Kapitulo 3: Leksyon 3

Ang Ebanghelyo ni Jesucristo

Mahimo nga Makapanghunahuna ang mga tawo

• Sin-o si Jesucristo? Paano Niya ako mabuligan kag ang akon pamilya?

• Ano ang buot silingon sang mag-angkon sang pagtuo kay Jesucristo? Paano ang pag-angkon sang pagtuo sa Iya makabugay sa akon kabuhi?

• Ano ang buot silingon sang maghinulsol?

• Paano ko mabatyagan ang kalinong kag kapatawaran sang Dios pagkatapos ko maghimo sang malain nga mga pagpili?

• Ano ang katuyuan sang bunyag?

• Ano ang dulot sang Balaan nga Espiritu?

• Ano ang buot silingon sang magpadayon tubtob sa katapusan?

Ang ebanghelyo ni Jesucristo amo ang paagi nga magpalapit kita kay Cristo. Tama sini ka simple nga bisan ang bata makaintiendi sini. Ang ini nga leksyon nagatutok sa ebanghelyo kag doktrina ni Cristo, dala ang pagtuo kay Jesucristo, paghinulsol, bunyag, dulot sang Balaan nga Espiritu, kag pagpadayon tubtob sa katapusan. Nagatutok man ini sa kon paano ginabugayan sang ebanghelyo ang tanan nga anak sang Dios.

Ang tinaga nga ebanghelyo literal nga nagakahulugan nga “maayong balita.” Ang ebanghelyo ni Jesucristo maayong balita tungod ginahatag sini ang doktrina—ang wala katapusan nga kamatuoran—nga kinahanglan naton para makapalapit sa Iya kag maluwas (tan-awa sa 1 Nefi 15:14). Ginatudloan kita sang ebanghelyo kon paano mangabuhi sang maayo kag makahulugan nga mga kabuhi. Ang maayong balita sang ebanghelyo nagahatag sang paagi para mapatawad kita sa aton mga sala, matinloan, kag makabalik sa presensya sang Dios.

Punto sa Pagtudlo: Ang Ebanghelyo ni Cristo kag ang Doktrina ni Cristo

Ang ebanghelyo ni Jesucristo nagasakop sang tanan nga doktrina, layi, kasugoan, ordinansa, kag mga kasugtanan nga kinahanglanon para sa aton kaluwasan kag pangkahitaasan.

Ang mensahe sang ebanghelyo amo nga malab-ot naton ang nagaluwas, nagatubos nga gahum ni Jesucristo. Mahimo naton ini paagi sa pagpakita sang pagtuo sa Iya, paghinulsol, pagpabunyag, pagbaton sang dulot sang Balaan nga Espiritu, kag pagpadayon tubtob sa katapusan (tan-awa sa Mga Artikulo sang Pagtuo 1:4).

Ginatawag man ini nga doktrina ni Cristo. Ang pagpangabuhi sining doktrina amo ang paagi nga nagapalapit kita kay Cristo kag maluwas (tan-awa sa 1 Nefi 15:14). Mabaskog ini nga ginatudlo sa Libro ni Mormon (tan-awa sa 2 Nefi 31; 32:1–6; 3 Nefi 11:31–40; 27:13–22). Ang imo tuyo amo nga buligan ang mga tawo nga magpalapit kay Cristo paagi sa pagbulig sa ila nga ipangabuhi ang Iya doktrina.

Tan-awa sa Giya sa Balaan nga mga Kasulatan, “Ebanghelyo,” “Doktrina ni Cristo”; Mga Topiko sang Ebanghelyo, “Ebanghelyo.”

Mga Panugyan sa Pagtudlo

Ini nga seksyon nagahatag sang sampol nga outline para buligan ka nga maghanda sa pagtudlo. May ari man ini sang halimbawa nga mga pamangkot kag mga imbitasyon nga pwede mo gamiton.

Samtang nagahanda ka sa pagtudlo, pamensara sing mainampuon ang tagsa ka sitwasyon kag espirituhanon nga panginahanglan sang tagsa ka tawo. Desisyoni kon ano ang makabulig gid nga itudlo. Maghanda nga ipaathag ang mga termino nga basi indi maintiendihan sang mga tawo. Magplano base sa oras nga ihatag sa imo, tandai nga dapat malip-ot lang ang mga leksyon.

Pilia ang balaan nga mga kasulatan nga imo gamiton sa pagtudlo. Ang seksyon sang leksyon nga “Pundasyon nga Doktrina” may ara sing madamo nga makabulig nga balaan nga mga kasulatan.

Pamensara kon ano nga mga pamangkot ang imo gamiton samtang nagatudlo. Planoha nga ang mga imbitasyon nga imo itanyag makapaisog sa tagsa ka tawo nga mag-akto.

Hatagi importansya ang ginpangako nga mga bugay sang Dios, kag ipaambit ang imo testimonya parte sa imo ginatudlo.

Ano ang Pwede Mo Itudlo sa mga Tawo sa Sulod sang 15–25 ka Minutos

Magpili sang isa ukon madamo pa sang masunod nga mga prinsipyo nga itudlo. Ang pundasyon nga doktrina sang tagsa ka prinsipyo ara sa katapusan sining outline.

Ang Diosnon nga Misyon ni Jesucristo

• Ginpadala sang Dios ang Iya Bugtong nga Anak nga si Jesucristo sa duta, para tubuson kita sa sala kag kamatayon.

• Tungod sang nagabayad-sala nga sakripisyo ni Jesus, pwede kita matinloan sa aton mga sala kag mapakabalaan kon maghinulsol kita.

• Pagkatapos nga ginlansang sa krus si Jesus, nabanhaw Sia. Tungod sang Iya Pagkabanhaw, tanan kita mabanhaw pagkatapos naton nga mapatay. Buot silingon nga ang espiritu kag lawas sang kada tawo magaupod liwat, kag ang kada isa sa aton mabuhi sa katubtuban sa perpekto, nabanhaw nga lawas.

Pagtuo kay Jesucristo

• Pagtuo ang una nga prinsipyo sang ebanghelyo ni Jesucristo.

• Ang pagtuo kay Jesucristo nagasakop sang kompiyansa nga Sia ang Anak sang Dios kag pagsalig sa Iya bilang aton Manluluwas kag Manunubos.

• Ang pagtuo kay Jesucristo isa ka prinsipyo sang pag-akto kag gahum.

• Ginapabakod naton ang aton pagtuo paagi sa pagpangamuyo, pagtuon sang balaan nga mga kasulatan, kag pagtuman sa mga kasuguan.

Paghinulsol

• Ang pagtuo kay Jesucristo nagatulod sa aton nga maghinulsol. Ang paghinulsol amo ang proseso sang pagliso sa Dios kag pagtalikod sa sala. Kon maghinulsol kita, ang aton mga aksyon, mga handum, kag mga panghunahuna nagabag-o para mangin mas nagaugyon sa pagbuot sang Dios.

