“Ongedei Bliongel: Ongerung Losisechakl—Uldesuel a Demad ra Babeluades el kirel a mo Suobel,” Molsisechakl er a Ebangkelio er Ngak: Olechotel a Berkel Ebangkelio er a Jesus Kristo (2023)

“Ongedei Bliongel: Ongerung Losisechakl,” Molsisechakl er a Ebangkelio er Ngak

Ongedei Bliongel: Ongerung Losisechakl

Uldesuel a Demad ra Babeluades el kirel a mo Suobel

Rechad a Locha mo Omdasu

Ngera moktek er a klengar?
Ngak ak mla er ker el mei?
Ngarngii a Dios el lomekerreu el kirek? Ng mekerang ak kumelchesuar el kmo Ngii a omekerreu el kirek?
Ng mekera e sebechek el oumerang er a Dios a le ngarngii a betok el mekngit el tekoi el dubech?
Ngera uchul ma klengar a kmal meringel sel bebil er a taem? Ak mekerang e metik a klisiich er a chelsel a ikal taem?
Ak mekerang e mo ungil chad?
Ngera mo dubech ruriul er rak mad?

A mla moluut el ebangkelio er a Jesus Kristo a ngosukid el longer a ikel meklou a ultutelel el ker er a reng. Ngokiu a ebangkelio, e kede mesuub el kirel a chedaol olengcheled me a diak ulebengelel klisiched el rengelekel a Dios. A ebangkelio a meskid a urunguled e ngosukid el metik a budech, deurreng, me a ikel ngarngii a belkul. Kiei loba ebangkelio a ngosukid el mukeroul e metik a klisiich sel dechau a ikel ringel er a klengar.

A Dios a soal a ungil klungiaol el mo er a Rengelekel e soal mo meskid a ikel kot el ngarbab el klengeltengat er Ngii, el uai ea diak ke deluut el mad me a diak a ulebengelel klengar (mesa Moses 1:39; Doctrine and Covenants 14:7). E le Ngii a betik a rengul er kid, e Ngii a mla meskid a uldasu el mo ngmai a ikal klengeltengat. Chelsel a chedaol llechukl, tial uldasu a lomekedong er ngii el uldasu er a mo suobel, el klou el uldasu er a deurreng, me a uldasu er a ngebetel a klengit (mesa Alma 42:5, 8, 11, 13, 15, 16, 31).

Sel uldesuel a Dios, e kid rokui a mo ngara omerael lokiu a klengar er a uchei, cheroll, klengar er a beluulechad, me a klengar er a uriul er a kodall. A Dios a mla ocholt a ikel dousbech er tial omeroled me a uriul er a kodelled, eng sebeched el lmuut el mo er a Rengedel e mo nguu a mui el deurreng.

Jesus Kristo a chedul a moktek er a Dios. Ngokiu a Tngakireng er Ngii me a Okiis er a Kodall, ea Jesus a rirellii mekid el rokui a mo diak ke deluut el mad e mo nguu a diak a ulebengelel klengar.

Chelsel tial klengar er kid er a beluulechad, eng diak debedebekii sel klengar kid er a uchei. Ma lechub el mui a klemedengei er kid er a klengar er a uriul er a kodall. Engdi, a Dios a mla cholt a betok el klemerang el kirel a telengtengil tial diak a ulebengel el omeroled. A ikal klemerang a meskid a klemedengei me bo el sebeched el medengelii a moktek er a klengar, e mo ngara deurreng, e mo ngarngi a urunguled el kirel a ikel ungil tekoi el merael mei. Tial klemedengei a chedaol e mekreos el klokled el mo omekrael er kid el ngar tial beluulechad.

Uldasu el kirel a Olisechakl

Tial bliongel a ochotii a teletael el ngosukau er a omengedmeklel sel bo molisechakl. Ng dirrek el uldimukl a ker me a ongit el locha sebechem el mo ousbech.

Me sel mongedmokel er kau el mo olsisechakl, e bo mngara nglunguuch el kirel a ikel lousbech a dersta el chad er a omeruul ngarngii me a ikel chedaol tekoi lousbech. Mtibir el kmo ngera sel kmal kirem el mo olisechakl er ngii. Bo modengei a belkul a tekoi el locha rechad a diak el sal medengei. Momdasu el kirel a klemengetel a taem el kau a mo ousbech er ngii, e molebedebek ma suobel dil mekekedeb.

Mngilt a chedaol llechukl el bo mousbech el losisechakl. Sel“Doctrinal Foundation” el bliongel er a suobel a uldimukl a betok el usbechall el chedaol llechukl.

Momdasu a ker el bo moker sel molsisechakl. Momdasu el kirel a ongit el sebechem lodars el mo omekduch a rengrir a rechad el mo meruul.

Molisiich a belkul a ikel klengeltengat el Dios a mla yaksok, e mouchais a klaumera er kau el kirel a ikel molsisechakl.

Ngera Sebechem Lolsisechakl el mo er a Rechad er a chelsel a teruich me a eim el bung el mora lluich me a eim el bung

Mngiltii a chimong ma lechub a lmuut el bebil er a ikal beldukl el olisechakl el kirel a uldasu er a mo suobel el bo molsisechakl er ngii. A uchetemel a omesuub er a dersta el olisechakl a louchais er a uriul er tial beldeklel a tekoi.

Klengar Ruchei: Moktek er a Dios me a Uldesuel el Kired

Kid rokui a ngelekel a Dios. Ng milebid el di uai Ngii.
Kede mle kiei lobengkel a Dios er a uchei ra demechell er a beluulechad. Kid a chedal a telungalek er Ngii. Ngii a medengelkid e betik a rengul er kid rokui.
A Dios a mla kudmeklii a uldasu el kirel a deurreng er kid me a omeroled er tial klengar me a diak a ulebengelel klengar.
Sel klengar er kid ruchei, e kede millilt el mo oltirakl er a uldesuel a Dios. Ng belkul a kmo kede mei er a beluulechad me bo el sebeched el nguu sel tara bakes el kirel a diak a ulebengelel omeroled.
A Jesus Kristo a chedul a moktek er a Dios. Ngii a uchul meng sebeched el diak deluut el mad e mo nguu a diak a ulebengelel klengar.

