Talateu ki he Taukei Fakatokāteliné

Ko e Taumuʻa ʻo e Taukei Fakatokāteliné

ʻE fakafeʻiloaki koe ʻe he lēsoni ko ʻení ki he taukei fakatokāteliné, mo e founga ʻe lava ke ne tāpuekina ai hoʻo moʻuí mo tokoniʻi koe ke langaki hake ho fakavaʻe fakalaumālié ʻia Sīsū Kalaisi.

Ueʻi fakalaumālie mo taimi totonu. Naʻe fakahoko ʻe Palesiteni M. Russell Ballard ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e fanongonongo ko ʻení ki he kau faiako seminelí mo e ʻinisititiutí: “ʻOku ueʻi fakalaumālie mo taimi totonu ʻa e [Taukei Fakatokāteliné]. Te ne hoko ko ha ivi tākiekina lahi ki hotau kakai kei talavoú. Ka, ko e ola lelei ʻo e Taukei Fakatokāteliné … ʻe fakafalala ia ki ha konga mahuʻinga ‘iate koe” (M.Russell Ballard, “Ko e Ngaahi Faingamālie mo e Ngaahi Fatongia ʻo e Kau Faiako ʻa e CES ʻi he Senituli hono 21” [efiafi mo e Taki Māʻolungá 26 Fēpueli 2016], broadcasts.ChurchofJesusChrist.org).

Teuteu ʻa e tokotaha akó: Fakaafeʻi e kau akó ke fili ha taha ʻo e ngaahi potufolofola taukei fakatokāteline ʻoku nau pehē ʻoku manakoa, ʻe lava ke tokoni ʻi ha fiemaʻu fakataautaha, pe tali haʻanau fehuʻi. ʻOku maʻu ha lisi ʻo e ngaahi potufolofolá ʻi he Doctrinal Mastery app pe ofi ki he fakaʻosinga ʻo e Fakamatala ki he ʻElito ʻo e Taukei Fakatokāteliné.

Ngaahi ʻEkitivitī Ako ʻOku Ala Fakahokó

Langa ha fakavaʻe ʻia Sīsū Kalaisi

Tornado, building and power lines in Cordele, Georgia, on April 5. 2017. (vert)

Naʻe fakatokanga ʻa ʻEletā Neil L. Andersen ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e ngaahi ‘ahiohio fakalaumālié ʻo pehē:

Ko e meʻa ʻoku toe fakahohaʻa lahi ange ʻi he ngaahi mofuike mo e ngaahi tau kuo kikiteʻi [‘i he ngaahi ‘aho kimui ní] ko e ngaahi ‘ahiohio fakalaumālie te nau lava ke taʻaki koe mei ho fakavaʻe fakalaumālié mo ʻave ho laumālié ki ha ngaahi feituʻu naʻe ʻikai ke ke teitei fakakaukau ʻe malava, pea ʻi he taimi ʻe niʻihi ʻoku ʻikai ke ke faʻa fakatokangaʻi hono ʻave koé.

(Neil L. Andersen, “Ngaahi Faingataʻa Fakalaumālié,” Ensign pe Liahona, Mē 2014, 18)

Ko e hā ha niʻihi ʻo e ngaahi ʻahiohio fakalaumālie ʻoku nau feinga ke taʻaki kitautolu mei hotau ngaahi fakavaʻe fakalaumālié?

Fakakaukau ki ha ʻahiohio fakalaumālie ‘okú ke ala fehangahangai mo ia. Lau ʻa e Hilamani 5:12 pea kumi ha ngaahi founga ke matuʻuaki ai ʻa e ʻahiohio ko ʻení.

Ko e hā naʻá ke fakatokangaʻi ʻe lava ʻo tokoni atu ke ke matuʻuaki ʻa e ngaahi ʻahiohio fakalaumālié?
ʻOkú ke pehē ko e hā ‘a e ‘uhinga ‘o e langa hotau fakavaʻé ʻia Sīsū Kalaisí?
Ko e hā ha ngaahi founga te ke maʻu ai ha lelei fakataautaha mei hono langa ha fakavaʻe mālohi ʻia Sīsū Kalaisí?

