Ngaahi Tefitoʻi Moʻoni ʻo e Faiako Faka-Kalaisí: ʻOfa ʻi he Niʻihi ʻOkú ke Akoʻí

Vakai ki he kau akó ʻi he founga ʻoku ʻafioʻi ai kinautolu ʻe he ʻOtuá.

Pōtoʻi Ngāué

Ako ʻa e ngaahi pōpoaki fakaepalōfita kimui ní ke mahino ʻa e founga ʻoku ʻafio mai ai ʻa e Tamai Hēvaní ki he kakai kei talavoú.

Fakamatalaʻi

Naʻe akoʻi ʻe ʻEletā Teili G. Lenilani, “Ko e founga lelei taha ke tau tokoniʻi ai e niʻihi kehé, ko e pau ko ia ke tau vakai kiate kinautolu ʻi he fofonga … [ʻo e] Tamai Hēvaní.” (“ʻI he Fofonga ʻo e ʻOtuá,” Liahona, Nōvema 2015, 94). Ko e kau palōfita moʻuí ko ha kau tangata kuo ueʻi fakalaumālie pea ui kinautolu ke nau lea maʻá e ʻEikí. ʻI he mahino kiate koe ʻa e meʻa ʻoku akoʻi ʻe he kau palōfitá fekauʻaki mo e toʻu tupu ʻo e ʻaho ní, te ke lava ʻo vakai ki hoʻo kau akó ʻi he fofonga ʻo e ʻOtuá mo ʻiloʻi lelei ange ʻa e founga ke tokoniʻi ai kinautolu ʻi ha faʻahinga taimi pē. Ko e founga ʻe taha ke fai ai ʻení ko hono ako ʻi he faʻa lotu ʻa e ngaahi pōpoaki fakaepalōfitá ke ʻiloʻi ʻa e tali ki he ngaahi fehuʻi hangē ko ʻení:

• Ko e hā ʻoku akoʻi ʻe he kau palōfitá mo e kau ʻaposetoló fekauʻaki mo e tuʻunga ʻo e toʻu tupú?

• Ko e hā ʻoku kole ʻe he kau taki ʻo e Siasí ki he toʻu tupú ke nau faí?

• Ko e hā ʻoku fakahā ʻe he kau palōfitá mo e kau ʻaposetoló fekauʻaki mo e ngaahi ʻamanaki, loto-holi, ongo, mo e finangalo ʻo e ʻEikí ki he kakai kei talavoú?

ʻI hoʻo ako ʻa e ngaahi lea ʻa e kau palōfita moʻuí ke maʻu ʻa e tali ki he ngaahi fehuʻi ko ʻení pe ko ha konga ʻo hoʻo ngaahi fehuʻí, ʻe tupulaki hoʻo mahino ki he founga ʻoku ʻafio mai ai ʻa e ʻOtuá ki he toʻu tupu ʻo e Siasí. ʻI hoʻo vakai lelei ange ki he kau akó ʻi he fofonga ʻo e ʻOtuá, ʻe ueʻi fakalaumālie koe ke ke akoʻi mo feohi mo e toʻu tupú ʻi ha ngaahi founga māʻolunga mo māʻoniʻoni ange.

Fakatātaaʻi

• ʻOku ʻamanaki ke faiako ʻa Sisitā ʻAniteli ʻi hono fuofua taʻu ʻi he ʻinisititiutí. Kimuʻa peá ne feʻiloaki mo ʻene kau akó, ʻokú ne ako ʻa e lea ʻa Palesiteni Nalesoni “Ngaahi Fili ki he Taʻengatá” mo fakalaulauloto ki he fehuʻi “Ko e hā ʻoku fiemaʻu ʻe he palōfita ʻa e ʻEikí ke mahino kiate au fekauʻaki mo e kakai lalahi kei talavou te u akoʻí?” ʻOkú ne vakai lelei ange ki he anga ʻa e ʻafio mai ʻa e Tamai Hēvaní ki heʻene kau akó ʻi heʻene lau ʻa e konga lea: “[Ko e] ʻuluaki mo mahuʻinga tahá, ko e fānau koe ʻa e ʻOtuá. Uá, ʻi hoʻo hoko ko e mēmipa ʻo e Siasí, ko e fānau koe ʻo e fuakavá. Pea tolú, ko ha ākonga koe ʻo Sīsū Kalaisi.”

