« អធិស្ឋានសម្រាប់ពួកគេតាមឈ្មោះពួកគេ » ជំនាញអភិវឌ្ឍន៍គ្រូបង្រៀន ៖ ស្រឡាញ់មនុស្សដែលអ្នកបង្រៀន ( ឆ្នាំ២០២៣ )

« អធិស្ឋានសម្រាប់ពួកគេតាមឈ្មោះពួកគេ » ជំនាញអភិវឌ្ឍន៍គ្រូបង្រៀន ៖ ស្រឡាញ់មនុស្សដែលអ្នកបង្រៀន

គោលការណ៍ទាំងឡាយនៃការបង្រៀនដូចជាព្រះគ្រីស្ទ ៖ ស្រឡាញ់មនុស្សដែលអ្នកបង្រៀន

អធិស្ឋានសម្រាប់ពួកគេតាមឈ្មោះពួកគេ ។

ជំនាញ

អធិស្ឋាន និងទូលសួរអំពីរបៀបដែលអ្នកអាចជួយសិស្សរបស់អ្នក ហើយធ្វើតាមការបំផុសគំនិតមកពីព្រះវិញ្ញាណបរិសុទ្ធ ។

កំណត់និយមន័យ

ការអធិស្ឋានឲ្យសិស្សរបស់អ្នកជាទៀងទាត់ អាចជួយអ្នកឲ្យទទួលអារម្មណ៍នៃសេចក្តីស្រឡាញ់របស់ព្រះកាន់តែខ្លាំងសម្រាប់ពួកគេ ហើយបង្កើនបំណងប្រាថ្នារបស់អ្នកដើម្បីផ្តល់កន្លែងសុវត្ថិភាព ជាកន្លែងដែលពោរពេញដោយការអញ្ជើញ ដែលពួកគេអាចរៀន ។ វាក៏អាចអនុញ្ញាតឲ្យព្រះវរបិតាសួគ៌ជួយអ្នកឲ្យយល់កាន់តែច្បាស់អំពីកាលៈទេសៈ និងសេចក្តីត្រូវការរបស់ពួកគេផងដែរ ។ ទោះបីជាយើងមិនអាចបង្ខំរឿងខាងវិញ្ញាណ ឬចម្លើយចំពោះការអធិស្ឋានក្តី ក៏ការអធិស្ឋានឲ្យសិស្សរបស់យើងអញ្ជើញការណែនាំពីព្រះវិញ្ញាណបរិសុទ្ធ ហើយអាចបង្កើនសមត្ថភាពរបស់យើងដើម្បីជួយពួកគេបានផងដែរ ។ ការធ្វើតាមការបំផុសគំនិតដែលអ្នកទទួលបាន អាចជួយអ្នកឲ្យកែលម្អបទពិសោធន៍រៀនសូត្ររបស់សិស្សម្នាក់ៗ ។ របៀបមួយដែលគ្រូបង្រៀនអាចព្យាយាមបង្កើនសេចក្តីស្រឡាញ់ចំពោះសិស្សរបស់ពួកគេគឺ តាមរយៈការពិចារណាអំពីអ្វីដែលពួកគេបានស្គាល់រួចហើយអំពីសិស្ស ហើយបន្ទាប់មកពិចារណាប្រកបដោយការអធិស្ឋាន និងសួរអំពីរបៀបដែលពួកគេអាចបង្ហាញសេចក្តីស្រឡាញ់កាន់តែច្រើនចំពោះសិស្សនោះ ។ ពេលពួកគេអធិស្ឋានដោយមានគំនិតនោះក្នុងចិត្ត នោះគ្រូបង្រៀនគួរតែព្យាយាមស្វែងរក និងធ្វើតាមការបំផុសគំនិតរបស់ព្រះវិញ្ញាណ ។

