Ako ʻaki ‘a e Laumālié
Ko Hono Fakaafeʻi ʻo e Laumālie Māʻoniʻoní ke Akoʻi Koe
ʻOku finangalo ʻa e Tamai Hēvaní mo Sīsū Kalaisi ke fakahā mai kiate kitautolu ʻa e moʻoní ʻi he mālohi ʻo e Laumālie Māʻoniʻoní. ʻE tokoni atu ʻa e lēsoni ko ʻení ke mahino kiate koe ʻa e founga ʻoku tokoniʻi ai koe ʻe he Laumālie Māʻoniʻoní ke ke ako ʻa e moʻoní mo maʻu ha fakahā fakataautaha. Te ke ako foki mo e founga ke fakaafeʻi ‘aki ‘a e Laumālie Māʻoniʻoní ke ne akoʻi koé, mo e founga ke ʻiloʻi ai e taimi ʻokú ke ako ʻaki ai e Laumālié.
Teuteu ʻa e tokotaha akó: Fakaafeʻi e kau akó ke nau lau ‘a e Sione 14:26–27 pea fakakaukau ki ha ngaahi aʻusia ‘i he taimi naʻa nau ongoʻi pe ako ai ha meʻa mei he Laumālie Māʻoniʻoní ʻi he ngaahi founga naʻe fakamatalaʻi ʻe he Fakamoʻuí ʻi he ngaahi veesi ko ʻení.
Ngaahi ʻEkitivitī Ako ʻOku Ala Fakahokó
Lau leʻolahi ʻa e talanoa fakatātā ko ʻení. Tuku ange leva ha taimi ki he kau akó ke nau fakalaulauloto ai ki heʻenau holi mo e loto-falala ʻi hono ʻiloʻi mo ako ʻaki e Laumālié.
Fakakaukauloto naʻá ke fakaafeʻi mai haʻo kaungāmeʻa ke kau mai ki he seminelí ko ʻene fuofua taimí ia. ʻI he taha ʻo e ngaahi fuofua aʻusia ʻa ho kaungāmeʻá ʻi he seminelí, naʻe fakamatalaʻi ai ʻe he faiakó ʻa e mahuʻinga ʻo hono fakaafeʻi ʻo e Laumālie Māʻoniʻoní ke hoko ko e faiako moʻoní, lolotonga ‘a e ako folofola seminelí mo fakatāutahá. Naʻe fakamoʻoni ʻa e faiakó ʻoku fakafou ʻi he Laumālie Māʻoniʻoní ʻa e lava ʻa e kau akó ʻo maʻu ha ngaahi pōpoaki fakataautaha mei he Tamai Hēvaní ʻa ia ʻoku ʻikai lea ʻaki leʻolahi ʻi he kalasí. Naʻe fehuʻi atu ho kaungāmeʻá pe ko e hā e ʻuhinga ʻo e ako mei he Laumālie Māʻoniʻoní.
Lolotonga hoʻo fakakaukau ki he founga ke tali ʻakí, fakalaulauloto ki he ngaahi fehuʻi ko ʻení. Manatuʻi ʻa e ngaahi fakakaukau mo e ngaahi ongo ʻoku maʻu ʻi hoʻo ako ʻa e lēsoni ko ʻení.
-
ʻOkú ke pehē ʻe liliu fēfē nai e aʻusia ho kaungāmeʻa ʻi he seminelí kapau naʻá ne ongoʻi naʻe fetuʻutaki ʻa e ʻOtuá mo ia ʻi heʻene ako ʻa e ongoongoleleí?
-
Ko e hā e mālohi ‘o e loto-falala ʻokú ke maʻú, ʻi hoʻo ʻiloʻi e ivi tākiekina ʻo e Laumālie Māʻoniʻoní ʻi hoʻo moʻuí mo hono fakaafeʻi Ia ke akoʻi koé?
Ko e hā e meʻa ʻoku fakahoko ʻe he Laumālie Māʻoniʻoní maʻatautolú?
