ធនធានណែនាំសម្រាប់អ្នកផ្សព្វផ្សាយសាសនា ៖ ដំណោះស្រាយការណ៍អាសគ្រាម
ប្រសិនបើអ្នកមានបទពិសោធន៍ជំរុញឲ្យមើលការណ៍អាសគ្រាម ហើយកំពុងព្យាយាមដកវាចេញពីជីវិតរបស់អ្នក ការណែនាំនេះអាចជួយបាន ។ វាមានគោលបំណងដើម្បីបំពេញបន្ថែម និងជួយអ្នកអនុវត្តគោលការណ៍ដែលបានរកឃើញនៅក្នុងផ្នែក « សូមធ្វើតាមវិធីបង្ការក្នុងការប្រើប្រាស់បច្ចេកវិទ្យា » នៅក្នុងជំពូកទី ២ នៃ ប្រកាសដំណឹងល្អរបស់យើង ៖ មគ្គុទ្ទេសក៍ចែកចាយដំណឹងល្អនៃព្រះយេស៊ូវគ្រីស្ទ ( ឆ្នាំ ២០២៣ ទំព័រ ២០–២២ ) ។ ដើម្បីទទួលបានប្រយោជន៍ច្រើនបំផុតពីធនធាននេះ សូមប្រាកដថាត្រូវពិនិត្យឡើងវិញនូវផ្នែកនោះ និងមេរៀនអំពីវិធីបង្ការដែលបានកែសម្រួល ។
ស្រឡាញ់
សេចក្ដីស្រឡាញ់របស់ព្រះចំពោះអ្នក
អ្នកជាបុត្រនៃព្រះវរបិតាសួគ៌ដែលពេញដោយក្តីស្រឡាញ់ ។ ដោយសារសេចក្ដីស្រឡាញ់របស់ទ្រង់ចំពោះអ្នក នោះទ្រង់បានតែងតាំងព្រះអង្គសង្គ្រោះ ព្រះយេស៊ូវគ្រីស្ទ ដើម្បីដឹកនាំអ្នក បង្រៀនអ្នក ហើយជួយអ្នកពេលអ្នកលំបាក ។ អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖ « ប៉ុន្ដែមិនថាអ្នកគិតថាអ្នកយឺតយ៉ាងណាទេ មិនថាឱកាសប៉ុន្មានដែលអ្នកគិតថាអ្នកបានរំលង មិនថាកំហុសច្រើនប៉ុនណាដែលអ្នកមានអារម្មណ៍ថាអ្នកបានធ្វើ ឬ ទេពកោសល្យដែលអ្នកគិតថាអ្នកមិនមាន ឬ ការឃ្លាតឆ្ងាយពីផ្ទះ និង គ្រួសារ និង ព្រះដែលអ្នកមានអារម្មណ៍ថាអ្នកបានធ្វើដំណើរមកឆ្ងាយយ៉ាងណានោះទេ ខ្ញុំសូមថ្លែងទីបន្ទាល់ថា អ្នក មិន បានធ្វើដំណើរឆ្ងាយផុតពីទំហំនៃសេចក្ដីស្រឡាញ់របស់ព្រះនោះទេ ។ វាមិនអាចទៅរួចសម្រាប់អ្នកដើម្បីលិចទៅជ្រៅជាងពន្លឺនៃដង្វាយធួនរបស់ព្រះគ្រីស្ទដ៏និរន្ដន៍ដែលអាចចែងចាំងដល់បានទេ » ( « The Laborers in the Vineyard » Ensign ឬ Liahona ខែ ឧសភា ឆ្នាំ ២០១២ ទំព័រ ៣១–៣៣ ) ។
សេចក្តីសង្ឃឹមនៅក្នុងព្រះគ្រីស្ទ
មិនថាអ្នកស្ថិតនៅកន្លែងណាលើដំណើររបស់អ្នកទេ ព្រះអម្ចាស់តែងតែប្រទានសេចក្ដីសង្ឃឹម ការព្យាបាល និងផ្លូវទៅកាន់សុវត្ថិភាព និងភាពសុខសាន្តជានិច្ច ។ អ្នកអាចបែរទៅរកទ្រង់គ្រប់ពេល ហើយទ្រង់នឹងជួយអ្នកឲ្យត្រឡប់មកវិញ ឬបន្តនៅលើមាគ៌ានេះ។ « អ្នកមិនចាំបាច់យកឈ្នះលើឧបសគ្គនានាដោយខ្លួនអ្នកនោះទេ ។ សូមពឹងផ្អែកលើកម្លាំងដែលមានមកពីដង្វាយធួនរបស់ព្រះអង្គសង្គ្រោះ និងសេចក្តីសញ្ញាដែលអ្នកបានចុះជាមួយទ្រង់ ។ ព្រះអម្ចាស់ជ្រាបដឹងពីឧបសគ្គដែលអ្នកប្រឈមមុខ ហើយទ្រង់នឹងជួយអ្នកក្នុងកិច្ចការដ៏អស្ចារ្យនេះ » ( ប្រកាសដំណឹងល្អរបស់យើង ទំព័រ ២២ ) ។
សូមចាំថា គ្មានមនុស្សដែលល្អឥតខ្ចោះនោះទេ ហើយនេះបូករួមទាំងពួកអ្នកផ្សព្វផ្សាយសាសនាផងដែរ ។ យើងមិនបានរំពឹងថានឹងទទួលបានភាពល្អឥតខ្ចោះក្នុងជីវិតនេះដែរ ។ ទោះជាតម្រូវឲ្យមានការខិតខំប្រឹងប្រែងក្នុងផ្នែករបស់យើងក្តី ក៏យើងអាចទទួលបានសេចក្ដីសង្គ្រោះ និងបានល្អឥតខ្ចោះតែតាមរយៈព្រះគ្រីស្ទប៉ុណ្ណោះ ( សូមមើល នីហ្វៃទី២ ២:៨ នីហ្វៃទី២ ១០:២៤; ម៉ូសាយ ៣:១៧; មរ៉ូណៃ ១០:៣២–៣៣ ) ។ ផ្លូវទៅកាន់ភាពល្អឥតខ្ចោះ គឺជាដំណើរការពេញមួយជីវិត ។ សូមអត់ធ្មត់ជាមួយខ្លួនឯង និងអ្នកដទៃនៅពេលដែលអ្នកព្យាយាមកែលម្អដោយមានជំនួយពីព្រះអង្គសង្គ្រោះ ។
អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់បានមានប្រសាសន៍ថា ៖ « គ្មានកម្រិតជាក់លាក់នៃភាពឥតខ្ចោះ ដែលបងប្អូនត្រូវតែមានដើម្បីស័ក្ដិសមនឹងព្រះគុណរបស់ព្រះឡើយ ។ … ព្រះមិនបានរង់ចាំដើម្បីរកបុគ្គលដ៏ឥតខ្ចោះម្នាក់ឲ្យស្ដារដំណឹងល្អរបស់ទ្រង់ឡើងវិញនោះទេ ។ ប្រសិនបើទ្រង់ចាំវិញ ទ្រង់នឹងនៅតែរង់ចាំនៅឡើយទេ » ( «Come and Belong » Ensign ឬ Liahona ខែ ឧសភា ឆ្នាំ ២០២០ ទំព័រ ១០៥–១០៦ ) ។ ប្រសិនបើអ្នកកំពុងព្យាយាមប្រែចិត្តដោយស្មោះ ទោះបីជាអ្នកជំពប់ដួលនៅតាមផ្លូវក្តី ក៏អ្នកត្រូវបានហៅឲ្យធ្វើកិច្ចការរបស់ព្រះអម្ចាស់ដែរ ។
ពីព្រោះគ្មានយើងណាម្នាក់ល្អឥតខ្ចោះនោះទេ យើងទាំងអស់គ្នាប្រព្រឹត្តអំពើបាប ។ ពេលខ្លះ រឿងនេះអាចនាំឲ្យមានភាពអាម៉ាស់ ។ ភាពអាម៉ាស់អាចនាំយើងឲ្យលាក់បាំងអំពើបាបរបស់យើង ហើយបំបាក់ទឹកចិត្តយើងពីការព្យាយាមរីកចម្រើន ហើយយកឈ្នះលើអំពើបាបទាំងនោះ ។ ភាពអាម៉ាស់ គឺជាអារម្មណ៍ដែលថាដោយព្រោះទង្វើទាំងនេះ នោះយើងជាមនុស្សអាក្រក់ ។ វាគឺជាឧបករណ៍មួយក្នុងចំណោមឧបករណ៍ដ៏មានប្រសិទ្ធិភាពបំផុតរបស់មារសត្រូវ ។ ប្រសិនបើអ្នកធ្លាប់មានអារម្មណ៍ថាគ្មានតម្លៃ ឬថាអ្នកមិនអាចផ្លាស់ប្ដូរបានទេ សូមដឹងថាអារម្មណ៍ទាំងនេះមិនកើតចេញពីព្រះឡើយ ។
នៅលើផ្លូវទៅកាន់ភាពល្អឥតខ្ចោះ
មនុស្សជាច្រើនបានរងផលប៉ះពាល់ដោយការណ៍អាសគ្រាម ។ នៅក្នុងសិក្ខាសាលាមួយសម្រាប់ប្រធានបេសកកម្មថ្មី ប្រធាន រ័សុល អិម ណិលសុន បានមានប្រសាសន៍ថា ៖ « យុវជនរបស់យើងត្រូវបានរងផលប៉ះពាល់ពីការណ៍អាសគ្រាម មិនថាពួកគេចង់ ឬមិនចង់នោះទេ ។ នៅពេលមួយនោះ ហេលេមិនបានកត់ត្រាថា កងទ័ពកំលោះទាំងអស់របស់គាត់បានរងរបួសនៅក្នុងចម្បាំង ហើយពួកគេភាគច្រើនមានសភាពធ្ងន់ធ្ងរ ។ ប្រៀបដូចជាពួកអ្នកផ្សព្វផ្សាយសាសនាជាច្រើនរបស់អ្នកដែរ ទោះជាមិនទាំងអស់ក្ដី គឺពួកគេហាក់ដូចជាកងទ័ពកំលោះនោះដែរ ដែលធ្លាប់រងរបួស ឬនឹងត្រូវរបួសក្នុងកម្រិតណាមួយ ដោយការប្រឈមទៅនឹងគ្រោះកាចដែលញៀន និងដ៏បំផ្លិចបំផ្លាញនេះដែរ » ( « To Change Minds and Hearts » [ សុន្ទរកថាដែលបានផ្ដល់ឲ្យសម្រាប់ថ្នាក់ដឹកនាំបេសកកម្មមួយចំនួន នៅថ្ងៃទី ១៧ ខែ កុម្ភៈ ឆ្នាំ ២០១៥ ] ទំព័រ ៦ បណ្ណាល័យប្រវត្តិសាស្ត្រសាសនាចក្រ ទីក្រុង សលត៍ លេក ) ។
ប្រសិនបើអ្នកត្រូវបានរងផលប៉ះពាល់ដោយការណ៍អាសគ្រាម សូមដឹងថាវាដូចជាឧបសគ្គផ្សេងទៀតដែរ អ្នកអាចយកឈ្នះវាបាន ប្រសិនបើអ្នកដាក់បន្ទុករបស់អ្នកនៅនឹងព្រះបាទានៃព្រះអង្គសង្រ្គោះរបស់អ្នក ហើយត្រូវជំនួសទម្លាប់អាក្រក់ៗជាមួយនឹងទម្លាប់ថ្មីៗវិញ ។ « ប្រសិនបើអ្នកធ្វើខុស រួមទាំងការប្រើប្រាស់បច្ចេកវិទ្យាមិនសមរម្យ សូមប្រែចិត្តក្នុងពេលនោះ ហើយបន្តព្យាយាមធ្វើតាមក្រឹត្យវិន័យរបស់ទ្រង់ ។ នេះជាផ្នែកមួយនៃការធ្វើជាសិស្សនៃព្រះគ្រីស្ទ » ( ប្រកាសដំណឹងល្អរបស់យើង ទំព័រ ២១ ) ។
រៀន
ស្វ័យវាយតម្លៃ
ការណ៍អាសគ្រាមគឺជាសម្ភារនានាដែលបង្ហាញ ឬពិពណ៌នាអំពីរូបកាយមនុស្ស ឬអាកប្បកិរិយាផ្លូវភេទតាមរបៀបមួយដែលចង់ដាស់អារម្មណ៍ផ្លូវភេទ ។ ការកំណត់កម្រិតនៃការប្រើប្រាស់ការណ៍អាសគ្រាមរបស់អ្នកអាចជួយអ្នកសម្រេចចិត្តថាតើអ្នកគួរចាត់វិធានការអ្វីខ្លះដើម្បីយកឈ្នះវា ។ អ្នកក៏អាចរកឃើញពីជម្រៅនៃបញ្ហារបស់អ្នកគឺមិនអាប់ឱន ឬធ្ងន់ធ្ងរដូចដែលអ្នកបានភ័យខ្លាចនោះទេ ដែលអាចពង្រឹងក្តីសង្ឃឹមរបស់អ្នកថាការផ្លាស់ប្ដូរ និងការប្រែចិត្តគឺអាចធ្វើទៅបាន ហើយការណ៍នេះវាស្ថិតនៅក្នុងកណ្តាប់ដៃរបស់អ្នក ។ ( សូមមើល ដាល្លិន អេក អូក « Recovering from the Trap of Pornography » Ensign ខែ តុលា ឆ្នាំ ២០១៥ ទំព័រ ៣២–៣៨ ) ។