• Kon sinsero kita nga nagahinulsol, ginapatawad kita sang Dios. Nangin posible ang kapatawaran tungod ginbayran ni Jesucristo ang aton mga sala.

• Kon maghinulsol kita, makabatyag kita sang kalinong samtang ang aton kabasulanan kag kasubo nagaayo.

• Ang paghinulsol bug-os-kabuhi nga proseso. Ginaabi-abi kita sang Dios tagsa nga maghinulsol kita. Indi gid Sia magpangampo sa aton.

Bunyag: Ang Aton Una nga Kasugtanan upod sa Dios

• Ang bunyag amo ang paagi nga nagasulod kita sa relasyon sang kasugtanan upod sa Dios.

• May duha ka bahin ang bunyag: bunyag paagi sa tubig kag paagi sa Espiritu. Kon ginabunyagan kita kag ginakompirma, ginatinloan kita sa aton mga sala, nga nagahatag sa aton sang bag-o nga panugod sa kabuhi.

• Ginabunyagan kita paagi sa pagtugmaw, nga sunod sa ehemplo ni Jesus.

• Ang mga bata wala ginabunyagan kon wala pa mag-walo ka tuig ang ila edad Ang mga bata nga napatay antes sina nga edad natubos na paagi sa Pagbayad-Sala ni Jesucristo.

• Nagaambit kita sang sakramento tagsa ka semana para dumdumon ang sakripisyo ni Jesus kag para bag-uhon ang aton mga kasugtanan sa Dios.

Ang Dulot sang Balaan nga Espiritu

• Ang Balaan nga Espiritu ang ikatatlo nga miyembro sang Pangulohan sang Dios.

• Pagkatapos naton nga mabunyagan, ginabaton naton ang dulot sang Balaan nga Espiritu paagi sa ordinansa sang kompirmasyon.

• Kon mabaton naton ang dulot sang Balaan nga Espiritu, pwede naton Sia mangin kaupod sa bilog naton nga kabuhi kon matutom kita.

• Ang Balaan nga Espiritu nagapakabalaan sa aton, nagagiya sa aton, nagapaumpaw sa aton, kag nagabulig sa aton nga mahibaloan ang kamatuoran.

Magpadayon tubtob sa Katapusan

• Ang pagpadayon nagalakip sang sige-sige nga paggamit sang pagtuo kay Cristo kada adlaw. Padayon kita nga nagatuman sang aton mga kasugtanan upod sa Dios, nagahinulsol, nagapangita sang pag-upod sang Balaan nga Espiritu, kag nagaambit sang sakramento.

• Kon matutom naton nga ginahandum nga sundon si Jesucristo, nagapromisa ang Dios nga mabaton naton ang kabuhi nga wala katapusan.

Ang Ebanghelyo ni Jesucristo Nagabugay sang Tanan nga Anak sang Dios

• Ang pagpangabuhi sang ebanghelyo nagapasangkad sang aton mga kalipay, nagapapagsik sang aton mga aksyon, kag nagapauswag sang aton mga relasyon.

• Laban-laban nga mangin malipayon kita—bilang mga indibidwal kag bilang pamilya—kon ginapangabuhi naton ang mga pinanudlo ni Jesucristo.

• Paagi sa ebanghelyo ni Jesucristo, ginabugayan ang mga pamilya sa sini nga kabuhi kag sarang mangin isa sa wala katubtuban kag magpuyo sa presensya sang Dios.

Mga Pwede Mo Ipamangkot sa mga Tawo

Ang masunod nga mga pamangkot mga halimbawa sang pwede mo ipamangkot sa mga tawo. Ining mga pamangkot makabulig sa imo nga makaangkon sang makahulugan nga paghinambalanay kag maintiendihan ang mga panginahanglan kag panan-aw sang tawo.

• Ano ang nahibal-an mo parte kay Jesus?

• Ano ang buot silingon para sa imo sang mag-angkon sang pagtuo kay Jesucristo?

• Ano nga mga pagbag-o ang gusto mo himuon sa imo kabuhi?

• Ano ang imo pag-intiendi sang paghinulsol?

• Ano ang imo pag-intiendi sang bunyag? Ano ang puede mo himuon subong para maghanda para sa bunyag?

• Paano ka mabuligan sang Balaan nga Espiritu sa imo pagpanglakaton pabalik sa presensya sang Dios?

• Ano nga kabudlayan ang ginaatubang mo ukon sang imo pamilya? Pwede bala kami mag-share sang pila ka paagi nga makabulig ang ebanghelyo ni Jesucristo?

Mga Imbitasyon nga Pwede Mo Ihatag

• Ipangamuyo mo bala sa Dios nga buligan ka hibalo kon matuod ang amon gintudlo? (Tan-awa sa “Mga Punto sa Pagtudlo: Pangamuyo” sa katapusan nga seksyon sang leksyon 1.)

• Masimba ka bala sini nga Domingo para matun-an pa gid ang parte sa amon gintudlo?

• Basahon mo bala ang Libro ni Mormon kag magpangamuyo para mahibal-an kon pulong ini sang Dios? (Pwede ka magpanugyan sang partikular nga mga kapitulo ukon bersikulo.)

• Sundon mo bala ang ehemplo ni Jesus kag magpabunyag? (Tan-awa sa “Ang Imbitasyon sa Pagpabunyag kag Pagpakompirma,” nga makita antes lang gid sang leksyon 1.)

• Pwede bala kita magtalana sang tion para sa amon madason nga pagbisita?

Pundasyon nga Doktrina

Ini nga seksyon may doktrina kag balaan nga kasulatan nga imo tun-an para pabakuron ang imo ihibalo kag testimonya sa ebanghelyo kag buligan ka sa pagtudlo.

Ang Diosnon nga Misyon ni Jesucristo

Ginpadala sang Amay nga Langitnon ang Iya Pinalangga nga Anak nga si Jesucristo sa duta, para matigayon nga maeksperiyensyahan naton tanan ang kalipay sa sining kalibutan kag sa kabuhi nga wala katapusan sa palaabuton. “Kag ini ang ebanghelyo, ang maayong balita, … nga nagkadto sia [si Jesucristo] sa kalibutan … agud pas-anon ang mga sala sang kalibutan, kag agud pakabalaanon ang kalibutan, kag agud tinloan ini halin sa tanan nga indi matarong; nga paagi sa iya ang tanan maluwas” (Doktrina kag mga Kasugtanan 76:40–42).

Bilang mga mortal, tanan kita makasala, kag tanan kita mapatay. Ang sala kag kamatayon magapugong sa aton nga makabaton sang kabuhi nga wala katapusan upod sa Dios luwas lang kon may ara kita sang Manunubos (tan-awa sa 2 Nefi 9). Antes gintuga ang kalibutan, ginpili sang aton Amay nga Langitnon si Jesucristo para tubuson kita. Sa pinakamataas nga pagpahayag sang gugma, nagkadto si Jesus sa duta kag gintuman ining diosnon nga misyon. Ginpatigayon Niya nga matubos kita sa aton mga sala, kag ginsiguro Niya nga tanan kita mabanhaw pagkatapos naton nga mapatay.

