Tokanga Taha kia Sīsū Kalaisi: Tokoniʻi ʻa e Kau Akó ke Nau Haʻu kia Sīsū Kalaisi

Tokoniʻi ʻa e kau akó ke fakamālohia honau vā fetuʻutaki mo e Tamai Hēvaní mo Sīsū Kalaisí.

Pōtoʻi Ngāué

Ngaahi fakamatala ʻe tokoni ke ʻilo mo ongoʻi ʻe he kau akó ʻa e ʻofa ʻa e Tamai Hēvaní mo Sīsū Kalaisí.

Fakamatalaʻi

ʻOku lahi ha ngaahi faingamālie ʻi he lēsoni kotoa pē ke tokoniʻi ʻa e kau akó ke fakamālohia honau vā fetuʻutaki mo e Tamai Hēvaní mo Sīsū Kalaisí. ʻOku hoko ha niʻihi ʻo e ngaahi faingamālie lelei tahá hili hono vahevahe ʻe he kau akó ʻenau ngaahi fakakaukaú pe ongó. ʻI he momeniti ko iá, ʻe lava ke fai ʻe he kau faiakó ha ngaahi fakamatala ʻoku nofotaha ʻi he ʻofa mo e ngaahi ʻulungaanga ʻo e Tamai Hēvaní mo Sīsū Kalaisí.

ʻE tokoni ʻa e faʻahinga fakamatala pehení ke ʻilo ʻe he kau akó ʻa e ongo ʻoku maʻu ʻe he Tamai Hēvaní mo Sīsū Kalaisi fekauʻaki mo kinautolú, ongo ʻoku nau maʻu fekauʻaki mo e Tamai Hēvaní mo Sīsū Kalaisí, pe fakatouʻosi. ʻI he fakamatalá, ʻe lava ke ke fakaʻilongaʻi, fakamoʻoniʻi, pe fakafehokotaki ai ʻa e meʻa naʻe toki vahevahe ʻe he tokotaha akó kau ki ha ʻulungaanga pe moʻoni fekauʻaki mo e ʻofa, natula, mo e ngaahi ongo ʻa e ʻOtuá ki Heʻene fānaú. ʻOku fakatupu ʻe he ngaahi fakamatala pehení ha ngaahi faingamālie lahi ange ke fakamoʻoniʻi ʻe he Laumālie Māʻoniʻoní ki he kau akó honau mahuʻinga fakafoʻituitui ki heʻenau Tamai Hēvaní mo Hono ʻAló.

Ngaahi Fakatātāʻí

• ʻOku vahevahe ʻe Meki naʻá ne maʻu ha tali ki heʻene lotú. ʻE toe tānaki atu leva ʻa e faiakó ʻaki ʻa e fakamatala ko ʻení, “Ko e aʻusia ko iá ko ha fakamoʻoni ia ʻoku ʻafioʻi ʻe he Tamai Hēvaní ko hai koe.”

• ʻOku vahevahe ʻe Seiti naʻá ne ongoʻi hono valokiʻi ia ʻe he Laumālié lolotonga ʻa e konifelenisí ʻi he ʻikai lahi ange ʻene lau folofolá. ʻOku tali ange leva ʻe he faiakó, “Fakamālō atu ʻi hoʻo fakamanatu mai kiate kimautolu kotoa ʻokú Ne fie kau mai ki heʻetau moʻuí.”

• ʻOku vahevahe ʻe Hei Sou ha fakakaukau naʻá ne maʻu lolotonga ʻene lau ʻene folofolá. ʻOku tali ange ʻe he faiakó, “Kuo akonekina kitautolu ʻe hoʻo ngaahi fakakaukaú kau ki he angaʻofa mo e angavaivai ʻa e ʻOtuá.”

• ʻOku fakahaaʻi ʻe Pilikihami ʻene taʻefiemālie ʻi he ʻikai ke ne maʻu ha taimi feʻunga ke lau ʻene folofolá. ʻOku tali ange leva ʻe he faiakó, “ʻOku tau lava ʻo tala ʻa e lahi hoʻo ʻofa kiate Iá ʻi hoʻo loto-holi ke muimui kiate Iá.”

