Mataio 21:12–16

Ua Faamama e Iesu le Malumalu

A o i ai i Ierusalema i le vaiaso mulimuli o Lona soifuaga, sa faamamaina e Iesu le malumalu mo le taimi lona lua ma faamalolo i latou na o ane ia te Ia. O lenei lesona o le a fesoasoani e te lagona ai se manao faateleina e aloaia le malumalu o se nofoaga paia e mafai ona e lagonaina ai le alofa o le Faaola ma faamalosia ai lou faatuatua ia te Ia.

Fesoasoani i tagata aoga e faataunuu a latou matafaioi. A o e saunia lesona taitasi, ia taulai atu i le matafaioi a au tagata aoga i lo latou lava tulaga aoaoina. Nai lo le na o le fesili atu, “O le a se mea o le a ou faia i le vasega i le aso?” po o le, “O le a se mea ou te aoao atu i au tagata aoga?” e mafai foi ona e fesili ifo ia te oe lava ia fesili e pei o le “O le a se mea e mafai ona fai e tagata aoga e latalata atili atu ai i le Faaola?” ma le “O le a se mea o le a fai e tagata aoga i le lesona o le asō e valaaulia ai le Agaga Paia e aoaoina i latou?”

Sauniuniga a le tagata o le vasega: Valaaulia tagata aoga e mafaufau loloto i la latou asiasiga lata mai i le malumalu. Afai latou te lei o atu lava i le malumalu, valaaulia i latou e mafaufau loloto pe o le a so latou manatu pe faapeī o le o atu i le malumalu.

Gaoioiga e ono Mafai Ona Aoao Ai

Ua faamama e Iesu le malumalu

I le taimi o le faigalotu, mafaufau e usu faatasi se pese e faatatau i le malumalu, e pei o le “Ou Te Fia Vaai i le Malumalu” (Tusipese a Tamaiti, 95). Mafaufau e faaali atu se ata o le malumalu i la outou eria ma valaaulia tagata aoga e faasoa mai o latou lagona e uiga i le malumalu. O ata o le malumalu e mafai ona maua itemples.ChurchofJesusChrist.org.

Na afio atu Iesu i Ierusalema e faamanatu le Paseka ma asiasi atu i le malumalu. O tagata tapuai e o atu i Ierusalema sa manaomia ona fesuiaʻi a latou tupe i tupe e mafai ona faaaoga i le malumalu e faatau ai manu mo taulaga o le a osia mo i latou e ositaulaga. E ui o lenei pisinisi sa talafeagai ma sa faia mo se faamoemoega lelei, ae o le taulimaina i le malumalu o se tulaga le faaaloalo ma le le migao. Na tali atu Iesu i mea na Ia matauina i le malumalu i ni taimi eseese se lua: e tasi ina ua lata i le amataga o Lana galuega (tagai i le Ioane 2:13–16) ma le isi i le vaiaso faaiu o Lona soifua (tagai i le Mataio 21:12–13).

Faitau se tasi po o mau uma e lua o loo i lalo, ma vaavaai pe na faapefea ona tali atu le Faaola i mea na Ia vaaia i le malumalu. Atonu foi e te manao e matamata i le vitio “Jesus Cleanses the Temple” (1:54), e maua i le ChurchofJesusChrist.org. O lenei vitio o loo faatino ai le tala i le Ioane 2.

• Ioane 2:13-16

• Mataio 21:12-13

• O le a se mea na e aoaoina mai le faitauina o nei tala e lua e uiga i lagona o le Faaola e faatatau i le malumalu?

• O le a sou manatu aisea na tali atu ai le Faaola i le ala na Ia faia i le mea na tupu i totonu o le malumalu?

• O a upumoni na e aoaoina mai afioga ma faatinoga a le Faaola i le malumalu?

Valaaulia tagata aoga e tusi se upumoni e tasi sa latou mauaina i luga o le laupapa. Atonu na latou faailoaina se upumoni e pei o lenei: O le malumalu o se maota o le Atua ma o se nofoaga paia.