Lolotonga hoʻo ako e ongoongoleleí, ʻe lava ke ʻoatu ʻe he Laumālie Māʻoniʻoní ha fakahā fakataautaha kiate koe. Naʻe akonaki ʻa Palesiteni Russell M. Nelson ʻo pehē:
ʻOku ʻikai fie maʻu ke ke fifili pe ko e hā ʻoku moʻoní [vakai, Molonai 10:5 ]. ʻOku ʻikai fie maʻu ke ke fifili pe ko hai te ke falala moʻoni ki aí. ʻI he fakahā fakatāutahá, te ke lava ai ʻo maʻu hoʻo fakamoʻoni pē ʻaʻau ko e Tohi ʻa Molomoná ko e folofola ia ʻa e ʻOtuá, ko Siosefa Sāmita ko ha palōfita, pea ko e Siasi ʻeni ʻo e ʻEikí. Tatau ai pē pe ko e hā ʻe lea ʻaki pe fai ʻe he niʻihi kehé, he ʻikai lava ‘e ha taha ʻo toʻo ha fakamoʻoni kuo fakatō ki ho lotó mo e ʻatamaí ʻo fekauʻaki mo e meʻa ʻoku moʻoní.
ʻOku ou poupouʻi atu ke fakalahi hoʻomou tuʻunga fakalaumālie lolotongá ke maʻu e fakahā fakatāutahá,. … ʻOku lahi fau ha ngaahi meʻa ʻoku finangalo ʻa hoʻo Tamai Hēvaní ke ke ʻilo. …
… Ko e moʻoni mahuʻinga taha ʻe lava ke fakamoʻoni ʻe he Laumālie Māʻoniʻoní kiate koé ko Sīsū ʻa e Kalaisí, ko e ʻAlo ʻo e ʻOtua Moʻuí. ʻOkú Ne moʻui!
(Russell M. Nelson, “Fakahā maʻá e Siasí, Fakahā ki Heʻetau Moʻuí,” Ensign pe Liahona, Mē 2018, 95–96)
Fakakaukau ke fakamanatu ki he kau akó ʻa e fakaafe teuteu ʻa e tokotaha akó ʻi he kamataʻanga ʻo e lēsoni ko ʻení. ʻE lava ke vahevahe ʻe he kau akó ha ngaahi fakakaukau mei heʻenau teuteú, kae ʻikai tali e ongo fehuʻi ‘e ua hono hokó.
-
Ko e hā e meʻa naʻá ke mahuʻingaʻia ai mei he lea ʻa Palesiteni Nalesoní?
-
Ko e hā e ‘uhinga ‘okú ke pehē ai ko e fakamoʻoni ko Sīsū ʻa e Kalaisí, ko e ʻAlo ʻo e ʻOtua moʻuí ‘a e foʻi moʻoni mahuʻinga taha ʻe lava ke fakamoʻoniʻi ʻe he Laumālie Māʻoniʻoní?
Fakaafeʻi e kau akó ke nau tali ʻa e fehuʻi ko ʻení ʻi haʻanau ngāue tauhoa pe ngāue ‘i ha fanga kiʻi kulupu iiki. Lue takai ʻi he lokí pea fakafanongo ki he ngaahi talí ke fakafuofuaʻi e mahino ‘oku maʻu ʻe he tokotaha akó ki he moʻoni ko ʻení.
-
Te ke fakamatalaʻi fakanounou fēfē ki ho kaungāmeʻá ʻi ha sētesi ʻe taha pe ua, ʻa e mahuʻinga ʻo e fakahā fakatāutahá ʻi heʻene ako e ongoongoleleí?
Te tau ʻiloʻi fēfē nai ‘a e ivi tākiekina ʻo e Laumālie Māʻoniʻoní?
Fakakaukauloto ʻoku kamata ke fakahaaʻi ʻe hoʻo kaungāmeʻá ʻa e mahuʻingaʻia moʻoni ʻi hono maʻu ha fakahā mei he ʻOtuá. Ka ʻokú ne tala atu, “ʻOku ʻikai ke u fakapapauʻi pe kuó u maʻu ha fakahā kimuʻa. Te u ʻiloʻi fēfē nai ʻa e Laumālie Māʻoniʻoní?”
Lau ʻa e ngaahi potufolofola ko ʻení ke tokoni atu ki hoʻo talí. Fakatokangaʻi ange ʻa e founga ʻoku fakamatalaʻi ai ʻa e ivi tākiekina ʻo e Laumālié.
Fakakaukau ke hiki ʻa e ngaahi fakamoʻoni fakafolofola ko ʻení (pe ko ha [ngaahi fakamoʻoni] kehe kuó ke fili) ʻi he palakipoé pea fakaafeʻi e kau akó ke nau fili ha fakamoʻoni fakafolofola ʻe taha pe ua ke nau ako. Fakaafeʻi ke nau hiki ʻi he palakipoé ʻi he tafaʻaki ʻo e fakamoʻoni fakafolofola ʻoku fekauʻaki mo iá, ʻa e meʻa ʻoku nau ako fekauʻaki mo e ivi tākiekina ʻo e Laumālie Māʻoniʻoní.