Omeob

Ngara chederdellel a Dios, ea Jesus Kristo a milebii a beluulechad.

Rebetel a Adam me a Eva

A Adam me a Eva a mle kot el ngelekel a Dios el mei er a beluulechad. A Dios a miliob a bedengir e ngiltiterir el mora Sers er a Eden.
A Adam me a Eva rirebet er a klengit, mete tilobed er a sers, e mlo cheroid er a rengedel a Dios. Tial dilubech el tekoi a domekedong er ngii el Rebet.
A uriul er a Rebet, ea Adam me a Eva a mlora klechad elmo sebecherir el mo mad. Me tial klechad er tir, eng mlo sebechir el mesuub, ngoriakl, e mo oungalek. Te dirrek el mlo chemau a klengiterreng, klengit, me a kodall.
A Rebet a sel teletael e lomakes el bedul luchei a rechad. A Rebet a uchul mekid a milechell er a beluulechad e mo ngoriakl e lokiu sel uldesuel a Demad ra Babeluades.

Klengar Kid er a Beluulechad

Sel uldesuel a Dios, eng kired el mera beluulechad e mo nguu a bedenged er a tech, mesuub, e mukeroul.
Ngara beluulechad, e kede mesuub el merael loba klaumerang. Engdi, a Demad ra Babeluades a diak el bechikid mel dilkid. Ng mla meskid a betok el sengk me a ulekrael lolengeseu er kid mede luut elmo ra Rengedel.

Tngakireng er a Jesus Kristo

Kede rokui el meruul a klengit, e rokui el mo mad. E le Dios a betik a rengul er kid, Ngii a uldureklii a Ngelekel Sechal, el Jesus Kristo, el mera beluulechad el mo olsobel er kid er a kengtid me a kodall.
E leng melngakireng er a Jesus, eng sebeched el mo nguu a klausubes e mo klikiid er a kengtid. A rengud a sebechel mo mengodech el mo ungil sel douchel a rengud. Tiang a rullii meng sebeched el lemuut el mo er a rengedel a Dios e nguu a mui el deurreng.
E leng nguchul sel Okisel a Jesus er a Kodall, e kid a mo mekiis er a kodall ruriul er a demad. Tiang a belkul a kmo a rokui el delbengir a rechad me a bedengir er a tech a lmuut el mo dmak, e kid rokui a mo kiei el mo cherechar el mla nguu a cherrungel, e mla mekiis er a kodall el bedenged.
A Jesus Kristo a meskid a ongelaod, urunguled, me a omekungil. Sel melngakireng er Ngii a kot el klou el lolechotel a Beltkil a Rengul el merkid. A ikel rokui el metacher besul er a klengar a sebechel mo ungil besul lokiu a Tngakireng er a Jesus Kristo.

Beluu ra Redeleb

A bedenged sel lemad, e a delebenged a melemolem el di ngar e mo kiei er a belurir a redeleb. Tiang sel di kedeb el taem el kirel omesuub me a omengedmokl ruchei er a Okiis er a Kodall.
A ebangkelio er a Jesus Kristo a lolsisechakl er ngii er a beluu ra redeleb, mel sebeched el melemolem el mukeroul e ngoriakl.

Okiis er a Kodall, Mo Suobel, me a Ngarbab el Klengeltengat

Uriul ra temed el ngara beluu ra redeleb, ea Okiis er a Kodall a sel kuk tara bakes el kirel a diak a ulebengel el omeroled.
A Okiis er a Kodall a sel delebenged me a bedenged er a tech a lmuut el mo dmak. Kid rokui a mo mekiis er a kodall e mo nguu a cherrungel el bedenged. Kede mo kiei el mo cherechar. Tiang a sebechel mo er ngii e leng sel Tngakireng er a Osobel me a Okiis er a Kodall.

Kerrekeriil me a Rengedel a Klebkall

Sel de bekiis er a kodall, ea Jesus Kristo a mo merritel er kid. Ngdi mekesai el teletael a diak luldimukl, a rokui el ngelekel a Dios a mo nguu a basio er tir er a chelsel a rengedel a klebkall.
Meng uaisei el kid rokui a mo mekiis er a kodall, eng di ngdiak el kid rokui a mo nguu a osisiu el diak a ulebengelel klebkall. A Jesus a mo merritel er kid lokiu a klaumera er kid, urered, me a ouchel reng er a klechad er a beluulechad me a beluu ra redeleb. Ng sebeched el lmuut el mo kiei er a chelsel a rengedel a Dios a lsekum me kede blak a rengud.

Ker Locha Bo Moker er a Rechad

A ikal beldukl el ker a olechotel a ikel locha bo moker er a rechad. A ikal ker a sebechel ngosukau mel ngarngii a belkul sel mchadecheduch e bo modengei a ikel chad a ousbech me a ikel ngara uldesuel.

Ngera omomdasu eng moktek er a klengar?
Ngera meskau a deurreng?
Ngera el ringel a omousbech er a Dios mel ngosukau?
Ngera bla msuub er a ikal ringel el kau a mlo chemau?
Ngera kemedengei el kirel a Jesus Kristo? Ng mekera ea klengar er Ngii me a urerel a mla rullii er a chelsel a klengar er kau?

Ongit el Soam el mo Odersii

Ng sebechem el mo oker er a Dios mel ngosukau el mo medengei el kmo a ikal ki bla molisechak a klemerang? (Mesa “Teaching Insights: Prayer” sel ulebongel el bliongel er a suobel 1.)
Ng sebechem el mo er a ikelesia lobengkemam er tial Sandei el mo mesuub a lmuut el bebil er a ikel ki bla mosisecheklau?
Ng sebechem el mo menguiu er a Babier er a Mormon e mo meluluuch el mo medengei el kmo ng tekingel a Dios? (Nglocha sebechem el ouchais er a uleterekokl el bliongel ma lechub eng bades.)
Ng sebechem el mo oltirakl er a okesiul a Jesus e mo metecholb? (Mesa “The Invitation to Be Baptized and Confirmed,” el di okiuelel a suobel 1.)
Ng sebeched el sikii a taem el deluut el mo kasues?