Ko Hoku Fakavaʻe Fakalaumālié

Fakakaukau ki ho fakavaʻe fakalaumālié peá ke fakafuofuaʻi koe ʻi he ngaahi fakamatala ko ʻení ʻaki ʻa e “Fiemālie,” “Fiemālie siʻisiʻi pē,” “Kiʻi Taʻefiemālie,” pe “Taʻefiemālie.”

ʻOku ou langa ha fakavaʻe mālohi ʻia Sīsū Kalaisi mo ʻEne ongoongoleleí.
ʻOku ou fakatupulaki ʻeku ʻilo kia Sīsū Kalaisi mo ʻEne tokāteliné.
ʻOku ou ongoʻi fiemālie ʻi hono ngāue ʻaki ‘a e folofolá ke fakamatalaʻi e tokāteline ʻo Sīsū Kalaisí.
ʻOku ou lava ʻo maʻu e tali ki heʻeku ngaahi fehuʻí pe ko e ngaahi fehuʻi ʻa e niʻihi kehé fekauʻaki mo e ongoongoleleí.

Taukei fakatokāteliné

ʻE lava ke tokoniʻi koe ʻe he seminelí ke langa ho fakavaʻé ʻia Sīsū Kalaisi ʻi hoʻo ako ʻEne tokāteliné, haʻu kiate Ia, pea hoko ko ʻEne ākonga (vakai, 3 Nīfai 11:39). Lau ʻa e ʻuluaki palakalafi ʻe ua ʻi he “Talateu ki he Taukei Fakatokāteliné” vahe ʻo e Fakamatala ki he ʻElito ʻo e Taukei Fakatokāteliné (2022), ʻo kumi ki he ngaahi founga ʻe lava ke tokoniʻi ai koe ʻe he seminelí ke langa ho fakavaʻé ʻia Sīsū Kalaisí.

Ko e hā e meʻa naʻá ke maʻú?

ʻOku ʻi ai ha ola tefito ʻe ua ki he taukei fakatokāteliné ʻe tokoni atu ke langa ho fakavaʻé ʻia Sīsū Kalaisi. Lau e ola ʻe ua ki he taukei fakatokāteliné ʻi he “Talateu ki he Taukei Fakatokāteliné” vahe ʻo e Fakamatala ki he ʻElito ʻo e Taukei Fakatokāteliné.

Te ke ngāue ʻi he seminelí he uike takitaha ki he taukei fakatokāteliné. ʻI he konga lahi taha ʻo e ngaahi lēsoni ko ʻení, te ke ako ai ha taha ʻo e ngaahi potufolofola ʻe 24 mei he Fuakava Foʻoú ʻoku ʻiloa ko e ngaahi potufolofola taukei fakatokāteline. ʻOku fakatātaaʻi ʻe he fakatātā ko ʻení ʻa e meʻa te ke fai ʻi he ngaahi lēsoni taukei fakatokāteliné.

Fakakaukau ke fakaʻaliʻali ʻa e fakatātaá pe tā ia ʻi he palakipoé. ʻOku fakafofongaʻi ʻe he fakatātā ko ʻení ʻa e founga ʻoku fokotuʻutuʻu ai ʻa e ngaahi lēsoni taukei fakatokāteliné.

ʻIloʻi mo fakamatalaʻi e tokāteliné

ʻAi ke ke ongoʻingofua ʻa e matuʻotuʻa fakalaumālie ʻo e tokotaha ako takitaha. Fekumi ʻi he faʻa lotu ki he fakahinohino ʻa e Laumālie Māʻoniʻoní ʻi hoʻo ʻai ke fakataautaha e lēsoní ʻo fakatatau mo e ngaahi fiemaʻu ʻa e kau akó.

