Pagpalambo sa mga Kahanas sa Magtutudlo
Awhaga ang mga tigkat-on sa pag-ila sa Manluluwas pinaagi sa pagtuon sa ebanghelyo sa matag adlaw—tumong sa pagtuon.

“Awhaga ang mga tigkat-on sa pag-ila sa Manluluwas pinaagi sa pagtuon sa ebanghelyo sa matag adlaw—tumong sa pagtuon,” Pagpalambo sa mga Kahanas sa Magtutudlo: Pagdapit og Makugihon nga Pagkat-on (2023)

“Awhaga ang mga tigkat-on sa pag-ila sa Manluluwas pinaagi sa pagtuon sa ebanghelyo sa matag adlaw—tumong sa pagtuon,” Pagpalambo sa mga Kahanas sa Magtutudlo: Pagdapit og Makugihon nga Pagkat-on

Awhaga ang mga tigkat-on sa pag-ila sa Manluluwas pinaagi sa pagtuon sa ebanghelyo sa matag adlaw—tumong sa pagtuon.

Kahanas

Tabangan ang mga estudyante sa paghimo og tumong sa matag adlaw nga pagtuon sa kasulatan.

Ipasabot

Ang pagtabang sa mga estudyante sa pag-ugmad og batasan sa pagtuon sa mga kasulatan matag adlaw motugot sa Ginoo sa pagtudlo, pagpalig-on, ug paggiya kanila sa mga paagi nga ilang gikinahanglan. Makaabag ka sa mga estudyante pinaagi sa pagtabang kanila nga makahimo og matag adlaw nga tumong sa kasulatan. Epektibo kining mahimo pinaagi sa pagtabang sa mga estudyante nga:

  • Makasabot sa gisaad nga mga panalangin nga may kalabotan sa matag adlaw nga pagtuon sa kasulatan,

  • Magmainampoon sa pagtakda og tumong sa inadlaw nga pagtuon sa kasulatan,

  • Makahukom kon kanus-a ug asa magtuon sa mga kasulatan sa matag adlaw, ug

  • Makahukom sa usa ka pamaagi nga gamiton sa pagtuon sa kasulatan.

Mahimo kining buhaton sa sinugdanan sa usa ka termino ug rebyohon pag-usab kon gikinahanglan aron matabangan ang mga estudyante nga mopadayon sa pag-uswag.

Modelo

Aniay pipila ka ehemplo kon unsaon nga matabangan nimo ang mga estudyante sa pagtakda og mga tumong sa matag adlaw nga pagtuon sa kasulatan samtang maninguha sila sa pagtuon sa kasamtangang tuig nga basahon sa kasulatan sa matag adlaw:

  • Pangutan-a ang mga estudyante sa paghunahuna kon unsa nga mga panalangin ang ilang nasinati pinaagi sa pagtuon sa mga kasulatan matag adlaw.

  • Dapita ang mga estudyante sa pagsiksik sa mga kasulatan o mga pakigpulong sa kinatibuk-ang komperensiya alang sa mga saad kabahin sa mga panalangin nga moabot gikan sa pagtuon sa pulong sa Dios.

  • Pahinumdomi ang mga estudyante nga magmainampoon sa pagtakda og tumong sa matag adlaw nga pagtuon sa kasulatan. Patinguhaa sila sa giya sa Ginoo sa unsay ilang labing gikinahanglan ug kon unsaon nila sa pagpalambo sa ilang kanhi nga mga paningkamot samtang magpadayon sila sa pagkat-on ug pag-uswag.

  • Tabangi sila sa pagtakda og matag adlaw nga tumong kon kanus-a ug asa magtuon pinaagi sa pag-awhag kanila sa pagpamalandong sa ilang kasamtangang matag adlaw nga naandang mga buluhaton. Dapita sila sa paghunahuna og oras ug dapit alang sa matag adlaw nga pagtuon diin sila mahimong alerto, mabinantayon, ug nakatutok.

  • Tabangi ang mga estudyante nga makahukom kon unsa nga paagi nga sila ganahan nga magtuon sa kasamtangang tuig nga basahon sa kasulatan. Awhaga sila sa paghunahuna og nagkadaiyang mga pamaagi sa pagtuon. Dapita sila sa pagtakda og piho nga tumong, nga magpahinumdom kanila nga kini nga mga tumong mahimong ipahiangay ug ipahaom samtang sila magpadayon.

Iklik dinhi aron makakita og bidyo niini nga modelo.

