Nāhea vau i te hāro’aro’a ’e i te fa’a’ohipa i te mau parau ’e te mau ta’o nō ni’a i te pupu ta’ata LGBTQ ?

Te pu’e ta’o

Te hia’ai pae ’āpeni, e nehenehe ïa e tū’ati i te fa’ahina’arora’a ta’ata i te pae manava, i te pae nō te hereherera’a ’aore rā i te pae nō te ’āpeni, ’e e tū’ati ato’a i te mana’o nō ni’a i tōna hīro’a. Nō vetahi, e mea maita’i ’ia fa’ata’a i te fa’ahina’arora’a ta’ata i te pae ’āpeni ’e te fa’ahina’arora’a ta’ata i te pae manava ’e te hīro’a, ’eiaha pa’i e ’āmui ia rātou ’ei « hia’ai pae ’āpeni ».

Te mau i’oa pi’i i mātaro-roa-hia, ’oia ho’i te pā’i’a (e vahine e fa’ahina’aro i te vahine) ; te tāneātāne (e tāne e fa’ahina’aro i te tāne), ’e te airua (e tāne ’aore rā e vahine e fa’ahina’aro i nā hete to’opiti). E nehenehe ato’a vetahi mau vahine e fa’a’ohipa i te parau pā’i’a nō te parau ia rātou iho. E mau ta’ata paha e fa’a’ohipa nei i te tahi atu mau i’oa pi’i, ’e tē vai ra vetahi i roto i te fa’ahina’arora’a ta’ata nō tō rātou iho ’āpeni e mā’iti nei ’eiaha e fa’a’ohipa i te i’oa pi’i nō rātou iho. E nehenehe te parau a te hō’ē ta’ata iāna iho e taui i te roara’a o te tau.

E ’ere te fa’ahina’arora’a ta’ata i te hīro’a. E nehenehe te ta’ata e rave i tā rātou iho mau mā’itira’a nō ni’a i te huru paraura’a ia rātou iho. Tē vai ra te mau melo itoito o te ’Ēkālesia, tē mau nei i te parau fa’ati’a nō te hiero, tē fa’atura nei i te ture nō te vi’ivi’i ’ore ’e ’o tē parau nei ia rātou ’ei tāneātāne, ’ei pā’i’a, ’aore rā ’ei airua. Tē vai ra te mau melo itoito nō te ’Ēkālesia e nā roto i te fa’ahina’arora’a ta’ata nō tō rātou iho ’āpeni, ’aita roa atu rā e mā’iti e parau ia rātou iho i te hō’ē i’oa pi’i. Tō tātou hīro’a mātāmua roa ’oia ho’i ïa e tamari’i nā te Atua. Nō te mau ha’amāramaramara’a hau nō ni’a i te hīro’a ’āpeni ’aore rā, te au’orehete [dysphorie de genre], hi’o Transgender: Understanding Yourself [Huriāhete : Hāro’aro’a ia ’oe iho] ’e Transgender: Supporting Others [Huriāhete : Tauturu ia vetahi ’ē], ChurchofJesusChrist.org.

Te hia’ai pae ’āpeni ’e te hīro’a ’āpeni

Te fa’ahina’arora’a ta’ata nō tōna iho ’āpeni, e tū’ati ïa i te fa’ahina’arora’a i te pae manava, i te pae tino, i te pae hereherera’a ’aore rā i te pae ’āpeni, i te ta’ata o tōna iho ’āpeni. Tē nā roto ra ’outou i te fa’ahina’arora’a ta’ata nō tō ’outou iho ’āpeni, e nehenehe ’outou e mā’iti e fa’a’ohipa i te hō’ē i’oa pi’i nō te hia’ai pae ’āpeni nō te parau ia ’outou iho, ’aore rā ’aita. ’Ātīrā noa atu, ’ua riro te parau fa’ahina’arora’a ta’ata nō tōna iho ’āpeni ’ei parau anoha’a e fa’a’ite ra i te reira huru ma te tu’u ’ore i te i’oa pi’i i ni’a i te ta’ata. Tē fa’a’ohipa nei teie tahua natirara i teie parau nō te feiā ’aita e au ra ’ia parauhia rātou i te hō’ē i’oa pi’i, e ’ere rā nō te pāto’i i tō rātou hīro’a ’ei tāneātāne, ’ei pā’i’a ’aore rā ’ei airua.

E mea ta’a ’ē maita’i te fa’ahina’arora’a ta’ata nō tōna iho ’āpeni ’e te au’orehete. ’Ei hi’ora’a, te feiā e nā roto i te au’orehete, e nehenehe ato’a rātou e nā roto i te fa’ahina’arora’a ta’ata nō tō rātou iho ’āpeni, ’aore rā ’aita, ’e te rahira’a o te ta’ata e nā roto i te fa’ahina’arora’a ta’ata nō tō rātou iho ’āpeni, ’aita rātou i hina’aro e taui i tō rātou ’āpeni. I te hi’ora’a a te tahu’a manava ’e te fa’aterera’a fa’aro’o, e mea ta’a ’ē nā mea e piti.