Faatomuaga i le Feagaiga Fou

E Fesosoani le Feagaiga Fou Tatou Te O Mai ai ia Keriso

O le Feagaiga Fou o se faamaumauga o le soifuaga i le tino ma le misiona a Iesu Keriso ma Ana Aposetolo. O le a fesoasoani lenei lesona e tapena ai oe e sau ia Iesu Keriso ma mulimuli ia te Ia ao e suesue i le Feagaiga Fou.

Tapenaga a le tagata aoga: Valaaulia tagata aoga ia mafaufau pe aisea e taua ai le suesue o le Feagaiga Fou i lenei tausaga. Atonu e aogā ona valaaulia i latou e fesili i ni nai tagata o o latou aiga pe aisea e taua ai.

Gaoioiga e Mafai Ona Faaaoga e Aoao Ai

Valaaulia tagata aoga e mafaufau ia latou tali i fesili nei e tolu. Ona talanoaina lea o fesili faailogaina nei o se vasega:

Mafaufau i uiga i au tali i fesili nei:

1. O le a lau mea e fai pe a e lagona le vaivai o le tino ma le mafaufau?

2. O le a lau mea e fai pe a e lagona le fefe?

3. O ai e te alu i ai pe a e manaomia se fesoasoani i se mea?

• E faapefea ona fesoasoani gaoioiga po o tagata na e manatu o le a fesoasoani ia oe i tulaga faigata?

• Sa i ai ea sou manaoga sa le mafai e se gaoioiga po o se tagata na foliga e mafai ona fesoasoani ia te oe e taulimaina?

Na aoao mai e Peresitene Jean B. Bingham, o le sa avea ma Peresitene Aoao o le Aualofa, le auala e mafai ona faafetaiaia o tatou manaoga aupito taua.

E maua le olioli tumau i le taulai atu i lo tatou Faaola, o Iesu Keriso, ma ola i le talalelei ola e pei ona faaali mai ma aoao mai e Ia. O le tele o lo tatou aoao e uiga, i ai le faatuatua, ma faata’ita’i ia Iesu Keriso, o le tele foi lea tatou te malamalama ai o Ia o le pogai o le faamalologa uma, filemu, ma le agai atu i le faavavau.

(Jean B. Bingham, “Ina Ia Atoa Lo Outou Olioli,” Liahona po o le Liahona, Nov. 2017, 85)

• E tusa ai ma le faamatalaga lenei, o ā faamanuiaga e mafai ona tatou maua ona o Iesu Keriso?

• O le fea o nei faamanuiaga e sili ona taua ia te oe i le taimi nei? Aisea?

O le suesueina o le soifuaga o Iesu Keriso i le Feagaiga Fou

O le tausaga nei, ua valaaulia i tatou ia suesue le Feagaiga Fou i le aiga, lotu, ma le seminare. A o tatou faia se taumafaiga e suesue le Feagaiga Fou ma aoao e ala i le Agaga Paia, o le a faateleina lo tatou malamalama ma tatou molimau ia Iesu Keriso ma mea ua Ia ofoina mai mo i tatou. O le a tatou aoaoina mea e mafai ona tatou faia ia iloa ai le olioli, faamalologa, ma le filemu ua Ia ofoina mai.

Ae lei faia atua ia fesili nei, mafaufau e valaaulia tagata aoga ia tatala le Feagaiga Fou ma vaavaai i ona itulau po o mataupu. Fesili i ai po o a mea ua latou matauina ma po o a mea ua latou iloa e uiga i lona faatulagaina.

• O le a se mea ua e iloa e uiga i le Feagaiga Fou?

• O a nisi o au tala e te fiafia i ai mai le Feagaiga Fou? Aisea?

• Aisea e te manatu ai o le a matua taua le suesueina o le Feagaiga Fou i lenei tausaga?

O tusi muamua e fa o le Feagaiga Fou o loo i ai i totonu tala i le soifuaga o le Faaola. Ua lauiloa o le Talalelei. O tusi o totoe o le Feagaiga Fou o loo i ai misiona ma aoaoga a nisi o le Au Aposetolo Toasefululua a le Faaola ma isi taitai o le uluai Ekalesia.

Mo nisi faamatalaga, tagai i le, ”O Faapefea Ona Faatulagaina le Feagaiga Fou?” i le“Tala ma Faamatalaga o Talaaga“vaega i le faaiuga o le lesona.

I le Feagaiga Fou, o loo ofo mai ai e le Faaola se valaaulia e mafai ona tatou talia ia maua ai le fesoasoani e finagalo o Ia e aumai ia i tatou.

