Faatomuaga

O lou taimi o le faafalepuipuiina e le manaomia ona avea ma aafiaga e faamatalaina ai lou olaga. O lou faasinomaga o se atalii/afafine o le Atua e faavavau, e tusa lava pe na faafalepuipuiina pe leai. O le agai i luma ma le faatuatua ma le faalagolago ia Iesu Keriso o le a fesoasoani ia te oe e avea ai ma tagata e finagalo o Ia ia avea ai oe. O le a fesoasoani o Ia ia te oe e ola i se olaga faamalieina ma anoa.

E mafai ona faigata le olaga i le taimi ma le maea ai o le faafalepuipuiina. O le sailia o galuega ma fale, faamalolosia o sootaga, ma le tele o isi vaega o le olaga i aso taitasi e ono faafaigataina e se talafaamaumau o se solitulafono. E ui lava i nei faigata, e le o tuua na o oe. O le mulimuli i aoaoga a Keriso, e mafai ai ona e faaleleia oe lava ma tuua ou taimi vaivai, filifiliga le lelei, ma aafiaga faigata i le taimi ua tuanai. O le a le tuulafoaia lava oe e le Atua. O Lona alofa, faamanuiaga, ma le talitonuga mautinoa ia te oe e mafai ona avea ma punavai o le malosi i aso taitasi i soo se luitau (tagai Mataio 11:28–29).

E faaopoopo atu i le Atua le Tama ma Iesu Keriso, e mafai foi ona avea lou aiga, uo, ma le Ekalesia ma punavai o fesoasoaniga. E toatele foi tagata lelei ua faatulagaina punaoa mo le alalafaga ma le faitalia ua tuuto atu i lou manuia mo se taimi umi. Ae peitai, ia manatua o oe lava e te faia filifiliga lelei o le a fesoasoani ia te oe e alualu ai i luma.

O ni nai amioga nei o le a fesoasoani ia te oe e faipaaga ai ma le Faaola e suia ma faaleleia atili:

Ia e latalata atu i le Atua e ala i le tatalo, suesue i tusitusiga paia, ma le mafaufau loloto. O nei faatinoga faigofie o le a musuia ai oe e faia ni filifiliga lelei ma fesoasoani ia te oe e malamalama ai ma faatuatuaina Iesu Keriso o lou Faaola ma lau uo.
Faatulaga se fesootaiga ma le Ekalesia. Faafesootai taitai o le Ekalesia i le lotoifale e pei o le epikopo, peresitene o le paranesi, peresitene o le korama a toeaina (mo alii), po o le peresitene o le Aualofa (mo tamaitai). Faasoa atu ia i latou lau malaga, e aofia ai lou liua ma ou faamoemoega mo le lumanai. E mafai ona fesoasoani nei taitai ia te oe e faatulaga lou olaga ma auai i le Ekalesia.
Ia faaauau pea ona usitaia matafaioi faaletulafono uma, faasa, ma taunuuga. Aua nei auai i soo se faatinoga e ono solia ai tuutuuga o lou magalo, palola, po o le faanofovaavaaia pe taitai atu ai i le toe faafalepuipuiina. Fesootai soo ma taitai o le vaavaaiga e faatatau i lou alualu i luma, manaoga, ma faanaunauga.
Aloese mai uo, nofoaga, po o ituaiga olaga e mafai ona taitai atu ai i le faafalepuipuiina. Saili ni uo o le a lagolagoina oe a o e saili e faia ni suiga lelei i lou olaga. Saili se galuega ma se fale i se vaega o lou nuu lea o le a mafai ai ona e mulimuli i au sini o le faaleleia ma o le a ausia ai ou tulaga manaomia faaletulafono. Faaaoga le taimi lenei o lou olaga e faatulaga tonu ai lou lumanai. Saili se fautuaga mai ou taitai o le Ekalesia e uiga i nofoaga e nonofo ai ma siosiomaga saogalemu faaagafesootai.

Manatua—e alofa le Atua ia te oe, ma o le a Ia musuia oe, tuuina atu ia te oe le malosi e galue ai, ma taitai atu oe ia i latou e mafai ona fesoasoani (tagai 1 Nifae 17:3).