“Tulungan ang mga mag-aaral na maging responsable sa kanilang pagkatuto,” Mga Kasanayan para sa Pag-unlad ng Guro: Maghikayat ng Masigasig na Pag-aaral (2023)

“Tulungan ang mga mag-aaral na maging responsable sa kanilang pagkatuto,” Mga Kasanayan para sa Pag-unlad ng Guro: Maghikayat ng Masigasig na Pag-aaral

Mga Alituntunin ng Pagtuturo na Tulad ng kay Cristo: Maghikayat ng Masigasig na Pag-aaral

Tulungan ang mga mag-aaral na maging responsable sa kanilang pagkatuto.

Kasanayan

Iwasan ang tendensiyang sagutin ang bawat komento at tanong at anyayahan ang klase na sumagot.

Ipaliwanag

Ang mga guro ay maaaring mag-anyaya ng masigasig na pag-aaral sa pamamagitan ng paggawa ng huwaran kung saan tumutugon ang mga estudyante sa isa’t isa sa isang silid-aralan sa halip na sa guro o bago magkomento ang guro. Kapag binibigyan ng mga guro ang mga estudyante ng pagkakataong ibahagi ang kanilang mga saloobin sa mga komento at tanong ng mga kaklase, nananatiling nakatuon ang pokus sa mga mag-aaral at mas nagiging kaengga-engganyo ang mga talakayan dahil nadaragdagan ang partisipasyon ng mga estudyante. Ang isang paraan para maisagawa ang huwarang ito ay sa pamamagitan ng pagtatanong ng mga bagay na nagtutulot sa mga estudyante na ibahagi ang kanilang mga iniisip at impresyon sa sinabi ng iba, sa halip na sa guro o bago magkomento ang guro.

Ipakita

Narito ang ilang halimbawa ng maaari mong itanong para maanyayahan ang klase na ibahagi ang kanilang mga naisip tungkol sa komento o tanong ng isang estudyante:

Sino ang maaaring magbahagi ng isang karanasan na may kaugnayan sa sinabi ni Gary?
Ano ang ikinagulat o hinangaan ninyo sa komento ni Lucinda?
Sino ang makapagpapatotoo sa sinabi ni Peter?
Ano ang maibabahagi ninyo tungkol sa natutuhan ninyo nang pag-isipan ninyo ang tanong na iyon?

Mag-klik dito upang mapanood ang video tungkol dito.

1:4

Magpraktis

Para sa bawat isa sa mga sumusunod na sitwasyon, sa halip na magbigay ng komento sa tanong o komento ng estudyante, pumili ng isa sa mga halimbawang tanong o sa sarili mong mga tanong na itatanong sa klase.

Sa oras ng klase, itinanong ni Amy ang sumusunod: “Paano ko malalaman kung ang isang ideya ay isang pahiwatig o kung ito ay sarili kong iniisip?”
Sa isang lesson sa Lumang Tipan, sinabi ni Kyle, “Sa palagay ko kamangha-mangha na makita na inaanyayahan ng Panginoon ang Israel na magsisi at bumalik sa Kanya, sa kabila ng maraming beses nilang pagtalikod sa Kanya.”
Isipin ang isang komento o tanong mula sa isang estudyante sa isang klase kamakailan. Gamit ang kasanayang ito, paano ka tutugon?

Talakayin o Pagnilayan

Isipin kung paano ka karaniwang tumutugon kapag nagkomento sa klase ang isang estudyante.
Anong magagandang resulta ang maaari mong maranasan kapag tinulungan mo ang mga estudyante na tumugon sa isa’t isa sa halip na magkomento ka agad o bago ka magbigay ng komento?

Isama

Habang inihahanda mo ang susunod mong lesson, pumili ng ilan sa mga halimbawang tanong o sa mga tanong na maiisip mo, upang mabigyan ng pagkakataon ang mga estudyante na sumagot sa isa’t isa.

Gusto Mo Bang May Matutuhan Pa?

“Tinulungan ng Tagapagligtas ang Iba na Maging Responsable sa Kanilang Pag-aaral” sa “Maghikayat ng Masigasig na Pag-aaral,” Pagtuturo sa Paraan ng Tagapagligtas (2022), 24–25
Gabi Kasama ang Isang General Authority—Elder Bednar Talakayan (video), ChurchofJesusChrist.org

Kasanayan

Magpokus sa kung ano ang magagawa ng mag-aaral sa klase na karaniwang ginagawa ng guro.

Ipaliwanag

Ang mga estudyante ay maaaring maging responsable sa kanilang pag-aaral sa klase sa pamamagitan ng paggawa ng mga bagay na karaniwang ginagawa ng guro. Sa paghahanda ng lesson, ang mga guro ay maaaring:

Tingnan ang isang scripture block na ituturo nila sa hinaharap.
Isipin ang kurikulum at ilan sa mga bagay na maaaring karaniwan nilang ginagawa habang itinuturo nila ang scripture block na ito (halimbawa: magtanong, mamuno sa talakayan, magsulat sa pisara, magbahagi ng mga ideya, at iba pa).
Itanong, “Ano ang maaari kong ipagawa sa mga estudyante sa klase na karaniwan kong ginagawa?”
Magtala ng mga impresyon sa lesson plan at gawin ang mga ito sa oras ng klase.

Ang paggawa nito ay nagbibigay ng mas maraming pagkakataon para maging aktibong kalahok ang mga mag-aaral sa proseso ng pag-aaral, na maaaring magpadali sa mas malalim na espirituwal na paglago.

Ang mga ipinakita at mga praktis sa ibaba ay pangkalahatang mga halimbawa. Ang training ay magiging mas epektibo kung ang mga ipinakita at mga praktis ay nauugnay sa susunod na mga lesson na tatalakayin sa kurikulum.