Talateu ki he Tohi Lēsoni ʻo e Fuakava Foʻoú maʻá e Faiako Seminelí

Ko e Kaveinga ʻo e Seminelí mo e ʻInisititiuti Fakalotú ke “tokoni ke mahino mo falala ʻa e toʻutupú mo e kakai lalahi kei talavoú ki he ngaahi akonaki mo e Fakalelei ʻa Sīsū Kalaisí, fakafeʻungaʻi kinautolu ke maʻu ʻa e ngaahi tāpuaki ʻo e temipalé, pea teuteuʻi kinautolu, honau fāmilí, mo e niʻihi kehé ki he moʻui taʻengata mo ʻenau Tamai Hēvaní” (Ko Hono Akoʻi mo Ako ʻo e Ongoongoleleí: Ko ha Tohi Tuʻutuʻuni maʻá e Kau Faiako mo e Kau Taki ʻi he Seminelí mo e ʻInisititiuti Fakalotú [2012], x, ChurchofJesusChrist.org).

ʻOku fakataumuʻa e ngaahi lēsoni mo e ngaahi maʻuʻanga tokoni kehe ʻi he tohi lēsoni ko ʻení ke tokoniʻi koe ke ke aʻusia e taumuʻa ko ʻení. Te nau lava ʻo tokoniʻi koe ke ke faiako ʻaki ʻa e Laumālié, tokanga taha kia Sīsū Kalaisi, akoʻi ʻEne tokāteliné ʻo hangē ko ia ʻoku hā ʻi he folofolá mo e ngaahi lea ʻa e kau palōfitá, pea fakaafeʻi e kau akó ke nau ako ʻi he faivelenga. ʻI hoʻo fai iá, te ke lava ʻo tokoni ki he kau akó ke fakaloloto ʻenau ului kia Sīsū Kalaisi mo ʻEne ongoongoleleí.

Ngaahi Meʻangāue ke Tokoni ki Hoʻo Teuteu ke Faiakó

Ko e Folofolá

Ko e ako fakataha mo e folofola ʻi he Haʻu, ʻo Muimui ʻIate Aú ko ha founga mahuʻinga ia ke teuteu ai ke akoʻi e kau akó. ʻOku fiemaʻu ʻe he ngaahi lēsoni ʻi he tohi lēsoni ko ʻení ha faiako ʻoku ueʻi fakalaumālie ke ne ako maʻu pē e folofolá mo fekumi ki he takaua ʻo e Laumālie Māʻoniʻoní. ʻI hoʻo ako maʻu pē ʻa e folofolá, te ke lava ʻo falala ʻe ueʻi koe ʻe he Tamai Hēvaní ʻo fakafou ʻi Hono Laumālié ki he founga ke fakafeʻungaʻi ai e naunau ko ʻení ki he ngaahi fiemaʻu hoʻo kau akó.

Ngaahi Vakai Fakalūkufua Fakauiké

ʻOku fokotuʻutuʻu ʻa e tohi lēsoni ko ʻení ʻo fakatatau ki he ngaahi konga folofola fakauike ʻo e Haʻu, ʻo Muimui ʻIate Aú. ʻOku ʻomi ʻe he tohi lēsoni ko ʻení ha vakai fakalūkufua fakauike ki he konga folofola he uike takitaha pea hoko mai ai mo ha lēsoni ʻe nima. ʻOku ʻoatu ʻe he vakai fakalūkufua fakauiké ha fakamatala fakanounou ʻo e naunau fakafaiako ki he uike ko iá kae pehē ki ha fakamatala pau ki he lēsoní ke tokoni atu ʻi hoʻo teuteu ke faiakó. Te ke maʻu ʻa e fakamatala ko ʻení ki he lēsoni takitaha:

taumuʻa ʻo e lēsoní
ngaahi fakakaukau ki he teuteu ʻa e tokotaha akó
lisi ʻo ha ngaahi lēsoni fakataumuʻa, ʻū laʻipepa tufa, ngaahi ʻīmisi, ngaahi vitiō, pe ʻū naunau kehe ʻe ala fiemaʻu ke teuteuʻi kimuʻa
fokotuʻu ki hono akoʻi ʻi he konifelenisi vitioó (kapau ʻoku hū ki he fakamatalá ʻo fakafou ʻi he Gospel Library app pe Gospel Library ʻi he ʻinitanetí ʻi he ChurchofJesusChrist.org)

ʻE lava ke tokoni ʻa hono toe fakamanatu ʻo e vakai fakalūkufua fakauiké ʻi he kamataʻanga ʻo e uike takitaha ke ke fili ai pe ko e lēsoni fē te ke akoʻí pea ko e hā ʻa e naunau ke tānakí pe teuteuʻi kimuʻá.

