O Manatu mo Lesona o Aso Sa Lona Lima

O lesona i Aso Sa Lona Lima ua tuuina mai ai ni avanoa matagofie e faamalosiau ai tagata o le ekalesia ia ola i mataupu faavae o le alofa, faasoa atu, ma valaaulia” ma iloa le olioli ma faamanuiaga e oo mai i le faasoaina atu o le talalelei a Iesu Keriso. O se tasi faamoemoega o lesona o Aso Sa lona lima, o le, ia fesoasoani i tagata taitasi o le ekalesia e faasoa atu le talalelei a Iesu Keriso i auala masani ma faanatura e ala i le faatinoina o mataupu faavae o le “alofa, faasoa atu, ma le valaaulia.”

Mulimuli i le taitaiga a le Agaga a o e sauniuni. Aoao atu i se auala e faamalosiau ai i tagata o lau uarota po o le paranesi aemaise le autalavou, ia auai i le talanoaga. O manatu ma punaoa nei e mafai ona fesoasoani ia te oe i au taumafaiga.

Manatu e Mafaufau i ai

O faamanuiaga ma le olioli o le faasoa atu o le talalelei o loo avanoa mo i tatou taitoatasi. E manuia tagata uma o le Ekalesia pe a tatou alolofa i le Atua ma o tatou tuaoi; faasoa atu le talalelei o se faaopoopoga o lo tatou olaga patino, faaleaiga, ma faale-ekalesia; ma valaaulia isi ia o mai ma vaai, o mai ma fesoasoani, ma o mai ma auai.

O le faasoa atu o le talalelei e aumaia ai le olioli ia i tatou, i le Alii, ma i isi. E aumaia ai foi le faateleina o le Agaga ma le mana o le Atua i totonu o o tatou olaga (tagai i le Mosaea 18:10; Ioane 15:4–5), puipui i tatou mai faaosoosoga (tagai i le 3 Nifae 18:24–25), ma aumaia le faamalologa ma le faamagaloga o agasala (tagai i le Mataupu Faavae ma Feagaiga 62:3).

Punaoa o le Faasoaina Atu o le Talalelei

O punaoa ua lisiina i lalo e mafai ona fesoasoani e te malamalama ai i auala e fesoasoani ai i tagata o le Ekalesia e faasoa atu le talalelei e ala i le faatino o mataupu faavae o le “alofa, faasoa atu, ma le valaaulia.”

• Talai Lau Talalelei: O Se Taiala i le Faasoaina Atu o le Talalelei a Iesu Keriso

• Gary E. Stevenson, “Alofa, Faasoa Atu, Valaaulia,” Liahona, Me 2022, 84–87

• (Marcus B. Nash, “Ia Tuu i Luga Lo Outou Malamalama,” Liahona, Nov. 2021, 71-73

• Faasoaina Atu o le Talalelei: Mataupu Faavae o le Alofa, Faasoa Atu, ma le Valaaulia

• Auala e Amata ai le Faasoaina o Punaoa a le Ekalesia

• Faatumutumuga o le Faasalalauga o le Faasoaina Atu o le Talalelei

• Faasoaina Atu o le Talalelei 2022: O Se Faasalalauga mo Taitai

O Ni Fesili e Mafai Ona Faaaoga mo Talanoaga

• E faapefea e le faasoaina atu o le talalelei ona aumaia i tatou ia latalata atili ia Iesu Keriso?

• E mafai faapefea ona tatou faaaofia isi i o tatou olaga e faaogatotonu ia Keriso i auala masani ma faanatura.

• O a ni auala o loo tatou faasoa atu ai le talalelei i faiga masani? E mafai faapefea ona tatou atinae i luga o na taumfaiga?

• E mafai faapefea e le tatou uarota se siosiomaga lea e faigofie ai ona alofa, faasoa atu, ma valaaulia?

• E faapefea ona tatou amata faasoa atu punaoa o le Ekalesia?