisi fuaitau uumi o loo i totonu o le itulau o faamatalaga faaopoopo o le Tusi Paia.

O le Luka 2 o loo faamatala ai le tala ia Iosefa ma Maria na mauaina Iesu i totonu o le malumalu ao 12 ona tausaga ina ua uma ona saili mo Ia mo le tolu aso (tagai Luka 2:40–45). Luka 2:46 o se faataitaiga o loo faamanino ai e le faaliliuga a Iosefa Samita mea o loo aoaoina i le fuaitau. E fesoasoani foi ia tutusa ai pea le faauigaga ma mea o loo aoaoina i le fuaiupu e 47 .

Suesue le Luka 2:46 e aunoa ma ni vaefaamatalaga, ma vaavaai mo mea ua e aoaoina e uiga ia Iesu Keriso.

Toe suesue le fuaitau, i le taimi la lenei ia faaaoga ai vaefaamatalaga, e aofia ai le mea lea e amata i le “GR.” O le uiga o le “GR” o le “Eleni”, o le gagana sa uluai tusia ai le tele o tusi o le Feagaiga Fou. E fesoasoani le vaefaamatalaga lenei tatou te malamalama ai i se isi uiga o le tusiga faaEleni.

Na faapefea ona faalauteleina e nei meafaigaluega mo le suesueina o le talalelei mea o loo aoao atu e le fuaiupu e uiga ia Iesu Keriso?

Sini ia avea atili e faapei o Iesu Keiso.

O se tasi o sini faatū muamua o le seminare o le fesoasoani lea ia te oe ia mulimuli ia Iesu Keriso ma avea ma Ona soo. O le suesue e le aunoa i tusitusiga paia o se tasi o auala sili atu e mafai ai ona avea atili ai o se soo tuuto o Iesu Keriso. O se tasi foi o mea e manaomia mo le mauaina o togi o le seminare. E mafai ona e fesili i lou faiaoga mo faamatalaga po o a mea e manaomia mo suesuega o tusitusiga paia pe afai e i ai ni au fesili.

E mafai ona faigata ona maua se taimi e fai ai suesuega patino o tusitusiga paia. Na tuuina mai e Elder David A. Bednar o le Korama Aposetolo e Toasefululua le fautuaga lenei:

Talu ai le tele o le pisi o loo i ai o tatou olaga, e le lava na o le manatu lelei ma le “faamoemoe” atonu e maua se taimi e suesue loloto ai tusitusiga paia. O lou aafiaga ua fautuaina ai faapea, o le i ai o se taimi faapitoa ma se taimi faatulaga e tuu ese i aso taitasi ma, i le tele e mafai ai, o se nofoaga faapitoa mo suesuega e faatuputeleina ai le aogā o a tatou sailiiliga i ai ma suesuega i tusitusiga paia.

(David A. Bednar, “Ona ua i ai Nei Mea i Luma o Tatou Mata,” New Era, Aperila 2006, 6)

Mafaufau e uiga i mea na e aoaoina ma lagonaina i le aso, ma mafaufau e toe iloilo au tali i le iloiloga o suesuega o tusitusiga paia. I lau api talaaga fai ai sau sini o au suesuega o tusitusiga paia. E mafai ona fai lenei mea o se sini faaleagaga mo le polokalama a Tamaiti ma le Autalavou pe fausia se sini e ese mai ai. Mafaufau e uiga i fesili nei ao faatu lau sini?

O a mea e te iloa pe te talitonu ai e uiga i tusitusiga paia? E faapefea e se mea ua e iloa pe talitonu i ai ona faateleina lou naunau e suesue i ai?
O a ni luitau na fetaiai ma oe i lau suesuega o tusitusiga paia? E mafai faapefea ona e manumalo ai?
O le a le telē o le a e suesueina? O fea ma o afea foi o le a e faia ai?

Tala Auiliili ma Faamatalaga o Talaaga

O a nisi o faamanuiaga e mafai ona maua mai le suesueina o tusitusiga paia?

Ua molimau mai Elder D. Todd Christofferson o le Korama a Aposetolo e Toasefululua e uiga i faamanuiaga e mafai ona maua mai suesuega o tusitusiga paia.