គំរូ

ខាងក្រោមនេះគឺជាឧទាហរណ៍មួយចំនួនអំពីរបៀបដែលអ្នកអាចអធិស្ឋាន និងទូលសួរអំពីរបៀបជួយសិស្សម្នាក់ៗ ហើយធ្វើតាមការបំផុសគំនិតមកពីព្រះវិញ្ញាណបរិសុទ្ធ ៖

អ្នកបានសម្គាល់ឃើញថា ចន បានស្ទាក់ស្ទើរក្នុងការចូលរួមក្នុងថ្នាក់នាពេលថ្មីៗនេះ ។ អ្នកទូលសួរព្រះវរបិតាសួគ៌អំពីរបៀបដ៏ល្អបំផុតដែលអ្នកអាចជួយគាត់បាន ។ អ្នកទទួលអារម្មណ៍ថា អ្នកគួរតែនិយាយជាមួយគាត់ ពេលគាត់ចូលមកក្នុងថ្នាក់ ។ អ្នកមានអារម្មណ៍ថា អ្នកគួរតែសួរគាត់ច្រើនអំពីចំណាប់អារម្មណ៍បច្ចុប្បន្នរបស់គាត់ ជាជាងគ្រាន់តែសួរគាត់អំពីមូលហេតុដែលគាត់មិនបានចូលរួមបានច្រើននាពេលថ្មីៗនេះ ។ អ្នកគ្រោងនឹងនិយាយជាមួយគាត់មុនចាប់ផ្តើមថ្នាក់រៀននៅថ្ងៃស្អែកនេះ ។
ម៉ារៀ បានចែកចាយយោបល់ និងទីបន្ទាល់របស់គាត់ជាទៀងទាត់នៅពីរបីសប្តាហ៍មុន ។ មុនពេលរៀនមេរៀនបន្ទាប់ អ្នកបានទូលសួរព្រះវរបិតាសួគ៌អំពីរបៀបដែលអ្នកអាចជួយនាងឲ្យបន្តរីកចម្រើន ។ អ្នកមានគំនិតចង់ចាប់ដៃគូគាត់ជាមួយមិត្តរួមថា្នក់គាត់ពីរបីនាក់ ដែលមិនចែកចាយយោបល់ញឹកញាប់ ឬមានការលំបាកដើម្បីចែកចាយដោយបើកចំហអំពីអារម្មណ៍របស់ពួកគេ ។ នៅក្នុងគម្រោងមេរៀនសម្រាប់ថ្ងៃស្អែក អ្នកបន្ថែមឱកាសចែកចាយមកពីមិត្តរួមថ្នាក់ ។

សូមចុចនៅត្រង់នេះដើម្បីមើលវីដេអូអំពីគំរូនេះ ។

1:40

អនុវត្ត

សូមប្រើការអនុវត្តមួយ ឬច្រើននៃការអនុវត្តខាងក្រោមនេះ ដើម្បីកែលម្អសមត្ថភាពរបស់អ្នក ដើម្បីអធិស្ឋានឲ្យសិស្ស និងធ្វើតាមការបំផុសគំនិតទាំងឡាយ ៖

សូមជ្រើសរើសសិស្សម្នាក់ ដែលអ្នកមានអារម្មណ៍ថា គាត់មិនសូវមានមិត្តភក្តិស្និទ្ធស្នាលច្រើនក្នុងថ្នាក់ ។ សូមអធិស្ឋានអំពីរបៀបដ៏ល្អបំផុតដើម្បីជួយដល់គាត់ ។ សូមដាក់ផែនការធ្វើតាមការបំផុសគំនិតដែលអ្នកទទួលបាន ។
សូមជ្រើសរើសសិស្សម្នាក់ដែលចែកចាយច្រើននៅក្នុងថ្នាក់ ។ សូមអធិស្ឋានឲ្យគាត់ និងអំពីរបៀបដើម្បីបន្តកែលម្អបទពិសោធន៍រៀនសូត្ររបស់សិស្សនោះ ។ សូមធ្វើតាមការបំផុសគំនិតដែលអ្នកទទួលបាន ។
សូមជ្រើសរើសសិស្សម្នាក់ដែលមិនបានមករៀននាពេលថ្មីៗនេះ ។ សូមអធិស្ឋានឲ្យគាត់ ហើយទូលសួរព្រះអម្ចាស់អំពីរបៀបដ៏ល្អបំផុតដើម្បីឈោងទៅជួយ និងជួយសិស្សនោះឲ្យទទួលអារម្មណ៍ថា មានគេស្រឡាញ់ និងត្រូវការគាត់ ។ សូមលើកឡើងអំពីផែនការមួយដែលផ្តោតលើការបំផុសគំនិតដែលអ្នកទទួលបាន សូមសម្រេចចិត្តពីពេលវេលាដែលអ្នកអាចធ្វើតាមផែនការនោះ ហើយធ្វើតាមទាំងស្រុង ។