Kumi ʻa e vakai fakalūkufua fakauike ki he uike hoko mai ʻo e ngaahi lēsoni te ke akoʻí. Ko e hā ha fakamatala ʻokú ke maʻu heni ʻoku ʻaonga ke ke ʻilo kimuʻa? Te ke fakaʻaongaʻi fēfē ʻa e fakamatala ko ʻení ʻi hoʻo teuteu ke faiakó?

Ngaahi Tokoni Fakafaiakó

ʻOku fakamatalaʻi ʻe he fanga kiʻi tokoni fakafaiakó ʻa e ngaahi founga fakafaiako mo e ngaahi tefitoʻi moʻoni ʻe lava ʻo tokoni atu ke ke fakalakalaka ʻi hoʻo hoko ko e faiakó. ʻOku ʻi he lēsoni takitaha ha tokoni fakafaiako ʻi he hili pē ʻa e talateu ki he lēsoní. Te ke lava ʻo maʻu ha toe ngaahi founga fakafaiako mo ha ngaahi tefitoʻi moʻoni kehe ʻi he laipeli ʻo e ngaahi taukei fakalakalaka fakafaiakó ʻa ia ʻoku lava ke maʻu ʻi he ChurchofJesusChrist.org kalasí. ʻI hoʻo ongoʻi mateuteú, feinga ke fakahoko e ngaahi tokoni ko ʻení ʻi hoʻo faiakó. ʻI hoʻo fai iá, te ke fakatokangaʻi e ngaahi fakalakalaka ʻi hoʻo malava ke faiakó.

Toe vakaiʻi e tokoni fakafaiakó ʻi ha lēsoni te ke akoʻi. Te ke feinga fēfē ke akoako fakahoko ʻa e fokotuʻu ko ʻení ʻi he lēsoní?

Fakahinohino ki hono Akoʻí

ʻOku fakataumuʻa ʻa e ngaahi fakahinohino ki hono akoʻí ke tokoniʻi koe ʻi hoʻo teuteu ke faiakó. ʻE lava ke fakamatalaʻi ʻe he ngaahi fakahinohino ko ʻení ʻa e taumuʻa ʻo e ngaahi ʻekitivitī ʻo e lēsoní pe ʻomi ha ngaahi fokotuʻu ki he founga hono fakafenāpasi e kakano ʻo e lēsoní ke feau lelei ange ai e ngaahi fiemaʻu ʻa e kau akó. ʻE lava ke kau ʻi he ngaahi fokotuʻu ko ʻení ha ngaahi founga, fehuʻi, pe ʻekitivitī ʻe tokoni atu ke ke liliu e kanotohí mo e ngaahi ʻekitivitií ʻo ka fiemaʻu.

Toe vakaiʻi ha niʻihi ʻo e ngaahi fakahinohino ki hono akoʻí ʻi ha lēsoni ʻe vavé ni pē haʻo akoʻi. Ko e hā ha ngaahi liliu te ke ala fai ʻo makatuʻunga ʻi he ngaahi fakahinohino fakafaiako ʻokú ke maʻú?

Teuteu ‘a e Tokotaha Akó

ʻOku kau ʻi he lēsoni kotoa pē ha fokotuʻu ki hono tokoniʻi e kau akó ke teuteuʻi honau ʻatamaí mo e lotó ki he aʻusia fakaakó. ʻOku lisi ʻi he vakai fakalūkufua fakauike takitaha ʻa e ngaahi fakakaukau teuteu ʻa e tokotaha akó ki he ngaahi lēsoni ʻe nima ʻo e uike ko iá. Te ke lava ʻo vakai ki he ngaahi fakakaukau ko ʻení ʻi he kamataʻanga ʻo e uiké peá ke fili ʻi he faʻa lotu ʻa e ngaahi fakakaukau ʻokú ke ongoʻi ʻe tokoni lelei taha ki hoʻo kau akó. ʻOku ʻikai fiemaʻu ke ke fakaʻaongaʻi e fokotuʻu kotoa pē ki he teuteu ʻa e tokotaha akó. Te ke lava ʻo fakafenāpasi kinautolu pe faʻu haʻo ngaahi fakakaukau pē ʻaʻau. ʻOku fakataumuʻa ha konga lahi ʻo e ngaahi fokotuʻu ko ʻení ke ʻoange ki he kau akó ʻi ha ʻaho ʻe taha pe lahi ange kimuʻa ‘i heʻenau aʻusia fakaakó.

