ការប្រើប្រាស់បច្ចេកវិទ្យាដោយឆ្លាតវៃ ៖ ការទទួលខុសត្រូវលើឧបករណ៍
អភិវឌ្ឍ និងពង្រឹងទម្លាប់នៃការប្រើប្រាស់បច្ចេកវិទ្យារបស់អ្នកដោយបង្កើតឱកាសដើម្បីបង្កើនការទទួលខុសត្រូវរបស់អ្នកចំពោះខ្លួនឯង ដៃគូរបស់អ្នក ថ្នាក់ដឹកនាំបេសកកម្មរបស់អ្នក និងព្រះអម្ចាស់ ។ ទម្លាប់ទាំងនេះនឹងប្រទានពរដល់ការប្រើប្រាស់បច្ចេកវិទ្យារបស់អ្នកក្នុងអំឡុងពេលបម្រើបេសកកម្មរបស់អ្នក និងពេញមួយជីវិតរបស់អ្នក ។
ការទទួលខុសត្រូវ ឬ « ទទួលខុសត្រូវចំពោះសេចក្ដីប្ដេជ្ញា អាកប្បកិរិយា សេចក្ដីប៉ងប្រាថ្នា និងសកម្មភាពទាំងឡាយ [ របស់យើង ] ផ្ទាល់ » ( សេចក្ដីណែនាំដល់បទគម្ពីរទាំងឡាយ « ការទទួលខុសត្រូវ » បណ្ណាល័យដំណឹងល្អ ) គឺជាជំហានដ៏សំខាន់មួយក្នុងការប្រើប្រាស់បច្ចេកវិទ្យាប្រកបដោយភាពឆ្លាតវៃ និងអភិវឌ្ឍទម្លាប់ប្រើប្រាស់បច្ចេកវិទ្យាដោយសេចក្ដីសុចរិតពេញមួយជីវិត ។ បើគ្មានការទទួលខុសត្រូវទេ វាងាយស្រួលក្នុងការធ្លាក់ចូលទៅក្នុងទម្លាប់ប្រើប្រាស់បច្ចេកវិទ្យាដោយខ្ជះខ្ជាយពេលវេលា ឬគ្រោះថ្នាក់ដោយមិនដឹងខ្លួន ។ ការកសាងទម្លាប់វិជ្ជមានតម្រូវឲ្យមានការខិតខំប្រឹងប្រែង និងត្រូវយល់ដឹងដោយខ្លួនឯង ។
អ្នកអាចបង្កើនការយល់ដឹង និងសុវត្ថិភាពរបស់អ្នកតាមរយៈមធ្យោបាយជាច្រើន ៖ មុខងារគ្រប់គ្រងពេលវេលា ( ដូចជាមុខងារ Digital Well-Being ) តម្រងឧបករណ៍ ការប្រើប្រាស់បច្ចេកវិទ្យាក្នុងវត្តមានរបស់អ្នកដទៃ និងការពិនិត្យមើលការទទួលខុសត្រូវលើឧបករណ៍ជាមួយដៃគូ ឬអ្នកដទៃទៀត ។ ( សូមមើល បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ, ៧.៥.២ ) ។
សូមស្វែងរកការណែនាំពីថ្នាក់ដឹកនាំបេសកកម្ម និងដៃគូរបស់អ្នកអំពីរបៀបបង្កើនប្រសិទ្ធភាព និងភាពសុចរិតរបស់អ្នកជាបន្តបន្ទាប់ខណៈពេលដែលកំពុងប្រើប្រាស់បច្ចេកវិទ្យា ។ សូមធ្វើការរំឭកឲ្យបានញឹកញាប់ៗនូវផ្នែក « សូមធ្វើតាមវិធីបង្ការក្នុងការប្រើប្រាស់បច្ចេកវិទ្យា » ក្នុងជំពូកទី ២ នៃ ប្រកាសដំណឹងល្អរបស់យើង ៖ មគ្គុទ្ទេសក៍ចែកចាយដំណឹងល្អនៃព្រះយេស៊ូវគ្រីស្ទ ( ឆ្នាំ ២០២៣, ទំព័រ ២០–២២ ) និងមេរៀនកែសម្រួលអំពីវិធីបង្ការក្នុងការប្រើប្រាស់បច្ចេកវិទ្យា ។ សូមធានាឲ្យបានថា អ្នកមានផែនការសកម្មភាពដែលថ្មីបំផុត ។ ( សូមមើលផ្នែក « បង្កើត និងធ្វើតាមផែនការសកម្មភាព » នៅក្នុង មគ្គុទ្ទេសក៍ធនធានសម្រាប់អ្នកផ្សព្វផ្សាយសាសនា ៖ ដំណោះស្រាយការណ៍អាសគ្រាម សូមមើលផងដែរនូវមេរៀនអំពីវិធីបង្ការដែលបានកែសម្រួល ) ។
តើខ្ញុំអាចទទួលខុសត្រូវកាន់តែខ្លាំងចំពោះខ្លួនខ្ញុំ និងចំពោះព្រះអម្ចាស់យ៉ាងដូចម្ដេច ?
