Mātiu 1; Luke 1

Vakai Fakalūkufuá

Ko Mātiu, ʻa ia ʻoku ʻiloa foki ko Līvaí, naʻá ne faʻu ʻa e ʻuluaki Kosipeli ʻo e Fuakava Foʻoú. Ko e taha ʻo ʻene ngaahi taumuʻa ʻi he tohí ko hono fakahaaʻi naʻe fakakakato ʻe Sīsū ʻa e ngaahi kikite ʻi he Fuakava Motuʻá fekauʻaki mo e Mīsaiá (vakai, Mātiu 1:1–17). Naʻe haʻu ʻa e ʻāngelo ko Kepalelí kia Mele ke fanongonongo ʻa e ʻaloʻi ʻo Sīsū Kalaisí, ko e “ʻAlo ʻo e Fungani Māʻolungá” (vakai, Luke 1:1–38). Lolotonga e feitama ʻa Mele ʻia Sīsuú, naʻá ne ʻaʻahi ki hono kāinga ko ʻIlisapetí pea fiefia fakataha mo ia ʻi he lelei ʻa e ʻOtuá (vakai, Luke 1:39–79).

Teuteu ke Faiako

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ‘i he lēsoni takitaha.

Mātiu 1:1–17

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau ako fekauʻaki mo Sīsū Kalaisi ko e Mīsaia kuo talaʻofa maí, pea ongoʻi ha houngaʻia lahi ange kiate Ia.

Teuteu ʻa e tokotaha akó: Fakaafeʻi ‘a e kau akó ke nau haʻu ki he kalasí kuo nau ‘osi fakakaukau ki he ʻuhinga ʻoku mahuʻinga ai ʻa Sīsū Kalaisi kiate kinautolú. Te nau lava foki ʻo fehuʻi ki honau fāmilí pe ngaahi kaungāmeʻá pe ko e hā ʻenau ongo fekauʻaki mo e Fakamoʻuí.

Vitiō: “Ko Hai ʻa Sīsū Kalaisi? Ko ha Vakai Fakalūkufua Sekoni ‘e 60” (1:23)
Vitiō: “Fanongonongo ‘e Sīsū ko Ia ‘a e Mīsaiá” (3:23; mamata mei he taimi 0:00 ki he 2:05)

Fokotuʻu ki hono akoʻi ʻo e konifelenisi fakavitioó: ʻI he kamataʻanga ʻo e lēsoní, ʻi he taimi ʻoku hiki ai ʻe he kau akó ha ngaahi fakaikiiki mahuʻinga fekauʻaki mo Sīsū Kalaisi ʻi ha laʻipepa, fakakaukau ke fakaafeʻi ‘a e kau akó ke taipeʻi ʻenau ngaahi talí pea pousi (post) hake kinautolu ʻo fakaʻaongaʻi ʻa e chat feature (polokalama fetalanoaʻakí). ʻOange ha taimi feʻunga ki he kau akó ke nau lau ai e meʻa kuo tohi ʻe he kau ako kehé.

Luke 1:1–38

Taumuʻa ʻo e lēsoní: ʻE tokoni ʻa e lēsoni ko ʻení ke ako ʻe he kau akó ʻa e founga ke tali ʻaki ‘a e finangalo ʻo e ʻEikí ʻi he falala lahi ange kiate Ia.

Teuteu ʻa e tokotaha akó:Fakaafeʻi ‘a e kau akó ke nau fakalaulauloto ki he fehuʻi ko ʻení: Ko e hā ʻokú ke ʻilo fekauʻaki mo e Tamai Hēvaní mo Sīsū Kalaisi ʻokú ne tokoniʻi koe ke ke falala kiate Kinauá?

ʻĪmisi: “Ko e Fakahā: Ko e Hā ʻa e ʻĀngelo ko Kepalelí kia Melé,” Tohi Fakatātā ʻo e Ongoongoleleí (2009), fika. 28
Vitiō: “Kikiteʻi ʻe ha ʻĀngelo kia Mele hono ʻAloʻi ʻo Sīsuú” (4:07)

Fokotuʻu ki hono akoʻi ʻo e konifelenisi fakavitioó: Kapau ʻoku maʻu ha fanga kiʻi loki, mahalo ʻe tokoni ke vahe fakakulupu e kau akó ki ai ke aleaʻi e ongo fehuʻi ʻoku muimui ki he fakamatala ʻa Palesiteni Nalesoní ʻi he fakaʻosinga ʻo e lēsoní. Vahe ki ha tokotaha ako ʻi he kulupu takitaha ke ne tataki ha fealēleaʻaki. ʻI he toe fakataha mai ʻa e kalasí, fakaafeʻi ʻa e kau tokoní ke nau fakamatalaʻi fakanounou ʻa e meʻa naʻe aleaʻi ʻe heʻenau ngaahi kulupú.