Uchetemel a Osisechakl

Tial bliongel a ouchais a osisechakl me a chedaol llechukl el kau a mo mesuub el mo melisiich a klemedengi er kau me a klaumera er kau er a ebangkelio e ngosukau el mo olisechakl.

Klengar Ruchei: Moktek er a Dios me a Uldesuel Kired

Kid a Ngelekel a Dios, e Kid a mle Kiei Lobengkel er a uchei er a Demechell

A Dios a Demal a delbenged. Kid a meral Ngelekel, el lulbeob el di uai Ngii. Kid el rokui a ngarngii chedaol ultekelled el ngelekel a Dios. Tial klemedengei a sebechel ngosukid er a chelsel a ikel meringel el taem e sebechel lomekrael er kid el mo er sel kot el bkul rebab el sebeched.

Kede mle kiei lobengkel a Dios el Rengelekel ruchei er a demechell er a beluulechad. Kid a chedal a telungalek er Ngii.

“Ngarngii a chimo el klou a belkul olangch el kid a obang ra delongeled er a chelechang el mo cherechar, el ngii a diak el kired el lobes er ngii, el ngii a kired el loureng a saul el kirel. El ngii a kmo kau a blechoel e melemolm el ngelekel a Dios el sechal ma lechub eng redil el ngarngii a chedaol basio er kau el diak ulebengelel.

“… Mo medengelii tial klemerang—e meral ungil medengelii e orkedii—a ngodechii a klengar. Ng meskau a tokubets el olangch el diak a ngidil chad el sebechel choridii er kau. E sel meral ngii, ke bai mo melchesuar el klou a ultutelem e ngarngii a belkum. Ea ulebongel, eng meskau a chedaol, e ngarbab, e klou a belkul moktek er a chelsel a klengar ” (M. Russell Ballard, “Children of Heavenly Father” [Brigham Young University devotional, Mar. 3, 2020], 2, speeches.byu.edu).

Kid a Mililt el Mei er a Beluulechad

A Demad er a Babeluades a betik a rengul er kid e saol kid a bo de uai Ngii. Ngii a mla ngosechekl e mla mengebkall a bedengel.

Chelsel a klengar er kid ruchei, e kede mlo medengei el kmo a uldesuel a Dios el merkid a mo uai Ngii. A tara telengtengil a Uldesuel a kmo kede mo mechei a blid er a babeluades e mei er a beluulechad el mo ngmai a bedenged er a tech. Ng dirrek el kired el mo ngmai a klubeled e mo rengii a klaumerang er kid er sel taem el decheroid er a rengedel a Dios. Ng diak bo domtab el kiliei el lobengkel a Dios. Engdi, Ngii a mo meskid a ikel dousbech me bo el sebeched el lmuut el mo kiei Lobengkel.

Mimokl el melilt, a lechub sel mimokl el klisiich el mo melilt, a klou a ultutelel el telengtengil a uldesuel a Dios el merkid. Sera klengar er kid ruchei, e kid a mililt el mo oltirakl er a uldesuel a Dios e mei er a beluulechad me bo el sebeched el nguu sel tara bkes el bedul a diak a ulebengelel el omeroled. Kede mle medengei el kmo sel de ngar tiang, e kede ngmai a betok el beches techall el mukeroul e mo ngara deurreng. Kede dirrek el mle medengei el kmo kede mo chemau a ultok. Kede mo chemau a omengesuseu, ringel, klengiterreng, me a kodall.

Me sera dolilt el mera beluulechad, e kede ulumerang er a beltkil a rengul a Dios me a ngesuil. Kede ulmerang er sel Uldesuel el kirel a osobeled.

A Demad ra Babeluades a Ngileltii a Jesus Kristo el mo Olsobel er Kid

Jesus Kristo a chedul a moktek er a Dios. Uchei er a demei ra beluulechad, e kede mle medengei el kmo ngdiak el sebechel di kid e lmuut el mo er a rengedel a Dios. A Demad ra Babeluades a ngililtii a Jesus Kristo, el Kot el Ngelekel Sechal, el rullii me bo el sebeched el lmuut el mo er Ngii e mo nguu a diak a ulebengelel klengar.

A Jesus a di mle beot el kongei. Ngii a kilengei el mera beluulechad e mo olsobel er kid lokiu a tngakireng er Ngii. A Tngakireng er Ngii me a Okiis er a Kodall a uchul ma moktek er a Dios el kired a mo tmaut.

Omesubel Chedaol Llechukl

Rengelekel a Dios

Moktek er a Dios

Klengar Ruchei

Mluut el Mesuub el kirel a Tial Llach

Ulekrael mora Chedaol Lechukl;: “Premortal Life,” “Plan of Redemption”
General Handbook, 1.1: “God’s Plan of Happiness”
Cheldecheduch ra Ebangkelio: “Premortality,” “Plan of Salvation”

Omeob

A uldesuel a Demad ra Babeluades el kirel a blebelel a beluulechad, el Rengelekel er a reng a mo ngmai a bedengir er a tech e mo ngmai a klubelir. A klengar er kid er a beluulechad a klou a ultutelel merkid me de ngoriakl el mo uai a Dios.

Ngara chederdelel a Demad ra Babeluades, a Jesus Kristo a milebii a beluulechad me a rokui el ngar el ngara chelsel. A Demad ra Babeluades a mocha mebii a sechal me a redil el Lokesiul. A Omeob a olechotel a beltkil a rengul a Dios me a Urungulel el merkid mel borngii techelled el mukeroul.