ប្រធាន ដាល្លិន អេក អូក នៃគណៈប្រធានទីមួយបានបង្ហាញពីការពាក់ព័ន្ធចំនួនបួនកម្រិតទាក់ទងនឹងការណ៍អាសគ្រាម ដែលត្រូវបានរៀបរាប់ខាងក្រោម ។ អ្នកអាចប្រើការពិពណ៌នាទាំងនេះដើម្បីវាយតម្លៃកម្រិតនៃការប្រើប្រាស់ការណ៍អាសគ្រាមរបស់អ្នក ៖
-
ការឃើញដោយអចេតនា អ្នកបានឃើញការណ៍អាសគ្រាមដោយអចេតនា ។ ទោះបីជាអ្នកមិនបានធ្វើបាបដោយការឃើញវាដោយអចេតនាក្ដី ក៏ការណ៍អាសគ្រាមនៅតែអាចប៉ះពាល់អវិជ្ជមានដល់អ្នកបានដដែល ។ វាមានប្រយោជន៍ក្នុងការមានយុទ្ធសាស្ត្រផ្ទាល់ខ្លួនដើម្បីឆ្លើយតប និងគ្រប់គ្រងការឃើញដោយអចេតនា ។
-
ការប្រើប្រាស់ម្ដងម្កាល អ្នកមើលការណ៍អាសគ្រាមដោយចេតនា ប៉ុន្តែមិនទៀងទាត់ទេ ។ អ្នកប្រហែលជាស្ថិតនៅក្នុងដំណើរការនៃការប្រែចិត្តពីការប្រើប្រាស់ការណ៍អាសគ្រាម ប៉ុន្តែអ្នកភ្លាត់ភ្លាំង ។ ឧទាហរណ៍ប្រហែលជាមានប៉ុន្មានថ្ងៃ សប្តាហ៍ ឬសូម្បីតែប៉ុន្មានខែនៅចន្លោះពេលដែលអ្នកមើលការណ៍អាសគ្រាម ។ អ្នកប្រហែលជាចង់ឈប់ប្រើការណ៍អាសគ្រាម ប៉ុន្តែពេលខ្លះអ្នកនៅតែត្រូវបានទាក់ទាញយ៉ាងខ្លាំង ។
-
ការប្រើប្រាស់ខ្លាំង អ្នកមើលការណ៍អាសគ្រាមដោយចេតនា និងជាទម្លាប់ ។ អ្នកប្រហែលជាមានអារម្មណ៍តានតឹង ប្រសិនបើអ្នកត្រូវបានបង្ខំឲ្យចាកចេញដោយគ្មានវា ប៉ុន្តែអ្នកមិនញៀនទេ ។ ទោះជាយ៉ាងណា អ្នកទំនងជាមានអារម្មណ៍ថាត្រូវបានជំរុញឲ្យស្វែងរកការលើកទឹកចិត្តកាន់តែខ្លាំងឡើង ។
-
ការប្រើប្រាស់យ៉ាងឈ្លក់វង្វេង ( ការញៀន ) អ្នកមើលការណ៍អាសគ្រាមយ៉ាងឈ្លក់វង្វេង ជាញឹកញាប់ច្រើនដងរៀងរាល់ថ្ងៃ ហើយប្រហែលជារយៈពេលវែង ។ អ្នកបានពឹងផ្អែកទៅលើវា ហើយវាប្រហែលជាគ្របដណ្តប់លើគំនិត និងអារម្មណ៍របស់អ្នក ។ វាអាចរំខានយ៉ាងធ្ងន់ធ្ងរដល់សកម្មភាពប្រចាំថ្ងៃរបស់អ្នក ។ វាមានផលប៉ះពាល់អវិជ្ជមានដ៏ធំមួយទៅលើអ្នក និងសមត្ថភាពរបស់អ្នកក្នុងការបម្រើ និងមានទំនាក់ទំនងជាមួយអ្នកដទៃ ។ វាហាក់ដូចជាដក់ជាប់នៅក្នុងខ្លួនអ្នក ។
ទោះបីជាការប្រើប្រាស់ការណ៍អាសគ្រាមអាចធ្វើឲ្យញៀនក្តី ក៏ពួកអ្នកផ្សព្វផ្សាយសាសនាភាគច្រើនដែលមានបញ្ហានឹងការណ៍អាសគ្រាមមិនញៀន ហើយមិនគួរដាក់ស្លាកថាជាអ្នកញៀននោះទេ ។ ការធ្វើបែបនេះមិនត្រឹមត្រូវអាចបង្កឲ្យមានអារម្មណ៍អាម៉ាស់ និងធ្វើឲ្យអ្នកផ្សព្វផ្សាយសាសនាពិបាកយកឈ្នះលើការប្រើប្រាស់ការណ៍អាសគ្រាម ។ ចូរផ្ដោតទៅលើអត្តសញ្ញាណដ៏ទេវភាពរបស់អ្នកក្នុងនាមជាបុត្ររបស់់់់់ព្រះ និងសេចក្ដីស្រឡាញ់របស់ទ្រង់ចំពោះអ្នក ហើយកុំដាក់ស្លាកខ្លួនអ្នក ឬកំណត់តម្លៃរបស់អ្នកដោយផ្អែកលើឧបសគ្គដែលអ្នកកំពុងជួបប្រទះនោះឡើយ ។
សូមប្រាកដថាត្រូវយកការវាយតម្លៃលើខ្លួនឯងនៅក្នុងមេរៀនវិធីបង្ការដែលមានការកែតម្រូវ ដើម្បីយល់កាន់តែច្បាស់ពីការប្រើប្រាស់ការណ៍អាសគ្រាមរបស់អ្នក ។ គ្រូពេទ្យជំនាញក៏អាចជួយអ្នកវាយតម្លៃថាតើការប្រើប្រាស់ការណ៍អាសគ្រាមរបស់អ្នកបានឈានដល់កម្រិតនៃការញៀនដែរឬទេ ។
ហេតុអ្វីខ្ញុំមានអារម្មណ៍ថាត្រូវជំរុញឲ្យមើលការណ៍អាសគ្រាម ?