2:25

Pagpraktis

Gamita ang usa o dugang pa sa mosunod nga mga binuhatan aron mapalambo ang imong abilidad sa pagtabang sa mga estudyante sa pagtakda og mga tumong sa matag adlaw nga pagtuon sa kasulatan:

  • Personal nga irebyo ang pipila sa gisaad nga mga panalangin nga may kalabotan sa pagtuon sa mga kasulatan matag adlaw. Kini makita diha sa mga kasulatan mismo o diha sa mga mensahe sa mga pakigpulong sa kinatibuk-ang komperensiya. Pagpili og usa niini nga mga saad nga ipakigbahin sa mga estudyante samtang magplano ka sa pagdapit kanila sa pagdiskobre sa mga saad sa ilang kaugalingon sa umaabot nga leksiyon.

  • Hunahunaa kon unsaon nimo pagdapit ang mga estudyante nga magmainampoon sa pagtakda og tumong sa inadlaw nga pagtuon sa kasulatan. Pagsulat og usa o duha ka pangutana nga mahimo nimong ipangutana sa mga estudyante nga makatabang kanila sa pagdapit sa Ginoo sa ilang pagtakda og tumong.

  • Praktisa ang pagdapit sa mga estudyante sa paghukom kon kanus-a ug asa magtuon sa mga kasulatan matag adlaw. Pagsulat og usa ka pangutana nga mahimo nimong ihangyo sa mga estudyante nga hunahunaon nga maghatag og tubag sa matag adlaw nga eskedyul, pagkamabinantayon, ug pagwala sa mga makabalda.

  • Praktisa ang pagtabang sa mga estudyante sa pagpili og pamaagi sa pagtuon sa kasulatan pinaagi sa paghatag kanila og mga kapilian ug paghisgot sa mga kaayohan sa matag usa. Praktisa ang paghulagway sa pipila niini nga mga pamaagi alang sa mga estudyante aron makakita sila kon unsaon nila sa pagpahiangay ang ilang kaugalingon nga pagtuon aron labing maayo nga matubag ang ilang mga panginahanglan samtang maninguha sila sa pagtuon sa kasamtangang tuig nga basahon sa kasulatan sa matag adlaw.

Hisgoti o Pamalandongi

Pamalandongi kon unsa ang imong nakat-onan gikan niini nga kasinatian. Tingali marekord nimo ang pipila niini nga mga hunahuna diha sa usa ka journal sa pagtuon. Ikonsiderar ang mosunod nga mga pangutana:

  • Unsay akong nabuhat kaniadto sa pagtabang sa mga estudyante sa pagtakda og mga tumong sa pagtuon sa kasulatan?

  • Unsay akong nakat-onan gikan niini nga kasinatian nga makapalambo sa akong abilidad sa pagtabang kanila sa pagtakda og mga tumong sa pagtuon sa kasulatan?

  • Unsaon nako sa pagtabang ang akong mga estudyante nga mahimong makanunayon sa ilang tumong sa pagtuon sa kasulatan?

Iapil

  • Mainampoon nga motan-aw sa imong mga tahas sa klase samtang maghunahuna sa mga ehemplo diha sa modelo ug sa pagpraktis nga mga seksiyon niini nga pagbansay. Hunahunaa kon unsa nga mga ehemplo ang labing maayo nga makatabang sa imong mga estudyante nga maghimo og tumong sa pagtuon sa kasulatan. Gamit ang usa sa mga ehemplo o usa nga imoha, pagsugod sa usa ka gamay nga kausaban nga makatabang sa imong mga estudyante nga makaugmad og nindot nga kinaiya sa inadlaw nga pagtuon sa kasulatan. Pagtakda og panahon kon kanus-a ka kanunay nga maka-follow up aron makita kon kumusta kini ug tabangi sila sa pag-usab sa ilang tumong kon gikinahanglan.

Gusto pa og Dugang?

Kahanas

Paghimo og mga pangutana nga makatabang sa mga tigkat-on nga makakonektar sa unsay ilang nakat-onan sa ilang personal ug pamilya nga pagtuon sa kasulatan ngadto sa kasinatian sa lawak klasehanan.