Toe vakaiʻi ʻa e konga ki he teuteu ʻa e tokotaha akó ʻi hoʻo lēsoni hokó, pea fakakaukau pe te ke fakaʻaongaʻi, fakafenāpasi, pe ʻikai fakaʻaongaʻi ʻa e teuteu ʻa e tokotaha akó kuo fokotuʻu atú. Kapau te ke fili ke fakaafeʻi hoʻo kau akó ke nau teuteu, te ke vahevahe fēfē ʻa e fakakaukau ko ʻení mo kinautolu? Te ke lava ʻo vahevahe ia ʻaki haʻo fakamatalaʻi pe fakaʻaliʻali ia ʻi he fakaʻosinga ʻo e kalasi kimuʻá pe ʻave ia ʻi he ʻīmeilí pe ko ha polokalama fepōpoakiʻaki, ʻo ka feʻunga ke fai pehē.

Ngaahi ʻEkitivitī Ako ʻe Ala Fakahokó

ʻOku kau ʻi he konga ko ʻeni ʻo e lēsoní ha ngaahi founga te ke lava ai ʻo fakahoko ʻaki ʻa e aʻusia fakaakó. ʻOku ʻikai fiemaʻu ke ke fakaʻaongaʻi kotoa e ngaahi meʻa ko ʻení ʻi he ngaahi lēsoni ʻokú ke akoʻí. Ke maʻu ʻe hoʻo kau akó ʻa e aʻusia lelei taha ʻe ala lavá, ʻoku totonu ke ke fakaʻaongaʻi ʻa e fakamatala ʻi he konga ko ʻení ko ha tataki kae ʻikai ko ha fakahinohino ke muimui pau ki ai. Kapau ko hoʻo toki kamata ʻeni ke hoko ko ha faiako semineli, ʻe lelei taha ke kamata ʻaki haʻo muimui ofi ki he ngaahi ʻekitivitī ako kuo fokotuʻu atú. ʻI hoʻo fakalakalaka ko ha faiakó, te ke maheni ange ai mo e ngaahi fiemaʻu hoʻo kau akó pea fakaleleiʻi hoʻo malava ke maʻu ha ueʻi fakalaumālié. Te ke lava lelei ange ʻo fakafenāpasi ʻa e kakano ʻo e tohi lēsoni ko ʻení ke ʻoange ki hoʻo kau akó ha ngaahi aʻusia ʻo e fakauluí mo e mahuʻinga ʻo e akó.

Fakamatala Fakamahinó mo e Puipuituʻá

Ko e lahi taha ʻo e ngaahi lēsoní ʻoku ʻi ai ha konga “Fakamatala Fakamahinó mo e Puipuituʻá” ʻi he fakaʻosinga ʻo e lēsoní. ʻOku kau ʻi he konga ko ʻení ha fakamatala lahi ange ʻe lava ʻo tokoni ke fakaloloto ʻa e akó. Te ke lava ʻo maʻu ha ngaahi tali ki ha ngaahi fehuʻi ʻe ala maʻu ʻe he kau akó pe kumi ha ngaahi fakamatala mei he kau taki ʻo e Siasí te ke ala fiemaʻu ke fakakau ʻi he lēsoní. ʻOku toki maʻu pē ʻa e konga ko ʻení kapau ʻokú ke maʻu ʻa e tohi lēsoni ʻa e faiakó ʻo fakafou ʻi he Gospel Library app pe Gospel Library ʻi he ʻinitanetí ʻi he ChurchofJesusChrist.org. Ko e lahi taha ʻo e fakamatala ʻi he konga ko ʻení ʻoku fakakau foki ia ʻi he naunau fakalēsoni ʻa e seminelí ʻi he ʻinitanetí pea ʻi he tohi lēsoni ʻa e tokotaha akó (ʻi he ʻuluʻi tohi “Fili pē: Fie Ako Lahi Ange?”) kapau ʻe hū ki ai ʻi he Gospel Library app pe Gospel Library ʻi he ʻinitanetí. ʻOku ʻikai fakakau ʻa e “Fakamatala Fakamahinó mo e Puipuituʻá” ʻi he tatau PDF ʻo e tohi lēsoni ʻa e faiakó pe tokotaha akó.

Vakai pe ʻoku kau ʻi he lēsoni hoko ʻokú ke akoʻí ʻa e “Fakamatala Fakamahinó mo e Puipuituʻá.” ʻOku ʻi ai nai ha ngaahi fehuʻi, tali pe fakamatala ʻa e kau taki ʻo e Siasí ʻe ʻaonga ke vahevahe mo hoʻo kau akó?