ពិភាក្សា ឬជញ្ជឹងគិត

សូមពិចារណាអំពីអ្វីដែលអ្នកបានរៀនចេញមកពីបទពិសោធន៍នេះ ។ ប្រហែលអ្នកអាចកត់ត្រាគំនិតមួយចំនួននៅក្នុងសៀវភៅកំណត់ហេតុការសិក្សាបាន ។ សូមពិចារណាសំណួរខាងក្រោម ៖

តើខ្ញុំបានខិតខំប្រឹងប្រែងធ្វើអ្វីខ្លះកាលពីមុនដើម្បីអធិស្ឋានឲ្យសិស្សរបស់ខ្ញុំ ?
តើខ្ញុំបានរៀនអ្វីខ្លះនៅក្នុងដំណើរការនេះ ដែលអាចកែលម្អសមត្ថភាពរបស់ខ្ញុំ ដើម្បីអធិស្ឋានឲ្យសិស្សរបស់ខ្ញុំ និងជួយពួកគេឲ្យកែលម្អបទពិសោធន៍រៀនសូត្ររបស់ពួកគេ ?
តើខ្ញុំនឹងធ្វើអ្វីខ្លះដើម្បីបន្តកែលម្អ ?

រួមបញ្ចូល

សូមដាក់ផែនការសកម្មភាពដើម្បីអធិស្ឋាន និងទូលសួរអំពីរបៀបដែលអ្នកអាចជួយសិស្សរបស់អ្នក ហើយធ្វើតាមការបំផុសគំនិតមកពីព្រះវិញ្ញាណបរិសុទ្ធ ។ អ្នកអាចពិចារណាអំពីជំហានដែលបានផ្តល់ជាយោបល់នៅខាងក្រោមនេះ នៅពេលអ្នកដាក់ផែនការសកម្មភាព ៖

សូមជ្រើសរើស និងផ្តោតលើការអនុវត្តមួយនៃការអនុវត្តទាំងឡាយខាងលើ ។
សូមកំណត់អំពីរបៀបដែលអ្នកនឹងរួមបញ្ចូលការអនុវត្តនោះ ។
សូមដាក់កាលវិភាគដើម្បីរួមបញ្ចូលការអនុវត្តនោះ។
សូមទូលសូមជំនួយពីព្រះវរបិតាសួគ៌ដើម្បីជួយដល់អ្នក ។

តើចង់បានបន្ថែមទៀតទេ ?

នែល អិល អាន់ឌើរសិន « A Classroom of Faith, Hope, and Charity » ( ជំនួបជាមួយនឹងអ្នកមានសិទ្ធិអំណាចទូទៅ ថ្ងៃទី២៨ ខែកុម្ភៈ ឆ្នាំ២០១៤ ) នៅលើគេហទំព័រ broadcasts.ChurchofJesusChrist.org
ឆាដ អេច វិប « Above All Things » ( ការចាក់ផ្សាយអំពីការបំពាក់បំប៉នថ្នាក់សិក្ខាសាលា និងថ្នាក់វិទ្យាស្ថានសាសនាប្រចាំឆ្នាំ ថ្ងៃទី១២ ខែមិថុនា ឆ្នាំ២០១៩ ) នៅលើគេហទំព័រ broadcasts.ChurchofJesusChrist.org
« ស្រឡាញ់មនុស្សដែលអ្នកបង្រៀន » ការបង្រៀនតាមរបៀបរបស់ព្រះអង្គសង្គ្រោះ ( ឆ្នាំ២០១៦ ) ទំព័រ ៦

