Ol Aedia blong Kam Antap long Famli Skripja Stadi blong Yu

Famli skripja stadi evri dei i wan wei we i gat moa paoa blong helpem famli blong yu blong lanem gospel. Hamas mo hamas taem yu rid olsem wan famli, hem i no impoten olsem ol taem we yu yu stap traehad. Taem yu mekem skripja stadi i kam wan impoten pat blong laef blong famli blong yu, bae yu helpem ol famli memba blong yu blong kam kolosap long Jisas Kraes mo bildimap testemoni blong olgeta antap long fandesen blong tok blong Hem.

Tingting long olgeta kwestin ia:

• ?Olsem wanem nao yu save leftemap tingting blong ol famli memba blong stadi ol skripja olgetawan?

• ?Wanem nao yu save mekem blong leftemap tingting blong ol famli memba blong oli serem wanem we oli stap lanem?

• ?Olsem wanem nao yu save tokbaot moa ol prinsipol we yu stap lanem insaed long ol skripja long evri dei taem yu stap tij?

Tingbaot se hom i nambawan ples blong lanem gospel mo stap tijim. Yu save lanem mo tijim gospel long hom long sam wei we i no posibol blong mekem insaed long wan klas long Jos. Yusum tingting blong yu blong krietem ol wei we yu save helpem famli blong yu blong lanem samting aot long ol skripja. Tingting long sam long ol aedia ia blong mekem famli skripja stadi blong yu i kam gud moa.

Yusum Miusik

Singsing ol singsing we oli kam sapotem ol prinsipol we oli stap tijim insaed long ol skripja.

Serem Ol Skripja we Oli Gat Mining

Givim taem long ol memba blong famli blong oli serem ol ples long ol skripja we oli faenem se i gat mining long olgeta taem oli stap mekem ol stadi blong olgetawan.

Yusum Ol Toktok blong Yuwan

Invaetem ol famli memba blong talemsot long toktok blong olgetawan, wanem oli lanem aot long ol skripja we yufala i bin stap stadi.

Yusum Ol Skripja long Laef blong Yu

Afta we yu ridim sam skripja ves, askem ol famli memba blong serem ol wei we skripja ia i go wetem laef blong olgeta.

Askem Wan Kwestin

Invaetem ol famli memba blong askem wan kwestin blong gospel, mo afta, spendem taem blong lukaotem ol ves we i gat ansa long kwestin ia.

Soem Wan Skripja

Jusum wan ves we yu luk se i gat mining, mo soem long wan ples we ol famli memba oli save luk plante taem. Invaetem ol famli memba blong oli gat wanwan taem blong jusum wan skripja blong soem.

Mekem Wan Skripja Lis

Olsem wan famli, jusum sam ves we bae yu wantem blong toktok raon long hem long wik we i stap kam.

Lanem Ol Skripja Baehat

Jusum wan skripja ves we i gat mining long famli blong yu, mo invaetem ol famli memba blong lanem skripja ia baehat mo ripitim skripja ia evri dei, o taem yufala i stap plei wan memori gem.

Serem Ol Lesen we Oli Yusum Samting long Hem

Faenem sam samting we i go wetem ol japta mo ol ves we yufala i stap ridim olsem wan famli. Invaetem ol famli memba blong tokbaot olsem wanem wanwan samting we yu karem, i go wetem ol tijing insaed long ol skripja.

Jusum wan Topik

Letem ol famli memba oli gat wanwan taem blong jusum wan topik we famli bae i stadi long hem tugeta. Yusum Topical Guide, o Bible Dictionary, o Gaed long Ol Skripja (olskripja.ChurchofJesusChrist.org) blong faenem ol skripja ves we i go wetem topik.

Droem Wan Pikja

Ridim sam ves olsem wan famli, mo afta, givim taem blong ol memba blong famli oli droem wan samting we i go wetem wanem yufala i stap ridim. Spenem taem blong toktok raon long wanwan droing.

Aktem Wan Stori

Afta we yu ridim wan stori, invaetem ol famli memba blong oli aktem stori ia. Afta long hemia, tokbaot olsem wanem stori i go wetem wanem wanwan i stap gotru long hem hemwan, mo olsem wan famli.

Elda David A. Bednar i talem: “Evri famli prea, evri taem blong famli skripja stadi, mo evri famli haos naet i olsem taem yu pentem wan mak long kaliko blong sol blong yu. I no gat wan taem we i luk se i gud o bigwan tumas blong man i tingbaot. Be semmak olsem yelo mo gol mo braon strok blong peint i go gud tugeta, mo i mekem wan naesfala peinting, fasin blong yumi blong stap gohed blong mekem oltaem ol smol samting, i save lidim yumi long ol bigfala risal long saed blong spirit” (“More Diligent and Concerned at Home,” Liahona, Nov. 2009, 19–20).