Ke tokoni ki hono tali ʻe he kau akó ʻa e ngaahi fehuʻi ko ʻení, fakakaukau ke fakaafeʻi kinautolu ke nau fili ha potufolofola pea fakaʻaongaʻi ia ke akoʻi ha kaungāmeʻa fekauʻaki mo e Laumālie Māʻoniʻoní.
-
Ko e fē ʻi he ngaahi fakamatala naʻá ke lau fekauʻaki mo e Laumālie Māʻoniʻoní te ke fie vahevahe mo ho kaungāmeʻá? Ko e hā hono ʻuhingá?
-
Te ke fakamatalaʻi fēfē nai ʻa e ngaahi founga kuó ke aʻusia ai e ivi tākiekina ʻo e Laumālie Māʻoniʻoní lolotonga hoʻo ako e ongoongoleleí?
ʻE lava ke hoko ‘a e fehuʻi kuo toki ‘osí ko ha konga mahuʻinga ia ʻo e lēsoni ko ʻení. Fakapapauʻi ke ʻoange ha taimi feʻunga ki he kau akó ke nau tali ai e fehuʻí. Fakakaukau ke ʻeke ki he kau akó ha ngaahi fehuʻi ke muimuiʻi ʻa e meʻa ne nau fakahoko ke teuteuʻi ai kinautolu ki heʻenau ngaahi aʻusia ʻi hono ongoʻi e ivi tākiekina ʻo e Laumālié.
Te tau lava fēfē nai ʻo fakaafeʻi ʻa e Laumālie Māʻoniʻoní ke akoʻi kitautolu?
‘Oku ‘ofaʻi kitautolu ‘e he‘etau Tamai Hēvaní, pea ‘okú Ne fie folofola mai kiate kitautolu ‘o fakafou mai ʻi he kihiʻi leʻosiʻi ‘o e Laumālie Māʻoniʻoní. Ka kuo pau ke tau fili pe ʻoku tau loto-fiemālie ke fekumi fakamaatoato ke maʻu ha fakahā meiate Ia. ‘Ikai ngata aí, ka ko e taimi ‘oku tau fakataha ai ko ha fāmili, kalasi, pe uōtí, ʻe lava ʻe heʻetau ngaahi holí, ngaahi tōʻongá, mo e ngaahi ngāué ʻo uesia e ni‘ihi kehe ʻoku tau feohí.
Naʻe akoʻi mai ‘e ʻEletā David A. Bednar ʻo e Kōlomu ʻo e Kau ʻAposetolo ʻe Toko Hongofulu Mā Uá ha ngaahi founga mahuʻinga te tau lava ai ʻo fakaafeʻi ‘a e Laumālie Māʻoniʻoní ke Ne akoʻi kitautolu.
ʻOku kamata ʻetau maʻu e Laumālie Māʻoniʻoní mei heʻetau holi fakamātoato ke maʻu ʻEne takauá ʻi heʻetau moʻuí. …
ʻOku tau fakaafeʻi e takaua ʻa e Laumālie Māʻoniʻoní he ngaahi founga lahi: ʻi hono fai mo tauhi e ngaahi fuakavá; lotu fakafoʻituitui mo fakafāmili fakamātoató; fekumi faivelenga he folofolá; fakamālohia e vā fetuʻutaki mo e fāmilí mo e kaungāmeʻá; feinga ke maʻu e ngaahi fakakaukau, tōʻonga, mo e lea ʻoku maʻá; moihū ʻi hotau ngaahi ʻapí, ʻi he temipale māʻoniʻoní, pea ʻi he falelotú.
(David A. Bednar, “Maʻu ʻa e Laumālie Māʻoniʻoní,” Ensign pe Liahona, Nōvema 2010, 96)
-
Ko e fē ʻi he ngaahi tōʻonga fakakaukau pe ngaahi ngāue naʻe lau ki ai ʻa ʻEletā Bednar kuó ne tokoniʻi koe ‘i hono fakaafeʻi mai ʻa e Laumālié ki hoʻo moʻuí?