ជំនាញ

អញ្ជើញសិស្សឲ្យអធិស្ឋានសម្រាប់សិស្សដទៃទៀត ។

កំណត់និយមន័យ

ឱកាសដើម្បីអធិស្ឋានទៅកាន់ព្រះវរបិតាសួគ៌ជំនួសឲ្យអ្នកដទៃ គឺជាទង្វើនៃសេចក្តីជំនឿដែលអំពាវនាវដល់ព្រះចេស្ដានៃស្ថានសួគ៌ កសាងចំណងមិត្តភាពរឹងមាំ និងពង្រឹងសេចក្តីស្រឡាញ់ក្នុងចំណោមសិស្ស និងគ្រូបង្រៀន ។ គ្រូបង្រៀនម្នាក់អាចអញ្ជើញសិស្សឲ្យចងចាំដល់មិត្តរួមថ្នាក់ក្នុងការអធិស្ឋានផ្ទាល់ខ្លួនរបស់ពួកគេ និងក្នុងការអធិស្ឋានបើក ឬបិទនៅក្នុងថ្នាក់រៀន ។ ក្នុងករណីខ្លះ ការអញ្ជើញនេះនឹងត្រូវបញ្ចូលនូវចំណុចជាក់លាក់អំពីបុគ្គលនោះនៅក្នុងការអធិស្ឋាន ។ ក្នុងករណីផ្សេងទៀតដោយគ្រាន់តែនិយាយឈ្មោះរបស់បុគ្គលនោះនៅក្នុងការអធិស្ឋានគឺគ្រប់គ្រាន់ហើយ ។ ការអញ្ជើញទាំងឡាយអាចត្រូវបានផ្ដល់ទុកជាការរំឭក នៅមុនពេលថ្នាក់ចាប់ផ្ដើម ជាការរំឭកឡើងវិញនៅពេលដ៏សមរម្យពេញមួយមេរៀន និងមុនពេលការអធិស្ឋានបិទ ។

( ចំណាំ ៖ អាស្រ័យទៅលើសិស្ស ឬលក្ខណៈសម្ងាត់នៃស្ថានភាពណាមួយ វាអាចមានសារៈសំខាន់ដើម្បីសុំការអនុញ្ញាតសិន មុនធ្វើការអធិស្ឋានសម្រាប់សិស្សជាក់លាក់ណាម្នាក់តាមឈ្មោះ ) ។

គំរូ

មុនពេលការអធិស្ឋានបិទបញ្ចប់ បងស្រី ហ្គរដុន រំឭកសិស្សឲ្យអធិស្ឋានដល់មិត្តរួមថ្នាក់របស់ពួកគេដែលកំពុងធ្វើការប្រឡងចូលមហាវិទ្យាល័យ ដោយនិយាយថា « ដោយមានមិត្តរួមថ្នាក់របស់យើងជាច្រើនដែលធ្វើការប្រឡងចូលមហាវិទ្យាល័យនៅសប្តាហ៍នេះ វាជាពរជ័យដ៏អស្ចារ្យមួយសម្រាប់ពួកគេ ពេលប្អូនៗនឹកចាំពួកគេនៅក្នុងការអធិស្ឋានរបស់ប្អូន » ។
ដេវីឌ បានផ្ញើសារមួយទៅបងប្រុស សានឆេស ថាគាត់មិនបានចូលរួមក្នុងថ្នាក់នៅសប្តាហ៍នេះទេ ដោយសារតែមរណភាពរបស់មនុស្សជាទីស្រឡាញ់ ។ ដោយមានការអនុញ្ញាតមកពី ដេវីឌ បងប្រុស សានឆេស ចាប់ផ្តើមបង្រៀនដោយនិយាយថា « សប្តាហ៍មុននេះ លោកយាយរបស់ ដេវីឌ បានទទួលមរណភាព ។ តើប្អូនៗនឹកចាំដល់ ដេវីឌ និងគ្រួសាររបស់គាត់នៅក្នុងការអធិស្ឋានរបស់ប្អូនៗក្នុងអំឡុងពេលដ៏លំបាកនេះបានទេ ?