Omesubel Chedaol Llechukl

Mluut el Mesuub el kirel Tial Llach

Ulekrael mora Chedaol Lechukl “Create, Creation”
Cheldecheduch ra Ebangkelio: “Creation”

Rebetel a Adam me a Eva

Uchei er a Rebet

A Adam me a Eva a mle kot el ngelekel a Dios el mei er a beluulechad. A Dios a miliob a bedengir er a tech el di uai a Ngii e ngiltiterir el mora Sers er a Eden. Se ra le ngara sers e te mle klikiid, ea Dios a ulengerachel a ikel lousbech.

Me se ra Adam me a Eva ra le ngara sers, ea Dios a milellach er tir el diak bo longa er sel redechel a kerekar er a klemedengei er a ungil me a mekngit. A lsekum mete oltirakl er tial llach, e te melemolem el ngara sers. Engdi, ng modiak el sebechir el ngoriakl er a omesubir er a ikel ulltok me a ringel er a klengar. Ng diak el bol sebecherir el mo medengelii a deurreng ele ngdimlak el sebechir mo chuarm ra klengiterreng me a ringel.

A Diablong a milngitikaik er a Adam me a Eva el mo menga er a mekull el rodech, me te millilt el mo oltirakl er ngii. Le te ngileltii tiakid, e te mlo dik er a sers e mlo cheroid er a rengedel a Dios. Tial dilubech el tekoi a domekedong er ngii el Rebet.

Uriul er a Rebet

A uriul er a Rebet, ea Adam me a Eva e mocha ra klechad el sebechir el mo mad. Ng mlo diak el klikiid, le te mlo medengelii e melchesuar a teletael er a ungil me a mekngit. Ng mlo sebechir lousbech er sel mimokl el lemeltir eldi tir el melilt er a delongelir. E le Adam me a Eva el mlo chemau a ultok me a omelasm, eng mlo sebechir el mesuub e ngoriakl. E le te mlo melchesaur a klengiterreng, te dirrek el mlo mlechesuar a deurreng. (Mesa 2 Nephi 2:22–25.)

Meng diak el ior er a ikel ringel blol chau, le Adam me a Eva a mlo medengei el kmo tial klechad ra beluulechad a klou el klengeltengat. A chimo el klengeltengat a sel tir a sebechir el mo oungalek. Tia ulechotii a rael me tirkel bebil ra rengelekel a Dios a mei er a beluulechad e mo ngmai a bedengir er a tech.

Meng kirel sel klengeltengat er a Rebet, a Adam me a Eva uleldeu a rengrir. A Eva milekoi el kmo, “a lsekum meng dimlak tial klengtit el ki blo er ngii eng mlo diak el sebechel ngarngi a [rengelkam], e diak ki modengelii a ungil me a mekngit, me a deurreng er a ngebetel a klengit, me a diak a ulebengelel klengar el Dios a mesterir tirkel rokui el bekongesenges” (Moses 5:11; dirrek mesa bades 10).

Mo Medengei a Suobel: Rebet

A Rebet a mle klou a ultutelel el telengtengil a uldesuel a Dios el kirel a osobeled. A Rebet a uchul meng mlo sebeched el mei er a beluulechad e mo oureor el bedul a mo uai a Dios (mesa 2 Nephi 2:25).

Sel telbilel a Eva me a Adam el mo menga er sel rodech e tilobed er a Sers er a Eden a mle telib lokiu a chedaol tekoi er a reng. Ng kmeed el uaisei, a chedaol llechukl me a reprofet a melekoi er tial omelilt el omtok a tekoi, e diak el klengit (mesa Tebechelel a Klaumerang 1:2; 2 Nephi 9:6).

A rebebil er a rechad a oumerang el kmo kid a mo ngmai a kengtil a Adam me a Eva er tial rebetir er a klengit (el bebil a omekedong er ngii el “sel kot el klengit”). Engdi, a Rubak ulechotii el kmo Ngii a kilkedir sel kot el klengit, ma le uaisei ea kengterir a roungalek a diak el bo er a rengelekir (Moses 6:54).

Sel momuchel lolsisechakl el kirel a Rebet, e bol beot a omesodel.

Omesubel Chedaol Llechukl

Ngara Sers

Rebet

Mluut el Mesuub el kirel Tial Llach

Ulekrael mora Chedaol Lechukl: “Fall of Adam and Eve,” “Agency”
Cheldecheduch ra Ebangkelio: “Fall of Adam and Eve,” “Agency and Accountability”

Klengar Kid er a Beluulechad

Betok el rechad a omdasu , “Ngera uchul me ak ngara beluulechad?” A klengar kid er a beluulechad a klou a ultutelel el telengtengil a uldesuel a Dios el merkid er a diak a ulebengelel omeroled. Sel kmal kot el moktek er kid a mo mengedmokl er kid el lmuut el mo er a rengedel a Dios e mo nguu a mui el deurreng. Llechukl er iou a bebil er a teletael el klengar er a beluulechad a mo kudmeklid el kirel tiang.

Nguu a Bedengem er a Tech

A tara moktek el kirel a mei er a beluulechad a mo nguu a bedengem er a tech ma delebengem bol kiei er a chelsel. A bedenged a chedaol, el meang el blebelel a Dios. Me sel ngarngii a bedenged er a tech, ng sebeched meruul a tekoi, mesuub, e meruul a betok el tekoi el delbenged a diak el sebechel. Ng sebeched el ngoriakl er a teletael el delbenged a diak el sebechel.

Ele bedenged a mo mad, e kede mo chemau a ringel, rakt, me a bebil er a olibesongel. A ikakid el teletael a sebechel ngosukid el mesuub el mo klou a rengud, chubechub, ma bebil er a chedaol teletael. Ng sebechel telengtengil a omeroled el mo nguu a deurreng. Me sel molilt er a llemalt a locha meringel engdi tia sel luchul a klaumera, urunguled, me a bliochel el beltikerreng a mo telengtengil a blekerdeled.