-
Ko e hā ha founga kuó ke vakai ai ki ha tōʻonga fakakaukau pe ngaahi fili ʻa ha taha ʻokú ne fakafaingofuaʻi (pe fakafaingataʻaʻiaʻi) ha niʻihi kehe ʻi ha fāmili pe kalasi ke akoʻi ʻe he Laumālié?
Fakakaukau ke fakaafeʻi e kau akó ke nau vahevahe ʻa e founga ʻoku nau fie maʻu ke ʻulungaanga ʻaki ʻi he loki akó mo e founga te nau fakaafeʻi ai ʻa e Laumālié ke hoko ko e faiako ʻi he kalasí.
ʻE lava ke fakakaukau ʻa e kau akó ki he meʻa kuo nau ako ʻi he lēsoni ko ʻení, ʻaki ʻenau tali ʻa e ngaahi fehuʻi ko ʻení ʻi heʻenau tohinoa akó.
-
Kuo tākiekina fēfē nai hoʻo holi pe ivi malava ke ako ʻi he Laumālié ʻe he meʻa naʻá ke ako he ʻaho ní?
-
Ko e hā te ke fie ako lahi ange fekauʻaki mo e fakahā fakatāutahá, pea mo hono akoʻi koe ʻe he Laumālié?
-
Ko e hā ‘a e meʻa te ke fakahoko ʻi ʻapi mo e seminelí ke fakaafeʻi e Laumālié ke ʻiate koe ʻi hoʻo ako ʻa e Fuakava Foʻoú?
Poupouʻi e kau akó ke hiki ʻenau ngaahi tali ki he fehuʻi kimuʻá ʻi ha feituʻu te nau lava ʻo vakai ki ai lolotonga e taʻú.
Fakahoko ha fakamoʻoni ʻoku finangalo ‘a e ʻOtuá ke folofola ki he tokotaha ako takitaha, ʻo fakafou ʻi he Laumālie Māʻoniʻoní.
Fakamatala Fakamahino mo e Puipuituʻá
ʻOku finangalo moʻoni nai ʻa e ʻEikí ke fakahā mai ha ngaahi meʻa kiate au?
Naʻe fakamatala ʻe Palesiteni Russell M. Nelson ʻo pehē:
Ko e meʻa ʻe taha kuo toutou ʻomi ʻe he Laumālié ki heʻeku fakakaukaú … ko e hōifua ko ia ʻa e ʻEikí ke fakahā ʻEne fakakaukaú mo Hono finangaló. Ko e faingamālie ko ia ke maʻu fakahaá, ko e taha ia ʻo e ngaahi meʻaʻofa lelei taha ʻa e ʻOtuá ki Heʻene fānaú.
(Russell M. Nelson, “Fakahā maʻá e Siasí, Fakahā ki Heʻetau Moʻuí,” Ensign pē Liahona, Mē 2018, 94)
Te u fakaafeʻi fēfē nai ʻa e Laumālie Māʻoniʻoní ke akoʻi au?
Naʻe tokoni ʻa ʻEletā Ulisses Soares ʻo e Kōlomu ʻo e Kau ʻAposetolo ʻe Toko Hongofulu Mā Uá ki hono tali ‘o e fehuʻí ni.
ʻOku fie maʻu ki ai ʻa e lotu ki he ʻOtuá pea ako ki he founga ʻo hono fakatefito ʻetau moʻuí ʻi he ongoongolelei ʻo Sīsū Kalaisí. Kapau te tau fai ia, ʻoku ou palōmesi ʻe ʻomai ʻe he tākiekina ʻo e Laumālie Māʻoniʻoní ʻa e moʻoní ki hotau lotó mo e ʻatamaí pea te tau fakamoʻoniʻi ia, pea akoʻi ʻa e meʻa kotoa.
(Ulisses Soares, “ʻE Mahino Fēfē Kiate Au?,” Ensign pe Liahona, Mē 2019, 7)
Ko e hā ha meʻa te ne tohoakiʻi ʻeku tokangá mei hono maʻu e fakahā ʻoku finangalo e ʻEikí ke ʻomi kiate aú?
