Aoaoina e ala i le Agaga

Valaaulia le Agaga Paia e Aoao Oe

E finagalo le Tama Faalelagi ma Iesu Keriso e faaali mai le mea moni ia i tatou e ala i le mana o le Agaga Paia. O le a fesoasoani lenei lesona ia te oe e malamalama ai pe faapefea ona fesoasoani le Agaga Paia ia te oe e aoaoina le mea moni ma maua faaaliga patino. O le a e aoaoina ai foi pe faapefea ona valaaulia le Agaga Paia e aoao oe ma faapefea ona e iloaina ua e aoaoina e ala i le Agaga.

Tapenaga a tagata aoga: Valaaulia tagata aoga e faitau le Ioane 14:26–27 ma mafaufau i ni aafiaga i se taimi na latou lagonaina pe aoaoina ai se mea mai le Agaga Paia i auala na faamatala mai e le Faaola i fuaiupu nei.

Gaoioiga e Mafai Ona Faaaoga mo nei Aoaoga

Faitau leotele le ata faataitai lenei. Ona faataga lea o tagata aoga e mafaufau loloto i o latou naunautaiga mo le ma le to’a i le iloaina lelei ma le aoaoina e le Agaga.

Vaai faalemafaufau faapea sa e valaaulia se uo i le seminare mo le taimi muamua. I se tasi o uluai aafiaga o se tasi o au uo i le seminare, na faamatala ai e le faiaoga le tāua o le valaauliaina o le Agaga Paia ina ia avea ma faiaoga moni i le taimi o le seminare ma suesuega faa-le-tagata lava ia o tusitusiga paia. Na tautino atu e le faiaoga faapea e ala i le Agaga Paia e mafai ai e tagata aoga ona maua feau patino mai le Tama Faalelagi e lē faaleoina i totonu o le vasega. Na fesili atu lau uo ia te oe po o le a le uiga o le aoao mai le Agaga Paia.

A o e mafaufau i le ala e tali atu ai, mafaufau loloto i fesili nei. Ia nofouta i manatu ma lagona e oo mai a o e suesue i lenei lesona.

• E te manatu o le a sui faapefea le aafiaga o lau uo i le seminare pe afai na ia lagona na talanoa atu le Atua ia te ia a o suesue i le tala lelei?

• O le a le tele o lou mautinoa i le iloaina o le tosinaga a le Agaga Paia i lou olaga ma le valaaulia o Ia e aoao oe?

O le a le mea a le Agaga e fai mo i tatou?

A o e suesue i le tala lelei, e mafai e le Agaga Paia ona avatu ia te oe faaaliga patino. Na aoao mai Peresitene Russell M. Nelson:

E te le tau mafaufau po o le a le mea e moni [tagai i le Moronae 10:5 ]. E te le tau mafaufau po o ai e mafai ona e faatuatuaina ma le saogalemu. E ala mai i faaaliga faaletagata lava ia, e mafai ai ona e maua lau oe lava molimau o le Tusi a Mamona o le afioga a le Atua, o Iosefa Samita o se perofeta, ma o le Ekalesia lenei a le Alii. Po o a lava tala po o mea e fai e isi, e leai se tasi e mafai ona aveesea se molimau na tuuina atu i lou loto ma le mafaufau e uiga i le mea e moni.

Ou te uunaia oe ina ia faateleina lou tomai faaleagaga o i ai nei ia maua ai faaaliga faaletagata lava ia. … Oi, e matua anoanoai mea e finagalo lou Tama o i le Lagi ia e iloa. …

… O le mea moni e sili atu le taua o le Agaga Paia o le a molimau atu ia oe faapea o Iesu o le Keriso o le Alo o le Atua soifua. O loo Soifua o Ia!

(Russell M. Nelson, “Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 95–96)

Mafaufau e toe faamanatu i tagata aoga e uiga i le tapenaga o le valaaulia o tagata aoga i le amataga o lenei lesona. E ese mai le taliina o fesili e lua ia e sosoo mai ai, e mafai e tagata aoga ona faasoa mai so latou iloa mai a latou tapenaga.

• O le a se mea o tumatila mai ia te oe mai le saunoaga a Peresitene Nelson?

• Aisea e te mafaufau ai o le mea moni e sili atu le taua e mafai e le Agaga Paia ona molimau mai o Iesu Keriso, o le Alo o le Atua soifua?

Valaaulia tagata aoga e tali atu i le fesili lenei i paga po o ni vaega toalaiti. Savali faataamilo i le potu ma faalogo i tali e iloilo ai le malamalama o tagata aoga i lenei upumoni.

• E faapefea ona e aoteleina mo lau uo i se fuaiupu e tasi pe lua le taua o faaaliga faaletagata lava ia i lana suesuega o le tala lelei?

E faapefea ona tatou iloaina le tosinaga a le Agaga Paia?