Ngaahi ʻEkitivitī Fakalahi ki he Akó

ʻOku ʻi he konga ko ʻení, ʻa ia ʻoku fakakau foki ʻi he fakaʻosinga ʻo e lēsoní, ha ngaahi fakakaukau lahi ange ki hono fakahoko ‘a e aʻusia fakaakó. ʻOku toki fakakau pē ʻa e ngaahi ʻekitivitī ako ʻoku tānaki atú ʻi he tohi lēsoni ʻa e faiakó kapau ʻokú ke maʻu ia ʻi he Gospel Library app pe ko e Gospel Library ʻi he ʻinitanetí ʻi he ChurchofJesusChrist.org. ʻOku ʻikai fakakau ʻa e konga ko ʻení ʻi he tatau PDF ʻo e tohi lēsoni ʻa e faiakó pe tokotaha akó.

Kapau ʻoku kau ʻi hoʻo lēsoni hokó ha konga ki he “Ngaahi ʻEkitivitī Fakalahi ki he Akó”, toe vakaiʻi e ngaahi ʻekitivitī ko ʻení. ʻOku ʻi ai nai ha faʻahinga ʻekitivitī ʻokú ke pehē ʻe ʻaonga ke fakaʻaongaʻi fakataha mo hoʻo kau akó ko ha tānaki atu pe ko ha fetongi ʻo e ngaahi ʻekitivitī ako ʻoku fakakau ʻi he tefitoʻi lēsoní?

Fakataukei Fakatokāteliné

Ko ha meʻa mahuʻinga ʻe taha kiate koe ko e faiakó ke tokoniʻi e kau akó ke nau lavaʻi e ngaahi ola ʻo e fakataukei fakatokāteliné. ʻOku kau ʻi he ngaahi ola ko ʻení ʻa hono tokoniʻi ʻo e kau akó

ako mo fakaʻaongaʻi e ngaahi tefitoʻi moʻoni fakalangí ki hono maʻu ʻo e ʻilo fakalaumālié pea
taukei ʻi he ngaahi potufolofola kuo filí mo e tokāteline ʻo e ongoongolelei ʻo Sīsū Kalaisi ʻoku nau akoʻí.

Ko e taukei ‘i he ngaahi potufolofola kuo filí mo e tokāteline ʻo e ongoongolelei ʻo Sīsū Kalaisi ʻoku akoʻi ʻi he ngaahi potufolofola ko ení, ʻoku ʻuhinga ia ko e kau akó te nau

ʻiloʻi mo mahino ʻa e tokāteline naʻe akoʻi ʻi he ngaahi potufolofola fakataukei fakatokāteliné;
fakamatalaʻi mahino ʻa e tokāteliné ʻo fakaʻaongaʻi e ngaahi potufolofola fakataukei fakatokāteline ʻoku fekauʻaki mo iá;
fakaʻaongaʻi e tokāteline ʻo e ongoongolelei ʻo Sīsū Kalaisí mo e ngaahi tefitoʻi moʻoni ʻo e maʻu ʻo e ʻilo fakalaumālié ʻi heʻenau ngaahi fili fakaʻahó pea ʻi heʻenau ngaahi tali ki he ngaahi palopalema mo e ngaahi fehuʻi fakatokāteline, fakataautaha, fakasōsiale, mo fakahisitōliá; pea
manatuʻi mo ʻiloʻi ʻa e ngaahi potufolofola fakataukei fakatokāteliné mo ako maʻuloto ʻa e ngaahi kupuʻi lea mahuʻinga ʻo e folofolá.

Mahalo ʻe ongoʻi lōmekina ʻeni ʻi he kamataʻangá, ka te ke lava ʻo maʻu ha loto-falala ʻe tokoniʻi koe ʻe he tohi lēsoni ko ʻení ʻi hono tokoniʻi hoʻo kau akó ke nau aʻusia ʻa e taukei fakatokāteliné. Te ke maʻu ʻi he seti kotoa pē ʻo e ngaahi lēsoni ʻe nima ʻi he tohi lēsoni ko ʻení, ha lēsoni ʻoku tokoni ki he kau akó ke nau lavaʻi e ngaahi ola ko ʻení. Ko e ngaahi lēsoni ko ʻení ko ha ngaahi lēsoni fakataukei folofola fakatokāteline ia pe ngaahi lēsoni vakaiʻi ʻo e fakataukei fakatokāteliné.