Ipasabot

Ang pagkonektar mao ang pagdala o paghiusa sa duha ka butang. Samtang ang mga magtutudlo motabang sa mga tigkat-on nga makakonektar sa ilang pagtuon sa kasulatan sa panimalay ngadto sa lawak klasehanan, sila nagdala o naghiusa niining duha ka kasinatian. Adunay daghang paagi sa pagbuhat niini. Usa ka paagi mao ang paggamit og mga pangutana nga dili limitado ang tubag nga (1) naglakip sa personal o pamilya nga mga kasinatian sa mga estudyante sa ilang pagtuon sa kasulatan sa panimalay, (2) mosuhid kon sa unsa nga paagi kadto nga mga kasintian mokonektar sa unsay ilang nakat-onan diha sa klase, ug (3) mohatag kanila og panahon sa pagpamalandong ug paghinumdom sa unsay ilang natun-an sa panimalay.

Mahimo usab kang mag-andam og mga pangutana nga pagahisgotan sa klase nga motabang sa mga estudyante sa pagkuha sa unsay ilang nakat-onan diha sa lawak klasehanan ug gamiton kini diha sa panimalay. Kini nga mga pangutana susama. Dapiton nimo ang mga estudyante sa paghunahuna kon unsa ang ilang mga kasinatian sa pagkat-on diha sa klase nianang adlawa ug sa unsa nga paagi kini mahimong mapuslanon sa panimalay. Kini nga mga pangutana makatabang kanato nga mahimong mas nakasentro sa panimalay ug gisuportahan sa Simbahan diha sa lawak klasehanan ug andamon ang mga estudyante nga makabaton og dugang pa nga mga kasinatian sa pagkat-on sa gawas sa lawak klasehanan.

Modelo

Mga pangutana nga mokonektar sa pagkat-on diha sa panimalay ngadto sa mga kasinatian diha sa lawak klasehanan:

  • Unsa ang inyong nakat-onan sa klase karon nga konektado sa unsay inyong nakat-onan sa panimalay?

  • Unsay inyong nakat-onan ug sa inyong pamilya mahitungod ni Jesukristo niini nga semana?

  • Unsa nga mga pangutana ang miabot kaninyo samtang kamo naghisgot niini nga mga kasulatan?

  • Unsa ang paborito nga butang nga inyong nakat-onan samtang kamo o ang inyong pamilya nagtuon niini nga mga tudling sa kasulatan?

Mga pangutana nga mokonektar sa pagkat-on diha sa lawak klasehanan ngadto sa mga kasinatian sa panimalay:

  • Unsa ang inyong nakat-onan karon nga mahimong usa ka panalangin nganha kaninyo ug sa inyong pamilya?

  • Kon nag-andam kamo og lima ka minuto nga leksiyon bahin niini nga mga kamatuoran, unsa ang inyong tutokan, ug ngano?

  • Unsa nga mga kasinatian nga nabatonan ninyo karon nga mahimong mapuslanon alang sa inyong pamilya? Unsa ang inyong usbon o lahi nga buhaton aron mapahiangay sa mga panginahanglan sa inyong pamilya?

Iklik dinhi aron makakita og bidyo niini nga modelo.

3:6

Pagpraktis

Pagpraktis #1: Gamit ang mga ehemplo diha sa modelo (o usa ka ehemplo nga imong kaugalingon), tinoa kon unsaon nimo sa pagkonektar sa unsay nasinati sa mga estudyante sa ilang pagtuon diha sa panimalay ngadto sa unsay ilang nasinati diha sa klase base sa mosunod nga ehemplo nga mga leksiyon.

Pagpraktis #2: Paghimo og usa ka pangutana aron sa pagkonektar sa unsay gibuhat sa mga estudyante diha sa lawak klasehanan ngadto sa ilang mga kasinatian sa panimalay, base sa mosunod nga ehemplo nga mga leksiyon.

Hisgoti o Pamalandongi

  • Unsa ang imong nakat-onan mahitungod sa pagdapit og makugihon nga pagkat-on pinaagi niini nga kasinatian?

  • Unsa ang ubang mga paagi nga ikaw nakakonektar sa unsay nasinati sa mga estudyante sa ilang pagtuon diha sa panimalay ngadto sa unsay ilang nasinati sa klase?

Iapil

Paggahin og tulo ka minuto sa dili pa ang klase matag adlaw sa sunod nga duha ka semana sa pagtan-aw sa ngalan sa usa ka estudyante diha sa imong lista. Samtang imong makita ang iyang ngalan, pamalandongi kon unsa kaha ang iyang gikat-onan diha sa personal ug pamilya nga pagtuon diha sa panimalay. Atol sa klase, pangutan-a ang klase o kana nga indibidwal nga estudyante sa usa sa mga pangutana nga imong gipraktis. Mahimo usab nimong isulat ang unsay imong makat-onan samtang ikaw mangutana ug maminaw.

Gusto pa og dugang?