ស៊ិស្ទើរ លីនដា អេស រីវស៍ បានបង្រៀនថា « តម្រងគឺជាឧបករណ៍ការពារដ៏មានប្រយោជន៍ ប៉ុន្តែតម្រងដ៏ធំបំផុតក្នុងពិភពលោកនេះ ហើយជាតម្រងតែមួយគត់ដែលនឹងមានប្រសិទ្ធភាព គឺតម្រងនៅខាងក្នុងខ្លួនមនុស្សផ្ទាល់ ដែលកើតចេញពីទីបន្ទាល់ដ៏ជ្រាលជ្រៅ និងខ្ជាប់ខ្ជួននៃក្ដីស្រឡាញ់របស់ព្រះវរបិតាសួគ៌យើង និងការបូជាដ៏ធួនរបស់ព្រះអង្គសង្គ្រោះសម្រាប់យើងម្នាក់ៗ » ( « Protection from Pornography—a Christ-Focused Home » Ensign ឬ Liahona ខែ ឧសភា ឆ្នាំ ២០១៤ ទំព័រ ១៦ ) ។
សូមជួយពង្រឹងតម្រងផ្ទាល់ខ្លួនរបស់អ្នកតាមវិធីដូចខាងក្រោម ៖
-
សូមពិចារណាពីអ្វីដែលអ្នកអាចធ្វើឥឡូវនេះ ដើម្បីពង្រឹងតម្រងផ្ទាល់ខ្លួនរបស់អ្នក ។
-
ការប្រើប្រាស់មុខងារ Digital Well-Being ដែលបានភ្ជាប់ជាមួយទូរសព្ទរបស់អ្នក គឺដើម្បីគ្រប់គ្រងថាតើអ្នកចំណាយពេលប៉ុន្មានទៅលើកម្មវិធីផ្សេងៗ ហើយដើម្បីកែសម្រួលការកំណត់តាមដែលចាំបាច់ ។
-
សូមប្រៀបធៀបថាតើអ្នកចំណាយពេលប៉ុន្មានក្នុងកម្មវិធីផ្សេងៗជាមួយនឹងរបៀបដែលកម្មវិធីទាំងនេះជួយអ្នកឲ្យស្វែងរកអំណរ និងសម្រេចគោលបំណងផ្សព្វផ្សាយសាសនារបស់អ្នក ។
-
សូមជញ្ជឹងគិតក្នុងការអធិស្ឋានរបស់អ្នកអំពីការប្រើប្រាស់បច្ចេកវិទ្យារបស់អ្នក ។ សូមកត់សម្គាល់ពីវិធីណាមួយដែលអ្នកមានអារម្មណ៍ថាត្រូវបានបំផុសគំនិតឲ្យផ្លាស់ប្ដូរ ។
តើខ្ញុំអាចទទួលខុសត្រូវកាន់តែខ្លាំងទៅលើដៃគូ និងថ្នាក់ដឹកនាំបេសកកម្មរបស់ខ្ញុំយ៉ាងដូចម្ដេច ?