Nagpangabuhi si Jesucristo nga wala sang sala. Sa katapusan sang Iya mortal nga pag-alagad, gindala Niya sa Iya Kaugalingon ang aton mga sala paagi sa Iya pag-antos sa Getsemani kag sang ginlansang Sia sa krus (tan-awa sa 1 Nefi 11:33). Grabe ang pag-antos ni Jesus nga bisan Sia “[nagkurog] bangod sa kasakit, kag nagwa ang dugo halin sa tagsa ka buho-buho sang panit“ (Doktrina kag mga Kasugtanan 19:18). Pagkatapos sang Paglansang sa Iya sa krus, nabanhaw si Jesus, nga nagdaog batok sa kamatayon. Kon tingbon, ini nga mga hitabo amo ang Pagbayad-Sala ni Jesucristo.

Ang aton mga sala nagahimo sa aton nga mahigko sa espirituhanon, kag “wala sing di-matinlo nga butang nga makapuyo upod sa Dios” (1 Nefi 10:21). Dugang pa, ang layi sang hustisya nagapangayo sang konsikwensya para sa aton mga sala.

Ang nagabayad-sala nga sakripisyo ni Jesus naghatag sa aton sang paagi nga matinloan sa aton mga sala kag mapakabalaan kon maghinulsol kita. Nagahatag man ini sang paagi nga masabat ang mga ginapangayo sang hustisya (tan-awa sa Alma 42:15, 23–24). Siling sang Manluluwas, “Ako … nag-antos sining mga butang para sa tanan agud nga indi sila mag-antos kon maghinulsol sila; apang kon indi sila maghinulsol kinahanglan nila mag-antos pareho man sa akon” (Doktrina kag mga Kasugtanan 19:16–17). Kon indi tungod kay Jesucristo, ang kamatayon magautod sang tanan nga paglaum para sa palaabuton nga kabuhi upod sa Amay nga Langitnon.

Sa paghalad sang Iya kaugalingon bilang sakripisyo para sa aton, wala ginkakas ni Jesus ang aton personal nga salabton. Kinahanglan naton nga magtuo sa Iya, maghinulsol, kag tinguhaan nga tumanon ang mga kasuguan. Kon maghinulsol kita, sukton ni Jesus para sa aton ang Iya kinamatarong sa kaluoy sang Iya Amay (tan-awa sa Moroni 7:27–28). Bangod sa pagpatunga sang Manluluwas, ginapatawad kita sang Amay nga Langitnon, nga ginakakas sa aton ang kabug-at kag kabasulanan sang aton mga sala (tan-awa sa Mosias 15:7–9). Matinloan kita sa espirituhanon kag sa ulihi batunon sa presensya sang Dios.

Ang diosnon nga misyon ni Jesus amo man ang luwason kita sa kamatayon. Tungod nabanhaw Sia, tanan kita mabanhaw pagkatapos naton nga mapatay. Buot silingon nga ang espiritu kag lawas sang kada tawo magaupod liwat, kag ang kada isa sa aton mabuhi sa katubtuban sa perpekto, nabanhaw nga lawas. Kon indi tungod kay Jesucristo, ang kamatayon magautod sang tanan nga paglaum para sa palaabuton nga kabuhi upod sa Amay nga Langitnon.

Pagtuon sa Balaan nga mga Kasulatan

Ginpadala sang Dios ang Iya Anak

• Alma 11:40

• Juan 3:16–17

Kaluwasan paagi kay Jesucristo

• 2 Nefi 2:6–8; 9:21–24

• Alma 34:8–9, 14–16

• Moroni 7:27–28

• Doktrina kag mga Kasugtanan 45:3–5

• 1 Mga Taga-Corinto 15:20–22

Tun-i Pa Gid ang parte sa Sining Prinsipyo

• “Ang Buhi nga Cristo”

• Giya sa Balaan nga mga Kasulatan: “Jesucristo”

• Mga Topiko sang Ebanghelyo: “Jesucristo”

Pagtuo kay Jesucristo

Ang una nga prinsipyo sang ebanghelyo amo ang pagtuo kay Ginuong Jesucristo. Ang pagtuo amo ang pundasyon sang tanan nga iban pa nga mga prinsipyo sang ebanghelyo.

Ang pagtuo kay Jesucristo nagasakop sang kompiyansa nga Sia ang Bugtong nga Anak sang Dios. Sakop sini ang pagsalig sa Iya bilang aton Manluluwas kag Manunubos—nga Sia lang ang solo naton nga paagi nga makabalik sa presensya sang Dios (tan-awa sa Mga Binuhatan 4:10–12; Mosias 3:17; 4:6–8). Ginahagad kita nga magpakita sang “di-mauyog nga pagtuo sa iya, nga nagasandig sing bug-os sa mga merito niya nga gamhanan sa pagluwas” (2 Nefi 31:19).

Ang pagtuo kay Jesucristo nagasakop sang pagpati nga nag-antos Sia para sa aton mga sala paagi sa Iya nagabayad-sala nga sakripisyo. Tungod sang Iya sakripisyo, pwede kita matinloan kag matubos kon maghinulsol kita. Ini nga pagtinlo nagabulig sa aton nga makakita sang kalinong kag paglaum sa sini nga kabuhi. Ginatugotan man kita sini nga mabaton ang kabug-osan sang kalipay pagkatapos naton nga mapatay.

Ang pagtuo kay Jesucristo nagalakip sang pagsalig nga paagi sa Iya, tanan kita mabanhaw pagkatapos naton mapatay. Ini nga pagtuo magasustiner kag magapaumpaw sa aton sa mga tion nga mamatyan kita. Ang kasubo sang kamatayon madula paagi sa promisa sang Pagkabanhaw.

Ang pagtuo kay Jesucristo nagalakip sang pagtuo kag pagsalig nga gindala Niya sa Iya Kaugalingon ang aton mga kalisdanan kag mga kasablagan (tan-awa sa Isaias 53:3–5). Nahibal-an Niya paagi sa Iya eksperiyensya kon paano kita suportahan nga may kaluoy sa mga hangkat naton sa kabuhi (tan-awa sa Alma 7:11–12; Doktrina kag mga Kasugtanan 122:8). Kon maggamit kita sang pagtuo, ginabuligan Niya kita nga mag-abante sa tunga sang mga kabudlayan.

Paagi sa aton pagtuo sa Iya, sarang kita ayuhon ni Jesus sa pisikal kag espiritwal. Handa Sia pirme nga magbulig sa aton nga panumdumon ang Iya imbitasyon nga “Magtulok sa akon sa tagsa ka panghunahuna; indi magduhaduha, indi magkahadlok” (Doktrina kag mga Kasugtanan 6:36).