Na aoao mai Peresitene Russell M. Nelson e uiga i le natura paia o le maota o le Alii:

O le malumalu o le maota o le Alii. O le faavae mo sauniga ma feagaiga uma o le malumalu---o le fatu lea o le ata o le faaolataga---o le Togiola a Iesu Keriso. O gaoioiga uma, lesona uma, o mea uma tatou te faia i le Ekalesia, e faasino atu i le Alii ma Lona maota paia. …

… E manaomia e lo tatou Togiola ia puipuia Ona malumalu mai le faaleagaina. E leai se mea eleelea e mafai ona ulu atu i Lona maota paia. Ae e talia lava soo se tasi ua saunia lelei.

(Russell M. Nelson, “Personal Preparation for Temple Blessings,“ Ensign, May 2001, 32–33)

• E faapefea ona fesoasoani le saunoaga a Peresitene Nelson tatou te malamalama atili ai i uiga faaalia o le Faaola i le malumalu?

• Aisea e te manatu ai ua finagalo le Alii ia tatou agavaa e ulufale atu i Lona malumalu?

Faasoa atu se aafiaga patino e uiga i le natura paia o le malumalu. Valaaulia ni nai tagata aoga e faasoa mai ni o latou lava aafiaga. Faamanatu i tagata aoga e aua nei faasoa maia ni aafiaga e paia naua pe patino.

Mafaufau i le saunoaga lenei a Elder David A Bednar o le Korama a Aposetolo e Toasefululua, ma mafaufau loloto i le mea e finagalo le Alii e te faia. E te ono fia matamata i le vitio “Exceeding Great and Precious Promises,” o loo maua i le ChurchofJesusChrist.org, mai le faailotaimi 10:08 i le 11:17, pe faitau i le upusii lenei.

O malumalu o nofoaga ua silisili ona paia o nofoaga tapuai uma. O le malumalu lava ia o le maota o le Alii, o se nofoaga paia ua vaetofiaina faapitoa mo tapuaiga i le Atua ma mo le mauaina ma le manatuaina o Ana folafolaga silisilii ma le taua.

… O le taulaiga autu o le tapuai i le malumalu o le auai lea i sauniga ma aoao e uiga, mauaina, ma le manatuaina o feagaiga. E ese o tatou mafaufauga, o faatinoga, ma laei i le malumalu mai lo isi nofoaga tatou te asiasi i ai.

O se faamoemoega autu lava o le malumalu o le siitia o la tatou vaaiga mamao mai mea o le lalolagi i faamanuiaga o le faavavau.

(David A. Bednar, “O Folafolaga Silisili ma le Taua,” Ensign po o le Liahona, Nov. 2017, 92)

Mafaufau e valaaulia tagata aoga e tomanatu i a latou tali i le fesili lenei ma tusi foi nisi o o latou manatu i a latou api talaaga.

• O le a sou lagona e pei ona finagalo le Alii e te iloa, lagona, pe faia ona o mea ua e aoaoina i lenei lesona e uiga i le natura paia o le malumalu?

Ua faamalolo e Iesu le tauaso ma le pipili

Faitau le Mataio 21:14, ma vaavaai mo mea na faia e le Faaola i le malumalu ina ua uma ona faamamaina i le taimi lona lua. O upu “le pipili” e faasino i tagata pipili po o le le atoatoa o le savali.

Matau le ala na faamaloloina ai faaletino e le Faaola nisi o Ona soo faamaoni i tafatafa o le malumalu.

• O a isi ituaiga faamalologa e mafai ona tatou oo i ai e ala i lo tatou faatinoina o le faatuatua ia te Ia ma lo tatou faia o galuega faalemalumalu?

Na faamalamalama mai e Elder Dale G. Renlund o le Korama a Aposetolo e Toasefululua le faamalologa e mafai ona tatou maua a o tatou auai i galuega o le malumalu ma talafaasolopito o aiga. Matamata i le vitio lenei, e maua i le ChurchofJesusChrist.org, mai le faailotaimi 3:49 i le 4:09, pe faitau le upusii o loo mulimuli mai.

A o tatou auai i talafaasolopito o aiga ma galuega o le malumalu i aso nei, ua tatou agavaa foi e maua faamanuiaga o le “faamalologa” ua folafola mai e perofeta ma aposetolo. O nei faamanuiaga e maofa ma ofoofogia ona o lo latou aotelega, natura patino, ma taunuuga i le olaga faaletino.

(Dale G. Renlund, “Galuega o Talafaasolopito o Aiga ma le Malumalu: Faamauga ma le Faamalologa,” Ensign po o le Liahona, Me 2018, 47)

Mafaufau e faasoa atu se aafiaga patino e faatatau i le mauaina o le faamalologa i le malumalu.

