Faamaopoopoga Anoa ma Faifeautalai

O au peresitene o le korama a le au toeaina ma le Aualofa e taulamua i le fesoasoani e musuia tagata o le au paia ia alolofa i fanau a le Atua, ia faasoa atu le talalelei, ma ia valaaulia isi ia maua faamanuiaga a le Faaola (tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 23.5.2, Potutusi a le Talalelei). I le avea ai ma taitai, ia iloa o a outou taumafaiga e matuai faaleleia pe a faamaopoopo e le au paia ma faifeautalai a latou taumafaiga e aumai tagata ia Keriso.

O se tasi o auala sili ona lelei e faaogatasi ai taumafaiga e aumai isi ia Keriso o le faia lea o fonotaga pupuu, faasamasamanoa faalevaiaso lea e “faamaopoopo ai e taitai i le lotoifale ma [faifeautalai] taumafaiga e faasoa atu le talalelei ma faamalolosia tagata fou ma tagata ua toe foi mai o le ekalesia” (Tala’i La’u Talalelei: O Se Taiala e Faasoa Atu ai le Talelei a Iesu Keriso [2023], 221).

O fonotaga faamaopoopo faalevaiaso e tatau ona taulai i tagata taitoatasi ma talanoaina fesili nei e fa mai le Tala’i La’u Talalelei:

E mafai faapefea ona tatou fesoasoani ia i latou o loo aoaoina?
E mafai faapefea ona tatou fesoasoani ia i latou o e na papatisoina talu ai nei?
E mafai faapefea ona tatou fesoasoani i tagata ua toe foi mai o le ekalesia?
E mafai faapefea ona tatou maua nisi tagata e aoao?

O fonotaga faamaopoopo faalevaiaso o ni taimi sili foi lea e mafaufau ai e uiga i manaoga o le afioaga lea e mafai ona fesoasoani punaoa a le Ekalesia e taulima ai. O nei fonotaga o se taimi foi lea e atinae ai auala o loo faasoa atu ai e tagata o le ekalesia le talalelei ma faailoa gaoioiga a le uarota po o le siteki e mafai e tagata o le ekalesia ona valaaulia ai uo ma aiga o le afioaga e auai.