Prinsipyo sang Aksyon kag Gahum

Ang pagtuo kay Jesucristo nagatulod sa aksyon. Ginapahayag naton ang aton pagtuo paagi sa pagsunod sang mga kasuguan kag paghimo sang maayo kada adlaw. Nagahinulsol kita sa aton mga sala. Tampad kita sa Iya. Nagatinguha kita nga mangin mas pareho sa Iya.

Kon ginagamit naton ang aton pagtuo, maeksperiyensyahan naton ang gahum ni Jesus sa adlaw-adlaw naton nga kabuhi. Padakuon niya ang pinakamaayo naton nga pagpaninguha. Buligan Niya kita nga magtubo kag mabatoan ang tentasyon.

Pagpabakod sang Aton Pagtuo

Gintudlo ni propetang Alma nga ang pagpatubo sang pagtuo pwede nga magsugod sa simple nga “maghandum sa pagpati” (Alma 32:27). Dayon, para magtubo ang aton pagtuo kay Jesucristo, kinahanglan naton ini saguron paagi sa pagtuon sang Iya mga pulong, pagpangabuhi sang Iya mga gintudlo, kag pagtuman sang Iya mga kasuguan. Gintudlo ni Alma nga kon pasensyoso, matutom naton nga saguron ang pulong sang Dios sa aton tagipusuon, “ini magapanggamot [kag daw mangin pareho sa] kahoy nga nagatubo padulong sa kabuhi nga dayon”—gani magabakod ang aton pagtuo (Alma 32:41; tan-awa sa bersikulo 26–43).

Pagtuon sa Balaan nga mga Kasulatan

Pagtuo, Gahum, kag Kaluwasan

• 1 Nefi 7:12

• 2 Nefi 9:23; 25:23

• Moroni 7:33–34; 10:7

Ang Doktrina sang Pagtuo

• Alma 32

• Mga Taga-Efeso 2:8

Mga Ehemplo sang Pagtuo

• Eter 12

• Mga Hebreo 11

Mga Binuhatan kag Pagtuman

• 1 Nefi 3:7

• Doktrina kag mga Kasugtanan 130:20–21

• Santiago 2:17–26

Pagtuo padulong sa Paghinulsol

• Alma 34

Tun-i Pa Gid ang parte sa Sining Prinsipyo

• Giya sa Balaan nga mga Kasulatan: “Jesucristo,” “Magbayad-sala, Pagbayad-Sala,” “Pagtuo”

• Mga Topiko sang Ebanghelyo: “Jesucristo,” “Pagbayad-Sala ni Jesucristo,” “Pagtuo kay Jesucristo”

Paghinulsol

Ano ang Paghinulsol

Paghinulsol ang ikaduha nga prinsipyo sang ebanghelyo. Ang pagtuo kay Jesucristo kag ang aton pagpalangga sa Iya ang nagatulod sa aton nga maghinulsol (tan-awa sa Helaman 14:13). Ang paghinulsol amo ang proseso sang pagliso sa Dios kag pagtalikod sa sala. Kon maghinulsol kita, ang aton mga aksyon, mga handum, kag mga panghunahuna nagabag-o para mangin mas nagaugyon sa pagbuot sang Dios. Ang kapatawaran sang sala nangin posible paagi kay Jesucristo kag sa Iya nagabayad-sala nga sakripisyo.

Ang paghinulsol masobra pa sangsa paggamit sang pagbuot nga bag-uhon ang pamatasan ukon lampuwasan ang kahuyang. Ang paghinulsol amo ang sinsero nga pagdangop kay Cristo, nga nagahatag sa aton sang gahum nga maeksperiyensyahan ang “dako nga pagbag-o” sa aton mga tagipusuon (Alma 5:12–14). Kon maeksperiyensyahan naton ini nga pagbag-o sang tagipusuon, mabun-ag kita liwat sa espirituhanon (tan-awa sa Mosias 27:24–26).

Paagi sa paghinulsol, nagapatubo kita sang bag-o nga panan-aw sa Dios, sa aton kaugalingon kag sa kalibutan. Mabatyagan naton liwat ang pagpalangga sang Dios sa aton bilang Iya mga anak—kag ang pagpalangga sang aton Manluluwas sa aton. Ang oportunidad nga maghinulsol isa sa pinakadako nga bugay sang Dios nga ginhatag sa aton paagi sa Iya Anak.

Proseso sang Paghinulsol

Kon maghinulsol kita, ginakilala naton ang aton mga sala kag nagabatyag sang tunay nga pagkakonsensya. Ginakumpisar naton ang aton mga sala sa Dios kag ginapangayo ang Iya kapatawaran. Ginakumpisar man naton ang seryoso nga mga sala sa awtorisado nga mga lider sang Simbahan, nga nagasuporta sa aton sa aton paghinulsol. Ginahimo naton ang aton masarangan para magbayad, nga buot silingon pagtinguha nga tadlungon ang mga problema nga resulta sang aton mga hinimuan. Ang tunay nga paghinulsol mas makita sa matarong nga mga aksyon sa kalawigon sang panahon.

Ang paghinulsol adlaw-adlaw nga proseso sa bilog naton nga kabuhi. “Ang tanan nagpakasala kag nawad-an sang himaya sang Dios” (Mga Taga-Roma 3:23). Dapat sige-sige kita nga maghinulsol, nga ginatandaan nga aton “[mahimo ang] tanan nga butang [paagi kay Cristo] nga nagapabakod” sa aton (Mga Taga-Filipos 4:13). Ginpasalig kita sang Ginuo nga “kon ano kasunson maghinulsol ang akon katawhan patawaron ko sila sang ila mga kalapasan batok sa akon” (Mosias 26:30).

Mga Bugay sang Paghinulsol

Ang paghinulsol isa ka positibo nga prinsipyo nga nagadala sang kalipay kag kalinong. Ginadala kita sini “sa gahum sang Manunubos, padulong sa kaluwasan sang [aton] mga kalag” (Helaman 5:11).

Kon maghinulsol kita, ang aton pagkakonsensya kag kasubo magaayo sa proseso sang panahon. Mabatyagan naton ang impluwensya sang Espiritu sing mas bugana. Ang aton handum nga sundon ang Dios magabaskog.

“Tuman kadamo sing mga tawo ang nagakabig sang paghinulsol bilang silot—isa ka butang nga dapat likawan. … Apang ini nga balatyagon nga ginasilotan gintuga ni Satanas. Ginatinguhaan niya nga punggan kita sa pagtulok kay Jesucristo, nga nagatindog nga bukas ang mga butkon, nagalaum kag handa mag-ayo, magpatawad, magtinlo, magpabakod, magpaputli, kag magpakabalaan sa aton” (Russell M. Nelson, “Sarang Kita Maghimo sing Mas Maayo kag Mangin Mas Maayo,” Liahona, Mayo 2019, 67).