Manatu faapea ua amata ona faaalia e lau uo le fiafia i le mauaina o faaaliga mai le Atua. Ae ua fai atu ia te oe, “Ou te le o mautinoa pe na ou maua muamua ni faaaliga. E mafai faapefea ona ou iloa le Agaga Paia?”

Ina ia fesoasoani ia te oe e tali atu, faitau mau nei. Matau pe o faapefea ona faamatalaina le tosinaga a le Agaga.

Mafaufau e tusi mau faasino nei (po o isi o lau filifiliga) i luga o le laupapa ma valaaulia tagata aoga e filifili se mau e tasi pe lua e suesue ai. Valaaulia i latou e tusi i luga o le laupapa i autafa o le mau faasino mea ua latou aoaoina e uiga i le tosinaga a le Agaga Paia.

• Luka 24:32

• Ioane 15:26

• Kalatia 5:22–23

• Mataupu Faavae ma Feagaiga 8:2–3

• Mataupu Faavae ma Feagaiga 85:6

Ina ia fesoasoani i tagata aoga e tali mai i fesili nei, mafaufau e valaaulia i latou e filifili se fuaitau o se mau ma faaaoga e aoao ai se uo e uiga i le Agaga Paia.

• O fea o faamatalaga nei sa e faitauina e uiga i le Agaga Paia o le a e manao e faasoa ai ma lau uo? Aisea?

• E faapefea ona e faamatalaina auala ua e aafia ai i le tosinaga a le Agaga Paia a o e suesue ai i le tala lelei?

O le fesili ua tuanai atu e mafai ona avea o se vaega taua o lenei lesona. Ia mautinoa ia lava se taimi e tuu i tagata aoga e tali mai ai. Mafaufau e fesili i tagata aoga fesili tulitatao e uiga i mea na latou faia e tapena ai i latou lava mo o latou aafiaga o le lagonaina o le pa’i mai o le Agaga.

E faapefea ona tatou valaaulia le Agaga Paia e aoao i tatou?

E alofa lo tatou Tama Faalelagi ia i tatou ma e finagalo e talanoa mai ia i tatou e ala i le leo filemu ma le itiiti o le Agaga Paia. Ae peitai e tatau ona tatou tofu filifili pe tatou te loto e saili faatauanau mo faaaliga mai ia te Ia. E le gata i lea, a tatou potopoto o se aiga, vasega, po o se uarota, o o tatou manaoga, uiga faaalia, ma faatinoga e mafai ona aafia ai isi e vagaia i tatou.

Na aoao mai e Elder David A Bednar o le Korama a Aposetolo e Toasefululua nisi auala taua e mafai ona tatou valaaulia ai le Agaga Paia e aoao i tatou.

O le mauaina o le Agaga Paia e amata i lo tatou manao faamaoni e le aunoa mo Lana mafutaga i o tatou olaga. …

E tele auala e tupu ai a tatou valaaulia mo le mafutaga a le Agaga Paia: e ala i le osia ma tausia o feagaiga; e ala i le tatalo ma le faamaoni o le tagata lava ia ma faaleaiga; e ala i le suesue ma le filiga i tusitusiga paia; e ala i le faamalolosia o sootaga talafeagai ma tagata o le aiga ma uo e ala i le saili atu i mafaufauga, faatinoga, ma gagana mama ma tapuaiga i totonu o o tatou aiga, i le malumalu paia, ma i le lotu.

(David A. Bednar, “Maua le Agaga Paia,” Ensign po o le Liahona, Nov. 2010, 96)

• O fea o uiga faaalia po o faatinoga na taua e Elder Bednar ua fesoasoani ia te oe e valaaulia ai le Agaga Paia i lou olaga?

• O a ni auala ua e vaaia i uiga faaalia o se tagata po o ni filifiliga ua faafaigofie, (pe faafaigata) ai mo isi o se aiga po o se vasega ona aoaoina e le Agaga?

Mafaufau e valaaulia tagata aoga e faasoa mai po o a ni amioga latou te mananao ia i ai i le potuaoga, ma pe o le a faapefea ona latou valaaulia le Agaga e avea ma faiaoga i le vasega.

E mafai e tagata aoga ona toe manatunatu i mea na latou aoaoina i le lesona lenei e ala i le tali mai i fesili nei i a latou api talaaga o suesuega.

• Na faapefea ona tosinaina lou naunau po o le tomai e aoao mai i le Agaga e ala i mea na e suesueina i le aso?

• O a ni mea e te manao e aoao atili i ai e faatatau i faaaliga patino ma le aoaoina e le Agaga?

• O le a lau mea o le a fai i le fale ma le seminare e valaaulia ai le Agaga ina ia faatasi ma oe a o e suesuea le Feagaiga Fou?

Uunaia tagata aoga e tusi faamaumau a latou tali i fesili ua tuanai i se mea e mafai ona toe tilotilo i ai i le gasologa o le tausaga.

Molimau atu e finagalo le Atua e talanoa mai i tagata aoga taitoatasi e ala i le Agaga Paia.