ដើម្បីជួយគ្នាទៅវិញទៅមកឲ្យប្រើប្រាស់បច្ចេកវិទ្យាដោយសុវត្ថិភាព និងមានប្រសិទ្ធភាព ៖
-
សូមពិនិត្យមើលការចុះផ្សាយប្រព័ន្ធផ្សព្វផ្សាយសង្គម ឬសារជាអក្សរជាដៃគូមុនពេលអ្នកផ្ញើចេញ ឬចុះផ្សាយ ។
-
សូមប្រាកដថាដៃគូរបស់អ្នកស្ថិតក្នុងទីតាំងដែលអាចមើលឃើញទូរសព្ទរបស់អ្នក លើកលែងតែពេលអ្នកកំពុងសន្ទនាជាលក្ខណៈឯកជនជាមួយគ្រួសារ ឬអ្នកដឹកនាំបេសកកម្មរបស់អ្នកប៉ុណ្ណោះ ។
-
សូមលើកទឹកចិត្តគ្នាទៅវិញទៅមកដើម្បីរស់នៅតាមវិធីបង្ការទាំងបួនដែលបានរៀបរាប់នៅក្នុង ប្រកាសដំណឹងល្អរបស់យើង ( ទំព័រ ២០–២១ ) ។
-
សូមពិនិត្យមើលឧបករណ៍របស់គ្នាទៅវិញទៅមក ហើយពិភាក្សាអំពីសំណួរ ឬការព្រួយបារម្ភនានា ។
ការអនុវត្តទាំងនេះអាចបង្កើតទម្លាប់នៃការបើកចំហដោយសារ « បញ្ហាស្ទើរតែទាំងអស់ដែលទាក់ទងទៅនឹងអ៊ីនធឺណិត ឬការណ៍អាសគ្រាម កើតឡើងនៅពេលដែលអ្នកនៅដាច់ដោយឡែកពីគេ » ( ប្រកាសដំណឹងល្អរបស់យើងទំព័រ ២១ ) ។
តើខ្ញុំធ្វើការពិនិត្យឡើងវិញនូវការទទួលខុសត្រូវលើឧបករណ៍នៅពេលណា ?
ដៃគូគប្បីពិនិត្យមើលឧបករណ៍របស់គ្នាទៅវិញទៅមកជាទៀងទាត់ ។ ការពិនិត្យឡើងវិញទាំងនេះអាចដាក់បញ្ចូលទៅក្នុងផែនការប្រចាំសប្តាហ៍របស់អ្នក ។
ប្រកាសដំណឹងល្អរបស់យើង អញ្ជើញអ្នកឲ្យ « ជួយបេសកកម្មរបស់អ្នកឲ្យបង្កើតទម្លាប់សាមគ្គីភាព ទំនុកចិត្ត ការទទួលខុសត្រូវ និងសេចក្តីមេត្តាករុណា ដើម្បីឲ្យអ្នកទាំងអស់គ្នាអាចពង្រឹង ហើយគាំទ្រដល់គ្នាទៅវិញទៅមក » ( ទំព័រ ២១ ) ។
តើខ្ញុំគប្បីពិនិត្យមើលអ្វីខ្លះនៅលើឧបករណ៍របស់អ្នកផ្សព្វផ្សាយសាសនាផ្សេងទៀត ?
នៅពេលដែលអ្នកពិនិត្យឡើងវិញនូវឧបករណ៍របស់អ្នកផ្សព្វផ្សាយសាសនាមួយផ្សេងទៀត សូមគោរពព័ត៌មានផ្ទាល់ខ្លួនរបស់គ្នាទៅវិញទៅមកដោយមិនមើលអ៊ីមែលឯកជន ទិនានុប្បវត្តិ និងកំណត់ចំណាំនានាឡើយ ។ សូមពិចារណាដូចខាងក្រោមពេលដែលអ្នកធ្វើការពិនិត្យឡើងវិញ ៖
-
តើខ្ញុំឃើញភស្តុតាងអ្វីខ្លះអំពីការប្រើប្រាស់បច្ចេកវិទ្យាដោយវិជ្ជមាន និងមានប្រសិទ្ធភាព ?