Ngaahi Lēsoni ʻo e Potufolofola Fakataukei Fakatokāteliné

Ko e ngaahi lēsoni fakataukei fakatokāteliné—kae pehē ki he lēsoni fakamatala kimuʻa ʻi he lēsoni takitaha—ʻoku totonu ke fakamahuʻingaʻi. ʻOku totonu ke akoʻi ʻa e lēsoni fakataukei fakatokāteline takitaha ʻi he lolotonga ʻo e taʻu fakaakó, kau ai ʻa e ngaahi lēsoni naʻe ʻikai akoʻi ʻi he taimi naʻe ʻikai fai ai ha kalasi seminelí. ʻOku kau ʻi he ngaahi lēsoni mahuʻinga ko ʻení ʻa e:

Talateu ki he Fakataukei Fakatokāteliné
Ko Hono Maʻu ʻo e ʻIlo Fakalaumālié, Konga 1, 2, mo e 3
ko e lēsoni fakamatala kimuʻa ʻi he ngaahi lēsoni fakataukei fakatokāteline takitaha ʻe 24
ngaahi lēsoni fakataukei fakatokāteline ʻe 24 (hangē ko ʻení, “Fakataukei Fakatokāteliné: Luke 2:10–12” pe “Fakataukei Fakatokāteliné: Sione 3:5”)

ʻOku tokoni e ngaahi lēsoni fakataukei fakatokāteliné ki he kau akó

ke maʻuloto ʻa e fakamoʻoni fakafolofolá mo e kupuʻi lea mahuʻinga he folofolá,
fakamatalaʻi e tokāteliné, mo
akoako fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié pea mo e tokāteline ʻoku akoʻi ʻi he potufolofolá.

Lēsoni ki hono Toe Vakaiʻi e Fakataukei Fakatokāteliné

ʻOku ʻomi ʻe he ngaahi lēsoni ki hono toe vakaiʻi ʻo e fakataukei fakatokāteliné ha ngaahi faingamālie ke toe vakaiʻi (pe ʻi ha ngaahi meʻa ʻe niʻihi, ke fakafeʻiloaki) ha niʻihi ʻo e ngaahi potufolofola fakataukei fakatokāteliné pea mo ngāue ki he ngaahi ola ʻo e fakataukei fakatokāteliné. Ko e ngaahi lēsoni ki hono toe vakaiʻi ʻo e fakataukei fakatokāteliné ‘oku fili pē. Kapau ʻe liʻaki ʻe he kau akó ha lēsoni fakataukei fakatokāteline koeʻuhí ʻoku ʻikai ke fai ha kalasi, te ke lava ʻo akoʻi ʻa e lēsoni ne liʻakí ʻo fetongi ʻaki ha lēsoni fakamanatu ʻo e fakataukei fakatokāteliné.

Ko hono Tokoniʻi e Kau Akó ke Siviʻi ʻEnau Akó

Ko e siví ko ha konga mahuʻinga ia ʻo e akó. ʻE lava ke hoko ʻa e ngaahi faingamālie ke kiʻi mālōlō mo fakakaukauloto ki he akó ko ha aʻusia lelei ki he kau akó pea fakaʻaiʻai kinautolu ʻi heʻenau hokohoko atu ke tupulaki mo fakalakalaka ke hoko ʻo hangē ko e Tamai Hēvaní mo Sīsū Kalaisí. Naʻe ‘omi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ‘a e akonaki fakapotopoto ko ‘ení ki he kau faiakó:

ʻĪmisi
Official Portrait of Elder Jeffrey R. Holland. Photographed January 2018.

“Manatuʻi ko e tokotaha akó ʻoku ʻikai ko ha faʻoʻanga meʻa ke fakafonu; ko e tokotaha akó ko ha afi ia ke tafunaki”

(“Angels and Astonishment” [Church Educational System training broadcast, Sune 12, 2019, broadcasts.ChurchofJesusChrist.org).

Ko hono ʻoange ki he kau akó ha ngaahi faingamālie ke sivisiviʻi ʻenau akó ko ha founga ia ʻe taha ke fakaʻaongaʻi ai e faleʻi ʻa ʻEletā Hōlaní. ʻI hono siviʻi e ako ʻa e kau akó, ʻoku nau kau longomoʻui mai leva ʻi he akó pea taliui lahi ange ki heʻenau akó. ʻOku ʻi ai ha ngaahi aʻusia fakaako ʻoku kau ʻi he naunau fakalēsoni ko ʻení ʻoku fakataumuʻa ke ʻoange ki he kau akó ha ngaahi faingamālie ke nau fakakaukau ai ki he meʻa ʻoku nau akó mo e founga ʻoku nau tupulaki ai ʻi heʻenau hoko ko ha ākonga ʻa Sīsū Kalaisí.