• Kuo loto-mamahi ʻeni ʻa Brother Miula ʻi he hangē ʻoku ʻikai ke tokanga ʻa e fānau ako ʻi heʻene kalasi seminelí. ʻOkú ne fekumi ki ha tokoni ʻaki hono ako ʻa e ngaahi lea ʻo e konifelenisi lahi fakamuimuitahá ke maʻu ʻa e tali ki he fehuʻi “Ko e hā naʻe vahevahe ʻe he kau taki ʻo e Siasí fekauʻaki mo e ngaahi ʻamanaki, ngaahi holi, ngaahi ongo, mo e ngaahi fiemaʻu ʻa e kakai kei talavoú?” ʻOku fakamālohia ʻene fakakaukau ki heʻene kau akó ʻi heʻene lau ʻa e ngaahi lea ʻa ʻEletā Tieta F. ʻUkitofa: “Siʻoku ngaahi kaungāmeʻa ʻofeina, tuku ke u toe fakaongo atu, kapau naʻe tuʻu ʻi heni e Fakamoʻuí ʻi he ʻahó ni, te Ne fakahaaʻi mai ʻEne ʻofa taʻe fakangatangata ʻiate koé, mo ʻEne falala kakato kiate koé” (“Ko Sīsū Kalaisi ʻa e Mālohinga ʻo e Toʻu Tupú,” Liahona, Nōvema 2022, 12).

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

• Ako ha pōpoaki fakaepalōfita kimuí ni pea kumi ha ngaahi fakakaukau ʻe tokoni ke mahino kiate koe ʻa e founga ʻoku ʻafioʻi ai ʻe he Tamai Hēvaní hoʻo kau akó.

Fakakau

• Hiki ha lisi ʻo e ngaahi lea fakaepalōfita mei he taʻu kuohilí ʻoku tokoni ke ke vakai ki he toʻu tupú ʻi he fofonga ʻo e Tamai Hēvaní.

Aleaʻi pe Fakalaulauloto

ʻOku lava fēfē ʻe hoʻo vakai ki he toʻu tupú ʻi he fofonga ʻo e ʻOtuá ʻo liliu hoʻo tōʻonga kiate kinautolú?

• Ko e hā ha ngaahi fakamatala fakaepalōfita kuó ne tokoniʻi koe ke ke vakai ki he toʻu tupú ʻi he founga ʻoku ʻafioʻi ai kinautolu ʻe he Tamai Hēvaní, pea ko e hā ha faikehekehe kuo hoko kiate koe?

• Ko e hā ha ngaahi fehuʻi kehe te ke ala fakalaulauloto ki ai lolotonga hoʻo ako ʻa e ngaahi pōpoaki fakaepalōfitá ke tokoni ke mahino lelei ange kiate koe ʻa e toʻu tupu ʻo e Siasí?

Fie Ako Lahi Ange?

• Russell M. Nelson, “Ngaahi Fili ki he Taʻengatá” (fakataha lotu fakaemāmani lahi maʻá e kakai lalahi kei talavoú, 15 Mē 2022), ChurchofJesusChrist.org

• Dale G. Renlund, “ʻI he Fofonga ʻo e ʻOtuá,” Liahona, Nōvema 2015, 93–94

• Chad H Webb, “Ko Hono Kau Fakafofongá” (Fakamafola ʻo e ako fakataʻu ʻa e Seminelí mo e ʻInisititiuti Fakalotú, 21 Sānuali 2022), broadcasts.ChurchofJesusChrist.org

Pōtoʻi Ngāué

“Fakakaukau fakasilesitiale” ki hoʻo kau akó ke tokoniʻi koe ke ke vakai kiate kinautolu ʻo hangē ko ia ʻoku fai ʻe he ʻOtuá.