Pagtuon sa Balaan nga mga Kasulatan

Paghinulsol

• Alma 34:8–17; 36:6–21

• Doktrina kag mga Kasugtanan 18:10–13; 58:42–43; 61:2

• 2 Mga Taga-Corinto 7:9–10

Pagtubos kag Kapatawaran

• Helaman 5:10–11

Kaluoy para sa mga Nagahinulsol

• Alma 12:32–34; 42:13, 21–24

Tun-i Pa Gid ang parte sa Sining Prinsipyo

• Giya sa Balaan nga mga Kasulatan: “Maghinulsol, Paghinulsol,” “Magbayad-sala, Pagbayad-Sala”

• Libro sang Pangkabilogan nga Pagsulundan, 32.1

• Mga Topiko sang Ebanghelyo: “Paghinulsol,” “Pagbayad-Sala ni Jesucristo”

Bunyag: Ang Aton Una nga Kasugtanan upod sa Dios

Ang pagtuo kay Jesucristo kag ang paghinusol nagahanda sa aton para sa mga ordinansa sang bunyag kag pagkumpirma. Ang bunyag amo ang una nga nagaluwas nga ordinansa sang ebanghelyo ni Jesucristo. Sa pagbaton naton sining malipayon nga ordinansa sang paglaum, nagahimo kita sang una naton nga kasugtanan upod sa Dios.

Ang ordinansa isa ka sagrado nga buluhaton ukon seremonya nga ginahikot paagi sa awtoridad sang priesthood. Ang iban nga mga ordinansa, pareho sang bunyag, kinahanglanon para sa aton kaluwasan.

Paagi sa mga ordinansa, nagahimo kita sang mga kasugtanan upod sa Dios. Ini nga mga kasugtanan sagrado nga mga promisa sa tunga naton kag sang Dios. Nagapromisa Sia nga bugayan kita kon tumanon naton ang aton mga promisa sa Iya. Dapat may mabaskog kita nga pangako nga tumanon ang aton mga promisa sa Dios.

Naghatag ang Dios sang mga ordinansa kag mga kasugtanan para buligan kita nga magpalapit sa Iya kag makaangkon sang kabuhi nga wala katapusan. Sa pagbaton naton sang mga ordinansa sang priesthood kag pagtuman sang kaupod sini nga mga kasugtanan, maeksperiyensyahan naton ang “gahum sang pagkadiosnon” sa aton mga kabuhi (Doktrina kag mga Kasugtanan 84:20).

Ang Kasugtanan sa Bunyag

Gintudlo sang Manluluwas nga ang bunyag kinahanglanon para makasulod kita sa ginharian sang langit (tan-awa sa Juan 3:5). Kinahanglanon man naton ini para mangin mga miyembro sang Simbahan ni Jesucristo. Nagpahamtang ang aton Manluluwas sang ehemplo paagi sa pagpabunyag (tan-awa sa Mateo 3:13–17).

Kon mabunyagan kita kag nagatuman sang aton kasugtanan, nagapromisa ang Dios nga patawaron kita sang aton mga sala (tan-awa sa Mga Binuhatan 22:16; 3 Nefi 12:1–2). Nangin posible ining dako nga bugay paagi sa nagabayad-sala nga sakripisyo ni Jesucristo, nga “nagahigugma sa aton kag naghugas sa aton gikan sa aton mga sala bangud sang iya dugo” (Bugna 1:5). Nagpromisa man ang Dios nga bugayan kita sang pagpakig-upod sang Balaan nga Espiritu para mapakabalaan kita, magiyahan, kag mapaumpawan.

Sa aton parte sang kasugtanan sa bunyag, nagasaksi kita nga handa kita nga dalhon sa aton mga kaugalingon- ang ngalan ni Jesucristo. Nagapromisa man kita nga pirme Sia panumdumon kag tumanon ang Iya mga kasugoan. Nagapromisa kita nga palanggaon kag serbisyohan ang iban, “magpangasubo upod sadtong mga nagapangasubo; … magpaumpaw sadtong mga nagakinahanglan sang kaumpawan, kag magtindog bilang mga saksi sang Dios sa tanan nga mga tinion kag sa tanan nga mga butang, kag sa tanan nga mga duog” (Mosias 18:9; tan-awa sa mga bersikulo 8–10, 13). Nagapahayag kita sang determinasyon sa pag-alagad kay Jesucristo hasta sa katapusan sang aton mga kabuhi (tan-awa sa Doktrina kag mga Kasugtanan 20:37; Mosias 2:17).

Ang mga pangako naton sa kasugtanan nga upod sang bunyag dako nga responsibilidad. Makainspirar man ini kag makapalipay. Nagapahamtang ini sang espesyal nga relasyon sa tunga naton kag sa Amay nga Langitnon kon diin ginapalab-ot Niya ang Iya pagpalangga sa katubtuban.

Bunyag paagi sa Pagtugmaw

Gintudlo ni Jesus nga kinahanglan naton mabunyagan paagi sa pagtugmaw para sa kapatawaran sang aton mga sala (tan-awa sa Doktrina kag mga Kasugtanan 20:72–74). Ang bunyag paagi sa pagtugmaw nagasimbolo sang kamatayon, lubong, kag Pagkabanhaw ni Jesucristo (tan-awa sa Mga Taga-Roma 6:3–6).

Ang bunyag paagi sa pagtugmaw may mabaskog man nga simbolismo para sa aton sa personal. Ginarepresentar sini ang kamatayon sang daan naton nga kabuhi, ang paglubong sina nga kabuhi, kag ang pagbangon naton sa espirituhanon nga pagkabun-ag liwat. Kon kita mabunyagan, ginasugdan naton ang proseso sang pagkabun-ag liwat kag mangin bag-o nga espirituhanon nga mga anak ni Cristo (tan-awa sa Mosias 5:7–8; Mga Taga-Roma 8:14–17).

Kabataan

Ang mga kabataan wala ginabunyagan kon wala pa maglab-ot sa edad sang pagka-may-salabton, nga amo ang walo katuig (tan-awa sa Doktrina kag mga Kasugtanan 68:27). Ang mga bata nga napatay antes sina nga edad gintubos na paagi sa Pagbayad-Sala ni Jesucristo (tan-awa sa Moroni 8:4–24; Doktrina kag mga Kasugtanan 137:10). Antes bunyagan ang kabataan, dapat sila tudloan sang ebanghelyo para mangin handa sila sa sining importante nga tikang sang ila kabuhi nga maghimo sang kasugtanan upod sa Dios.

Ang Sakramento

Gusto sang Amay nga Langitnon nga mangin tampad kita sa mga kasugtanan nga ginahimo naton upod sa Iya. Para mabuligan kita nga himuon ini, ginsugo Niya kita nga magkitaay pirme para mag-ambit sang sakramento. Ang sakramento isa ka ordinansa sang priesthood nga ginsugdan ni Jesus sa Iya mga Apostoles antes lang gid sang Iya Pagbayad-Sala.