ʻI he konga kimuʻa ʻo e lēsoní, naʻá ke fakafuofuaʻi ai hoʻo ongoʻi fiemālie ʻi hono fakaʻaongaʻi ʻo e folofolá ke fakamatalaʻi ʻaki ʻa e tokāteline ʻo Sīsū Kalaisí. Tatau ai pē pe ko e hā hoʻo fakafuofuaʻi koé, ʻe hanga ʻe hoʻo ako e taukei fakatokāteliné ʻo fakatupulaki hoʻo ʻilo ki he Fakamoʻuí mo ʻEne tokāteliné. ʻE tupulaki hoʻo malava ko ia ke fakamatalaʻi ʻEne tokāteliné ʻo fakaʻaongaʻi e folofolá.

Vakai ki he lisi ʻo e ngaahi potufolofola taukei fakatokāteline ʻo e Fuakava Foʻoú mo ʻenau ngaahi kupuʻi lea mahuʻingá. Te ke lava ʻo maʻu ʻa e lisi ko ʻení ʻo ofi ki he fakaʻosinga ʻo e Fakamatala ki he ʻElito ʻo e Taukei Fakatokāteliné. Fili ha taha ʻo e ngaahi potufolofola ʻokú ke pehē ʻoku manakoá, ʻe lava ʻo tokoni ʻi ha fiemaʻu fakataautaha, pe tokoni ki haʻo fehuʻi.

Mahalo ʻe ʻaonga ki he kau akó hono aleaʻi e ngaahi fehuʻi ko ʻení mo hano hoa.

Ko e potufolofola fē naʻá ke filí?
Ko e hā ʻoku akoʻi atu ʻe he potufolofolá fekauʻaki mo Sīsū Kalaisí pe ko ‘Ene tokāteliné?
Ko e hā ha ngaahi founga ʻe tāpuekina ai hoʻo moʻuí ʻi hono ʻiloʻi e founga ke fakamatalaʻi ʻaki e tokāteline mei he potufolofola ko ʻení?

Maʻu ʻo e ʻIlo Fakalaumālié

ʻE kehekehe e aʻusia ʻa e tokotaha ako kotoa pē fekauʻaki mo e ngaahi tefitoʻi moʻoni ki hono maʻu ʻo e ʻilo fakalaumālié. Liliu ʻa e konga ko ʻeni ʻo e lēsoní ʻo fakatatau ki he ngaahi fiemaʻu mo e ngaahi meʻa ʻoku malava ʻe he kau akó. ʻOku ʻi ai ha ngaahi lēsoni kehekehe ʻamui ange ʻi he naunau fakalēsoní ki he tefitoʻi moʻoni takitaha ʻe tolu ki hono maʻu ʻo e ʻilo fakalaumālié. Kapau ʻoku siʻisiʻi pe ʻikai ha taukei ʻa e tokolahi ʻo e kau akó ʻi hono fakaʻaongaʻi ‘o e ngaahi tefitoʻi moʻoni ʻo hono maʻu e ʻilo fakalaumālié, fakakaukau ke akoʻi e konga “Maʻu ʻo e ʻIlo Fakalaumālié”, konga 1, 2, mo e 3 ʻo e ngaahi lēsoní, kimuʻa pea akoʻi e ʻuluaki lēsoni taukei fakatokāteliné.

ʻI he ngaahi lēsoni taukei fakatokāteliné, te ke maʻu ai ha faingamālie ke ako lahi ange mo akoako fekauʻaki mo hono fakaʻaongaʻi ‘o e ngaahi tefitoʻi moʻoni ʻo hono maʻu e ʻilo fakalaumālié ke tokoni atu ki hono tali e ngaahi fehuʻi fakatāutahá mo fakasōsialé, kae pehē ki he ngaahi fehuʻi fekauʻaki mo e tokāteliné, ngaahi founga ngāué, pe hisitōlia ʻo e Siasí. ʻE tokoni hoʻo ako mo fakaʻaongaʻi e ngaahi tefitoʻi moʻoni ko ʻení ke langa ho fakavaʻé ʻi he Fakamoʻuí pea tafoki kiate Ia ʻi hoʻo fehangahangai mo e ngaahi fehuʻí. Ko e ngaahi tefitoʻi moʻoni ʻe tolu ʻo hono maʻu ʻo e ʻilo fakalaumālié te ke akoako fakaʻaongaʻi ʻi he seminelí ko e:

Ngāue ʻi he tuí.
Sivisiviʻi ‘a e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá.
Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.