Faitau le Mataio 11:28, ma vaavaai mo le valaaulia a le Faaola.

• O le a sou manatu o le a le uiga o le ”sau ia Keriso”?

• O le a le ituaiga malolo e te mafaufau e mafai ona aumai e le Faaola i ai tatou pe a tatou omai ia te Ia?

• O a faamanuiaga ua uma ona e maua i lou olaga a o e sau ia Iesu Keriso?

Faamalosia o lou avea ai ma soo a o e suesueina le Feagaiga Fou.

O ou aafiaga a o e suesueina le Feagaiga Fou i le tausaga nei o le a avatu ai avanoa e te sau ai ia Iesu Keriso ma avea ma Ona soo, po o se e mulimuli ia te Ia.

I le gasologa o lau suesuega, ave lou mafaufau e le na o mea o e faitauina ma faalogo ai e uiga ia Iesu Keriso ae faapea foi mea o aoao atu e le Agaga e uiga ia te Ia. Mafaufau e faaavanoa ni nai itulau i totonu o lau api talaaga e tusi faamaumau ai mea o loo e aoaoina ma lagona e uiga ia te Ia ma mea o loo e faia e mulimuli ai ia te Ia. I le gasologa o le tausaga, faaopoopo faafouga i itulau nei ma toe iloilo lou alualu i luma.

Valaaulia tagata aoga ia mafaufau e uiga i le aafiaga o le a latou oo i ai i le suesueina o le Feagaiga Fou i le tausaga nei e ala i le tali mai i fesili o i lalo i a latou api talaaga.

• O a mea e te faamoemoe e aoaoina pe e te oo i ai a o e suesueina le soifuaga ma aoaoga a Iesu Keriso i le tausaga nei?

• O a ni auala patino e te faamoemoe ia faaleleia ai o se e mulimuli ia Iesu Keriso?

Mafaufau e faasoa atu lau molimau e uiga i le Faaola. Atonu foi e mafai ona aoga ina ia valaaulia nai tagata aoga e faasoa mai foi a latou tautinoga o le Faaola. Faamalosiau tagata aoga e mafaufau i auala o le a faamalolosia ai a tatou tautinoga r omai ia te Ia ma avea ma Ona soo a o latou amata suesueina le Feagaiga Fou.

Tala ma Faamatalaga o Talaaga

O faapefea ona faatulagaina le Feagaiga Fou?

O tusi muamua e fa o le Feagaiga Fou (Mataio, Mareko, Luka, ma Ioane) ua ta’ua o Talalelei. O le Talalelei o molimau ia e fa i le soifuaga faitino o Iesu ma lana misiona. I le gagana Eleni, o le upu talalelei o lona uiga o “tala e lelei.” Mo nisi faamatalaga e uiga i Talalelei e fa, tagai i le Taiala i Tusitusiga Paia,” Talalelei,” scriptures.ChurchofJesusChrist.org.

O tusi o totoe o le Feagaiga Fou (le tusi a Galuega e oo i le tusi a Faaaliga) o loo i ai tusitusiga ma auaunaga a taitai autu i le Ekalesia a le Faaola. O le tusi a Galuega o loo faamaumau ai galuega faafaifeautalai, auaunaga, ma vavega a le au Aposetolo. O le tusi a Roma e oo i le tusi a Iuta o ni tusitusiga ia, po o tusi, na tusia e Paulo ma isi taitai o le Ekalesia e faatonutonu ai ma faamalamalama ai le Au Paia. O le tusi o Faaaliga o loo i ai se faaaliga na maua e Ioane e uiga i aso amuli.

E mafai faapefea ona faamalosia lo’u faatuatua ia Iesu Keriso a o ou suesue i le Feagaiga Fou?

Sa faasoa mai e Peresitene Jean B. Bingham, o se na avea ma Peresitene Aoao o le Aualofa, nisi auala e mafai ona faamalosia ai lo tatou faatuatua a o tatou suesue i le soifuaga ma aoaoga a le Faaola.

A o e suesue i le soifuaga ma aoaoga a Keriso i auala e le mafaitaulia, o le a faatuputeleina lou faatuatua ia te Ia. O le a oo ina e iloa e alofa o Ia ia te outou taitoatasi ma e malamalama lelei foi ia te oe. I le 33 tausaga o Lona soifua ai i le olaga nei, sa mafatia o ia i le teenaina, sauaga, galala i le fia taumafa, fiainu, ma le vaivai, tuuatoatasi, sauaina i upu ma le faaletino, ma iu ai i se maliu tigaina i lima o tagata agasala. I le Faatoaga o Ketesemane ma luga o le satauro i Kalevaria, sa Ia lagona uma ai o tatoutiga, mafatiaga, ma’i, faaosoosoga, ma vaivaiga.