មានហេតុផលជាច្រើនដែលអ្នកអាចបែរទៅរកការណ៍អាសគ្រាម ។ ជាញឹកញាប់ មនុស្សស្វែងរកការណ៍អាសគ្រាមដើម្បីដោះស្រាយនឹងអារម្មណ៍ ឬស្ថានភាពដ៏លំបាក ។ ការប្រើប្រាស់ការណ៍អាសគ្រាមអាចលាក់បាំង ឬធ្វើឲ្យស្ពឹកនឹងរឿងទាំងនេះជាបណ្តោះអាសន្ន ហើយផ្តល់នូវការធូរស្រាលភ្លាមៗ ។ ទោះជាយ៉ាងណាក៏ដោយ ជាធម្មតាវាបាននាំមកនូវភាពសោកសៅ ភាពអាម៉ាស់ ឬអារម្មណ៍អវិជ្ជមានបន្ថែមទៀត ។ ការប្រើប្រាស់ការណ៍អាសគ្រាមម្ដងហើយម្ដងទៀតអាចធ្វើឲ្យរូបកាយ និងគំនិតរបស់យើងប្រើប្រាស់ការណ៍អាសគ្រាមនៅពេលណាដែលយើងពិបាកចិត្ត ។
អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ បានពន្យល់ថា « ក្នុងកម្រិតជាក់លាក់មួយ មនុស្សខាងសាច់ឈាមដែលបានពិពណ៌នាដោយស្ដេចម៉ូសាយ គឺមានជីវិតក្នុងខ្លួនយើងម្នាក់ៗ ( សូមមើល ម៉ូសាយ ៣:១៩) ។ បុរស ឬស្ត្រីខាងសាច់ឈាមគ្មានការប្រែចិត្ត ជាមនុស្សលោកិយ ហើយត្រេកត្រអាល ( សូមមើល ម៉ូសាយ ១៦:៥; អាលម៉ា ៤២:១០; ម៉ូសេ ៥:១៣ ) បណ្ដោយខ្លួនហួសប្រមាណ ហើយមានអំនួតនិងអាត្មានិយម ។ …
« ដូច្នេះលក្ខណៈដ៏ជាក់លាក់នៃការសាកល្បងក្នុងជីវិតរមែងស្លាប់អាចសង្ខេបក្នុងសំណួរដូចតទៅនេះ ៖ តើខ្ញុំនឹងងាកចិត្តទៅរកផ្លូវខាងសាច់ឈាម ឬងាកទៅរកការទាក់ទាញពីព្រះវិញ្ញាណបរិសុទ្ធ ហើយសម្រាតភាពខាងសាច់ឈាម ហើយក្លាយជាពួកបរិសុទ្ធម្នាក់តាមរយៈដង្វាយធួននៃព្រះគ្រីស្ទជាព្រះអម្ចាស់ដែរទេ ( សូមមើល ម៉ូសាយ ៣:១៩ ) ? នោះជាការសាកល្បង ។ រាល់ការស្រេកឃ្លាន ក្ដីប្រាថ្នា ទំនោរចិត្ត និង ការជំរុញនៃភាពខាងសាច់ឈាមអាចឈ្នះបានដោយ និងតាមរយៈដង្វាយធួននៃព្រះយេស៊ូវគ្រីស្ទ ។ យើងនៅរស់លើផែនដីដើម្បីអភិវឌ្ឍគុណសម្បត្តិដូចជាព្រះ និងដើម្បីទប់ចិត្តនឹងរាល់តណ្ហាខាងសាច់ឈាម » ( « We Believe in Being Chaste » Ensign ឬ Liahona ខែ ឧសភា ឆ្នាំ ២០១៣ ទំព័រ ៤២–៤៣ ) ។
ហេតុអ្វីវាសំខាន់សម្រាប់ខ្ញុំ ដើម្បីជៀសវាងការប្រើប្រាស់ការណ៍អាសគ្រាម ?
ព្រះអម្ចាស់បានបង្រៀនពីគ្រោះថ្នាក់ខាងវិញ្ញាណដែលទាក់ទងនឹងការប្រើប្រាស់ការណ៍អាសគ្រាមពេលទ្រង់ប្រកាសថា « ហើយអ្នកណាដែលក្រឡេកឃើញស្ត្រី ហើយមានតម្រេកសម្រើបចង់បាន នោះនឹងបោះបង់ចោលសេចក្ដីជំនឿ ហើយនឹងមិនត្រូវមានព្រះវិញ្ញាណឡើយ » ( គោលលទ្ធិ និងសេចក្ដីសញ្ញា៤២:២៣ ) ។ បន្ថែមពីលើការណ៍អាសគ្រាមដែលប្រឆាំងនឹងព្រះវិញ្ញាណ ប្រធាន ណិលសុន ក៏បានរំឭកយើងផងដែរថា ការណ៍អាសគ្រាមគឺធ្វើឲ្យញៀន និងជំរុញយើងឲ្យចៀសពី « អ្វីៗ ដែលប្លន់សិទ្ធិជ្រើសរើសរបស់បងប្អូនបាន ។ … ការណ៍អាសគ្រាម … ធ្វើឲ្យព្រះអាក់អន់ព្រះទ័យ ។ ហេតុអ្វី ? ពីព្រោះការឈ្លក់វង្វេងរបស់បងប្អូនបានក្លាយជាព្រះរបស់បងប្អូន ។ បងប្អូនខ្វល់ខ្វាយតែនឹង វា ជំនួសឲ្យ ទ្រង់ ដើម្បីទទួលបានការសម្រាលទុក្ខ ។ បើបងប្អូនពុះពារនឹងការញៀន សូមស្វែងរកជំនួយខាងវិញ្ញាណ និងអ្នកជំនាញដែលបងប្អូនត្រូវការ ។ សូមកុំបណ្តោយឲ្យការឈ្លក់វង្វេងប្លន់សេរីភាពបងប្អូនពីការធ្វើតាមផែនការដ៏អស្ចារ្យរបស់ព្រះឡើយ » ( « គិតដល់សេឡេស្ទាល ! » លីអាហូណា ខែ វិច្ខិកា ឆ្នាំ ២០២៣ ទំព័រ ១១៨ ) ។
ការប្រើប្រាស់ការណ៍អាសគ្រាមអាចបង្កគ្រោះថ្នាក់ដល់អ្នក និងដល់ទំនាក់ទំនងបច្ចុប្បន្ន និងអនាគតរបស់អ្នក រួមទាំងទំនាក់ទំនងរបស់អ្នកជាមួយព្រះអម្ចាស់ផងដែរ ។ ពេលអ្នកប្រែចិត្តអ្នកនឹងរីករាយកាន់តែពេញលេញចំពោះភាពជាដៃគូនៃព្រះវិញ្ញាណបរិសុទ្ធ ហើយក្លាយជាអ្នកបម្រើដ៏មានប្រសិទ្ធភាពជាងមុនរបស់ព្រះអង្គសង្គ្រោះ ។ ព្រះអម្ចាស់ត្រូវការកិច្ចខិតខំដ៏ល្អបំផុតក្នុងកិច្ចការរបស់ទ្រង់ ហើយទ្រង់នឹងជួយអ្នកឲ្យទទួលបានជោគជ័យ ។
តើខ្ញុំនឹងត្រូវបញ្ជូនទៅផ្ទះវិញដោយសារការមើលការណ៍អាសគ្រាមដែរឬទេ ?
