Ngaahi Tefitoʻi Moʻoni ʻo e Faiako Hangē ko Kalaisí: Fakaafeʻi ʻa e Ako Fakamātoató

Fakaafeʻi ʻa e kau akó ke nau moʻui ʻaki ʻa e meʻa ʻoku nau akó.

Pōtoʻi Ngāué

Palani ke toe vakaiʻi ha ngaahi fakaafe naʻe fai ʻi ha kalasi kimuʻa pea fakaafeʻi ʻa e kau akó ke vahevahe ʻenau ngaahi aʻusia ʻi hono moʻui ʻaki ʻa e meʻa ne nau akó.

Fakamatalaʻi

ʻI hoʻo teuteu ha ngaahi fakaafe ki he kau akó ke nau fakaʻaongaʻi ʻa e meʻa ʻoku nau akó, te ke lava foki ʻo palani ke toe vakaiʻi ʻa e fakaafe ko iá. ʻE lava ke hoko ʻa e ngaahi taimi vakaiʻi ko ʻení ʻi he kamataʻanga ʻo e ngaahi kalasi hoko maí, ʻo fakafou ʻi he ngaahi fetuʻutaki ʻi tuʻa ʻi he kalasí, lolotonga ʻa e ngaahi fakataha lotú, pe ʻi he lotolotonga ʻo e toʻú. Ke palani ha ngaahi taimi muimuiʻi, te ke lava ʻo fehuʻi pē kiate koe:

1. Ko e hā ha fakaafe te u lava ʻo fai te ne fakaʻatā ʻa e kau akó ke vahevahe ʻenau ngaahi aʻusia ʻi hono moʻui ʻaki ha moʻoni ne nau ako ʻi ha kalasi kimuʻa?

2. Ko e fē nai ha taimi lelei ke fakahoko ʻa e toe vakaiʻí?

ʻOku hanga ʻe hono fai ʻo e ongo fehuʻi ko ʻení ʻo fakaafeʻi ʻa e Laumālie Māʻoniʻoní ke ne tataki koe ʻi hoʻo palani ke fakahoko ʻa e toe vakaiʻí. ʻE tokoni ʻa e palani ke toe vakaiʻi ʻa e akó ke nau ongoʻi haʻisia mo fie fakahoko ʻenau ngaahi tukupaá, ʻa ia ʻe lava ʻo tokoni ke iku ki ha ului kia Sīsū Kalaisi.

Fakatātaaʻi

• ʻI hono teuteuʻi ʻe Brother Tolotoni ʻi he faʻa lotu ʻa e aʻusia fakaako hono hokó maʻa ʻene kau akó, ʻokú ne fehuʻi loto pē, “Ko e hā ha fakaafe te u lava ʻo fai te ne fakaʻatā ʻa e kau akó ke vahevahe ʻenau aʻusia ʻi hono moʻui ʻaki ha moʻoni ne nau ako ʻi ha kalasi kimuʻa? Ko e fē nai ha taimi lelei ʻi he kalasi hokó ke fakahoko ʻa e toe vakaiʻí?” ʻOku haʻu kiate ia ʻa e fakakaukau ke ʻoange ha taimi ki he kau akó ʻi he kamataʻanga ʻo e kalasi hokó ke nau tohi ʻi heʻenau tohinoá fekauʻaki mo ʻenau feinga ke ngāueʻi ha moʻoni ne nau ako ʻi he lēsoni fakaʻosí.

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

Akoako ʻeke ʻa e ngaahi fehuʻí ni ʻi hoʻo teuteu hoʻo ngaahi lēsoni ka hokó:

1. Ko e hā ha fakaafe te u lava ʻo fai te ne fakaʻatā ʻa e kau akó ke vahevahe ʻenau ngaahi aʻusia ʻi hono moʻui ʻaki ʻa e ngaahi moʻoni ne nau ako ʻi ha kalasi kimuʻa?

2. Ko e fē nai ha taimi lelei ke fakahoko ai ʻa e toe vakaiʻí?

Aleaʻi pe Fakalaulauloto

• ʻE fakaloloto fēfē ʻe hoʻo toutou muimuiʻí ʻa e ului ʻa e toʻu tupu ʻokú ke akoʻí?

• Ko e hā ha ngaahi founga kuo ʻosi ueʻi fakalaumālie ai koe ʻe he Laumālie Māʻoniʻoní ke tokoni ki he kau akó ke vahevahe ʻenau ngaahi aʻusia ʻi hono moʻui ʻaki ʻa e meʻa kuo nau akó?

• Te ke lava fēfē ʻo faʻu ha tukufakaholo ʻo hono vahevahe ʻe he kau akó ʻenau ngaahi feinga ke moʻui ʻaki ʻa e ongoongoleleí ʻi he kotoa ʻo e kalasí ʻi ha foʻi teemi?

