Ngaahi Tefitoʻi Moʻoni ʻo e Faiako Hangē ko Kalaisí: Fakaafeʻi ʻa e Ako Fakamātoató

Fakaafeʻi ʻa e kau akó ke nau teuteu ke ako.

Pōtoʻi Ngāué

Faʻu ha ngaahi fakaafe ʻe tokoni ki he kau akó ke nau teuteu ki he aʻusia fakaako hokó.

fefine ʻoku teuteu lēsoni

Fakamatalaʻi

Hili hono akoʻi ʻe he Fakamoʻuí ha niʻihi ʻo ʻEne kau muimui ʻi he ongo ʻAmeliká, naʻá Ne fakaafeʻi kinautolu ke “teuteu [honau] ʻatamaí ki he ʻapongipongí, pea te [Ne] toe haʻu kiate [kinautolu]” (3 Nīfai 17:3). Ko hono fakaafeʻi ʻo e kau akó ke teuteu ke akó ko ha konga mahuʻinga ia ʻo hono tokoniʻi kinautolu ke nau ʻiloʻi ʻa e moʻoní ʻiate kinautolu pē (vakai, Siosefa Sāmita—Hisitōlia 1:20). ʻOku ʻomi ʻe he ngaahi fakaafe ko ʻení ha faingamālie ki he kau akó ke nau maʻu ha aʻusia ʻi ha potufolofola pe moʻoni kimuʻa pea nau omi ki he kalasí. ʻOku hoko ʻa e ngaahi fakaafe ke teuteú ʻi ha ngaahi founga kehekehe. Ko ha ngaahi sētesi ia ʻoku faʻa nounou mo faingofua pē ʻoku kau ai ʻa e:

• Potufolofola pe moʻoni ʻe aleaʻi ʻi he lēsoni ka hoko maí.

• Founga ke femoʻuekina ai ʻa e kau akó ʻi he folofola ʻa e ʻOtuá. Hangē ko ʻení, ʻe lava ke ako, fakaʻaongaʻi, talanoa, pe ʻeke mo fakalaulauloto ʻa e kau akó ki he ngaahi fehuʻi fekauʻaki mo e meʻa te nau akó.

ʻE lava ke ueʻi fakalaumālie koe ʻe he Laumālie Māʻoniʻoní lolotonga hoʻo teuteu lēsoní mo e aʻusia fakaakó ʻaki ʻa e ngaahi fakaafe ʻe lava ke tokoni lelei taha ki he kau akó ke nau mateuteu ke akó. ʻOku faʻa fakakau ʻi he ngaahi naunau fakalēsoní ʻa e faʻahinga fakaafe ko ʻení.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

1. ʻOku loto ʻa Sisitā Menitisi ke tokoniʻi ʻene kau akó ke nau ongoʻi ha ʻamanaki lelei ʻi heʻenau ako ʻa e 2 Tīmoté. ʻOkú ne faʻu ʻa e fakaafé ʻo pehē: “ʻI hoʻo ako ʻa e 2 Tīmoté ʻi he uike ní, kumi ha ngaahi veesi ʻokú ne ʻoatu ha ʻamanaki lelei ʻo fakafou ʻia Sīsū Kalaisi pea vahevahe mo ha taha kehe ha meʻa naʻá ke ako.”

2. ʻOku teuteu ʻa Brother Palatisoa ke faiako fekauʻaki mo e ngāue tokoní ʻo fakaʻaongaʻi ʻa e malanga ʻa e Tuʻi ko Penisimaní. ʻOkú ne teuteuʻi ʻa e fakaafé ʻo pehē: “Kumi ha founga ke tokoniʻi ai ha taha ʻi he uiké ni pea omi mateuteu ke vahevahe ʻi heʻetau ako ʻa e Mōsaia 2–4.”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

1. Te ke faiako fekauʻaki mo e ʻulungaanga faka-Kalaisi ʻo e faʻa kātakí ʻi he lēsoni hokó. Faʻu ha fakaafe te ke lava ʻo fai ʻi he kalasi ʻo e ʻaho ní maʻá e kau akó ke nau omi mateuteu ki ai ʻi he taimi hokó.

2. Fili ha potufolofola pe ko ha moʻoni ʻi ha naunau fakalēsoni ka hoko mai pea faʻu ha fakaafe te ne teuteuʻi ʻa e kau akó ke nau akó.

Aleaʻi pe Fakalaulauloto

• Ko e hā ʻokú ke ako fekauʻaki mo hono faʻu ʻo ha ngaahi fakaafe ke tokoni ke ako ʻa e kau akó?

• Ko e hā ha ngaahi founga kuó ke mamata ai ki he tokoni ʻa e teuteu ʻa e tokotaha akó ki ha aʻusia fakaakó?

Fakakau

• Fai ha fakaafe ʻi ha lēsoni ʻi he kahaʻú maʻá e kau akó ke nau fai ha meʻa ʻi tuʻa ʻi he kalasí ke teuteu ki he aʻusia fakaako hokó. Vakaiʻi ʻa e meʻa naʻá ke ako ʻi heʻene ʻosí. Fekumi ki ha fakamatala tokoni mei hoʻo kau akó ke hokohoko atu hono fakaleleiʻi ʻa e ngaahi fakaafe ʻokú ke ʻoangé.