ពួកអ្នកផ្សព្វផ្សាយសាសនាមិនត្រូវបានបញ្ជូនទៅផ្ទះដោយស្វ័យប្រវត្តិដោយសារការមើលការណ៍អាសគ្រាមនោះទេ ។ តាមពិត ពួកអ្នកផ្សព្វផ្សាយសាសនាភាគច្រើនអាចបន្តការបម្រើរបស់ខ្លួនបាននៅពេលដែលពួកគេធ្វើការដើម្បីយកឈ្នះលើឧបសគ្គរបស់ពួកគេ ហើយត្រូវបានស្វែងរកការបំផុសគំនិតនៅក្នុងស្ថានភាពនីមួយៗ ។ ខណៈពេលកំពុងបម្រើជាអ្នកផ្សព្វផ្សាយសាសនា អ្នកអាចអភិវឌ្ឍទម្លាប់ល្អៗ រួមទាំងទម្លាប់ដែលទាក់ទងនឹងការប្រើប្រាស់បច្ចេកវិទ្យា ដែលអាចប្រទានពរដល់ជីវិតរបស់អ្នកពេញមួយជីវិត បន្ទាប់ពីអ្នកបញ្ចប់បេសកកម្ម ។
ភាពស័ក្ដិសមមិនមែនជាភាពល្អឥតខ្ចោះ
« ភាពស្រស់ស្អាតនៃដំណឹងល្អគឺថា យើងអាចទទួលបានការអភ័យទោសពេលយើងប្រែចិត្ត »( ប្រកាសដំណឹងល្អរបស់យើង ទំព័រ ២១ ) ។ ការប្រែចិត្តគឺជាដំណើរការដ៏ស្រស់ស្អាត ដែលអាចឲ្យយើងស្វែងយល់ពីរបៀបដែលគំនិត និងសកម្មភាពរបស់យើងត្រូវគ្នាទៅនឹងផែនការរបស់ព្រះបិតាសម្រាប់យើង ហើយក្រោយមកយើងកែសម្រួលគំនិត និងសកម្មភាពរបស់យើងដើម្បីសម្របតាមព្រះរាជបំណងរបស់ទ្រង់ឲ្យបានប្រសើរឡើង ។ សូមស្វែងយល់ពីសន្ទុរកថារបស់បងប្រុស ប្រាតលី អ័រ វីលឃុស « ភាពស័ក្ដិសមមិនមែនជាភាពល្អឥតខ្ចោះ»( លីអាហូណា ខែ វិច្ឆិកា ឆ្នាំ ២០២១ ទំព័រ ៦១–៦២ ៦៧ ) ។ សូមពិចារណាដូចខាងក្រោម ៖
-
ភាពស័ក្ដិសមគឺជាការប្រព្រឹត្តដោយស្មោះត្រង់ និងការព្យាយាមដើម្បីកែលម្អ ហើយវាមិនត្រូវបានកំណត់ដោយកាលបរិច្ឆេទតាមចិត្ត ឬរយៈពេលនៃការអត់ឱននោះទេ ។
-
ប្រសិនបើអ្នកជួបឧបសគ្គ សូមកុំបោះបង់ចោលឡើយ ។ សូមប្រើវាជាដុំថ្មសម្រាប់បោះជំហានឆ្លងទៅរកការយល់កាន់តែច្បាស់អំពីឧបសគ្គរបស់អ្នក និងបន្តការកែលម្អរបស់អ្នក ។ ឧបសគ្គមិនទាញអ្នកត្រឡប់ទៅចំណុចដើមវិញទេ ។
-
ការផ្លាស់ប្តូរគឺជាដំណើរការនៃការទទួលព្រះគុណថែមលើព្រះគុណ ( សូមមើល គោលលទ្ធិ និងសេចក្តីសញ្ញា ៩៣:១១–១៤ ) ។ ខណៈដែលគោលដៅចុងក្រោយរបស់អ្នកគឺត្រូវស្អាតស្អំពីការប្រើប្រាស់ការណ៍អាសគ្រាម សូមយល់ថាអ្នកមិនទៅដល់ចំណុចនោះក្នុងពេលតែមួយដងនោះឡើយ ។ វានឹងតម្រូវឲ្យមានការខិតខំប្រឹងប្រែងដោយជាប់លាប់ និងជាទៀងទាត់ ។
-
សូមដាក់គោលដៅតូចៗដែលអាចសម្រេចបាន ហើយកសាងលើភាពជោគជ័យជាជាងផ្តោតលើការបរាជ័យ ។
បន្ទាប់ពីពិចារណា សូមសួរខ្លួនឯងថា ៖ តើខ្ញុំមានភាពស្មោះត្រង់ជាមួយខ្លួនឯង ជាមួយព្រះអម្ចាស់ និងអ្នកដទៃឬទេ ? តើខ្ញុំកំពុងព្យាយាមធ្វើឲ្យប្រសើរឡើងឬទេ ? តើខ្ញុំអាចប្រើឧបសគ្គដែលពិបាកៗដើម្បីជួយខ្ញុំឲ្យបន្តទៅមុខដោយរបៀបណា ? តើខ្ញុំយល់អ្វីខ្លះអំពីលក្ខណៈនៃការប្រែចិត្ត ? តើខ្ញុំទទួលបានអារម្មណ៍នៃក្តីសង្ឃឹមចំពោះការប្រែចិត្តឬទេ ?
ធ្វើសកម្មភាព
ចូរមានចិត្ដមេត្ដា និងស្មោះត្រង់ចំពោះខ្លួនឯង
ប្រសិនបើអ្នកកំពុងប្រើការណ៍អាសគ្រាមដើម្បីដោះស្រាយនឹងអារម្មណ៍អវិជ្ជមាន គោលដៅរបស់អ្នកគួរតែជំនួសទម្លាប់នេះដោយទម្លាប់ដែលប្រសើរជាងនេះ ។ អ្នកអាចចាប់ផ្ដើមដោយការទទួលស្គាល់អារម្មណ៍របស់អ្នក និងដោយការមានសេចក្ដីអាណិតអាសូរចំពោះខ្លួនអ្នកដែលចង់បានការធូរស្បើយ ដែលជារឿងធម្មតា ។ បន្ទាប់មកសូមស្មោះត្រង់ចំពោះខ្លួនឯង ហើយពិចារណាពីរបៀបដែលការមានបំណងដើម្បីស្វែងរកការធូរស្រាលភ្លាមៗទាំងនោះ អាចធ្វើឲ្យស្ថានភាពកាន់តែពិបាកទៅៗសម្រាប់អ្នកក្នុងរយៈពេលវែង ។
ប្រែចិត្តជារៀងរាល់ថ្ងៃ