Mosuub el mo Ungil Lousbech er a Mimokl el Melilt

A tara moktek er a klengar a mo mesuub el mo ungil lousbech er a mimokl el melilt—el mo melilt er a llemalt. Sel dosuub el mo ungil lousbech er a mimokl el melilt a klou a ultutelel a bode ua Dios.

A Demad ra Babeluades me a Jesus Kristo a olsisechakl er kid a tekoi ra lemalt e meskid a llach el mekrolid el mo ra deurreng. A Diablong a mengesuseu er kid el mo meruul a chelbirukel, e soal a le bol mekngit a rengud el uai ngii. Kede mo chemau a ultok er a delongelel a ungil me a mekngit, el ngii a klou a belkul kirel a omesubed el mo ousbech er a mimolk el melilt. (mesa 2 Nephi 2:11).

Me sel doltirakl er a Dios, e kede mukeroul e mo ngmai a ikel klengeltengat el Ngii a mle yaksok. E sel lak doltirakl, e kede mengeroid er kid er Ngii e mo obangel a telemall leng kengtid a uchul. Ma le bebil ra taem eng kora diak el cholt el uaisei, ngdi klengit a di merael el bedul a klengit el reng. Ng blechoel ikel klengeltengat er a dolngesenges—me a telmelel a klengit—a diak el dil mereched el mo er ngii ma lechub e deues. Engdi meral morngii, e le Dios a melemalt a rengul.

Meng locha blak a rengud el mora bkul rebab el sebeched, eng kid rokui a mo er a klengit e “mo cheroid er a klebkellel a Dios” (Rom 3:23). Ng medengelii tiang, a Chedam er a Babeluades a ulechotii a rael el merkid el mo ouchel a rengud me bo el sebeched el lmuut el mo er Ngii.

A ouchel reng a nguu a klisichel a Osobeled, el Jesus Kristo, el mera chelsel a klengar er kid(mesa Helaman 5:11). Me sel douchel a rengud, e kede mo klikiid er a kengtid lokiu sel tngakireng er a Jesus Kristo me a sengk er a Chedaol Reng (mesa 3 Nephi 27:16–20). Ngokiu a ouchel reng, e kede melchesuar ra deurreng. A rael el lmuut el mora Demad er a Babeluades a blok el merkid, e le Ngii a chubechub. (Mesa “Repentance” sel suobel 3.)

Mosuub el Merael loba Klaumerang

A tara moktek er tial klengar a mo ngmai a omeruul el ngii a di sebechel mo er ngii sel bo decheroid er a Demad ra Babeluades. E leng diak Desang, eng kired el mesuub el merael loba klaumerang (mesa 2 Korinth 5:6–7).

A Dios diak el bechikid mel dil kid el ngar tial lomerael. Ngii a mla odureklii a Chedaol Reng el mo omekrael, melisiich, e mengedaol er kid. Ngii a dirrek el mla meskid a chedaol llechukl, reprofet, nglunguuch, me a ebangkelio er a Jesus Kristo.

A rokui el telengtengil a omeroled er tial klengar—el deurreng me a klengiterreng, chetangkl me a olibesongel—a sebechel ngosukid er a ulekuruled sel dongedmokl er kid el lmuut el mo er a Dios.

Omesubel Chedaol Llechukl

A Taem el mo Mukeroul e Ngoriakl

omelilt

Ungil me a Mekngit

Moroni 7:12–19

Klengit

Ng Kmal Kired el Klikiied a Bo dobengkel a Dios

Mluut el Mesuub el kirel Tial Llach

Ulekrael mora Chedaol Lechukl: “Mortal, Mortality,” “Adversity”
Cheldecheduch ra Ebangkelio: “Mortality,” “Adversity”

Tngakireng er a Jesus Kristo

Eleng sel Rebetel a Adam me a Eva, e kid rokui a mo chemau a klengit me a kodall. Ng diak el sebeched el di kid el mo mesisiich er a klengit me a kodall. Sel uldasu er a mo suobel er a Demad er a Babeluades, e Ngii ulechotii a rael el mo mesisiich er a ikel teletelel a Rebet me bol sebeched el lmuut el mo er Ngii. A uchei ra beluulechad lobeob, e Ngii a ngileltii a Jesus Kristo el mo Osobeled e Okised ra Kodall.

Ng dital Jesus Kristo a sebechel mo olsobel er kid er a klengit me a kodall. Ngii a meral Ngelekel a Dios. Ng kiliei el dimlak a kengtil, el meral kedung loltirakl er a Demal. Ng mle keldmokl e meral ngarngii ra rengul el mo meruul a moktek er a Deamd ra Babeluades.

A Tngakireng er a Osobel a uldimukl er sel Ringelel el mlara Gethsemane, Ringelel el mlad er a kerus, me a Okisel er a Kodall. Ngii a mlo chuarm er a ringel el diak el sebeched el metebengii—meng di mlo omaoch a rasech er a bek el belsibs ra bedengel (mesa Doctrine and Covenants 19:18).

A Tngakireng er a Jesus Kristo a kot el klebokel el teletael er a chelsel a reksi er a rechad. Ngokiu ra tngarkireng er Ngii, ea Jesus a uchul ma uldesuel a Demad a mlo oureor. Ngmo diak el sebeched el meruul a ngera a lak a Tngakireng er a Jesus Kristo eleng mo diak el sebechel el di kid losebelid ra klengit me a kodall (mesa Alma 22:12–15).

A ringelel a Osobel a kot el klou lolechotel a beltkil a rengul el mo er a Demal me kid. “Ngera tengel, klemengetel, ma kldidiul, ma delechel” a beltkil a rengul a Kristo a engelakl er sel klemedengei er kid (Efesus 3:18; dirrek mesa bades 19).

A Jesus Kristo a mlo Mesisiich er a Kodall Kirel a Rokui

Sera Jesus Kristo ra lemad er a kerus, a Delbengel a mlo ileakl er a Bedengel. E sel ongedei el sils, ea Delbengel me a Bedengel a mlo dmak, e diak el luut el mo kakeakl. Ng mlo chemolt el mora rebetok el chad, e ulecholt er tir el kmo a Bedengel er a tech ma chiuis a dikeal el luut el mad. Tial uldekial a bedenged me a delebenged a okedongall el Okisel a Kodall.