• O le a sou manatu e mafai faapefea e le tapuai i le malumalu ona fesoasoani ia i tatou e faamalolo mai o tatou manua faaleagaga ma faalelagona?

Tala Auiliili ma Faamatalaga o Talaaga

Mataio 21:13. Aisea na fetalai ai Iesu ua faia e tagata le malumalu “o se ana o e faomea”?

O le fasifuaitau “se ana o e faomea” ua tau mai ai o le au faatau tupe ma le au faatauoloa sa sili atu ona naunau i le maua o a latou tupe faasili nai lo le tapuai i le Atua ma fesoasoani atu i isi e faia faapena.

Pe na toatamai Iesu ina ua Ia faamamaina le malumalu?

Na aoao mai Peresitene Gordon B. Hinckley (1910–2008) e uiga i le faamamaina e le Faaola o le malumalu. Matamata i le vitio lenei mai le faailotaimi 11:07 i le 11:35, pe faitau le upusii o mulimuli mai.

Atonu e talafeagai le ita i nisi o tulaga. Ua ta’u mai e tusitusiga paia ia i tatou na tuliesea e Iesu le au faatau tupe mai le malumalu, ma fetalai atu, “E taua lou fale o le fale tatalo; a ua fai e outou ma ana o e faomea” ( Mataio 21:13). Ae e oo lava i lenei mea sa tautalagia pea o se aoaiga nai lo o se sasao o le ita le pulea.

(Gordon B. Hinckley, “Faagesegese ona Ita,” Ensign po o le Liahona, Nov. 2007, 66)

Gaoioiga Faaopoopo e Aoao Mai Ai

Maimoaga taamilo i le malumalu i luga o le initoneti

Faaali leneivitiomo se maimoaga taamilo i le Malumalu o Roma Italia e aoao atili ai e uiga i malumalu ma mea tatou te faia i totonu. O lenei gaoioiga e mafai ona avea ma se isi auala e amata ai le lesona.

Faamalologa e ala i galuega o le malumalu ma talafaasolopito o aiga

Faaali leneivitioe uiga i le auala na maua ai e se faufautua o le malumalu ma talafaasolopito o aiga le faamanuiaga folafolaina o le faamalologa mo se tuafafine e toatasi sa ia fesoasoani i ai i talafaasolopito o aiga. A uma ona matamata, e mafai ona valaaulia tagata aoga e faasoa mai o latou aafiaga i le sailia o igoa o tagata o le aiga ma ave na igoa i le malumalu.

Mafaufau e faasoa atu ni vaega mai le tusiga “Miracles of Healing through Temple Ordinances” (Ensign, Sept. 2020, 43–47), saunia e Sister Reyna I. Aburto o le Au Peresitene Aoao o le Aualofa.

Faamamaina o o tatou lava malumalu

Ua faatusatusa e le Aposetolo o Paulo o tatou tino faaletino i “le malumalu o le Agaga Paia” (tagai i le 1 Korinito 6:19). E mafai e tagata aoga ona mafaufau pe mafai faapefea ona latou faamamaina o latou lava malumalu, o lona uiga o o latou tino, faatasi ai ma le migao ma le faanatinati e tasi sa i ai ia Iesu a o Ia faamamaina le malumalu i Ierusalema. E mafai e tagata aoga ona iloilo le tamaitusi Mo Le Malosi o le Autalavou ma mafaufau po o le a se mea latou te ono manaomia ona lafoai ese mai o latou olaga ina ia sili atu ona paia ma olioli i le mafutaga faifai pea a le Agaga Paia. E mafai foi ona uunaia tagata aoga e faatu se sini faaleagaga o se vaega o le polokalama a Tamaiti ma le Autalavou lea o le a fesoasoani ia i latou e “viia le Atua i [o latou] tino” ( 1 Korinito 6:20).

Temples.ChurchofJesusChrist.org

Valaaulia tagata aoga e asiasi i lenei uepisaite e sue ai tali ia latou fesili e uiga i le malumalu. E mafai ona faaaoga lenei gaoioiga i le faaiuga o le lesona. E mafai foi ona faamalosia tagata aoga e asiasi i latou lava i le upega tafailagi. Ia mautinoa e tusi le sootaga i luga o le laupapa.