Ko Hono Maʻu ʻo e ʻIlo Fakalaumālié, Konga 1

Taumuʻa ʻo e lēsoní: ʻE tokoni ʻa e lēsoni ko ʻení ke mahino mo fakaʻaongaʻi ʻe he kau akó ʻa e tefitoʻi moʻoni pau ʻo e ngāue ʻi he tui kia Sīsū Kalaisí ʻi he taimi ʻoku hoko ai ha ngaahi faingataʻa mo ha ngaahi fehuʻi faingataʻa.

Teuteu ʻa e tokotaha akó:Kole ki he kau akó ke nau fakakaukau ki heʻenau ngaahi aʻusia ʻoku fefaʻuhi mo ha palopalema faingataʻa pe ko ha ngaahi fehuʻi ʻoku ʻikai faingofua hono fakaleleiʻí (mei heʻenau moʻuí pe mei he moʻui ʻa e niʻihi kehé). ʻE lava ke kau heni ha ngaahi meʻa hangē ko ha fehuʻi fakalaumālie ʻoku ʻikai tali pe ko ha ʻahiʻahi faingataʻa. Fakaafeʻi ‘a e kau akó ke fakalaulauloto ki he founga ne nau tali ʻakí pe te nau tali ʻaki ‘a e ngaahi tūkunga ko ʻení.

Laʻipepa Tufa: “ʻOku ʻuhinga ki he hā ʻa e ngāue ʻi he tuí?”

Fokotuʻu ki hono akoʻi ʻo e konifelenisi fakavitioó: Fakakaukau ke teuteuʻi ha fakaʻaliʻali silaiti (slide presentation) ʻaki ha fakamatala mei he laʻipepa tufá pe ʻave ʻa e laʻipepa tufá ki he kau akó ʻi he ʻīmeilí pe ko e polokalama ki hono tokangaʻi ʻo e akó. Fakaafeʻi ‘a e kau akó ke nau maʻu ‘a e laʻipepa tufá ke nau lava ʻo vakai ki ai lolotonga ‘a e kalasí.

Mātiu 1:18–25; Luke 1:26–35

Taumuʻa ʻo e lēsoní: ʻE tokoni ʻa e lēsoni ko ʻení ke mahino ki he kau akó ʻa e founga ʻoku hanga ai ʻe he ngaahi ʻulungaanga naʻe maʻu ʻe Sīsū mei ha faʻē fakamatelie mo ha Tamai taʻe-faʻa-mate ʻo ʻai ke makehe ʻEne malava ʻo tokoniʻi kitautolu ke tau ikunaʻi ʻa e ngaahi faingataʻa kotoa ʻo e moʻui fakamatelié.

Teuteu ʻa e tokotaha akó: Fakaafeʻi ‘a e kau akó ke nau fakakaukau ki he ngaahi faingataʻa ʻoku faʻa fehangahangai mo e kakai ʻi honau toʻú.

Vitiō: “Koeʻuhí ko Ia” (2:36)

Nāunau maʻá e Kau Akó:Pepa, peni vahevahe kala, kala valivali, mo e alā meʻa pehē.

Luke 1:39–79

Taumuʻa ʻo e lēsoní: ʻE ʻoange ʻe he lēsoni ko ʻení ha ngaahi faingamālie ki he kau akó ke nau fakatokangaʻi ai ʻa e lelei ʻo e ʻOtuá pea mo fakahīkihikiʻi Ia koeʻuhí ko e lelei ko iá.

Teuteu ʻa e tokotaha akó:Fakaafeʻi e kau akó ke nau haʻu mateuteu ki he kalasí ke vahevahe ha laine mei ha himi ʻokú ne fakamamafaʻi ‘a e lelei ʻo Sīsū Kalaisí.

Fokotuʻu ki hono akoʻi ʻo e konifelenisi fakavitioó: Teuteu ke fakaʻaliʻali ʻa e ngaahi fehuʻi fakalaulauloto ʻoku hiki atu ʻi he fakaʻosinga ʻo e lēsoní ke lava ʻa e kau akó ʻo vakai ki ai. Kapau ʻe lava, fakakaukau ke fakaʻatā ʻa e kau akó ke nau puleʻi ʻa e screen (‘oku ‘asi ai ‘a e fakaʻaliʻalí) koeʻuhí ke nau lava ʻo tohi ʻa e ngaahi ʻulungaanga mo e ngaahi anga ʻo e Fakamoʻuí ʻoku nau mahuʻingaʻia taha aí.