Me sel dechad er tial klengar, e kid el rokui a mo mad. Engdi, a Jesus a mlo mesisiich er a kodall ma uchul, ea rokui el chad el milechell er a beluulechad a mo mekiis er a kodall. A Okisel a Kodall a chedaol sengk el mora rokui, el mlodars lokiu a klechubechub er a Osobel me a krasia. A delebengir ma bedengir a rokui el chad a lmuut el mo dmak, e kid el rokui a mo kiei el mo cherechar e mla mecherungel, ma bedenged el mla mekiis er a kodall. A lsekum meng dimlak a Jesus Kristo, ea kodall a meterob a rokui el urunguled er a ngarmedad el taem el mo obengkel a Chedam er a Babeluades (mesa 2 Nephi 9:8–12).

A Jesus a Uchul Meng Sebeched el Mo Klikiid er a Kengtid

Me sel bo dodengelii a urunguled el sebeched el nguu lokiu a Kristo, eng kired el mo medengelii a llach er a kerekeriil. Tiang sel diak el mengodech el llach el mo ocholt a teletael el bo dechau eleng nguchul a blekerdeled. Sel dolngesenges ra Dios a mekdebechii a moungil ra uriul, ea lak ke dolngesenges a uchul a mekngit el teletael. (Mesa Alma 42:14–18.) Sel deruul a klengit, eng mo diak de klikiid, e diak a kikiongel el tekoi el mo soiseb er a rengedel a Dios (mesa 3 Nephi 27:19).

Jesus el Meluluuch er a Gethsemane, mla er a Harry Anderson

Sera le temel a Jesus Kristo el melngakireng, e Ngii a ulmetechei er kid, el ngara ringel, e mlo kokad a belsel a kengtid (mesa 3 Nephi 27:16–20). A uldesuel a Dios a msang a Jesus Kristo a klisiich el mo sioning er kid—el mo dechor ra delongeled ma kerekeriil (mesa Mosiah 15:9). Eleng sel tngakireng ra Jesus el ludersii, e Ngii a sebechel mo ngmai aikel Klisichel ra klechubechub el kired sel douedikel a klaumera er kid el kirel a ouchel reng (mesa Moroni 7:27; Doctrine and Covenants 45:3–5). “Ma le uaisei ea klechubechub a mo sebechel lomelemii sel longerchir er ngii a kerekeriil, e mengeluoleu [er kid] meke de selbechakl ” (Alma 34:16).

Ngdi kirel lokiu sel sengk er a Tngakireng er a Osobel e mo ouchel a rengud a mo uchul eng mo sebeched el lmuut el mo kiei lobengkel a Dios. Me sel douchel a rengud, e kede mousubes e mo nguu a klikiid el reng. Kede mo kebekall er a berredel a kengtid. A telemelel a rengud a mo mechubs. E kede mo mui er a deurreng (mesa Alma 36:24).

Meng locha kid a diak kede cherrungel e mo lmuut el mo reuebet, engdi ngarngii a betok el krasia, beltikerreng, me a klechubechub er a Jesus Kristo ra bai le ngarngii a klechitechut, chelbirukel, ma lechub a klengit el ngarkid. A Dios a di blechoel keldmokl e semeriar el mo omechull er kid sel dobult el mo er Ngii e ouchel a rengud. (mesa Lukas 15:11–32). Ngdiak a ngidil ngera ma ngidil chad “el mo sebechel el choridid er a beltikerreng er a Dios, el ngara Kristo Jesus el Rubak er kid” (Rom 8:39).

Jesus a Ngilai a Ringeled, Telmeled, me a Chelitechetud

Me sel luldersii el tngakireng er Ngii, ea Jesus Kristo a ngilai a ringeled, telmeled, me a chelitechetud. Ele tiang a uchul, Ngii a medengei el kmo ng mekerang a lolngeseu er a rechedal el kirel a chitecheterir (Alma 7:12; dirrek el mesa bades 11). Ngii a siotai, “Mer ngak,” me sel dotireklii, e Ngii a meskid a ulengull, urunguled, klisiich, uldasu, me a omekungil (Mateus 11:28; dirrek mesa bades 29–30).

Me sel dultuil er a Jesus Kristo me a Tngakireng er Ngii, e Ngii a sebechel ngosukid me dotekangel a ikel lolibesongel, secher, me a ringel el dechau. Ng sebeched el mo mui er a deurreng, budech, me a ulserechakl el reng. A ikel rokui el metacher besul er a klengar a sebechel mo ungil besul lokiu a Tngakireng er a Jesus Kristo.

Omesubel Chedaol Llechukl

Tngakireng er a Osobel

Okiis er a kodall

Mluut el Mesuub el kirel Tial Olisechakl

Ulekrael mora Chedaol Lechukl: “Jesus Christ,” “Atone, Atonement,” “Grace”
Cheldecheduch ra Ebangkelio: “Jesus Christ,” “Atonement of Jesus Christ,” “Grace”

Beluu er a Redeleb

Te betok el chad a omdasu, “Ngera dubech sel luriul er ak mad?” Sel uldasu er a mo suobel a ouchais a bebil er a meklou a belkul el nger el kirel tial ker.

A kodall a telengtengil a “uldesuel a klechubechub” er a Dios el merkid (2 Nephi 9:6). Meng bai diak el ulebengelel a klengar er kid, a kodall a sel tara bakes el kirel a diak a ulebengelel lomeroled. Sel mo uai a Dios, eng kired el mo chemau a kodall ea uriul e kede mecherrungel, ea bedenged a mla mekiis ra kodall .

A bedenged sel lemad, e a delebenged a melemolem el di ngar e mo kiei er a belurir a redeleb. Tiang sel di kedeb el temel sel basio er a omesuub me a omengedmokl ruchei er a Okiis er a Kodall me a Ulebongel el Kerrekeriil. A klubeled er tial klengar a di melemolem lobengked.