ការប្រែចិត្ដគឺជារឿងដ៏ល្អណាស់ និងរឿងវិជ្ជមានដែលអាចធ្វើទៅបានតាមរយៈដង្វាយធួនរបស់ព្រះយេស៊ូវគ្រីស្ទ ។ ចូរប្រែចិត្តជារៀងរាល់ថ្ងៃ ។ វាត្រូវការពេលវេលា និងការស៊ូទ្រាំ ។ ការប្រែចិត្តពុំមែនជាព្រឹត្តិការណ៍តែម្ដងនោះទេ ។ វាជាបទពិសោធន៍មួយដែលកើតឡើងពេញមួយជីវិត ។ ទោះបីជាក្រោយពីបានយកឈ្នះលើទម្លាប់អាសគ្រាមក៏ដោយ អ្នកអាចនៅតែជួបនឹងការល្បួង ឬចំណង់ដដែល ។ ទោះជាយ៉ាងណាក៏ដោយ នេះមិនមែនមានន័យថាការតមអាហារ ការអធិស្ឋាន ការប្រសិទ្ធពរ និងការខិតខំខាងវិញ្ញាណទាំងអស់របស់អ្នកគឺគ្មានប្រសិទ្ធិភាពនោះទេ ។ ពេលអ្នកប្រែចិត្តជារៀងរាល់ថ្ងៃ អ្នកនឹងចាប់ផ្ដើមមើលឃើញការរីកចម្រើន ហើយជាមួយនឹងការរីកចម្រើន នោះនឹងមានការកើនឡើងនូវសេចក្ដីជំនឿ ទំនុកចិត្ត និងសេចក្ដីស្រឡាញ់ចំពោះខ្លួនអ្នក និងអ្នកដទៃទៀតផងដែរ ។
បង្កើត និងធ្វើតាមផែនការសកម្មភាព
ជាផ្នែកមួយនៃមេរៀនវិធីបង្ការដែលបានកែសម្រួលរបស់អ្នក អ្នកត្រូវបានណែនាំឲ្យបង្កើត និងធ្វើបច្ចុប្បន្នភាពផែនការសកម្មភាពផ្ទាល់ខ្លួនរបស់អ្នកជាទៀងទាត់សម្រាប់ការប្រើប្រាស់បច្ចេកវិទ្យា ។ កាលអ្នកធ្វើដូចនេះ សូមពិចារណានូវយោបល់ខាងក្រោម ៖
-
ចូរអធិស្ឋានទូលសុំការដឹកនាំ ។
-
« សូមចាប់អារម្មណ៍ទៅលើគំនិត អារម្មណ៍ និងឥរិយាបថរបស់អ្នក ។ ត្រូវដឹងពីរបៀបគំនិត អារម្មណ៍ និងឥរិយាបថទាំងនេះ អាចធ្វើឲ្យអ្នកកាន់តែងាយរងគ្រោះពេលប្រើប្រាស់បច្ចេកវិទ្យាមិនត្រឹមត្រូវ » ( ប្រកាសដំណឹងល្អរបស់យើង ទំព័រ ២១ ) ។ សូមស្គាល់ពីស្ថានភាពរាងកាយ ឬផ្លូវចិត្តដែលអាចបង្កើតឲ្យមានបំណងប្រាថ្នាចង់មើលការណ៍អាសគ្រាម—ដូចជា ការឃ្លាន ភាពនឿយហត់ កំហឹង នឹកផ្ទះ ភាពតានតឹង ការព្រួយបារម្ភ ការបាក់ទឹកចិត្តជាដើម—ហើយសូមប្រុងប្រយ័ត្នឲ្យបានខ្ពស់ នៅពេលអ្នកកំពុងជួបប្រទះបទពិសោធន៍ទាំងនោះ ។ សូមពិចារណាបង្កើតបញ្ជីមួយអំពីមធ្យោបាយល្អៗដែលអ្នកអាចគ្រប់គ្រងអារម្មណ៍ទាំងនេះបាន ។
-
« មនុស្សស្ទើរតែទាំងអស់មានបញ្ហាជាប់ទាក់ទងទៅនឹងអ៊ីនធឺណិត ឬរូបអាសគ្រាមដែលវាកើតឡើងពេលយើងនៅដាច់ដោយឡែកពីគេ ។ សូមប្រើឧបករណ៍តែនៅពេលណាដែលអ្នកអាចមើលឃើញអេក្រង់របស់គ្នាទៅវិញទៅមកប៉ុណ្ណោះ ។ សូមមានភាពក្លាហាន និងទទួលខុសត្រូវចំពោះគ្នាទៅវិញទៅមក ( ប្រកាសដំណឹងល្អរបស់យើង ទំព័រ ២១ ) ។
-
សូមដាក់ឧបករណ៍របស់អ្នកដោយអេក្រង់ផ្កាប់ចុះនៅពេលដៃគូរបស់អ្នកចាកចេញពីបន្ទប់រហូតដល់ដៃគូរបស់អ្នកត្រឡប់មកវិញ ។
-
សូមបិទឧបករណ៍របស់អ្នកក្នុងពេលជាក់លាក់មួយនៅពេលល្ងាច ហើយសូមកុំបើកវាម្តងទៀតរហូតដល់ពេលជាក់លាក់មួយនៅពេលព្រឹក ។
-
សូមកុំយកឧបករណ៍របស់អ្នកចេញ ឬមើលក្នុងអំឡុងពេលជាក់លាក់នៃថ្ងៃដែលអ្នកដឹងថាអ្នកនឹងងាយរងគ្រោះឡើយ ។
-
សូមកុំយកឧបករណ៍របស់អ្នកចូលទៅក្នុងបន្ទប់ទឹកឲ្យសោះ ។
-
សូមពិភាក្សាជាមួយប្រធានបេសកកម្មរបស់អ្នកអំពីកម្រិតណាមួយដែលនឹងល្អបំផុតសម្រាប់អ្នក ដើម្បីចូលដំណើរការទូរសព្ទអ្នក ហើយសូមដាក់ផែនការក្នុងការឆ្ពោះទៅរកការចូលដំណើរការកាន់តែប្រសើរឡើងទៅថ្ងៃខាងមុខ ។
-
ចូរក្រោកឡើង ហើយធ្វើចលនា នេះអាចជាទម្លាប់ហាត់ប្រាណ ការដើរជាមួយដៃគូរបស់អ្នក ។ ល ។
-
សូមនិយាយជាមួយដៃគូដែលមានទំនួលខុសត្រូវគួរឲ្យទុកចិត្តបាន—ដូចជាដៃគូរបស់អ្នក ឪពុក ឬម្តាយ អ្នកដឹកនាំបេសកកម្ម ឬគ្រូពេទ្យព្យាបាល ឬអ្នកប្រឹក្សាយោបល់—ហើយសុំជំនួយពីពួកគាត់ ។ ( ប្រសិនបើអ្នកប្រើប្រាស់ការណ៍អាសគ្រាមយ៉ាងខ្លាំង ឬយ៉ាងឈ្លក់វង្វេង អ្នកប្រហែលជាត្រៀមទាក់ទងទៅកាន់បុគ្គលនេះជារៀងរាល់ថ្ងៃ ដើម្បីរាយការណ៍អំពីស្ថានភាពរបស់អ្នក ) ។ « ពួកអ្នកផ្សព្វផ្សាយសាសនាទាំងអស់គួរតែមានផាសុកភាពក្នុងការសុំជំនួយនៅពេលចាំបាច់ ។ … [ ព្រះអម្ចាស់ ] បានប្រទានដៃគូ និងថ្នាក់ដឹកនាំដើម្បីជួយការពារ ហើយគាំទ្រដល់អ្នក » ( ប្រកាសដំណឹងល្អរបស់យើង ទំព័រ ២១ ) ។
ទទួលការគាំទ្រ—តើខ្ញុំគួរទៅជួបប្រធានបេសកកម្មរបស់ខ្ញុំឬទេ ?