Ngaahi Lēsoni “Siviʻi Hoʻo Akó”

ʻOku kau ʻi he tohi lēsoni ko ʻení ha ngaahi lēsoni “Siviʻi hoʻo akó.” ʻOku ʻoange ʻe he ngaahi lēsoni ko ʻení ha ngaahi faingamālie ki he kau akó ke nau fakamatalaʻi ai ʻa e tokāteline mahuʻinga mei he Fuakava Foʻoú, fakakaukauloto ki honau ʻulungāngá mo ʻenau ngaahi holí, pea vahevahe ʻenau fakalakalaka ʻi hono fakatupulaki e ngaahi ʻulungaanga ʻoku tokoni ke nau hoko ko ha kau ākonga mateaki ange ʻo Sīsū Kalaisí. ʻE lava ke tokoni ʻa e ngaahi lēsoni ko ʻení ke ongoʻi fiefia ʻa e kau akó ʻi heʻenau ʻiloʻi ʻenau tupulakí mo ʻiloʻi ʻa e ngaahi tafaʻaki ke fakalakalaka lahi ange ai he kahaʻú.

Ngaahi Lēsoni Fakamanatu Siviʻi ʻo e Akó

ʻI he fakaʻosinga ʻo e vaeuaʻanga takitaha ʻo e kalasí, te ke ʻoange ki he kau akó ha sivi ke tokoni ke nau fakafuofuaʻi ʻenau malava ke aʻusia e ngaahi ola ʻo e fakataukei fakatokāteliné. ʻOku totonu ke akoʻi ha lēsoni fakamanatu ʻo e siví ʻi he taimi kalasí kimuʻa pea fakahoko e siví. ʻOku maʻu e ngaahi lēsoni fakamanatu ʻo e siví ʻi he fakamatala fakalahi ʻo e tohi lēsoni ko ʻení. ʻOku kau ʻi he ngaahi lēsoni ko ʻení ha ngaahi ʻekitivitī fakamanatu ʻe tokoni ki he kau akó ke nau toe vakaiʻi ʻa e tokāteliné, ngaahi fakamoʻoni fakafolofolá, mo e ngaahi kupuʻi lea mahuʻinga ʻo e ngaahi potufolofola fakataukei fakatokāteline takitaha naʻa nau ako ʻi he konga ʻuluaki pe ua ʻo e kalasí. ‘E tokoni foki e ngaahi lēsoni ko ‘ení ki he kau akó ke toe vakaiʻi e ngaahi tefitoʻi moʻoni ʻo hono maʻu ʻo e ʻilo fakalaumālié.

Siviʻi ʻo e Akó

ʻOku nofotaha ʻa e ngaahi siviʻi ʻo e akó ki he konga ʻuluaki mo e ua ʻo e kalasí ʻi he fakataukei fakatokāteliné pea ʻoku fakakau atu ia ʻi he fakamatala fakalahi ʻo e tohi lēsoni ko ʻení. ʻE lava ke fai ʻe he kau akó ha sivi lolotonga ha kalasi pea fakatonutonu ia ʻi he kalasí ʻaki e tokoni ʻenau faiakó mo e kaungāako kehé. Ke maʻu ha maaka ki he kalasi semineli ko ʻení, ʻe fiemaʻu ke 75% pe māʻolunga ange ʻa e maaka ʻa e kau akó ʻi he sivi takitaha. ʻE lava ke toe fakahoko ʻe he kau akó ʻa e ngaahi sivi ko ʻení ʻi he lahi taha ʻe fiemaʻú.

Kau Faiako Semineli ʻi he ʻInitanetí

Kapau ko ha faiako semineli koe ʻi he ʻinitanetí, mahalo ʻe tokoni ke ke vakaiʻi e fakamatala ʻi he tohi lēsoni ʻa e faiako seminelí ʻi hoʻo teuteu e ngaahi lēsoní. Neongo ko e konga lahi ʻo e ngaahi lēsoni ʻi he tohi lēsoni ko ʻení mo e ʻū naunau fakalēsoni semineli ʻi he ʻinitanetí ʻoku nau maʻu ha meimei fakamatala tatau, ka ʻoku kau foki ʻi he tohi lēsoni ʻa e faiako seminelí ʻa e fakahinohino ki hono akoʻí mo e ngaahi ʻekitivitī fakalahi ki he akó. ʻE lava ke tokoni atu ʻa e ngaahi maʻuʻanga tokoni ko ʻení ke ke tali ʻa e ngaahi fehuʻi ʻa e kau akó, fakafenāpasi ʻa e naunau fakalēsoni ʻi he ʻinitanetí, mo teuteu ki he ngaahi kalasi femātākí (ʻo tatau ai pē pe ʻoku ʻi loki ako pe ʻi he ʻinitanetí).