Kapau ʻoku ʻikai ke ke maheni mo e ngaahi tefitoʻi moʻoni ko ʻení, mahalo te ke fie lau ʻa e palakalafi 5–12 ʻi he vahe “Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Taukei Fakatokāteliné.

Ko e hā ʻokú ke ʻilo fekauʻaki mo e ngaahi tefitoʻi moʻoni ko ʻení?
Ko e hā ha ngaahi meʻa kuó ke aʻusia ʻi he ngaahi tefitoʻi moʻoni ko ʻení?
ʻOkú ke pehē ko e hā ha ngaahi founga ʻe lava ke tokoniʻi ai koe ʻe he ngaahi tefitoʻi moʻoni ko ʻení ke langa ho fakavaʻé ʻia Kalaisi mo matuʻuaki ʻa e ngaahi ‘ahiohio fakalaumālié?

Ngaahi potufolofola taukei fakatokāteliné

ʻE poupouʻi koe ʻi he seminelí ʻi he taʻu takitaha ke ke ako maʻuloto ha kupuʻi lea mahuʻinga ʻi he ngaahi potufolofola taukei fakatokāteline ʻe 24.

Naʻe akonaki ʻa ʻEletā Richard G. Scott (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e ako maʻuloto ‘o e potufolofola.

2:3

ʻOku lava ke maʻu ha mālohi lahi mei hono ako maʻuloto ʻo e folofolá. Ko hono ako maʻuloto ʻo ha potufolofolá ko hano kamata ia ʻo ha feohi fakakaungāmeʻa foʻou. ʻOku hangē ia hano toki ʻiloʻi ha taha foʻou ʻe lava ke tokoni ʻi he taimi ʻo e faingataʻá, ʻokú ne ueʻi mo fakafiemālieʻi kita, pea hoko ko ha maʻuʻanga poupou mo fakalotolahi ki ha liliu ʻoku fie maʻu.

(Richard G. Scott, “Ko e Mālohi ʻo e Folofolá,” Ensign pe Liahona, Nōvema 2011, 6)

ʻOkú ke pehē ko e hā ʻe tokoni ai ke ako maʻuloto ha ngaahi potufolofola kehekehé?
ʻOkú ke pehē ʻe tokoniʻi fēfē nai koe ʻe hono ako maʻuloto ʻo e folofolá ke langa ho fakavaʻé ʻia Sīsū Kalaisi mo matuʻuaki ʻa e ngaahi ʻahiohio fakalaumālié?

Fakaʻaongaʻi ha ngaahi miniti siʻi ke toe vakaiʻi ai e ngaahi potufolofola taukei fakatokāteline ʻe 24, mo e ngaahi kupuʻi lea fakafolofola mahuʻinga ki he kalasi ʻo e Fuakava Foʻoú. Te ke lava ʻo fakaʻaongaʻi ʻa e app Taukei Fakatokāteliné pe ko e Fakamatala ki he ʻElito ʻo e Taukei Fakatokāteliné. Mahalo te ke fie kamata ako maʻuloto ʻa e fakamoʻoni fakafolofolá mo e kupuʻi lea fakafolofola mahuʻinga ʻi he potufolofola naʻá ke fili kimuʻá.

Fakamatala Fakamahino mo e Puipuituʻá

Ko e hā ʻoku mahuʻinga ai ʻa e taukei fakatokāteliné?

