Manatu e Faaleleia ai Au Suesuega Faaletagata Lava Ia o Tusitusiga Paia

O ni nai auala faigofie ia e faaleleia ai lau suesuega o le afioga a le Atua o loo i tusitusiga paia.

Tatalo mo Musumusuga

O loo i ai i tusitusiga paia le afioga a le Atua. Ao e aoaoina ia mea, fesili atu i lou Tama Faalelagi mo Lana taitaiga ma maua Lona Agaga e fesoasoani ia te oe ia e malamalama ai.

Vaavaai mo Upumoni e uiga ia Iesu Keriso

Ua aoao mai i tatou e tusitusiga paia o mea uma lava e molimau atu ia Keriso (tagai i le 2 Nifae 11:4; Mose 6:63), o lea saili ia te Ia i mea o loo tutupu, o tala, ma aoaoga o i tusitusi paia. Fuafua e matau pe maka ia fuaiupu o loo aoao mai e uiga i le Faaola ma pe faapefea ona mulimuli ia te Ia.

Tagai mo ni Upu ma ni Fasifuaitau Musuia

Atonu e te maua e i ai ni upu ma ni fasifuaitau patino i mau e uunaia ai oe, e pei na tusia faapitoa lava mo oe. E ono lagonaina le taua patino ma le musuia ma faaosofia ai oe. Fuafua e maka i au tusitusiga paia pe tusi foi e uiga i ia mea i lau tusi talaaga.

Vaavaai mo Upumoni o le Talalelei

O nisi taimi o upumoni o le talalelei (e tele ina ta’ua o aoaoga faavae po o mataupu faavae) e tuusa’o mai lava, ma o nisi taimi e faaiteite mai i se faataitaiga po o se tala. Fesili ifo ia te oe lava, “O a upumoni o le talalelei o loo aoao mai i nei fuaiupu?”

Faalogo i le Agaga

Faalogo i ou mafaufauga ma lagona, tusa lava pe le fesootai ma mea o loo e faitauina. O na lagona atonu o mea tonu na e finagalo lou Tama Faalelagi e te aoaoina ma lagona.

Ia Faatatau Mau i Lou Olaga

Mafaufau pe faapefea ona faaaoga tala ma aoaoga o loo e faitauina i lou olaga. Mo se faataitaiga, e mafai ona e fesili ifo ia te oe lava, “O a ni o’u aafiaga e tutusa ma mea o loo ou faitauina?” po o le “E mafai faapefea ona ou mulimuli i le faataitaiga a le tagata lenei o loo i mau?”

Fai ni Fesili

Faia o ni fesili e uiga i le talalelei e mafai ona fesoasoani ia te oe e filifili poo le a e ao ona suesueina. A o e suesue i mau, atonu o le a oo atu foi ni fesili i lou mafaufau. O nei fesili e ono fesootai i mea o loo e faitauina po o i lou olaga masani. Manatunatu loloto i nei fesili, ma vaavaai mo tali a o e suesue pea i tusitusiga paia. A maea ona e suesue, fesili poo a nisi mea e finagalo le Atua e ao ona e aoaoina, ma vaavaai mo tali i le aluga o itula ma aso.

Faaaoga Fesoasoaniga mo le Suesueina o Tusitusiga Paia

Ina ia maua ni malamalamaaga loloto faaopoopo i fuaiupu o loo e faitauina, faaaoga ia vaefaamatalaga, o le Taiala mo Autu, o le Bible Dictionary, o le Taiala i Tusitusiga Paia (scriptures.ChurchofJesusChrist.org), ma isi fesoasoaniga mo suesuega.

Mafaufau i le Talaaga o Tusitusiga Paia

E mafai ona e maua ni malamalamaaga loloto naua e uiga i se mau pe a e mafaufau i lona talaaga—o tulaga po o le nofoaga o tusitusiga paia. Mo se faataitaiga, o le iloaina o tua atu ma talitonuga o tagata na saunoa atu i ai se perofeta, e mafai ona fesoasoani e te malamalama ai i le faamoemoega o ana saunoaga.

Tusifaamaumau ou Mafaufauga ma Lagona

E tele auala e tusifaamaumau ai lagona uunai ia e oo mai a o e suesue. Mo se faataitaiga, e mafai ona e makaina se upu anoa po o se fasifuaitau ma tusifaamaumau ou mafaufauga e fai ma faamanatu i au tusitusiga paia. E mafai foi ona tausi sau tusitalaaga o malamalamaaga, lagona, ma uunaiga e te maua. Pe atonu o le a e tusi faamaumau le fesili sa e fesili atu ai ao lei amataina lau suesuega, sosoo atu ai ma tali sa taitaiina atu i ai oe.

Suesue i Upu a Perofeta ma Aposetolo o Aso e Gata Ai

Faitau po o a mea na aoao mai e perofeta ma aposetolo o aso e gata ai e uiga i mataupu faavae e te maua i tusitusiga paia. O a latou lauga o loo maua i le “Konafesi Aoao,” “Mekasini,” ma isi tuufaatasiga i le Gospel Library.

Faitau ia Tala

Faitau ia tala i totonu o tusitusiga paia, ma saili ia malamalama i o latou talaaga (taimi, nofoaga, failauga, ma le aofia). O tala faatusiata o tusitusiga paia o se punaoa sili atu mo lenei mea, aemaise lava mo tamaiti ma tagata o le au paia e le masani tele i tusitusiga paia.

Fefaasoaai Malamalamaaga Loloto

O le talanoaina o malamalamaaga mai lau suesuega faaletagata lava ia o se auala lelei lea e aoao atu ai isi, ma fesoasoani e faamalosia ai lou malamalama i mea sa e faitauina.

Ola I Mea Ua E Aoaoina

O le suesueina o tusitusiga paia e musuia ai i tatou, ma taitai atu ai i tatou ina ia suia le ala tatou te ola ai. Faalogo i mea e uunaia ai oe e le Agaga e fai e pei ona e faitauina, ona tautino atu lea e faatino na uunaiga.