Tānaki atu ki he tohi lēsoni ko ʻení mo e naunau fakalēsoni semineli ʻi he ʻinitanetí, ʻoku ʻi ai ha maʻuʻanga tokoni makehe ke tokoni atu ʻi hono akoʻi ʻo e seminelí ʻi he ʻinitanetí. Ko e naunau fakalēsoni semineli ʻi he ʻinitanetí, ʻoku kau ai ha peesi teʻeki pulusi maʻá e kau faiakó ʻoku ui ko e “Ngaahi Fokotuʻu maʻá e Kau Faiako ʻi he ʻInitanetí,” ʻi he uike takitaha. ʻOku ʻi he peesi ko ʻení ha ngaahi fokotuʻu kehekehe ke tokoni atu ke ke ʻai e aʻusia fakaako ʻi he ʻinitanetí ke mahuʻingamālie ange ki hoʻo kau akó. ʻʻOku kau ki he ngaahi fokotuʻú ʻa e ngaahi meʻa ko ʻení:

fanga kiʻi tokoni fakafaiako ʻi he ʻinitanetí
ngaahi taumuʻa ʻo e lēsoní
ngaahi fakakaukau ki he teuteu ʻa e tokotaha akó
ngaahi fokotuʻu ki hono akoʻí ‘o e konifelenisi vitioó
ngaahi fokotuʻu ki hono fakafenāpasi ʻo e kanotohí ʻi he ʻinitanetí

ʻOku fakalotolahiʻi koe ke ke fakafenāpasi ʻa e naunau fakalēsoni semineli ʻi he ʻinitanetí ke feau e ngaahi fiemaʻu hoʻo kau akó. ʻE lava ke liliu ʻa e peesi kotoa pē ʻi he naunau fakalēsoni semineli ʻi he ʻinitanetí. ʻE lava ke kau ʻi he ngaahi fakafenāpasi ʻe niʻihi te ke fai ki he naunau fakalēsoni he ʻinitanetí ʻa hono

toe vakaiʻi ha lēsoni ʻekitivitī ke ʻaonga mo fakamānako ange ki he kau akó,
tamateʻi ha ngaahi meʻa ʻoku fuʻu lahi pe fuʻu faingataʻa ke mahino ki he kau akó,
fetongi e kanotohí ʻaki ha vitiō ʻo haʻo fakamoʻoni pe ko e fakamoʻoni ʻa ha taha kehe fekauʻaki mo ha tefitoʻi moʻoni pe tokāteline ʻi he folofolá pe vahevahe ha aʻusia fakataautaha, pe
fetongi ha kupuʻi lea ʻaki ha konga lea naʻe toki lea ʻaki kimuí ni pe konga lea ʻoku mahinongofua ange ki he kau akó.

ʻE fiemaʻu ke liliu ʻe he kau faiako semineli ʻi he ʻinitanetí ʻa e fakahokohoko ʻo ha ngaahi lēsoni ʻe niʻihi ʻi he naunau fakalēsoni semineli ʻi he ʻinitanetí ke muimui ki he ngaahi fakahinohino ki hono akoʻi fakalotofonuá.

Faiako Semineli Ako ʻi ʻApí

Kapau ko ha faiako semineli koe ki he ako ʻi ʻapí, ʻe fiemaʻu ke maʻu ʻe he kau akó ha tatau ʻo e tohi lēsoni ʻa e tokotaha ako seminelí pe lava ke hū ki he Gospel Library app pe ko e Gospel Library ʻi he ʻinitanetí, ʻa ia ʻoku maʻu ʻi he ChurchofJesusChrist.org. ʻE fiemaʻu ke ke fetuʻutaki mo e kau akó fekauʻaki mo e ngaahi lēsoni te nau ako ʻi ʻapí pea mo e ngaahi lēsoni te mou ako fakataha ʻi he ‘initanetí pe femātākí. ʻOku fekauʻaki e ngaahi lēsoni ʻi he tohi lēsoni ʻa e tokotaha akó mo e ngaahi lēsoni tatau ʻi he tohi lēsoni ʻa e faiakó.