Naʻe akonaki ʻa Palesiteni M. Russell Ballard ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻE nofotaha e [taukei fakatokāteliné] ʻi hono langa mo fakamālohia ‘a e tui ʻa ʻetau kau akó kia Sīsū Kalaisí mo fakamālohia kinautolu ʻaki ha malava lahi ange ke moʻui ʻaki mo fakaʻaongaʻi e ongoongoleleí ʻi heʻenau moʻuí. ʻI hono ako e folofolá mo e ngaahi lea ʻa e kau palōfitá, te nau ako ai e founga ke ngāue ʻaki e tui kia Kalaisí ke maʻu ai ʻa e ʻilo mo e mahino fakalaumālie ʻo ʻEne ongoongoleleí. Pea te nau maʻu ʻa e ngaahi faingamālie ke ako e founga ke fakaʻaongaʻi ai e tokāteline ʻo Kalaisí mo e ngaahi tefitoʻi moʻoni ʻo e ongoongoleleí ki he ngaahi fehuʻi mo e ngaahi faingataʻa ʻoku nau fanongo mo vakai ki ai he ʻaho kotoa pē ʻi he lotolotonga honau toʻú pea ʻi he mītia fakasōsialé.

(M. Russell Ballard, “Ko e Ngaahi Faingamālie mo e Ngaahi Fatongia ʻo e Kau Faiako ʻa e CES ʻi he Senituli hono 21”[efiafi mo ha Taki Māʻolunga, 26 Fēpueli, 2016], ChurchofJesusChrist.org)

Ngaahi ʻEkitivitī Fakalahi ki he Akó

ʻEkitivitī fakaʻilongaʻi ʻo e potufolofola taukei fakatokāteliné

Ke tokoni ke fakaʻilongaʻi ʻe he kau akó ‘a e ngaahi potufolofola taukei fakatokāteliné, fakakaukau ke fakaʻaongaʻi e ʻekitivitī ko ʻení. Fakapapauʻi ʻa e lahi ʻo e ngaahi potufolofola ke fakaʻaongaʻi ʻi he ʻekitivitī ko ʻení, pea vahe ki he tokotaha ako takitaha ha potufolofola (ʻe lava ke vahe ki ha kau ako tokolahi ʻa e potufolofola tatau pē).

ʻOange ha taimi ki he kau akó ke nau teuteu ai, pea fakaafeʻi kinautolu ke fakahoko ʻa e ngaahi meʻa ko ʻení: (1) ʻaʻahi ki ha mēmipa kehe ʻo e kalasí, (2) fevahevaheʻaki ʻenau ngaahi potufolofola taukei fakatokāteliné, pea (3) fakaʻilongaʻi ʻa e ngaahi potufolofolá. Toutou fakahoko tuʻolahi ‘a e ʻekitivitī ko ʻení.

Ke tānaki atu ha ngaahi founga kehekehe ange ki he ʻekitivitií, fakakaukau ke fakaafeʻi e kau akó ke nau tali ha fehuʻi ke tokoniʻi kinautolu ke nau maheni ange, pe vahevahe ha tūkunga ʻoku nau pehē ʻe tokoni ai hono ʻiloʻi e potufolofola ko ʻení.

Polokalama Taukei Fakatokāteliné

Tokoni ke download ʻe he kau akó ʻa e app Taukei Fakatokāteliné ʻi ha meʻangāue toʻotoʻo. Fakaʻaongaʻi e taimi kalasí ke tokoniʻi e kau akó ke nau maheni mo e app pea ngāue ki ha niʻihi ʻo e ngaahi ʻekitivitií. Poupouʻi e kau akó ke nau fakaʻaongaʻi ʻa e app ‘i tuʻa mei he kalasí.

Ako maʻuloto ʻa e ngaahi potufolofolá

Fakaafeʻi e kau akó ke nau fakakaukauloto ko kinautolu ko ha faifekau, mātuʻa, pe ko ha tali ‘o e ngaahi fehuʻi ʻa ha kaungāmeʻa fekauʻaki mo e ongoongoleleí. Kole ki he kau akó ke nau vahevahe ha ngaahi founga ʻe lava ke tokoniʻi ai kinautolu ʻi he ngaahi tūkunga ko iá ʻi hono ako maʻuloto ʻo e folofolá.