Ngaahi Naunau Fakafeʻiloakí

Vakai Fakalūkufuá

Te ke ako ʻa e Fuakava Foʻoú he taʻú ni ʻi he seminelí. ʻE tokoni atu ʻa e ngaahi lēsoni ʻo e uike ní ke ke teuteu ai ke ako fekauʻaki mo Sīsū Kalaisi ʻi he mālohi ʻo e Laumālie Māʻoniʻoní ʻi hoʻo ako ʻi he taʻu ní.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

Talateu ki he Fuakava Foʻoú

Taumuʻa ʻo e lēsoní: Tokoniʻi e kau akó ke nau haʻu kia Sīsū Kalaisi pea muimui kiate Ia ʻi heʻenau ako ʻa e Fuakava Foʻoú.

Teuteu ʻa e tokotaha akó: Fakaafeʻi ʻa e kau akó ke nau fakakaukau ki he ʻuhinga ʻe ʻaonga ai ke ako ʻa e Fuakava Foʻoú ʻi he taʻu ní. ʻE ala ʻaonga ke fakaafeʻi kinautolu ke nau fehuʻi ki ha niʻihi ʻo e kau mēmipa honau fāmilí ki he ʻuhinga ʻoku nau pehē ai ʻe ʻaonga iá.

Naunau maʻá e kau akó: Fakapapauʻi ʻoku maʻu ʻe he tokotaha ako takitaha ha tohinoa ako folofola pea ʻokú ne maʻu ha tatau fakaʻilekitulōnika pe tatau kuo paaki ʻo e Fuakava Foʻoú (ko ha pulusinga ʻa e Siasí ʻoku ʻi ai hono ngaahi futinouti, fakahokohoko fakamotuʻalea, mo e ngaahi meʻa pehē, kapau ʻoku maʻu ʻi hoʻo lea fakafonuá).

Fokotuʻu ki hono akoʻi ʻi he konifelenisi vitioó: Fakakaukau ke tuku ha taimi kimuʻa pea kamata e lēsoní ke fakafeʻiloaki koe ki he kau akó mo tokoniʻi e kau akó ke nau feʻilongaki.

Ko Hono Ako ʻo e Folofolá

Taumuʻa ʻo e lēsoní: Tokoniʻi e kau akó ke nau haʻu kia Kalaisi pea ʻiloʻi lelei ange Ia ʻi heʻenau ako e folofola ʻa e ʻOtuá ʻaki hono fakatupulaki ʻenau ngaahi taukei ako folofolá mo fokotuʻu ha ngaahi taumuʻa ako folofola.

Teuteu ʻa e tokotaha akó: Kapau ʻe lava, ʻai ke fakakakato ʻe he kau akó ʻa e siviʻi ʻo e ako folofolá ʻi ha ngaahi ʻaho siʻi kimuʻa he kalasí. Fakakaukau ke fakahoko ʻeni ʻi ha founga fakaʻilekitulōnika pe ʻoange ki he kau akó ʻa e laʻipepa tufa ʻo e siví ke nau fakafonu mai ia ʻo ʻikai tohi honau hingoá, kimuʻa ʻi he lēsoni ko ʻení.

Ko e Ako ʻi he Laumālié

Taumuʻa ʻo e lēsoní: Tokoni ke mahino ki he kau akó ʻa e founga ʻoku tokoniʻi ai kinautolu ʻe he Laumālie Māʻoniʻoní ke nau ako e moʻoní mo maʻu ha fakahā fakatāutahá.

Teuteu ʻa e tokotaha akó: Fakaafeʻi e kau akó ke nau lau e Sione 14:26–27 pea fakakaukau ki he ngaahi aʻusia kuo nau ongoʻi pe ako ai ha meʻa mei he Laumālie Māʻoniʻoní ʻi he ngaahi founga naʻe fakamatalaʻi ʻe he Fakamoʻuí ʻi he ongo veesi ko ʻení.

Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi ʻa e whiteboard koeʻuhí ke lisi ʻe he kau akó ʻa e ngaahi founga ʻoku fakamatalaʻi ai ʻa e Laumālie Māʻoniʻoní ʻi he ngaahi potufolofola ʻoku lisi atu ʻi he lēsoní.

Ako ‘i he Tui kia Sīsū Kalaisí

Taumuʻa ʻo e lēsoní: Tokoni ke mahino ki he kau akó ʻa e mahuʻinga ʻo e ngāue ʻi he tui kia Sīsū Kalaisí ʻi heʻenau ako ʻi he seminelí.

Teuteu ʻa e tokotaha akó: Fakaafeʻi e kau akó ke nau fakalaulauloto ki he fehuʻi ko ʻení: Ko e hā ha meʻa kuó ke fakahoko ʻoku tokoni lahi taha kiate koe ʻi hoʻo ako ʻa e ongoongoleleí?

Naunau maʻá e kau akó: ʻOmi ha laʻipepa maʻá e tokotaha ako takitaha, ko ha laʻipepa ʻoku lahi feʻunga ke vahevahe ki ha kōlomu ʻe tolu.

Talateu ki he Fakataukei Fakatokāteliné

Taumuʻa ʻo e lēsoní: Fakafeʻiloaki e kau akó ki he fakataukei fakatokāteliné pea mo e founga ʻe lava ai ʻo tāpuekina ʻenau moʻuí mo tokoniʻi kinautolu ke langa honau fakavaʻe fakalaumālié ʻia Sīsū Kalaisí.

Teuteu ʻa e tokotaha akó: Fakaafeʻi e kau akó ke fili ha taha ʻo e ngaahi potufolofola fakataukei fakatokāteline ʻoku nau pehē ʻoku nau saiʻia aí, ʻe lava ke tokoni ʻi ha fiemaʻu fakataautaha, pe tali haʻanau fehuʻi. ʻOku maʻu ha lisi ʻo e ngaahi potufolofolá ʻi he polokalama Fakataukei Fakatokāteliné pe ofi ki he fakaʻosinga ʻo e Fakamatala ki he ʻElito ʻo e Fakataukei Fakatokāteliné.
Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi ʻa e fanga kiʻi loki breakout ke tokoni ki he kau akó ke nau aleaʻi ha fehuʻi ʻe taha pe lahi ange ʻi he lēsoní.

Laʻipepa Tufa: Teuteuʻi ʻa e laʻipepa tufa “Ko Hoku Fakavaʻe Fakalaumālié” maʻá e tokotaha ako takitaha.
Meʻa ke fakaʻaliʻalí: Teuteu ke fakaʻaliʻali e fakatātā ʻokú ne fakatātaaʻi e ngaahi ʻelemēniti ʻo e ngaahi lēsoni fakataukei fakatokāteliné.