Naʻe vahevahe mai ʻe ʻEletā David A. Bednar ʻo e Kōlomu ʻo e Kau ʻAposetolo ʻe Toko Hongofulu Mā Uá ‘a e fakakaukau ko ʻení:
Kapau ʻoku ʻi ai ha meʻa ʻoku tau fakakaukauʻi, mamata, fanongo, pe fakahoko te ne tohoakiʻi ke tau mavahe ai mei he Laumālie Māʻoniʻoní, tā ʻoku totonu ke ʻoua te tau fakakaukauʻi, mamata, fanongo pe fakahoko ia. Hangē ko ʻení, kapau ʻe hoko e meʻa naʻe fakataumuʻa ke ne fakafiefiaʻi kitautolú, ke tau mavahe ai mei he Laumālie Māʻoniʻoní, tā ʻoku ʻikai toe veiveiua ko e faʻahinga fakafiefia hala ia maʻatautolu. Koeʻuhí ʻoku ʻikai lava ke nofo ʻa e Laumālié ʻi ha meʻa ʻoku taʻefeʻunga, taʻe-maau, pea taʻe-taau, tā ʻoku mahino ʻoku ʻikai ko e meʻa totonu ia maʻatautolú.
(David A. Bednar, “That We May Always Have His Spirit to Be with Us,” Ensign or Liahona, May 2006, 30)
Naʻe akonaki ʻa Palesiteni M. Russell Ballard ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻOku fuʻu tokolahi fau hono tuku ʻe ha niʻihi e meimei kotoa ʻo ʻenau moʻuí ki he ʻinitanetí mo ʻenau ngaahi naunau toʻotoʻó—ʻokú ne hulungia honau fofongá ʻi he ʻaho mo e pō mo ha vavae ʻi honau telingá ʻo tekeʻi ai e kihiʻi leʻo siʻi mo vanavanaiki ʻo e Laumālié. Kapau he ʻikai ke tau kumi ha taimi ke fakamamaʻo ai, ʻe ala mole meiate kitautolu e faingamālie ke ongoʻi e leʻo ʻo Ia naʻá ne pehē, “Mou longo pē, pea ʻilo ko au ko e ʻOtuá” [Saame 46:10].
(M. Russell Ballard, “Ngaahi Meʻaʻofa Mahuʻinga mei he ʻOtuá,” Ensign pe Liahona, Mē 2018, 10)
Te u lava fēfē nai ʻo ʻiloʻi ʻa e fakahā ki hoku ʻatamaí?
Naʻe akonaki ʻa e Palōfita ko Siosefa Sāmita ʻo pehē:
ʻE ala ʻaonga ki ha taha ke ne fakatokangaʻi ʻa e ʻuluaki fakaʻilonga ʻo e laumālie ʻo e fakahaá; hangē ko ʻení, ko e taimi te ke ongoʻi ai ʻa e ʻilo haohaoa ʻokú ke taumalingi mai kiate koé, ʻe lava ke ʻoatu ai ha ngaahi fakakaukau fakafokifā.
Naʻe vahevahe ‘e ʻEletā Richard G. Scott (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ‘a e fakakaukau ko ʻení:
Ko ha ongo ki he ʻatamaí ʻoku mātuʻaki pau ia. ʻE lava pē ke ongona pe ongoʻi ha ngaahi fakamatala fakaikiiki, pea tohi ʻo hangē pē naʻe tala fakahangatonu mai e fakahinohinó kae tohí.
(Richard G. Scott, “Helping Others to Be Spiritually Led” [lea naʻe fakahoko ki he kau ako fakalotu ‘i he fakataha naʻe fakahoko ke aleaʻi ʻa e Tokāteline mo e Ngaahi Fuakavá, pea mo e hisitōlia ‘o e Siasí, ʻi he Univēsiti Brigham, 11 ‘Aokosi 1998]; vakai foki, Teaching Seminary: Preservice Readings [2004], 55)
Te u lava fēfē nai ʻo tala ʻa e faikehekehe ʻo e ngaahi ueʻi mei he Laumālie Māʻoniʻoní pea mo ʻeku ngaahi fakakaukau pē ‘aʻakú?
Naʻe tokoni ʻa ʻEletā David A. Bednar ʻo e Kōlomu ʻo e Kau ʻAposetolo ʻe Toko Hongofulu Mā Uá mo hono uaifí ko Sisitā Susan Bednar, ke tali ʻa e fehuʻi ko ʻení ʻi he vitiō “Elder and Sister Bednar—Recognizing the Spirit” (“ʻEletā mo Sisitā Bednar—Ko Hono ‘Iloʻi ‘o e Laumālié” (fakaʻilonga taimi 0:00 ki he 5:13), ʻoku ʻi he ChurchofJesusChrist.org.