“Wiepe kan me pahn Kakairada Ahmw Onopiki Pwuhk Sarawi.“ Wiepe kan en Onopiki Pwuhk Sarawi (2021)
“Wiepe kan me pahn Kakairada Ahmw Onopiki Pwuhk Sarawi.“ Wiepe kan en Onopiki Pwuhk Sarawi
Wiepe kan me pahn Kakairada Ahmw Onopiki Pwuhk Sarawi
Iet ekei wiepe mengei kan me pahn kakairada ahmw onopiki mahsen en Koht nan pwuhk sarawi kan.
Kapakapki Kamarain
Irehn pwuhk sarawi kan audaudki mahsen en Koht. Ahnsou me ke onopiki mahsen pwuko, peki Sapwellimen Semomw Nanleng kaweid oh ale Sapwellime Ngehno pwehn seweseiuk wehwehki mahsen ko.
Rapahki Me Mehlel kan en Sises Krais
Irehn pwuhk sarawi kan padahkihong kitail me mehkoaros kin kadehdeki Krais (tehk 2 Nihpai 11:4; Moses 6:63), eri rapahki Ih nan mwekid kan, soai kan, oh padahk kan nan irehn pwuhk sarawi kan. Song en intingi de kilelehla ireh kan me padahngki duwen Sounkomouro oh ia mwomwen ahmw pahn idawehn Ih.
Repahki Mahsen kan oh Pwuloi kan me kin kihda Kamarain
Ke kak diar me ekei mahsen kan oh pwuloi kan nan pwuhk sarawi kan kin sair uhk, likamwete re intingdi ong uhk. Re kak kahrehda pepehm me dokeiuk oh kamarain oh kamwakid uhk. Song en kilelehdi mahsen pwuko nan noumw pwuhk sarawi kan de intingihdi mehkot me pid irail nan noumw pwuhk en rekohdo.
Rapahki Me Mehlel kan en Rongamwahuo
Ekei ahnsou me mehlel kan en rongamwahuo (kin kalapw sansal nan kosonned de padahk kan) kin sansal oh inen ah ekei ahnsou kawehweparail kin pwarada nan karasaras oh soai. Peidek rehmw, “Soangen me mehlal kan en rongamwahu dah me padahkpe mie nan ire pwukat?“
Kapaidoke Ngehno
Kin tetehk mwahu ahmw lamalam oh pepehm kan, itarete ma re sohte pahrekiong dahme ke wadwadek. Pepehm pwuko kak wia uhdahn mehkan me Semomw Nanleng kupwurki ken ese oh pehm.
Karasa Irehn Pwuhk Sarawi kan ong Ahmw Mour
Medewe mwomwen soai kan oh padahk kan me ke wadwadek arail rasehng ahmw mour. Ni karasepe, ke kak peidek rehmw, “Soangen irair dah me I alehier me duwehte dahme I wie wadwadek?“ de “Ia mwomwen ahi kak idawehn karasaras en aramas menet nan irehn pwuhk sarawi kan?“
Idek Peidek kan
Peidengki duwen rongamwahuo kak seweseiuk medewehda dahme ke pahn onopiki. Ni ahmw onopiki irehn pwuhk sarawi kan, peidek kan pahn pil pwarada nan ahmw lamalam. Peidek pwukat kak doke dahme ke wadwadek de mehkan me pid ahmw mour. Douloali peidek pwukat oh rapahki pasapengparail ni ahmw doula onohnopiki irehn pwuhk sarawi kan. Mwurin ahmw onop, peidengki dahme Koht kupwurki ken esehla, oh mwasahn pasapeng kan nan erein awa kan oh rahn kohkohdo kan.
Doadoahngki Sawaspen Onopiki Pwuhk Sarawi
Pwehn ale sawas en kamarain ong ireh kan me ke wadwadek, doadoahngki footnote kan nan Topical Guide, Bible Dictionary, Guide to the Scriptures (scriptures.ChurchofJesusChrist.org), oh wasahn sawas teikan.
Medewe Wehwehn Irehn Pwuhk Sarawi kan
Ke kak diar wehwe kamarain me pid ehu irehn pwuhk sarawi kan ma ke kin medewe wehwe tik en mahsen ko—mwekid de wasa me mahsen pwuko soasoaia. Ni karasepe, ahmw ese mour en aramas oh dahme irail kamehlele me emen soukohpo koasoakoasoi ong ko kak seweseiuk wehwehki kahrepen en soukohpo koasoi kan.
Intingiedi Ahmw Madamadau kan oh Pepehm kan
Tohto wiepen intingiedi pepehm kan me kin pwarada ni ahnsoun onop. Ni karasepe, ke kak kilele ehu mahsen kaselel de pwuloi oh intingiedi ahmw madamadau kan nan noumw pwuhk sarawi kan. Ke pil kak kolokol ehu pwuhk en rekohd en ahmw madamadau kan, pepehm kan, oh ire kan me kin sair uhk. De ke pil kak intingiedi peidek me ke wia ni tepdahn ahmw onopo, iangahki pasapeng me ke ale mwuri.
Onopiki Padahk kan en Soukohp kan oh Wahnpoaron kan en Imwin-rahn akan.
Wadek dahme soukohp kan oh wahnpoaron kan padahngkiher ki ireh kan me ke diar nan pwuhk sarawi kan. Arail padahk kan kin dierek nan “Kapokon Lap,” “Makasihn kan,” oh wasa teikan nan Laiprehri en Rongamwahuo.
Wadek Soai kan nan pwuhk sarawi kan.
Wadek soai kan nan pwuhk sarawi kan, rapahki wehwe tik en soai ko (ahnsou, wasa, me soaia soaio, oh me rongorong soaio). Soai me mahlenpe miehier nan pwuhk sarawi kan wia ehu wiepe mengei en kawehwe irehn pwuhk sarawi kan ong seri or aramas me sohte nohn wehweki pwuhk sarawi.
Ehukihda Irehn Kamarain kan
Koasoaia irehn kamarain me ke alehdi nan ahmw onop wia ehu wiepe mwahu en kasukuhli mehteikan oh pil kin sewese katehlapiala ahmw wehwehki dahme ke wadekehr.
Momourki Dahme Ke Eselahr
Onopiki pwuhk sarawi kan kin kak kamaraini kitail oh elehieng kitail en wekidala mwomwen atail mour. Rong dahme Ngehno kin kapehmkin uhk ni ahmw wadawad, oh inoukihda ken idawehn kapehm tikitik ko.