Fakamatalaʻi

Kuo fakaafe mai ʻa Palesiteni Lāsolo M. Nalesoni ke tau “fakakaukau fakasilesitiale” ʻaki ʻetau “fakakaukau fakalaumālie” (“Fakakaukau Fakasilesitiale!,” Liahona, Nōvema 2023, 117). Te ke lava ʻo fakaʻaongaʻi ʻeni mo hoʻo kau akó, pea ʻe lava ʻo tokoni atu ke ke vakai kiate kinautolu ʻo hangē ko e ʻafio mai ʻa e ʻOtuá kiate kinautolú. Ko e founga ʻe lava ke fai ai ʻení ko haʻo fakakaukau ki ha tokotaha ako ʻokú ke ʻiloʻi mo “fakakaukau fakasilesitiale” ʻaki haʻo fehuʻi pē kiate koe, “Ko e hā ʻoku ʻafioʻi mo mahino ki he ʻOtuá fekauʻaki mo e tokotaha ako ko ʻení?” ʻE lava ke fakaʻaongaʻi ʻa e taukei ko ʻení ʻi he taimi kotoa pē ʻokú ke fengāueʻaki ai mo e kau akó pe fakakaukau ki he kau akó.

Fakatātaaʻi

• Hili ha ʻaho lōloa, ʻoku foki ʻa Brother Sāmita ki ʻapi. ʻOku fehuʻi ange ʻe hono uaifí fekauʻaki mo hono ʻahó, pea ʻokú ne fakakaukau ke vahevahe ha tūkunga naʻá ne maʻu mo ha tokotaha ako naʻe ʻikai ke iku lelei. Peá ne fakakaukau leva ki he fakaafe ʻa Palesiteni Nalesoni ke “fakakaukau fakasilesitialé” mo fehuʻi loto pē, “Ko e hā ʻoku ʻafioʻi mo mahino ki he ʻOtuá fekauʻaki mo e tokotaha ako ko ʻení?” ʻOkú ne vahevahe mo hono uaifí, “Naʻá ku foua ha momeniti faingataʻa mo ha tokotaha ako ʻi he pongipongí ni, ka ʻoku ou houngaʻia ʻi heʻeku ʻilo naʻe ʻomi ʻe he Tamai Hēvaní ʻa e talavoú ni ki heʻemau kalasí ke lavameʻa.”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

• Fakakaukau ki ha tokotaha ako ʻokú ke ʻiloʻi pea “fakakaukau fakasilesitiale” fekauʻaki mo ia. Ko e hā ʻoku ʻafioʻi mo mahino ki he ʻOtuá fekauʻaki mo e tokotaha ako ko ʻení?

• Fakakaukau ki ha tokotaha ako kehe ʻokú ke ʻiloʻi pea “fakakaukau fakasilesitiale” fekauʻaki mo ia. Ko e hā ʻoku ʻafioʻi mo mahino ki he ʻOtuá fekauʻaki mo e tokotaha ako ko ʻení?

Aleaʻi pe Fakalaulauloto

• Ko e hā naʻá ke ako ʻi hono akoako fakahoko ʻa e taukei ko ʻení? Ko e hā ʻoku mahuʻinga ai ke vakai ki he kau akó ʻo tatau mo e ʻafio mai ʻa e ʻOtuá kiate kinautolú?

• ʻE tākiekina fēfē nai ʻa e aʻusia fakaakó ʻi hoʻo “fakakaukau fakasilesitiale” maʻu pē ki hoʻo kau akó?

Fakakauʻaongaʻí

• Ko e hā te ke lava ʻo fai ke hoko ʻa e “fakakaukau fakasilesitiale” fekauʻaki mo hoʻo kau akó ko ha tōʻonga moʻuí?

Fie Ako Lahi Ange?

• Russell M. Nelson, “Fakakaukau Fakasilesitiale!,” Liahona, Nōvema 2023, 117–120