Ang pag-ambit sang sakramento ang sentro nga katuyuan sang sakramento nga miting kada semana. Ang tinapay kag tubig ginabendisyunan kag ginapasa sa kongregasyon. Ginarepresentar sang tinapay ang pagsakripisyo sang Manluluwas sang Iya lawas para sa aton. Ginarepresentar sang tubig ang Iya dugo, nga Iya ginpaagay para sa aton.

Nagaambit kita sining tinapay kag tubig sa pagdumdom sang sakripisyo sang Manluluwas kag para bag-uhon ang aton mga kasugtanan upod sa Dios. Mabaton naton liwat ang promisa nga makaupod naton ang Espiritu.

Antes sang Bunyag

Antes mabunyagan ang imo ginatudloan, dapat nagpatubo na sila sang pagtuo kay Cristo, naghinulsol, kag naghimo sang nagakaigo nga mga pagbag-o sa ila kabuhi para mangin kwalipikado sa bunyag pareho sa ginhambal sa Doktrina kag mga Kasugtanan 20:37. Dapat man sila magpangako nga tumanon ang mga kasuguan kag ipangabuhi ang ebanghelyo ni Jesucristo. Kon nag-set na kamo sang petsa sang bunyag pero ang tawo kinahanglan pa sang dugang nga preparasyon, i-postpone ang bunyag hasta mangin handa na sia.  

Antes sang bunyag, ang kada tawo dapat:

• Makabaton sang tanan nga mga leksyon sang misyonero.

• Makaistoryahanay sa elders quorum president, Relief Society president, kag sa bishop.

• Maka-attend sa pila ka sakramento nga miting.

Awtoridad sa Pagbunyag

Ang pila ka tawo nga ginbunyagan na sa iban nga simbahan mahimo nga magpamangkot kon ngaa kinahanglan nila bunyagan liwat. Ang bunyag kag kompirmasyon kinahanglan nga himuon sang mga nagakapot sang priesthood nga gin-ordin sa paghimo sina nga mga ordinansa (tan-awa sa Mga Artikulo sang Pagtuo 1:5; Mga Binuhatan 19:1–6; Mga Hebreo 5:4).

Pagtuon sa Balaan nga mga Kasulatan

Ehemplo ni Cristo

• 2 Nefi 31:4–18

• Mateo 3:13–17

Ang Kasugtanan sa Bunyag

• 2 Nefi 31:13

• Mosias 18:8–10, 13

• Alma 7:15–16

• Doktrina kag mga Kasugtanan 20:37

Mga Kinahanglanon para sa Bunyag

• 2 Nefi 9:23

• Mosias 18:8–10

• Alma 7:14–15

• 3 Nefi 11:23

• Moroni 6:1–3

• Doktrina kag mga Kasugtanan 20:37

• Mga Binuhatan 2:37–39

Ginpromisa nga mga Bugay sang Bunyag

• Mosias 4:11–12

• Moroni 8:25–26

Kakinahanglanon sang Awtoridad

• Doktrina kag mga Kasugtanan 22

• Mateo 28:19–20

• Mga Hebreo 5:4

Ginsugdan ni Jesus ang Sakramento

• 3 Nefi 18:1–18

• Lucas 22:15–20

Ang Pangsakramento nga mga Pangamuyo

• Moroni 4 kag 5

• Doktrina kag mga Kasugtanan 20:75–79

Pag-ambit sang Sakramento

• Doktrina kag mga Kasugtanan 27:2

• 1 Mga Taga-Corinto 11:23–29

Tun-i Pa Gid ang parte sa Sining Prinsipyo

• Giya sa Balaan nga mga Kasulatan: “Bunyag, Magbunyag,” “Sakramento”

• Mga Topiko sang Ebanghelyo: “Bunyag,” “Sakramento”

Ang Dulot sang Balaan nga Espiritu

Pagbaton sang Dulot sang Balaan nga Espiritu

Ang bunyag may duha ka bahin. Gintudlo ni Jesus nga kinahanglan naton nga “matawo sa tubig kag sa Espiritu” para makasulod sa ginharian sang Dios (Juan 3:5; emphasis gindugang). Gintudlo ni Joseph Smith, “Ang bunyag paagi sa tubig katunga lang sang bunyag, kag wala kapuslanan kon wala ang katunga sini—nga amo ang bunyag sang Balaan nga Espiritu” (Teachings of Presidents of the Church: Joseph Smith [2007], 95).

Ang bunyag paagi sa tubig dapat sundan sang bunyag sang Espiritu para mangin kompleto. Kon mabaton naton ang duha ka bunyag, matinloan kita sang aton mga sala kag mabun-ag liwat sa espirituhanon. Dayon ginasugdan naton ang bag-o nga espirituhanon nga kabuhi bilang mga disipulo ni Cristo.

Mabaton naton ang bunyag sang Espiritu paagi sa ordinansa nga ginatawag kompirmasyon. Ginahikot ini nga ordinansa sang isa ukon madamo pa nga nagakapot sang priesthood nga nagatakdong sang ila mga kamot sa aton ulo. Una ginakompirma nila kita nga miyembro sang Simbahan, kag dayon ginahatag nila ang dulot sang Balaan nga Espiritu sa aton. Amo man ini ang ordinansa nga ginatumod sa Bag-ong Katipan kag sa Libro ni Mormon (tan-awa sa Mga Binuhatan 8:14–17; 3 Nefi 18:36–37).

Ang Balaan nga Espiritu ang ikatatlo nga miyembro sang Pangulohan sang Dios. Upod Sia nga nagabuligay sa Amay nga Langitnon kag kay Jesucristo. Kon mabaton naton ang dulot sang Balaan nga Espiritu, pwede naton Sia mangin kaupod sa bilog naton nga kabuhi kon matinuohon kita.

Paano Kita Ginabugayan sang Balaan nga Espiritu

Ang dulot sang Balaan nga Espiritu isa sa pinakadako nga regalo sang aton Amay nga Langitnon. Ang Balaan nga Espiritu nagatinlo sa aton, nagahimo sa aton nga mas balaan, mas kompleto, mas pareho sa Dios (tan-awa sa 3 Nefi 27:20). Ginabuligan Niya kita nga magbag-o kag magtubo sa espirituhanon samtang ginatinguhaan naton nga sundon ang mga pagsulundan sang Dios.

Ginabuligan kita sang Balaan nga Espiritu nga magtuon kag makilala ang kamatuoran (tan-awa sa Moroni 10: 5). Ginakompirma man Niya ang kamatuoran sa aton mga tagipusuon kag kaisipan. Dugang pa, ginatudloan kita sang Balaan nga Espiritu nga magtudlo sang kamatuoran (tan-awa sa Doktrina kag mga Kasugtanan 42:14). Kon magtuon kag magtudlo kita sang kamatuoran paagi sa gahum sang Balaan nga Espiritu, ginadala Niya ini sa aton tagipusuon (tan-awa sa 2 Nefi 33:1).