ការប្រើប្រាស់ការណ៍អាសគ្រាមធ្ងន់ធ្ងរឡើងដោយសារភាពសម្ងាត់ ។ ការនិយាយដោយស្មោះត្រង់ជាមួយអ្នកដទៃផ្ដល់អំណាចបន្ថែមដល់យើងដើម្បីបញ្ឈប់ ។ ការស្វែងរកការគាំទ្រពីប្រធានបេសកកម្មរបស់អ្នកអាចជាផ្នែកដ៏ចាំបាច់មួយនៃដំណើរការប្រែចិត្ត ហើយជាទង្វើនៃសេចក្ដីជំនឿ និងភាពរាបសា ។ ទោះបីជាវាអាចមានអារម្មណ៍គួរឲ្យខ្លាច ឬអាម៉ាស់ក៏ដោយ គាត់ស្រឡាញ់អ្នក ហើយត្រូវបានហៅឲ្យជួយដល់អ្នក ។ សូមអធិស្ឋានឲ្យមានភាពក្លាហានដើម្បីទាក់ទងទៅប្រធានបេសកកម្មរបស់អ្នក ហើយសូមមានភាពស្មោះត្រង់ជាមួយគាត់ ។ គាត់នឹងគាំទ្រអ្នក ហើយផ្តល់យុទ្ធសាស្ត្រ និងធនធាននានាដើម្បីស្ថាបនាទំនុកចិត្តរបស់អ្នក ហើយជួយអ្នកឲ្យដោះស្រាយការប្រើប្រាស់ការណ៍អាសគ្រាមរបស់អ្នក ។
ក្នុងករណីខ្លះ ប្រធានបេសកកម្មអាចផ្តល់អនុសាសន៍ឲ្យអ្នកធ្វើការជាមួយគ្រូពេទ្យជំនាញ ឬអ្នកប្រឹក្សាយោបល់ដើម្បីទទួលបានធនធានជំនួយ ។ ការធ្វើការជាមួយគ្រូពេទ្យព្យាបាលមិនមានន័យថាអ្នកមិនល្អគ្រប់គ្រាន់ ឬថាបញ្ហារបស់អ្នកគឺធ្ងន់ធ្ងរនោះទេ ។ យើងទាំងអស់គ្នាត្រូវការជំនួយពេលខ្លះ ហើយការធ្វើការជាមួយអ្នកប្រឹក្សាយោបល់គឺគ្មានហេតុផលណាមួយដែលត្រូវអៀនខ្មាសនោះទេ ។ គ្រូពេទ្យព្យាបាល ឬអ្នកប្រឹក្សាយោបល់នឹងណែនាំអ្នកក្នុងដំណើរការនេះ ហើយរក្សារឿងនេះជាការសម្ងាត់តាមដែលអាចធ្វើទៅបាន ។
ពេលអ្នកស្វែងរកជំនួយពីប្រធានបេសកកម្មរបស់អ្នក ឬអ្នកដទៃដើម្បីយកឈ្នះលើការប្រើប្រាស់ការណ៍អាសគ្រាម សូមប្រាកដថាអ្នកក៏បែរទៅរកព្រះវរបិតាសួគ៌ និងព្រះយេស៊ូវគ្រីស្ទផងដែរ ។ ប្រធានបេសកកម្មរបស់អ្នកអាចផ្ដល់ឲ្យអ្នកនូវធនធានដែលអ្នកប្រហែលជាត្រូវការសម្រាប់ការរីកចម្រើនខាងវិញ្ញាណរបស់អ្នក ប៉ុន្តែគាត់មិនអាចជំនួសតួនាទីរបស់ព្រះវរបិតាសួគ៌ និងព្រះអង្គសង្គ្រោះដែលដើរតួនាទីក្នុងការជួយអ្នកឲ្យធ្វើការផ្លាស់ប្ដូរបានទេ ។ សូមបន្តពឹងផ្អែកលើទ្រង់ទាំងទ្វេ ហើយពង្រឹងទំនាក់ទំនងរបស់អ្នកជាមួយទ្រង់ ។
រកមើលលំនាំទាំងឡាយ
សូមរកមើលលំនាំនៃពេលដែលអ្នកមានអារម្មណ៍ថាមានបំណងស្វែងរកការណ៍អាសគ្រាម ។ តើអ្នកមានអារម្មណ៍យ៉ាងណាដែរ ? តើអារម្មណ៍តានតឹង ស្ត្រេស ឬការឈឺចាប់អ្វីខ្លះដែលអ្នកបានជួបប្រទះ ? ជាញឹកញាប់ អាចមានមូលហេតុដែលជំរុញឲ្យអ្នកស្វែងរកការណ៍អាសគ្រាម ។ អ្នកខ្លះប្រហែលជាស្វែងរកការណ៍អាសគ្រាមនៅពេលមានភាពតានតឹង ភាពឯកោ ឬគ្រាដ៏សោកសៅផ្សេងទៀត ។ ពេលអ្នកអភិវឌ្ឍសមត្ថភាពស្គាល់ពីអារម្មណ៍របស់អ្នកច្បាស់ នោះអារម្មណ៍ទាំងនេះនឹងមានអំណាចលើអ្នកតិចជាងមុន ។
សូមសរសេរអំពីបទពិសោធន៍របស់អ្នក និងការយល់ដឹងណាមួយដែលអ្នកទទួលបាន ។ សូមរក្សាទិនានុប្បវត្តិទាំងនេះនៅកន្លែងមានសុវត្ថិភាពមួយ ។ អ្នកអាចពិភាក្សាអំពីអ្វីដែលអ្នកបានរៀនជាមួយប្រធានបេសកកម្ម ឬដៃគូរបស់អ្នកបាន ។ ការយល់ដឹងពីអារម្មណ៍របស់អ្នកនឹងមានប្រយោជន៍ នៅពេលដែលអ្នកចាប់ផ្តើមធ្វើផែនការ ដើម្បីឆ្លើយតបទៅនឹងអារម្មណ៍ទាំងនេះតាមវិធីដែលប្រសើរជាង ។
គ្រប់គ្រងលើអារម្មណ៍របស់អ្នក
នៅពេលដែលអ្នកបែរទៅរកព្រះវរបិតាសួគ៌ និងព្រះយេស៊ូវគ្រីស្ទដើម្បីបានភាពរឹងមាំខាងវិញ្ញាណ និងអំណាច នោះការយកឈ្នះលើការប្រើប្រាស់ការណ៍អាសគ្រាមក៏សម្រេចបានផងដែរតាមរយៈការអភិវឌ្ឍទម្លាប់ថ្មីៗដើម្បីជំនួសលើការប្រើប្រាស់ការណ៍អាសគ្រាម ។ ពេលអ្នកពឹងផ្អែកលើព្រះអង្គសង្គ្រោះ នោះទ្រង់នឹងជួយអ្នកឲ្យស៊ូទ្រាំនឹងអារម្មណ៍លំបាកៗបាន ។ នេះជាដំណើរការមួយដែលនឹងជួយអ្នកឲ្យផ្លាស់ប្ដូរគំនិត អារម្មណ៍ និងឥរិយាបថរបស់អ្នក ។ អ្នកក៏អាចទូលដល់ព្រះវរបិតាសួគ៌ក្នុងការអធិស្ឋានដើម្បីមានអារម្មណ៍នៃសេចក្ដីស្រឡាញ់របស់ទ្រង់ចំពោះអ្នក ហើយទូលសូមឲ្យទ្រង់គាំទ្រដល់ការខិតខំរបស់អ្នកផងដែរ ។
ក្នុងការខិតខំប្រឹងប្រែងរបស់អ្នកដើម្បីយកឈ្នះលើការណ៍អាសគ្រាម សូមរៀនថាវាមិនអីទេនៅពេលមានអារម្មណ៍យ៉ាងខ្លាំងដោយមិនស្វែងរកការធូរស្រាលភ្លាមៗ ។ ការធ្វើបែបនេះយូរៗទៅនឹងជួយអ្នកផ្ដាច់ការជំរុញឲ្យមើលការណ៍អាសគ្រាមពីសកម្មភាពនៃការមើលវាជាក់ស្តែង ។ អ្នកនឹងរៀនថាអ្នកគ្មានបញ្ហាទេទោះជាគ្មានការណ៍អាសគ្រាមក៏ដោយ ព្រោះអ្នកនឹងយកឈ្នះលើការភ័យខ្លាចក្នុងការគ្រប់គ្រងអារម្មណ៍របស់អ្នក ។