ʻI he taimi ʻokú ke fakakaukauʻi ai ʻa e ngaahi lēsoni ke akoʻi ʻi ha kalasi femātākí, fakakaukauʻi pe ko e fē ʻa e ngaahi lēsoni ʻe ʻaonga taha ʻi ha kulupú. Te ke lava ʻo fai ha ngaahi fakaafe ki he kau akó ʻa ia te ne tokoniʻi kinautolu ke nau teuteu ki he kalasí. ʻE lava ke ʻoatu ʻe he ngaahi fokotuʻu ki he teuteu ʻa e tokotaha akó ʻi he kamataʻanga ʻo e lēsoni takitaha ha ngaahi fakakaukau ki he founga ke fakahoko ai ʻení. ʻI hoʻo palani ʻa e ngaahi aʻusia fakaako ʻo e ngaahi kalasi femātākí, fakaʻaongaʻi ha taimi ʻi he kalasí ke toe vakaiʻi ai ʻa e ngaahi fakamoʻoni fakafolofolá mo e ngaahi kupuʻi lea mahuʻinga ʻo e ngaahi potufolofola fakataukei fakatokāteline kuo toki ako ʻe he kau akó.

ʻOku totonu ke fakakakato ʻe he kau akó ʻa e ngaahi ngāue kuo fakafikefika mei he tohi lēsoni ʻa e tokotaha akó pea ʻoatu ia kiate koe ʻi he uike kotoa pē. ʻE lava ke fakahū fakaʻilekitulōnika ʻe he kau akó ʻenau ngāué (ʻi he ʻīmeilí, app ki he fepōpoakiʻakí, pe ko ha meʻa tatau mo ia) pe ʻi ha tohinoa ako. Kapau ʻoku fakahū ʻe he kau akó ʻenau ngāué ʻi ha tohinoa ako, ʻoku totonu ke ʻi ai haʻanau tohinoa ako ʻe ua koeʻuhí ke nau lava ʻo tuku ha taha mo koe ʻo ka fiemaʻu pea hokohoko atu e ngāué ʻi he taha, pea toki fakafetongi e tohinoá ʻi he taimi kotoa pē ʻoku mou fakataha aí.

ʻI hoʻo vakaiʻi e ngāue ʻa e kau akó, ʻoange ha fakamatala ʻoku fakapatonu mo ʻuhingamālié. Kumi ha ngaahi founga ke fakalotolahiʻi ai hoʻo kau akó pea mo tokoniʻi kinautolu ke nau tupulaki ʻi heʻenau akó. ʻE lava foki ke tokoni ‘aupito ki he kau akó kapau te ke kumi ha ngaahi founga ke fetuʻutaki ai mo kinautolu ʻi he lolotonga ‘o e uiké. Hangē ko ʻení, kapau ʻokú ke ako ʻa e ngaahi lēsoni ʻi he tohi lēsoni ko ʻení lolotonga iá ʻoku fakakakato ʻe he kau akó ʻa e ngaahi lēsoni tatau ʻi ʻapi, ʻe ala ueʻi koe ke ke vahevahe ha fehuʻi, fokotuʻu ha vitiō, pe maʻuʻanga tokoni kehe mei he tohi lēsoni ko ʻení mo e kau akó ʻo fakafou ʻi he ʻīmeilí, fepōpoakiʻaki fakakulupú, pe ngaahi founga kehe ʻo e fetuʻutakí. Te ke lava foki ʻo ʻoange ki he kau akó ha ngaahi fakamanatu pe fakalotolahi kae lava ke tokoni ke langaki ʻa e uouangataha ʻa e kalasí mo tokoniʻi e kau akó ke nau ongoʻi ʻoku nau kau mai ʻi heʻenau ako ʻa e ongoongoleleí mo tupulaki fakatahá.

Ke maʻu ha fakamatala lahi ange fekauʻaki mo e founga ke tokoniʻi ai e kau akó ke nau aʻusia e ngaahi ola ʻo e fakataukei fakatokāteliné, vakai ki he ako “Fakataukei Fakatokāteliné” ʻoku ʻi he ChurchofJesusChrist.org.

Ke maʻu ha fakamatala lahi ange ki he founga hono fakaʻaongaʻi ʻo e tohi lēsoni ko ʻení ke tokoni ke siviʻi e ako ʻa e tokotaha akó, vakai ki he ako “Ako ki he Ngaahi Siví” ʻoku ʻi he ChurchofJesusChrist.org.