Kon mapainubuson naton nga pangayuon ang direksyon halin sa Balaan nga Espiritu, giyahan Niya kita (tan-awa sa 2 Nefi 32:5). Upod sina diri ang pagpabatyag sa aton kon paano naton alagaran ang iban.

Ang Balaan nga Espiritu nagahatag sang espirituhanon nga kusog para malampuwasan naton ang kahuyang. Ginabuligan Niya kita nga mabatoan ang tentasyon. Ginapaandaman Niya kita sang espiritwal kag pisikal nga katalagman.

Buligan kita sang Balaan nga Espiritu sa tunga sang mga kabudlayan sang kabuhi. Paumpawan Niya kita sa panahon sang pagtilaw ukon kasubo, ginapuno kita sang paglaum (tan-awa sa Moroni 8:26). Paagi sa Balaan nga Espiritu, mabatyagan naton ang pagpalangga sang Dios sa aton.

Giya halin sa Balaan nga Espiritu

Laban-laban nga nabatyagan sang imo mga ginatudloan ang impluwensya sang Balaan nga Espiritu samtang nagabisita kamo sa ila kag samtang nagatuon sila kag nagapangamuyo. Ipaathag nga para padayon nila nga maeksperiyensyahan ining manami nga pamatyagon, dapat sila magbasa sang Libro ni Mormon, magpangamuyo, magsimba, kag magtuman sang mga kasuguan.

Ipaathag nga ang bunyag kag kompirmasyon nagahatag sang bugay sang padayon nga giya sang Balaan nga Espiritu.

Kon kinahanglan, tudloi ang tawo kon paano magpangamuyo. Tan-awa sa “Magpangamuyo agud Mahibaloan ang Kamatuoran paagi sa Balaan nga Espiritu” sa leksyon 1 kag “Magpangamuyo Pirme” sa leksyon 4 para sa giya kon paano buligan ang isa ka tawo nga magpangamuyo.

Pagtuon sa Balaan nga mga Kasulatan

Kinaiya sang Balaan nga Espiritu

• Doktrina kag mga Kasugtanan 8:2–3; 130:22–23

• Lucas 24:31–32

• Juan 3:5–8

• Mga Taga-Galacia 5:22–23

Mga Bugay kag Impluwensya gikan sa Balaan nga Espiritu

• 2 Nefi 32:1–5; 33:1–2

• 3 Nefi 27:13–22 (bersikulo 20)

• Moises 6:61

• Juan 14:26

Importansya sang Dulot sang Balaan nga Espiritu

• 2 Nefi 31:11–12, 18, 21

• 3 Nefi 18:36–37; 19:13; 27:19–20

• Doktrina kag mga Kasugtanan 19:31; 20:38, 41; 33:15

• Mga Binuhatan 19:1–6

Tun-i Pa Gid ang parte sa Sining Prinsipyo

• Giya sa Balaan nga mga Kasulatan: “Balaan nga Espiritu,” “Dulot sang Balaan nga Espiritu”

• Mga Topiko sang Ebanghelyo: “Balaan nga Espiritu,” “Espirituhanon nga mga Dulot”

Magpadayon tubtob sa Katapusan

Kon mabunyagan kita kag makompirma, nagasulod kita sa kasugtanan upod sa Dios. Upod sa iban nga butang, nagapromisa kita nga tumanon ang Iya mga kasuguan kag alagaran Sia sa bilog naton nga kabuhi (tan-awa sa Mosias 18:8–10, 13; Doktrina kag mga Kasugtanan 20:37).

Pagkatapos naton nga magsulod sa banas sang ebanghelyo paagi sa bunyag kag kompirmasyon, ginatinguhaan naton ang tanan para magpadayon diri. Kon magtalang kita sa banas bisan diutay lang, gamiton naton ang aton pagtuo kay Cristo para maghinulsol. Ang bugay sang paghinulsol nagatugot sa aton nga makabalik sa banas sang ebanghelyo kag hawiran ang mga bugay sang aton mga kasugtanan upod sa Dios. Kon sinsero kita nga nagahinulsol, bukas pirme ang Dios sa pagpatawad kag pagbaton sa aton liwat.

Ang pagpadayon tubtob sa katapusan nagakahulugan sang pagpabilin nga tampad sa Dios hasta sa katapusan sang aton mga kabuhi—sa maayo kag mabudlay nga panahon, sa katin-aran kag kabudlayan. Mapainubuson naton nga ginatugotan si Cristo nga pormahon kita kag himuon kita nga mas pareho sa Iya. Nagatulok kita kay Cristo nga may pagtuo, pagsalig, kag paglaum bisan ano ang matabo sa aton mga kabuhi.

Ang pagpadayon tubtob sa katapusan wala nagakahulugan nga magkapyot lang kita hasta mapatay. Kundi, nagakahulugan ini sang pagtutok sang aton mga kabuhi, mga panghunahuna, kag aksyon kay Jesucristo. Upod diri ang padayon nga paggamit sang pagtuo kay Cristo kada adlaw. Padayon man kita nga nagahinulsol, nagatuman sang aton mga kasugtanan sa Dios, kag nagapangita sang pag-upod sang Balaan nga Espiritu.

Ang pagpadayon tubtob sa katapusan may upod nga “[pagdutdot] pasulong upod ang isa ka kalig-on kay Cristo, nga may isa ka himpit nga kasanagan sang paglaum, kag isa ka gugma sang Dios kag sang tanan nga mga tawo.” Nagpromisa ang aton Amay nga Langitnon nga kon magpadayon kita tubtob sa katapusan, aton “maangkon ang kabuhi nga wala’y katapusan” (2 Nefi 31:20).

Pagtuon sa Balaan nga mga Kasulatan

Magpadayon tubtob sa Katapusan

• 2 Nefi 31:14–20

• 3 Nefi 27:13–22

• Mateo 10:22

Mga Bugay para sa Mga Nagapadayon

• 1 Nefi 13:37; 22:31

• 3 Nefi 15:9

• Doktrina kag mga Kasugtanan 14:7

Tun-i Pa Gid ang parte sa Sining Prinsipyo

• Mga Topiko sang Ebanghelyo: “Pagtilaw”

• Giya sa Balaan nga mga Kasulatan: “Magbatas,” “Pagtilaw”

Ang Ebanghelyo ni Jesucristo Nagabugay sang Tanan nga Anak sang Dios

Ang ebanghelyo ni Jesucristo para sa tanan nga anak sang Dios. Ginatudlo sa balaan nga mga kasulatan nga “ang tanan palareho sa Dios” wala sapayan sa aton ginhalinan ukon sitwasyon. Ginahagad Niya ang “tanan sa pagkari sa iya kag mag-ambit sang iya kaayo; kag wala sia sing ginadumilian nga bisan sin-o nga nagakari sa iya” (2 Nefi 26:33).