• ʻOku vahevahe ʻe ʻAtalaine ʻene ngaahi ongó hili ʻene lau ʻa e Tokāteline mo e Ngaahi Fuakava 18:10. ʻOku pehē leva ʻe he faiakó, “ʻOku ou ʻiloʻi foki ʻoku mahuʻinga fau ho laumālié kiate Ia.”

Akoako

Faʻu ha fakamatala ʻe lava ʻo tokoni ki he tokotaha ako takitaha ke ne ongoʻi ʻa e ʻofa ʻa e Tamai Hēvaní mo Sīsū Kalaisí.

• ʻOku vahevahe ʻe Polokilini ko e taha ʻo e ngaahi laine ʻokú ne saiʻia taha ai mei he “ʻOku Moʻui Hoku Huhuʻí” ko e “[ʻOkú Ne moʻui ke holoholoʻi hoku] loʻimatá ni.”

• ʻOku vahevahe ʻe Tōmasi kimuʻa pea vete ʻene ongomātuʻá, naʻe lahi ʻa e fekeʻikeʻi ʻi honau ʻapí. ʻI he taimi naʻá ne lotu aí, ko e taimi pē ia naʻá ne ongoʻi ai ʻa e nongá mo e fiemālié.

• Hili ʻa e laukonga ʻa Pīsila fekauʻaki mo hono fakamavaeuaʻi ʻo e Tahi Kulokulá, naʻá ne pehē, “ʻOku ou tui ʻoku fakaofo moʻoni hono fakahoko ia ʻe he ʻOtuá maʻa Mōsese mo e Fānau ʻo ʻIsilelí.”

Aleaʻi pe Fakalaulauloto

• Ko e hā hono mahuʻinga ʻo hono fai ha ngaahi fakamatala ʻe tokoni ki he kau akó ke nau ongoʻi ʻa e ʻofa ʻa e Tamai Hēvaní mo Sīsū Kalaisí?

• Ko e hā ka finangalo ai ʻa e Tamai Hēvaní ke tau fakahoko ʻa e ngaahi fakamatala pehení ko ha konga ʻo e aʻusia fakaakó?

Fakakau

• Fakaʻaongaʻi ha miniti ʻe 5 hili ʻa e kalasi takitaha ʻokú ke akoʻi ʻi he uike ka hokó ʻo hiki ha ngaahi fakamatala naʻá ke mei lea ʻaki ʻo makatuʻunga ʻi he meʻa naʻe vahevahe ʻe he kau akó. ʻI he uike hono hokó, feinga ke fai ha ngaahi fakamatala tatau lolotonga ʻa e lēsoní.

Fie Ako Lahi Ange?

• “Tokanga Taha kia Sīsū Kalaisi,” Ko e Faiako ʻi he Founga ʻa e Fakamoʻuí (2022), 5–9

• Chad H Webb, “Sinoemeʻa” (Fakamafola ʻo e ako fakataʻu ʻa e Seminelí mo e ʻInisititiuti Fakalotú, 12 Sune 2019), broadcasts.ChurchofJesusChrist.org.

Pōtoʻi Ngāué

Fai ha ngaahi fehuʻi ʻe tokoni ki he kau akó ke nau maʻu ha ngaahi sīpinga ʻo e ʻofa ʻa e Tamai Hēvaní ʻi he potufolofolá.

Fakamatalaʻi

Naʻe pehē ʻe ʻEletā D. Toti Kulisitofasoni ʻi he konifelenisi lahi ʻo ʻOkatopa 2021, “ʻOku ʻofa lahi mo haohaoa ʻetau Tamai Hēvaní ʻiate kitautolu. … Ko ʻEne ʻofá ko e ʻofa haohaoa ia ʻa ha Tamai—ʻoku maʻá e tokotaha kotoa pē, ka ʻoku ongoʻi fakataautaha ia ʻe he tokotaha takitaha” (“Ko e ʻOfa ʻa e ʻOtuá,” Liahona, Nōvema 2021, 16). Ko e founga ʻe taha ke tokoniʻi ai ʻa e kau akó ke nau ʻiloʻi mo ongoʻi ʻa e ʻofa ʻa e Tamai Hēvaní ko hono fakaafeʻi kinautolu ke kumi ha ngaahi sīpinga ʻo ia ʻi he ngaahi potufolofola ʻoku nau akó. Te ke lava ʻo fai ia ʻaki haʻo fai ha ngaahi fehuʻi hangē ko ʻení kimuʻa pe hili hono lau ha potufolofola ʻi he kalasí.