រឹតបន្តឹងការចូលដំណើរការ
ឧបករណ៍របស់អ្នកមានកម្រិតផ្សេងគ្នានៃការចូលដំណើរការ ដែលអាចជួយអ្នកអភិវឌ្ឍទម្លាប់ល្អៗក្នុងការប្រើប្រាស់បច្ចេកវិទ្យាបាន ។ បើការប្រើប្រាស់ការណ៍អាសគ្រាមគឺជាការព្រួយបារម្ភមួយសម្រាប់អ្នក សូមនិយាយជាមួយប្រធានបេសកកម្មរបស់អ្នក ។ គាត់នឹងជួយអ្នកសម្រេចចិត្តថា តើអ្នកអាចទទួលបានប្រយោជន៍ពីកម្រិតចូលដំណើរការណាមួយនៅលើឧបករណ៍របស់អ្នកឬអត់ ។ ពេលអ្នកអភិវឌ្ឍទម្លាប់ដែលប្រសើរជាង នោះកម្រិតចូលដំណើរការរបស់អ្នកអាចត្រូវបានកែសម្រួលដើម្បីបំពេញតម្រូវការរបស់អ្នក ។
រំឭកឡើងវិញ
សូមពិចារណាអំពីគំនិតខាងក្រោមនេះដើម្បីជួយអ្នកឲ្យយកឈ្នះលើការប្រើប្រាស់ការណ៍អាសគ្រាម ៖
-
រក្សាការប្រុងប្រយ័ត្ន ចូរនៅជិតព្រះវិញ្ញាណតាមរយៈទម្លាប់ល្អៗ ហើយអនុវត្តការប្រែចិត្តជារៀងរាល់ថ្ងៃ ។ សូមចាំថាព្រះវរបិតាសួគ៌ស្រឡាញ់អ្នក ហើយនឹងព្រះសណ្ដាប់ឮការទូលអង្វររបស់អ្នក ។ ទ្រង់នឹងការពារ ដឹកនាំ និងគាំទ្រអ្នកសូម្បីតែនៅពេលដែលអ្នកអាចមានអារម្មណ៍ថាមិនសក្តិសមនឹងសេចក្ដីស្រឡាញ់ និងជំនួយរបស់ទ្រង់ក៏ដោយ ។ ទ្រង់នឹងគង់នៅទីនោះសម្រាប់អ្នកជានិច្ច ។
-
សូមពិនិត្យមើលផ្នែក « សូមធ្វើតាមវិធីបង្ការក្នុងការប្រើប្រាស់បច្ចេកវិទ្យា » ជាទៀងទាត់ នៅក្នុងជំពូកទី ២ នៃ ប្រកាសដំណឹងល្អរបស់យើង។ សូមសិក្សាផ្នែកនេះរៀងៗខ្លួន និងជាមួយដៃគូ ជាមណ្ឌល និងជាហ្សូនរបស់អ្នក ។ ការធ្វើតាមគោលការណ៍ណែនាំនេះនឹងធ្វើឲ្យអ្នកមានសុវត្ថិភាព រួមទាំងជួយអ្នកអភិវឌ្ឍទម្លាប់ល្អៗនៃការប្រើប្រាស់បច្ចេកវិទ្យា ដែលនឹងបន្តមានបន្ទាប់ពីការបម្រើបេសកកម្មរបស់អ្នក ។
-
សូមពិនិត្យឡើងវិញជាទៀងទាត់នូវមេរៀនវិធីបង្ការដែលមានការកែតម្រូវដើម្បីបន្តរីកចម្រើនឡើង ។
-
តែងតែមានផែនការសកម្មភាព ប្រៀបដូចជាក្រុមកីឡារៀបចំសម្រាប់ស្ថានការណ៍ដែលវាអាចប្រឈមក្នុងការប្រកួតដែរ វាសំខាន់សម្រាប់អ្នកក្នុងការមានផែនការសកម្មភាពមួយដែលអ្នកអាចប្រើ នៅពេលណាដែលអ្នកជួបនឹងការណ៍អាសគ្រាមដោយអចេតនា ឬមានអារម្មណ៍ថាត្រូវបានល្បួងឲ្យមើលវា ។ សូមធ្វើបច្ចុប្បន្នភាពផែនការសកម្មភាពរបស់អ្នកឲ្យបានទៀងទាត់ ។
-
សូមប្រឹក្សាជាមួយប្រធានបេសកកម្មរបស់អ្នកដើម្បីសម្រេចចិត្តថា តើកម្រិតចូលដំណើរការទូរសព្ទមួយណាក្នុងចំណោមកម្រិតទាំងបួនគឺសមបំផុតសម្រាប់អ្នក ។ ឧទាហរណ៍ អ្នកអាចស្នើសុំកម្រិតកាន់តែតឹងរឹងក្នុងរយៈពេលមួយ ។ នៅពេលដែលអ្នកធ្វើការជាមួយប្រធានបេសកកម្មរបស់អ្នក នោះអ្នកអាចបង្កើតផែនការមួយដើម្បីឆ្ពោះទៅកាន់កម្រិតចូលដំណើរការដែលកាន់តែប្រសើរឡើង ។
-
សូមចូលទៅកាន់ដំណើររបស់អ្នកក្នុងនាមជាមនុស្សម្នាក់ដែលកំពុងរៀន និងកំពុងទទួលបានជោគជ័យដោយប្រើឧបសគ្គរបស់អ្នកជាមធ្យោបាយខិតទៅជិតព្រះអង្គសង្គ្រោះ ហើយក្លាយជាបុគ្គលដែលទ្រង់សព្វព្រះទ័យឲ្យអ្នកប្រែក្លាយ ។ « រៀន ប្រែចិត្ត និងកែលម្អ សូមប្រើប្រាស់បទពិសោធន៍របស់អ្នក ដើម្បីបន្តរៀនសូត្រ និងកែលម្អ » ( ប្រកាសដំណឹងល្អរបស់យើង ទំព័រ ២២ ) ។
ធនធានបន្ថែមទាំងឡាយ
ផ្នែក ជួយដល់ជីវិត និងភាពខ្លួនទីពឹងខ្លួន នៃកម្មវិធីបណ្ណាល័យដំណឹងល្អ ( ឬតាមអនឡាញនៅ ChurchofJesusChrist.org/study/life-help/pornography ) មានធនធានជាច្រើនទាក់ទងនឹងការណ៍អាសគ្រាម ។ អ្នកអាចរកឃើញគំនិតល្អៗក្នុងសៀវភៅ Help for Me ( ឆ្នាំ ២០១៩ គេហទំព័រ ChurchofJesusChrist.org ) ។ ជំពូកខាងក្រោមនេះចេញពីសៀវភៅនោះអាចមានប្រយោជន៍ជាពិសេស ៖
-
« Understanding Your Pornography Use »
-
« ហេតុអ្វីបានជាខ្ញុំមានអារម្មណ៍មិនល្អយ៉ាងខ្លាំងចំពោះខ្លួនឯងដូច្នេះ ? »
-
« ហេតុអ្វីបានជារឿងនេះបន្តកើតឡើង ? »
-
« តើការប្រើប្រាស់ការណ៍អាសគ្រាមប៉ះពាល់ដល់ខ្ញុំយ៉ាងដូចម្ដេច ? »