Tala ma Faamatalaga o Talaaga

Pe o finagalo moni ea le Alii e faaali mai mea ia te a’u?

Na faamalamalama mai e Peresitene Russell M. Nelson:

O se tasi o mea e uunaia soo e le Agaga i lo’u mafaufau … o le, pe o le a le tele o le naunau o le Alii e faaali mai Lona mafaufau ma Lona finagalo. O le avanoa o le mauaina o faaaliga o se tasi lea o meaalofa silisili a le Atua i Lana fanau.

(Russell M. Nelson, “Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 95.)

E mafai faapefea ona ou valaaulia le Agaga Paia e aoao a’u?

Na fesoasoani Elder Ulisses Soares o le Korama a Aposetolo e Toasefululua e tali le fesili lenei.

E manaomia le valaau i le Atua ma le aoao pe faapefea ona aumai le tala lelei a Iesu Keriso i le totonugalemu o o tatou olaga. A tatou faia o lea, ou te folafola atu o le a aumaia e le tosinaga a le Agaga Paia le upumoni i o tatou loto ma mafaufau ma o le a molimau mai e uiga i ai, ma aoao mai mea uma.

(Ulisses Soares, “E Faapefea Ona Mafai Ona Ou Malamalama?,” Ensign po o le Liahona, Me 2019, 7)

O a ni mea e ono faalavelaveina ai au mai le mauaina o faaaliga e finagalo le Alii e aumai mo a’u?

Na faasoa mai Elder David A. Bednar o le Korama Aposetolo e Toasefululua le malamalamaaga lenei:

Afai o se mea tatou te mafaufau i ai, vaai i ai, faalogoina, pe faia foi e faataumamao ese ai i tatou mai le Agaga Paia, ona tatau loa ona taofia le mafaufau i ai, vaai i ai, faalogologo i ai, po o le faia o lena mea. Mo se faataitaiga afai o le mea o loo faamoemoe e faafiafia ai, e vavaeese mai ai tatou mai le Agaga Paia, ua manino mai ai o na ituaiga o faafiafiaga e le mo i tatou. Talu ai e le mafai ona mafuta le Agaga ma mea faatufanua, o mea paaa, pe le tausaafia foi, o lona uiga e manino lava e le mo i tatou foi na mea.

(David A. Bednar, “Ina Ia Tatou Maua Pea Lona Agaga e Faatasi Ma I Tatou,” Ensign po o le Liahona, Me 2006, 30)

Na a’oa’o mai Peresitene M. Russell Ballard o le Korama a Aposetolo e Toasefululua:

Ua anoanoa’i tagata ua faatagaina i latou lava e toetoe ina ola i le initaneti i a latou masini poto—o lau o masini e suluia ai o latou fofoga i le ao ma le po ma meafaalogo i o latou taliga ua poloka ai le leo filemu ma le itiiti o le Agaga. Afai tatou te le maua se taimi e se’i ai le palaka, tatou te ono misia avanoa e faalogo ai i le siufofoga o Ia na fetalai mai, “Ia fifilemu, ma iloa o a’u o le Atua” [Salamo 46:10].

(M. Russell Ballard, “O Meaalofa Faapelepele mai le Atua,” Ensign po o le Liahona, Me 2018, 10)

E mafai faapefea ona ou iloa lelei faaaliga i lo’u mafaufau?

Sa aoao mai le Perofeta o Iosefa Samita:

Atonu e manuia se tagata e ala i le matauina o le uluai faaiteite o le agaga o faaaliga; mo se faataitaiga, pe a e lagonaina le poto mama ua sosolo atu ia te oe, atonu e avatu ia te oe ni asaga faafuasei o manatu.

(Aoaoga a Peresitene o le Ekalesia: Iosefa Samita [2007], 132)

Na faasoa mai Elder Richard G. Scott (1928–2015) o le Korama a Aposetolo e Toasefululua le malamalamaaga lenei:

O se lagona i le mafaufau e patino tele O upu auiliili e mafai ona faalogoina pe lagonaina ma tusia e pei lava o faalauina mai ni faatonuga.

(Richard G. Scott, “Fesoasoani I Isi ia Taitaiina e le Agaga” [saunoaga sa tuuina atu i faiaoga faalelotu i le konafesi tauaofia e faatatau i Mataupu Faavae ma Feagaiga ma talafaasolopito o le Ekalesia, Brigham Young University, Aukuso. 11, 1998]; tagai foi i le Aoao Atu o Seminare: Faitauga Muamua [2004], 55)

E faapefea ona ou iloa le eseesega i le va o uunaiga mai le Agaga Paia ma o’u lava mafaufauga?

Na fesoasoani Elder David A Bednar o le Korama o le toasefululua o le au Aposetolo ma lona faletua, o Sister Susan Bednar, e tali le fesili lea i le vitio “Elder ma Sister Bednar—Iloaina Lelei o le Agaga” (taimi 0:00 i le 5:13), o loo maua i le ChurchofChrist.org.