Ngara beluu er a redeleb, e tirkel chad el mle kongei e kiei loba ebangkelio er a Jesus Kristo “a mengai el mo er a delengchokl er a deurreng, el lomekedong er ngii el kmo baradis” (Alma 40:12). A re mekekerei el ngalek a dirrek el mo mengai el mo er a baradis sel lemad.

A delebengir a rechad el ngara baradis a mo ngara budech er a ikel ringel me a klengiterreng. Te melemolem a chedaol ulekurulir, el meruul a urerel a Dios e oldingel er a rebebil. Te mo olsisechakl er a ebangkelio el mo er tirkel dimlak el nguu sera le ngara beluulechad (mesa Doctrine and Covenants 138:32–37, 57–59).

Ngara beluu er a redeleb, e tirkel rechad el dimlak el lenguu a ebangkelio er sera le ngara beluulechad, ma lechub e te tilbir el diak loltirakl a llach, a mo chemau a bebil er a telekael el tekoi (mesa Doctrine and Covenants 138:6–37; Alma 40:6–14). Engdi, ng uchul a Dios a melemalt e chubechub, eng mo ngarngii a techelir el mo mosisechakl er a ebangkelio er a Jesus Kristo. A lsekum mete kongei er ngii e mo ouchel a rengrir, e te mo suobel er a kengterir (mesa Doctrine and Covenants 138:58; dirrek mesa 138:31–35; 128:22). Te mo mengemedaol er tir el mo soiseb er sel budech er a baradis. Te mo nguu a basio er tir er a chelsel a rengedel a klebkall el lultuil ra ikel lulilt er a beluulechad me a beluu er a redeleb.

Kid a melemolem el ngara belurir a redeleb el mo lmuut ersel de bekiis er a kodall.

Omesubel Chedaol Llechukl

Mluut el Mesuub el kirel Tial Llach

Ulekrael mora Chedaol Lechukl: “Paradise”

Okiis er a Kodall, Mo Suobel, me a Ngarbab el Klengeltengat

Okiis er a kodall

A uldesuel a Dios a rullii meng sebeched el mo mukeroul e mo nguu a diak a ulebengelel klengar. Uriul er sel temed el ngara beluu er a redeleb, ea Okiis er a Kodall a sel bakes el kirel a ulekuruled.

A Okiis e ra Kodall a sel bedenged me a delbenged a lmuut el mo dmak. Kid rokui a mo mekiis er a kodall. Tiang mlo sebechel morngii lokiu a Tngakireng er a Osobel me a Okiis er a Kodall. (Mesa Alma 11:42–44.)

Sel debekiis er a kodall, ea bedenged a mo cherrungel, e diak e lolchesuar a ringel ma secher. Ng diak deluut el mad, e di ngar el mo cherechar.

Mo Suobel

E le kid a mo mekiis er a kodall, e kede rokui el mo selebechakl—ma lechub kede mo suobel—er a kodellel a tech. Tial sengk a mlodars el merkid lokiu a krasia er a Jesus Kristo.

Ng dirrek el sebeched el mo selbechakl—ma lechub kede mo suobel—er a ikel teletael el llechul a kerekeriil a soal bo doruul el kirel a kengtid. Tial sengk a dirrek el mlo er ngii lokiu ra ungil lomeruul me a klechubechub er a Jesus Kristo sel bo douchel a rengud. (Mesa Alma 42:13–15, 21–25.)

Ngarbab el Klengeltengat

Ngarbab el klengeltengat, ma lechub eng diak a ulebengelel klengar, a kot el ngarbab el deurreng me a klebkall er a rengedel a celestial. Ngarbab el klengeltengat a sengk el kirem el loureor el kirel me bol sebechem el nguu. A President Russell M. Nelson a ulsisechakl el kmo , “A ikel lomeruul el kirel meketmokl a uldimukl er a klaumerang er a Rubak, ouchel reng, techolbechelid, nguu a sengk er a Chedaol Reng, e melemolem el meruul e oltirakl a chedaol ruoll me a telbiil er a templo” (“Salvation and Exaltation,” Liahona, May 2008, 9).

Ngarbab el klengeltengat a belkul a mo kiei lobengkel a Dios el mo cherechar el diak a ulebengelel telungalek. Mo medengelii a Dios me a Jesus Kristo, e mo uai Tir, e mo ngara klengar el Tir a sorir.

Omesubel Chedaol Llechukl

Mluut el Mesuub el kirel Tial Olisechakl

Ulekrael mora Chedaol Lechukl: “Resurrection”
Cheldecheduch ra Ebangekelio: “Resurrection,” “Salvation”

Kerrekeriil me a Rengedel a Klebkall

Uleklatk: Sel omkot lolsisechakl el kirel a rengedel a klebkall, e molsisechakl el ngara beot el omerolel lultuil er a ikel lousbech a chad me a klemedengei er ngii.

Sel debekiis er a kodall, ea Jesus Kristo a mo oba lemalt me a chubechub lomerritel. Ngdi mekesai el teletael el diak luldimukl, ra dersta er kid a mo nguu a basio er tir er a rengedel a klebkall. Meng locha kid rokui a mo mekiis er a kodall, engdi kid rokui a diak bo dolai er a osisiu el diak a ulebengelel klebkall (mesa Doctrine and Covenants 88:22–24, 29–34; 130:20–21; 132:5).

Tirkel rechad el dimlak a techelir el mo ungil medengei e oltirakl a llechul a Dios er sera lengara beluulechad a bo lebesterir a techall er sel belurir a redeleb. A Jesus a mo merritel er a rokui el chad lultuil er a klaumerang er tir, urelir, urungulir, me a ouchel reng ra le ngara beluulechad me a belurir a redeleb (mesa Doctrine and Covenants 138:32–34, 57–59).

A chedaol llechukl a olisechakl el kirel a celestial, terrestrial, me a telestial el rengedel a klebkall. Ngii rokui a olechotel a beltkil a rengul a Dios, llemalt, me a klechubechub.