Po o a lava mea ua tatou mafatia ai, o Ia o le pogai o le faamalologa. O i latou ua aafia i soo se ituaiga o sauaga, se toesea ogaoga, ma’i faaumiumi po o se mafatiaga le ma’alofia, tuua’iga le moni, sauaga matuia, po o se faatama’iga faaleagaga mai le agasala po o le le malamalama e mafai ona faaatoatoaina uma e le Togiola o le lalolagi. Peitai, o le a Ia le ulufale mai e aunoa ma se valaaulia. E tatau ona tatou o mai ia te Ia ma faataga o Ia e faatino Ana vavega.

Jean B. Bingham, “Ina Ia Atoa Lo Outou Olioli,” Ensign po o le Liahona, Nov. 2017, 86

Na molimau Elder L. Tom Perry (1922–2015) o le Korama a Aposetolo e Toasefululua i le taua o le suesueina o le Feagaiga Fou:

Ua matuai lofia le lalolagi i aso nei i aoaoga faavae a tagata lea e faigofie ona galo ma leiloa ai le faatuatua i lena tala taua o le soifuaga ma le misiona a le Faaola—o le Feagaiga Fou. O lenei voluma paia o le totonugalemu lea o tala faasolopito faaletusipaia, e pei lava foi ona avea le Faaola lava Ia ma totonugalemu o o tatou olaga. E tatau ona tuuto atu i tatou lava e suesue ma teufatuina!

(L. Tom Perry, “O Le Sapati ma le Faamanatuga,” Ensign po o le Liahona, Me 2011, 6)

Gaoioiga Faaaopoopo e Aoao Mai Ai

O ai Iesu Keriso ia te oe?

Faaali atu se ata o Iesu Keriso, e pei o lea na maua i le amataga o le lesona. Valaaulia tagata aoga e tusifaamaumau a latou tali i fesili nei i a latou api talaaga o suesuega. Ona valaaulia lea o ni nai volenitia e faasoa mai a latou tali i le vasega.

• O ai Iesu Keriso ia te oe?

Faamalosiau i tagata aoga ia matau pe faapefea ona suia a latou tali i le lenei fesili a o latou suesue i le soifuaga o Keriso i le Feagaiga Fou i lenei tausaga.

O le suesueina o le Feagaiga Fou e mafai ona faamalolosia ai a tatou tautinoga faapea o Iesu o le Keriso.

Valaaulia tagata aoga ia suesue le Ioane 20:30–31, ma vaavaai mo se tasi o mafuaaga na tusia ai e Ioane lana tala o le soifuaga o le Faaola. Faamatala atu, o upu a Ioane i nei fuaiupu e mafai foi ona faaaoga i vaega o totoe o le Feagaiga Fou.

Atonu e mafai ona aoga le toe iloilo o tala mai le Feagaiga Fou ia e faamalolosia ai lo tatou faatuatua faapea o Iesu o le Keriso ma o le Alo o le Atua. E mafai e tagata aoga ona maua e i latou lava se tala, pe mafai foi ona e tuuina ia i latou ni nai mea e filifili mai ai, e aofia ai nisi o mea nei:

Mataio 8:23–27 ; Mataio 14:15-21 ; Luka 22:39-44 ; Ioane 11:32–45 ; Galuega 3:1–8

A o suesue ai tagata aoga, valaaulia i latou ia mafaufau po o a mea ua latou aoaoina e mafai ona faamalosia ai se molimau a se isi tagata faapea o Iesu o le Keriso.

O suafa ma faalaniga o Iesu Keriso

O se tasi o auala o le a aoaoina ai tagata aoga e uiga ia Iesu Keriso ao suesue i le Feagaiga Fou o le matau lea o Ona mau suafa ma faalaniga. Valaaulia tagata aoga ia suesue nisi o fuaiupu nei, vaavaai mo suafa po o faalaniga o loo faaaoga e faamatalaina ai Iesu Keriso. Valaaulia tagata aoga ia mafaufau po o a mea ua aoao ai i latou i na suafa ma faalaniga e uiga ia te Ia.

Mataio 14:33 ; Luka 2:11 ; Ioane 1:29 ; Ioane 3:2 ; Ioane 4:25–26