Kapitulo 3

Ang Imbitasyon sa Pagpabunyag kag Pagpakompirma

Pundasyon nga Doktrina

Tanan kita mga anak sang Amay nga Langitnon. Nagkari kita sa kalibutan para makaangkon sang oportunidad sa pagtuon, pagtubo, kag mangin mas pareho sa Iya para makabalik kita sa Iya presensya (tan-awa sa Moises 1:39). Indi kita mangin pareho sa Iya ukon makabalik sa Iya nga wala sang diosnon nga bulig. Ginpadala sang aton Amay nga Langitnon ang Iya Anak nga si Jesucristo, para bayran ang aton mga sala kag bugtuon ang mga gapos sang kamatayon (tan-awa sa 3 Nefi 27:13–22).

Mabaton naton ang nagatubos nga gahum ni Cristo paagi sa pagtuo sa Iya tubtob sa paghinulsol, pagpabunyag, pagbaton sang dulot sang Balaan nga Espiritu paagi sa kompirmasyon, kag pagpadayon tubtob sa katapusan. Ang pagtuman sang kasugtanan sa bunyag amo ang una nga tikang sa paghigot naton sang aton kaugalingon sa Dios para matinloan sang Balaan nga Espiritu, mapabakod, kag mabag-o ang aton kinaiya sa mas maayo. Ang pag-eksperiyensya sining nagatinlo nga impluwensya ginatawag nga espirituhanon nga pagkabun-ag liwat. (Tan-awa sa 2 Nefi 31:7, 13–14, 20–21; Mosias 5:1–7; 18; 27:24; 3 Nefi 27:20; Juan 3:5.)

Ang espirituhanon nga pagkabun-ag liwat nagasugod kon kita mabunyagan paagi sa tubig kag sa Espiritu. Ang bunyag isa ka malipayon kag puno sing paglaum nga ordinansa. Kon bunyagan kita nga may masinulub-on nga tagipusuon kag mahinulsulon nga espiritu, ginasugdan naton liwat ang aton kabuhi upod ang nagapabakod nga gahum sang Dios. Pagkatapos naton nga mabunyagan kag makompirma, padayon kita nga mapabakod paagi sa pag-ambit sang sakramento nga kaangay-angay. (Tan-awa sa 2 Nefi 31:13; Mosias 18:7–16; Moroni 6:2; Doktrina kag mga Kasugtanan 20:37.)

Paghatag sang Imbitasyon

Kon ginapabatyag ka sang Espiritu, hagara ang mga tawo nga magpabunyag kag magpakompirma. Pwede ini matabo sa bisan ano nga leksyon.

Itudlo ang doktrina sang bunyag kag buligi ang mga tawo nga maintiendihan ang doktrina ni Cristo (tan-awa sa leksyon 3). Itudlo ang importansya kag kalipay sa kasugtanan sang bunyag, sang pagbaton sang kapatawaran sang mga sala, kag pagbaton sang dulot sang Balaan nga Espiritu paagi sa kompirmasyon.

Ihanda ang mga tawo sa imbitasyon nga magpabunyag paagi sa pagsiguro nga naintiendihan nila ang imo ginatudlo kag ang kasugtanan nga ila pagahimuon. Ang kasugtanan sa bunyag amo ang masunod:

• Magsugot nga dal-on sa aton kaugalingon ang ngalan ni Jesucristo.

• Tumanon ang mga kasuguan sang Dios.

• Magserbisyo sa Dios kag sa iban.

• Magpadayon tubtob sa katapusan. (Tan-awa sa leksyon 4.)

Pwede mo man ihambal ang masunod:

“Kon mabunyagan kita kag makompirma, nagasaksi kita sa atubang sang [Dios] nga nagasulod [kita] sa isa ka kasugtanan upod sa iya, nga pirme [naton] Sia alagaran kag tumanon ang Iya mga kasuguan.’ Sa paghimo naton sining kasugtanan, nagapromisa Sia nga Iya ‘ibubo ang iya Espiritu sing bugana pa gid sa [aton]’ (Mosias 18:10).”

Ang imo imbitasyon nga magpabunyag dapat maathag kag direkta. Pwede mo ihambal:

“Sundon mo bala ang ehemplo ni Jesucristo paagi sa pagpabunyag sa tawo nga gin-ordin para maghikot sining ordinansa? Buligan ka namon nga maghanda para sa bunyag. Nagapati kami nga mangin handa ka na sa [petsa]. Ihanda mo bala ang imo kaugalingon nga mabunyagan sa sina nga petsa?”

Pareho sa bisan ano nga imbitasyon nga imo ginatanyag, magpromisa sang dalagko nga mga bugay nga mabaton sang mga tawo kon magbaton sila sang imbitasyon nga magpabunyag kag magtuman sang kaupod sini nga mga kasugtanan. Ipaambit ang imo testimonya parte sa sining mga bugay.

Itudlo nga ang bunyag kag kompirmasyon indi pa ang katapusan nga destinasyon. Kundi, amo ini ang punto sa dalan sang pagbag-o nga nagadala sang paglaum, kalipay, kag sang mas dako nga gahum sang Dios sa kabuhi sang tawo (tan-awa sa Mosias 27:25–26). Pagkatapos sang mga tawo nga mabunyagan kag makompirma, makapaabot sila nga matinloan sang Espiritu samtang nagaabante sila sa dalan sang kasugtanan.

Kon mahimo, hagara ang inyo ginatudloan nga magkadto sa baptismal service kag sakramento nga miting kon diin may isa nga pagakumpirmahan.

Mga Ideya para sa Imbitasyon sa Pagpabunyag

Pamensara nga basahon ang istorya sa balaan nga kasulatan kon diin ginabunyagan si Jesus (tan-awa sa Mateo 3:13–17). Pwede mo man ipakita ang video sa Biblia nga nagapakita sang bunyag sang Manluluwas ukon ang video sa Libro ni Mormon kon diin nagapangbunyag ang mga disipulo sang Manluluwas.

Pwede mo man basahon ang panaysayon ni Nefi parte sa bunyag ni Jesus (tan-awa sa 2 Nefi 31:4–12). Ang pagbasa sang mga sinulatan parte sa bunyag ni Jesucristo makapabakod sang inyo mga ginatudloan.

Pagtuon sa Balaan nga mga Kasulatan

Tun-i ang masunod nga balaan nga mga kasulatan:

• 2 Nefi 31:4–12

• Moroni 6

• Doktrina kag mga Kasugtanan 20:37; 22

• Mateo 3:13–17

Isulat ang kabilogan sang imo natun-an.

Mga Punto sa Pagtudlo

Mahimo nga ginbugayan sang Amay nga Langitnon ang mga tawo nga imo nakilala sing may malahalon nga espiritwal nga paghanda. Ang mga tikang nga ila na ginhimo mahimo nga naghanda na sa ila sa paghimo sang mga kasugtanan upod sa Dios paagi sa pagpabunyag sa Ang Simbahan ni Jesucristo sang mga Santos sa Ulihing mga Adlaw.