2:3

E mafai faapefea ona ou suesue lelei i tusitusiga paia?

Na faasoa mai e Elder D. Todd Christofferson o le Korama a Aposetolo e Toasefululua malamalamaaga nei:

Pe a ou fai atu ‘suesue’, o lona uiga o se mea e sili atu nai lo le faitau. O se mea lelei i nisi taimi le faitau o se tusi mai tusitusiga paia i totonu o se taimi faatulagaina ina ia maua ai se uiga loloto o le savali, ae peitai mo le liuaina, e tatau ona tele lou taimi e faaalu i tusitusiga paia nai lo le taimi e faitau ai. Ou te vaai ia te oe i isi taimi e te faitauina ai ni nai fuaiupu, ona taofi lea e mafaufau loloto i ai, ma toe faitau faaeteete i fuaiupu lava ia, ma ao e mafaufau i o latou uiga, tatalo mo se malamalama, tuufesilisili i lou mafaufau, ma faatalitali mo ni uunaiga faaleagaga, ma tusitusi i lalo uunaiga ma malamalamaaga e oo mai ina ia mafai ai ona e manatua ma aoao ai atili. O le suesue faapea, atonu e le tele ni mataupu po o ni fuaiupu e te faitauina i se afa itula, ae peitai o le a e tuuina i totonu o lou loto le afioga a le Atua, ma o le a Ia fetalai atu ia te oe.

(D. Todd Christofferson, “When Thou Art Converted,”Ensignpo o leLiahona, Me 2004, 11)

O nisi o meafaigaluega ma punaoa e fesoasoani ia te oe e suesue lelei ai i tusitusiga paia e aofia ai:

“Auala e Suesue ai Tusitusiga Paia” ma anomea faatomuaga i le tusi lesona o le Sau, Mulimuli Mai ia Te A’u—Mo Tagata Taitoatasi ma Aiga tusi lesona.
O Le Tusi Lesona a le Tagata Aoga o le inisitituti o le Feagaiga Fou, o loo i ai ata aoga, faamatalaga auiliili, ma faamalamalamaga.

O mea nei e fa’aaoga e mafai ona maua i totonu o le “Fesoasoani Suesue” i le vaega o lau polokalama o le Gospel Libarary po o totonu o itulau o faasino tusi o lau tuu-faatasiga e faatoluina po o le Tusi Paia:

O le Taiala i Tusitusiga Paia, Bible Dictionary, ma le Taiala o Ulutala, ia e mafai ona fesoasoani ia te oe i le suesueina e ala i ulutala pe ala i le sueina o mau faasino, faauigaga, ma faamatalaga o manatu faavae.
Faafanua o le Tusi Paia, ia e mafai ona fesoasoani ia te oe ia sili atu lou malamalama i matalalaga o tala o tusitusiga paia.
O le meafaigaluega o Ata o le Tusi Paia o loo i ai ata i le Nuu Paia e mafai ona fesoasoani e sili atu ai lau vaai faalemafaufau i tala o le Tusi Paia.
O Talaaga o Tusi o le Talalelei, o se faasinoupu o nofoaga e su’e i ai ituaiga eseese i tala taitasi o le Talalelei, ma fesoasoani ai ia faatuputeleina lou malamalama i na mea na tutupu.

Gaoioiga Faaopoopo e Aoao Mai Ai

Suesue faatasiga o tala o le talalelei

Mafaufau e faaaoga lea faataitaiga e faaopoopo i ai pe a le o lena o le gaoioiga i vaefaamatalaga o le Faaliliuga a Iosefa Samita.

E ono aoga foi i tagata aoga mai le suesueina o tala lava e tasi i le Feagaiga Fou mai se vaaiga a ni tusitala se toatele. E mafai ai ona fesoasoani lena mea i tagata aoga e maua ai malamalamaaga faaopoopo i le Faaola. E tasi se talaaga e faataitai ai atonu o puapuaga o le Faaola i Ketesemane, o loo maua i le Mataio 26:36–46 ; Mareko 14:32-42 ; Luka 22:40—46 . Pe a uma ona suesue tagata aoga i nei tala, e mafai ona latou faasoa mai malamalamaaga na latou maua e ala i le suesueina o tusitusiga paia i le auala lenei.