-
តើឧបករណ៍នេះជាទូរសព្ទដែលបានអនុម័តថាត្រូវបានចុះបញ្ជីយ៉ាងត្រឹមត្រូវនៅក្នុងការការពាររបស់សាសនាចក្រដែរឬទេ ? ប្រសិនបើទូរសព្ទត្រូវបានចុះបញ្ជីត្រឹមត្រូវ វានឹងប្រាប់ថា « ឧបករណ៍នេះត្រូវបានគ្រប់គ្រង ( ឬកាន់កាប់ )ដោយអង្គការរបស់អ្នក » នៅលើអេក្រង់ចាក់សោ ។
-
ពិនិត្យ និងពិភាក្សាអំពីស្ថិតិ Digital Well-Being ថ្មីៗរបស់ឧបករណ៍នោះ ។ ពិភាក្សាអំពីអ្វីដែលដំណើរការបានល្អ និងឧបសគ្គអ្វីដែលពួកគេអាចនឹងប្រឈមមុខ ។ សូមសួរពីរបៀបដែលអ្នក ឬថ្នាក់ដឹកនាំបេសកកម្មរបស់អ្នកអាចជួយនិងផ្ដល់ការគាំទ្របានល្អបំផុត ។
ប្រសិនបើយើងប្រើឧបករណ៍រួមគ្នា តើដៃគូរបស់ខ្ញុំ និងខ្ញុំអាចពិនិត្យមើលឧបករណ៍ដោយរបៀបណា ?
ប្រសិនបើអ្នកបម្រើក្នុងបេសកកម្មនៅកន្លែងដែលអ្នក និងដៃគូរបស់អ្នកត្រូវប្រើទូរសព្ទរួមគ្នា អ្នកអាចពិនិត្យឡើងវិញនូវចំណុចដូចគ្នាដែលបានរៀបរាប់នៅខាងលើជាមួយគ្នា ឬសុំដៃគូផ្សេងទៀតដើម្បីពិនិត្យមើលទូរសព្ទរបស់អ្នក ។
ចុះបើខ្ញុំរកឃើញអ្វីមួយដែលគួរឲ្យព្រួយបារម្ភនៅលើឧបករណ៍ ឬប្រព័ន្ធផ្សព្វផ្សាយសង្គមរបស់អ្នកផ្សព្វផ្សាយសាសនាផ្សេងទៀត តើត្រូវធ្វើដូចម្ដេច ?
សូមប្រុងប្រយ័ត្ន និងពិចារណានៅពេលដែលអ្នកពិនិត្យឡើងវិញនូវឧបករណ៍របស់អ្នកផ្សព្វផ្សាយសាសនាមួយផ្សេងទៀត ។ ប្រសិនបើអ្នកឃើញអ្វីមួយដែលគួរឲ្យព្រួយបារម្ភ អ្នកអាចសួរអ្នកផ្សព្វផ្សាយសាសនានូវសំណួរមូលដ្ឋានមួយចំនួនតាមរបៀបដែលមិនគំរាមកំហែង និងមិនមានការវិនិច្ឆ័យឡើយ ។ ផ្តល់ឱកាសឲ្យពួកគេដើម្បីទទួលខុសត្រូវ ដោយស្នើសុំជំនួយពីប្រធានបេសកកម្មរបស់ពួកគេ ។ បង្ហាញសេចក្តីស្រឡាញ់ និងការគាំទ្រ ។ ប្រសិនបើអ្នកនៅតែមានអារម្មណ៍ព្រួយបារម្ភបន្ទាប់ពីនិយាយជាមួយអ្នកផ្សព្វផ្សាយសាសនា ឬពួកគេមិនចង់ពិភាក្សាអំពីបញ្ហានេះជាមួយប្រធានបេសកកម្មរបស់អ្នក សូមសុំប្រធានបេសកកម្មរបស់អ្នកឲ្យជួយ ។
កុំចែកចាយបញ្ហាឯកជនជាមួយពួកអ្នកផ្សព្វផ្សាយសាសនាដទៃទៀតឲ្យសោះ ( សូមមើលផ្នែក « រួមគ្នាតែមួយ » ក្នុង ប្រកាសដំណឹងល្អរបស់យើង ទំព័រ ២១ ) ។ ប្រសិនបើអ្វីដែលអ្នករកឃើញនៅលើឧបករណ៍របស់ដៃគូគឺមានផលប៉ះពាល់អវិជ្ជមាន ឬរំខានដល់អ្នក វាសំខាន់ក្នុងការមានស្មោះត្រង់ ហើយស្វែងរកជំនួយពីអ្នកដទៃ ។ សូមទាក់ទងទៅប្រធានបេសកកម្មរបស់អ្នកដើម្បីគាំទ្រ ។