Ginabugayan kita sang ebanghelyo sa bilog naton nga mortal nga kabuhi kag sa bilog nga wala katubtuban. Laban-laban kita nga mangin malipayon—bilang mga indibidwal kag bilang pamilya—kon ginapangabuhi naton ang mga pinanudlo ni Jesucristo (tan-awa sa Mosias 2:41; “Ang Panimalay: Isa ka Proklamasyon sa Kalibutan,” ChurchofJesusChrist.org). Ang pagpangabuhi sang ebanghelyo nagapasangkad sang aton mga kalipay, nagapapagsik sang aton mga aksyon, kag nagapauswag sang aton mga relasyon.

Ang pagpangabuhi sang ebanghelyo ni Jesucristo nagaamlig man sa aton sa paghimo sang mga pagpili nga makahalit sa aton sa pisikal ukon espiritwal. Ginabuligan kita sini nga makakita sang kusog kag kaumpawan sa panahon sang pagtilaw kag kasubo. Ginapahamtang sini ang alagyan padulong sa malipayon nga kabuhi nga wala katapusan.

Isa sa dako nga mensahe sang ginpanumbalik nga ebanghelyo amo nga tanan kita bahin sang pamilya sang Dios. Kita ang pinalangga Niya nga mga anak nga lalaki kag babayi. Wala sapayan sang sitwasyon naton sa pamilya sa duta, ang kada isa sa aton miyembro sang panimalay sang Dios.

Isa pa ka dako nga bahin sang aton mensahe amo nga ang panimalay pwede mag-upod sa katubtuban. Ang panimalay gintalana sang Dios. Ang plano sang kalipayan sang Amay nga Langitnon nagatugot nga ang mga relasyon sa pamilya magpadayon pagkatapos sang kamatayon. Ang sagrado nga mga ordinansa kag kasugtanan sa templo nagapatigayon sa mga pamilya nga mag-ululupod tubtob sa katubtuban.

Paagi sa kasanag sang ebanghelyo, maresolbar sang mga pamilya ang indi pag-intiendihanay, pag-ilinaway, kag mga hangkat. Ang mga pamilya nga naguba tungod sa pag-ilinaway, pwede mag-ayo paagi sa paghinulsol, pagpatawad, kag pagtuo sa gahum sang Pagbayad-Sala ni Jesucristo.

Ang ebanghelyo ni Jesucristo nagabulig sa aton nga magpatubo sang mas mabaskog nga mga relasyon sa pamilya. Ang puluy-an amo ang pinakamaayo nga lugar sa pagtudlo kag pagtuon sang mga prinsipyo sang ebanghelyo. Ang isa ka puluy-an nga ginpasad sa mga prinsipyo sang ebanghelyo mangin isa ka lugar sang kapahuwayan kag kahilwayan sa katalagman. Ini mangin lugar kon diin ang Espiritu sang Ginuo magatiner.

Mangin Sensitibo Kon Magtudlo parte sa Pamilya

Kon magtudlo parte sa mga pamilya, magmangin sensitibo kon ang mga tawo indi kasado, indi makabata, ukon may indi manami nga relasyon sa mga miyembro sang pamilya. Ipatalupangod nga palangga sila sang Dios bilang bahin sang Iya pamilya. Buligi sila nga makita kon paano sila bugayan sang ebanghelyo sa personal wala sapayan sang mga sirkumstansya sang ila pamilya. Kon matutum sila, mahatag ang Dios sang paagi nga mabaton nila ang mga bugay sang mapinalanggaon nga pamilya, sa sini man nga kabuhi ukon sa pihak nga kabuhi.

Pagtuon sa Balaan nga mga Kasulatan

• 2 Nefi 25:26

• 3 Nefi 18:21

• Doktrina kag mga Kasugtanan 68:25

• Moises 2:27–28; 5:1

• Abraham 2:11

• Mga Taga-Efeso 3:14–15

• Genesis 12:3

Tun-i Pa Gid ang parte sa Sining Prinsipyo

• Giya sa Balaan nga mga Kasulatan: “Ebanghelyo”

• “Ang Panimalay: Isa ka Proklamasyon sa Kalibutan”

• Libro sang Pangkabilogan nga Pagsulundan, mga kapitulo 2 kag 16

• Mga Topiko sang Ebanghelyo: “Ebanghelyo,” “Pamilya”

Malip-ot kag Hustohan lang Kalaba nga Outline sang Leksyon

Ang masunod nga outline sampol sang pwede mo itudlo kon gamay lang ang imo oras. Sa paggamit sining outline, magpili sang isa ukon mas madamo pa nga mga prinsipyo nga itudlo. Ang pundasyon nga doktrina sang tagsa ka prinsipyo ara sa ibabaw sa leksyon.

Samtang nagatudlo ka, magpamangkot kag magpamati. Maghatag sang mga imbitasyon nga makabulig sa mga tawo nga magtuon kon paano mas magpalapit sa Dios. Isa ka importante nga imbitasyon sa tawo amo nga makigkita liwat sa inyo. Ang kalabaon sang leksyon depende sa imo nga ipamangkot kag sa imo pagpamati.

Ano ang Pwede Mo Itudlo sa mga Tawo sa 3-10 ka Minutos

• Ginpadala sang Dios ang Iya Bugtong nga Anak nga si Jesucristo sa duta, para tubuson kita sa sala kag kamatayon.

• Ang pagtuo kay Jesucristo isa ka prinsipyo sang pag-akto kag gahum. Nagabulig ang pagtuo nga maeksperiyensyahan naton ang nagapabakod nga gahum sang Manluluwas sa aton mga kabuhi.

• Ang pagtuo kay Jesucristo nagatulod sa aton nga maghinulsol. Ang paghinulsol amo ang proseso sang pagliso sa Dios kag pagtalikod sa sala. Kon maghinulsol kita, ang aton mga aksyon, mga handum, kag mga panghunahuna nagabag-o para mangin mas nagaugyon sa pagbuot sang Dios.

• Kon maghinulsol kita, patawaron kita sang Dios. Nangin posible ang kapatawaran tungod ginbayran ni Jesucristo ang aton mga sala.

• May duha ka bahin ang bunyag: bunyag paagi sa tubig kag paagi sa Espiritu. Kon ginabunyagan kita kag ginakompirma, ginatinloan kita sa aton mga sala, nga nagahatag sa aton sang bag-o nga panugod sa kabuhi.

• Pagkatapos naton nga mabunyagan paagi sa tubig, mabaton naton ang dulot sang Balaan nga Espiritu paagi sa ordinansa sang kompirmasyon.

• Kon matutom naton nga sundon ang banas sang ebanghelyo hasta sa katapusan sang aton mga kabuhi, nagapromisa ang Dios nga mabaton naton ang kabuhi nga wala katapusan.