Fakakau

Fokotuʻu ha taimi ke ke ʻeke ai ʻa e ngaahi fehuʻi ko ʻení ko ha konga ʻo hoʻo teuteu lēsoní:

• “Ko e hā ha fakaafe te u lava ʻo fai te ne fakaʻatā ʻa e kau akó ke vahevahe ʻenau ngaahi aʻusia ʻi hono moʻui ʻaki ʻa e ngaahi moʻoni ne nau ako ʻi ha kalasi kimuʻa?”

• “Ko e fē nai ha taimi lelei ke fakahoko ai ʻa e toe vakaiʻí?”

Fie Ako Lahi Ange?

• M. Russell Ballard, “Toe Vakaiʻí,” Liahona, Mē 2014, 78–81.

Pōtoʻi Ngāué

Fai ha ngaahi fehuʻi fekumi ʻe tokoni ki he kau akó ke nau fakakaukau pe ko hai ʻa e ʻOtuá pea mo e ngaahi tāpuaki ʻokú Ne foaki kiate kinautolú.

Fakamatalaʻi

ʻE lava ke tokoniʻi ʻe he kau faiakó ʻa e kau akó ʻi heʻenau holi ke moʻui ʻaki ʻa e meʻa ʻoku nau akó ʻaki hano fai ha ngaahi fehuʻi ʻe tokoni ki he kau akó ke nau fakakaukau pe ko hai ʻa e ʻOtuá pea mo e ngaahi tāpuaki ʻokú Ne foaki kiate kinautolú. ʻOku totonu ke kau ʻi he ngaahi fehuʻi fekumi ko ʻení ha potufolofola mo ha fakaafe ki he tokotaha akó ke ne ʻiloʻi ha ʻulungaanga pe tāpuaki kuo talaʻofa mai ʻe he ʻOtuá. ʻOku totonu ke ʻeke ange kiate kinautolu kimuʻa pea nau lau ʻa e potufolofolá. Ko e lahi ange hono ʻiloʻi ʻe he kau akó ʻa e ʻOtuá mo e meʻa ʻokú Ne foaki maí, ko e lahi ange ia ʻenau loto-fiemālie ke ngāué.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

• Ko e hā ha ngaahi tāpuaki kuo talaʻofa mai ʻokú ke vakai ki ai ʻi he Tokāteline mo e Ngaahi Fuakava 19:16–19 ʻokú ne ueʻi koe ke ke muimui ʻia Sīsū Kalaisi?

• ʻI hoʻo ako ʻa e Sione 14:6, ko e hā ʻokú ke ako fekauʻaki mo Sīsū Kalaisi ʻokú ne tokoniʻi koe ke ke maʻu ha loto-falala ki he meʻa ʻokú Ne talaʻofa maí?

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

ʻI he ngaahi potufolofola ko ʻení, hiki ha fehuʻi fekumi ʻe tokoni ki he kau akó ke nau fakakaukau pe ko hai ʻa e ʻOtuá pea mo e ngaahi tāpuaki ʻokú Ne foaki kiate kinautolú:

• Mōsese 1:1–6

• Saame 23:1–2

• Ko ha potufolofola mei hoʻo lēsoni hokó

Aleaʻi pe Fakalaulauloto

• Ko e hā ʻokú ke ako ʻi hoʻo akoako fakahoko ʻa e ngaahi fehuʻi fekumi ko ʻení?

• Ko e fē feituʻu ʻi he folofolá ʻokú ke vakai ai ki he kakaí ʻoku nau ngāue ʻi he tui koeʻuhí ko e meʻa ʻoku nau ʻilo fekauʻaki mo e ʻOtuá mo ʻEne ngaahi talaʻofá?

Fakakau

• ʻI he ngaahi uike ka hokó, kumi ha faingamālie ke fakaʻaongaʻi ʻa e faʻahinga fehuʻi fekumi ko ʻení ʻo ʻoua naʻa toe siʻi hifo ʻi he tuʻo tahá ʻi he lēsoni takitaha ʻokú ke akoʻí.

Fie Ako Lahi Ange?

• 1 Nīfai 3:7 (Koeʻuhí ko e meʻa naʻe ʻilo ʻe Nīfai fekauʻaki mo Sīsū Kalaisí, naʻá ne maʻu ha loto-falala ke ʻalu ʻo fakahoko ʻa e ngāué.)

• Siosefa Sāmita Hisitōlia 1:13 (naʻe ʻiloʻi ʻe Siosefa Sāmita te ne lava ʻo kole ki he ʻOtuá ʻi he taimi naʻá ne fakakaukau ai ki he meʻa ʻe lava ke fai ʻe he ʻOtuá maʻaná.)