Fie Ako Lahi Ange?

• “Ko e Hā Ha Founga Te u Tokoni Ai ki he Kakaí ke Nau Fakahoko mo Tauhi ʻEnau Ngaahi Tukupaá?,” Malangaʻaki ʻEku Ongoongoleleí: Ko ha Fakahinohino Ki he Ngāue Fakafaifekaú (2018), 233-42

• “Naʻe Fakaafeʻi ʻe he Fakamoʻuí ʻa e Niʻihi Kehé ke Nau Teuteu ke Ako,” Ko e Faiako ʻi he Founga ʻa e Fakamoʻuí (2022), 25

• Jan E. Newman, “Ko e Faiako ‘i he Founga ‘a e Fakamo‘uí,” Liahona, Mē 2021, 16–19

Pōtoʻi Ngāué

Faʻu ha fakaafe mahuʻingamālie ʻoku fekauʻaki mo e ola ʻo e lēsoní ke fakaʻaongaʻi ʻi he kamataʻanga ʻo e lēsoni takitaha.

tokotaha ako ʻoku tohi ʻi he palakipoé

Fakamatalaʻi

ʻOku mahuʻinga ʻa e teuteu ke akó ki hono ako ʻo e ongoongoleleí. Ko e founga lelei ʻe taha ʻe lava ke tokoni ai ʻa e kau faiakó ki hono teuteuʻi ʻenau kau akó ko hono faʻu ha fakaafe mahuʻingamālie ke fakaʻaongaʻi ʻi he kamataʻanga ʻo ha lēsoni. Lolotonga hoʻo teuteú, fakakaukau ki hoʻo kau akó pea mo e meʻa ʻokú ke ʻamanaki ʻe hoko ko ha ola ʻo e lēsoní. Fakalaulauloto pe ko e hā ha fakaafe te ne teuteuʻi lelei taha kinautolu ke ngāue mo ako ʻi he lolotonga ʻo e lēsoní ke aʻusia ʻa e olá pea hiki ia ʻi hoʻo palani lēsoní. ʻE lava ke fakatupulaki ʻe hono faʻu ʻo e ngaahi fakaafe ko ʻení ʻa e malava ʻa e kau akó ke aʻusia ʻa e olá pea lava ke poupouʻi ʻa e fevahevaheʻaki ʻi he faʻa fakakaukaú.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

• ʻE akoʻi ʻe Brother Fenanitesi ʻa e tefitoʻi moʻoni ʻo e talangofuá. ʻOkú ne fie tokoni ki heʻene kau akó ke nau ʻiloʻi ʻoku maʻu ʻa e ngaahi tāpuakí koeʻuhí ko e talangofuá. ʻI heʻene teuteú, ʻokú ne hiki ʻa e fakaafe ko ʻení: “ʻI heʻetau fakahoko ʻa e lēsoní, fekumi ki he ngaahi tefitoʻi moʻoni ʻo e talangofuá mo e ngaahi tāpuaki ʻoku fekauʻaki mo iá pea hiki ia ʻi hoʻo tohinoá.”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

Faʻu ha fakaafe mahuʻingamālie ʻoku fekauʻaki mo e ola ʻo e lēsoní ke fakaʻaongaʻi ʻi he kamataʻanga ʻo e ngaahi lēsoni ko ʻení:

• ʻOkú ke akoʻi ʻa e 3 Nīfai 28, pea ko e ola ʻokú ke ʻamanaki ki aí, ʻe ongoʻi ʻe he kau akó ha holi lahi ange ke ʻomi ʻa e niʻihi kehé kia Sīsū Kalaisi.

• Ko hoʻo lēsoni hokó.

Aleaʻi pe Fakalaulauloto

• Mei he meʻa ʻokú ke ako ʻi hoʻo akoakó, ko e hā ha ngaahi tuʻunga ʻo ha fakaafe mahuʻingamālie?

• Ko e hā ha ngaahi ola lelei ʻe ala aʻusia ʻe hoʻo kau akó ʻi hoʻo tokoni ke nau ngāueʻi ha ngaahi fakaafe mahuʻingamālie ʻi he kamataʻanga ʻo e lēsoni takitaha?

Fakakau

• Fakaʻaongaʻi ʻi he kalasí ʻa e fakaafe naʻá ke teuteu ʻi he akoakó.

• ʻI hoʻo teuteu ha toe ngaahi lēsoní ʻe lava fēfē ke hokohoko atu hoʻo fakaʻaongaʻi ʻa e sīpinga ko ʻení?

Fie Ako Lahi Ange?

• “Naʻe Fakaafeʻi ʻe he Fakamoʻuí ʻa e Niʻihi Kehé ke Nau Teuteu ke Ako,” ʻi he “Fakaafeʻi ʻa e Ako Fakamātoató,” Ko e Faiako ʻi he Founga ʻa e Fakamoʻuí (2022), Gospel Library