សូមចុចនៅត្រង់នេះដើម្បីមើលវីដេអូអំពីគំរូនេះ ។

0:36

អនុវត្ត

សូមប្រើការអនុវត្តមួយ ឬច្រើននៃការអនុវត្តខាងក្រោមនេះ ដើម្បីកែលម្អសមត្ថភាពរបស់អ្នកក្នុងការជួយសិស្សឲ្យមើលឃើញ និងយល់ពីសេចក្តីពិតសម្រាប់ខ្លួនពួកគេ ៖

សិស្សមួយចំនួនមានការព្រួយបារម្ភអំពីព្រឹត្ដិការណ៍ដែលនឹងមកដល់ ។ សូមសរសេរលិខិតអញ្ជើញមួយដែលអ្នកអាចឲ្យទៅសិស្ស ដើម្បីលើកទឹកចិត្តសិស្សឲ្យអធិស្ឋានសម្រាប់មនុស្សដែលមានការព្រួយបារម្ភអំពីព្រឹត្តិការណ៍នេះ ។
សូមគិតដល់សិស្សម្នាក់ ដែលអ្នកដឹងថាកំពុងត្រូវការជំនួយបន្ថែមពីព្រះអម្ចាស់ ។ សូមសរសេរអំពីរបៀបដែលអ្នកអាចអញ្ជើញសិស្សអធិស្ឋានឲ្យសិស្សម្នាក់នោះ ។

ពិភាក្សា ឬជញ្ជឹងគិត

ពេលអ្នកអនុវត្ត តើមានរឿងអ្វីផ្សេងទៀតដែលបានចូលមកក្នុងគំនិតរបស់អ្នក ដែលអាចជួយអ្នកឲ្យពង្រីកការអញ្ជើញទាំងនេះបាន ?
តើអ្នកស្គាល់នរណាម្នាក់ដែលបានទទួលពរជ័យ ដោយសារតែការអធិស្ឋានរបស់អ្នកផ្សេងទៀតនៅពេលណា ?

រួមបញ្ចូល

ក្នុងរយៈពេលពីរបីសប្តាហ៍ខាងមុខនេះ សូមស្វែងរកឱកាសដើម្បីផ្ដល់ការអញ្ជើញទៅកាន់សិស្សដើម្បីឲ្យអធិស្ឋានសម្រាប់មិត្តរួមថ្នាក់របស់ពួកគេ ។ បន្ទាប់មក សូមផ្ដល់ការអញ្ជើញនោះ ។

តើចង់បានបន្ថែមទៀតទេ ?

« ព្រះអង្គសង្គ្រោះបានអធិស្ឋានសម្រាប់អស់អ្នកដែលទ្រង់បានបង្រៀន » នៅក្នុង « ស្រឡាញ់អស់អ្នកដែលអ្នកបង្រៀន » ការបង្រៀនតាមរបៀបរបស់ព្រះអង្គសង្គ្រោះ ( ឆ្នាំ២០២២ ) បណ្ណាល័យដំណឹងល្អ
ដេវីឌ អេ បែដណា « Principle #3 » នៅក្នុង « Pray Always » Liahona ខែវិច្ឆិកា ឆ្នាំ២០០៨ ទំព័រ ៤៣–៤៤