• Ko e hā ha ngaahi sīpinga ʻo e ʻofa ʻa e Tamai Hēvaní ʻokú ke vakai ki ai ʻi he ngaahi veesi ko ʻení?

• Naʻe tāpuekina fēfē [ʻa e tokotahá ni] ʻe he ʻofa ʻa e Tamai Hēvaní?

• Ko e hā ʻoku akoʻi atu ʻe he talanoa pe meʻa ko ʻeni naʻe hokó fekauʻaki mo e ʻofa ʻa e Tamai Hēvaní ki Heʻene fānaú?

ʻE lava ke tokoni hono ʻai ke ʻiloʻi ʻe he kau akó ha ngaahi sīpinga ʻo e ʻofa ʻa e Tamai Hēvaní ʻi he founga ko ʻení ke nau fakatokangaʻi lelei ange ai ʻEne ʻofá ʻi heʻenau moʻuí, ongoʻi lahi ange ʻEne ʻofa fakataautaha mo haohaoa kiate kinautolú, pea fakatupulaki ʻenau loto-falala ke tafoki kiate Ia ʻi he taimi ʻo e faingataʻá.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

• Hili hono aleaʻi ʻo e Tokāteline mo e Ngaahi Fuakava 19:16–19, ʻa ia ʻoku fakamatalaʻi ai ʻe he Fakamoʻuí ʻEne faingataʻaʻia ʻi hono fakahoko ʻa e Fakaleleí, naʻe fehuʻi ange ʻe Sisitā ʻApalā ki heʻene kau akó, “ʻI hoʻo ʻilo naʻe fakaʻatā ʻe he Tamai Hēvaní Hono ʻAló ke mamahi maʻatautolú, ko e hā ʻokú ke ako fekauʻaki mo ʻEne ʻofa ki Heʻene fānaú kotoa?”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

ʻI he ngaahi meʻá ni takitaha, hiki ha fehuʻi te ke lava ʻo fai ki hoʻo kau akó ʻa ia ʻe tokoni ke nau ʻiloʻi ʻa e ngaahi sīpinga ʻo e ʻofa ʻa e Tamai Hēvaní ʻi he potufolofola ko iá:

• ʻEkesōtosi 20:3–17 (ko e Ngaahi Fekau ʻe Hongofulú)

• Ko ha potufolofola ʻi loto pe ko ha konga kehe ʻo hoʻo lēsoni hokó

Aleaʻi pe Fakalaulauloto

• ʻOkú ke pehē ko e hā ʻe ongoʻi pe mahino ki hoʻo kau akó hili hoʻo ʻeke ange ʻa e ngaahi fehuʻi naʻá ke tohí?

Fakakau

• ʻI he lēsoni takitaha ʻokú ke teuteu ʻi he uike ka hokó, feinga ke ʻiloʻi ha feituʻu ʻe taha te ke lava ʻo ʻeke ai ki he kau akó ha fehuʻi ʻe tokoni ke nau maʻu ai ha ngaahi sīpinga ʻo e ʻofa ʻa e Tamai Hēvaní. Hiki ha fehuʻi ʻe tokoni ke nau fai ia.

• ʻOkú ke pehē ko e fē ʻi hoʻo ngaahi lēsoni ka hokó te ne ʻomi ha faingamālie lelei makehe ke tokoniʻi hoʻo kau akó ke nau maʻu ha ngaahi sīpinga ʻo e ʻofa ʻa e Tamai Hēvaní?

Fie Ako Lahi Ange?

• D. Todd Christofferson, “Ko e ʻOfa ʻa e ʻOtuá,” Liahona, Nōvema 2021, 16–18

• “Tokoniʻi ʻa e Kau Akó ke Fakamālohia Honau Vā Fetuʻutaki mo e Tamai Hēvaní mo Sīsū Kalaisí,” ʻi he “Tokoniʻi e Kau Akó ke Haʻu kia Sīsū Kalaisi,” Ko e Faiako ʻi he Founga ʻa e Fakamoʻuí (2022), Gospel Library