Tirkel louediekl a klaumerang er tir er a Kristo, ouchel a rengrir er a kengterir, e ngmai a chedaol ruoll er a ebangkelio, e oltirakl a telbilir, e nguu a Chedaol Reng, e outekangel el mo er a ulebongel a mo suobel er a chelsel a rengedel a celestial. Tial renged a dirrek el mo uldimukl tirkel rechad el dimlak a techellir el mo nguu a ebangkelio er sel klengar er tir er a beluulechad engdi te mo nguu loba rokui el rengrir er sel belurir a redeleb (Doctrine and Covenants 137:8; dirrek mesa bades 7). A rengalek el mlad ruchei er sel rekil sebechel melilt (eai a rekil) a dirrek el mo suobel er a chelsel a rengedel a celestial (mesa Doctrine and Covenants 137:10).

Chelsel a chedaol llechukl, ea rengedel a celestial a lomekesiu er ngii el morsel klebkellel a lechub eng didichel a sils. (Mesa Doctrine and Covenants 76:50–70.)

Tirkel rechad el mle chetengakl a klengar er tir engdi ngdimlak el borngii a klaumerang er tir er a Jesus el ngara beluulechad engdi uriul e mlo er ngii a mo nguu a basio er tir er a rengedel a terrestrial (Doctrine and Covenants 76:74). A osisiu el klemerang a dirrek el mo er tirkel dimlak el mesisiich a klaumerang er tir er a Jesus. Tial renged a lomekesiu er ngii el mo er sel klebkellel a buil. (Mesa Doctrine and Covenants 76:71–80.)

Tirkel melemolem el ngara klengit e dimlak louchel a rengrir er tial klengar ma lechub el nguu a ebangkelio er a Jesus Kristo er a belurir a redeleb a mo nguu a ngkedir er a chelsel a rengedel a telestial. Tial renged a lomekesiu er ngii el mo er a klebkellel a btuch. (Mesa Doctrine and Covenants 76:81–86.)

Mo Medengei a Olisechakl: Kerrekeriil

Rokui el chad a mo dechor er a medal a Jesus Kristo me “bol mukerrekeriil el kirel a urerir” (3 Nephi 27:15; mesa bades 13–15). A Dios a mo omes a ikel luruul a derstal chad el kirel a omeruul el bla rengii, luldimukl er a klemedengei er tir er a ungil me a mekngit, medengelii a ebangkelio, medengei a kirir, me a ikel soal a rengrir (mesa Lukas 12:47–48; Doctrine and Covenants 137:9).

Ele kid a diak kede mui lungil medengei a ikel omerellir a rebebil, eng kired el diak dorritel el kirel a rengedel a klebkall el mor tir. Ng bai, kired el mengedmokl er kid el mo mesang a Rubak e siotai er a rebebil me bo longedmokl er tir. (Mesa Alma 5:15–19, 33; Moroni 10:32; Dallin H. Oaks, “‘Judge Not’ and Judging,” Ensign, Aug. 1999, 6–13.)

Omesubel Chedaol Llechukl

Mluut el Mesuub el kirel Tial Llach

Ulekrael mora Chedaol Lechuk: “Judge, Judgment,” “Degrees of Glory”

Kedeb el mora Telkib el Kemanget el Llecheklel a Suobel

A beldukl el llechukl a olechotel a ikel locha soam el lolisechakl el mora tara chad a lsekum eng di kekedeb a temem. Sel mousbech er tial llechukl, e mngiltii a chimong ma lechub a bebil ra llach el bo molsisechakl. A uchetemel a olisechakl er a bek el llach a ngarsel suobel el mla ruchei.

Me sel molsisechakl, e moker a ker e morrenges. Modars a siotai el mo olngeseu er a rechad mel losuub el mo kmeed er a Dios. A kot el klou a ultutelel el siotai a sel chad a lmuut el mo kebtech el lobengkem. A klemengetel a omesuub a ultuil er a ker el moker ma ikel bo morrenges.

Ngera Locha Sebechem el Lolsisechakl el mo er a Rechad er a chelsel a edei el mo er a teruich el bung

Kid el rokui a ngelekel a Dios er a reng. Kid a rechedal a telungalek er Ngii. Ngii medengelkid e betik a rengul er kid.
A Dios a mla ochotii a uldasu el kirel a diul a rengud ma omeroled er tial klengar el mora diak a ulebengelel.
Sel uldesuel a Dios, eng kired el mei er a beluulechad el mo ngmai a bedenged er a tech, mesuub, e mukeroul.
Jesus Kristo a chedul a moktek er a Dios. Ngii a uchul meng sebeched el mo nguu a diak a ulebengelel klengar.
Ngara chederdelel a Dios, ea Jesus a milebii a beluulechad.
A teletael el doruul er tial beluulechad a kirel mo olngeseu er kid el lmuut el mora rengedel a Dios.
Kid el rokui a mo ngara klengit, e kid rokui a mo mad. E le Dios a betik a rengul er kid, Ngii a uldereklii a Ngelekel Sechal, el Jesus Kristo, el mera beluulechad el mo olsobel er kid er a kengtid ma kodall.
A ikel rokui el metacher besul er a klengar a sebechel mo ungil besul lokiu a Tngakireng er a Jesus Kristo.
Sel bedenged er a tech a mad, ea delebenged a melemolem el ngar. E kid a mo mekiis er a kodall. Tia belkul a kmo a delebengel a chad me a bedengel a lmuut el mo dmak, e kid el rokui a mo kiei el mo cherechar elmo mecherrungel, ea bedenged a mekiis er a kodall.
Sel bo debekiis er a kodall, ea Jesus Kristo a mo merritel er kid. Ngdiak el ngii el rokui elmo tirakl, ea rokui el ngelekel a Dios a mo nguu a basio er tir er a rengedel a klebkall. Ng sebeched lmuut el mo kiei er a rengedel a Dios a lsekum e kede oumerang.