« ព្យាយាមស្គាល់ពួកគេ—យល់ពីកាលៈទេសៈ តម្រូវការ និងចំណុចខ្លាំងរបស់ពួកគេ » ជំនាញអភិវឌ្ឍន៍គ្រូបង្រៀន ៖ ស្រឡាញ់មនុស្សដែលអ្នកបង្រៀន ( ឆ្នាំ ២០២៣ )

« ព្យាយាមស្គាល់ពួកគេ—យល់ពីកាលៈទេសៈ តម្រូវការ និងចំណុចខ្លាំងរបស់ពួកគេ » ជំនាញអភិវឌ្ឍន៍គ្រូបង្រៀន ៖ ស្រឡាញ់មនុស្សដែលអ្នកបង្រៀន

ព្យាយាមស្គាល់ពួកគេ—យល់ពីកាលៈទេសៈ តម្រូវការ និងចំណុចខ្លាំងរបស់ពួកគេ ។

ជំនាញ

សង្កេត និងសួរអំពីចំណាប់អារម្មណ៍របស់សិស្ស ។

កំណត់និយមន័យ

គ្រូបង្រៀនអាចរៀនអំពីស្ថានភាពសិស្សរបស់ពួកគាត់ ហើយស្វែងរកតម្រូវការរៀនសូត្រមួយចំនួនរបស់ពួកគេ តាមរយៈការសង្កេត និងការសួរអំពីចំណាប់អារម្មណ៍របស់ពួកគេ ។ ជារឿយៗ វាស្រួលបំផុតដើម្បីមានការសន្ទនាទាំងនេះពីមុន និងបន្ទាប់ពីការបង្រៀន ប៉ុន្តែការសន្ទនាទាំងនេះក៏អាចធ្វើបានអំឡុងពេលបង្រៀនផងដែរ ។ មានវិធីជាច្រើនដែលគ្រូបង្រៀនអាចធ្វើកិច្ចការនេះបាន ។ គ្រូបង្រៀនអាចសង្កេតមើលសៀវភៅ គម្រោង ស្ទីកគឺ ឧបករណ៍លេងកីឡា ឬអ្វីៗផ្សេងទៀតដែលសិស្សយកមកថ្នាក់រៀន ។ ឬគ្រូបង្រៀនអាចចាំពីព្រឹត្តិការណ៍មួយដែលសិស្សបានចូលរួម ហើយសួរពួកគេអំពីព្រឹត្តិការណ៍នោះ ។ សំណួរដែលយើងសួរនឹងជួយយើងឲ្យស្គាល់សិស្សនោះ និងចំណាប់អារម្មណ៍របស់ពួកគេ ហើយរួមបញ្ចូលនូវឃ្លាដូចជា ៖

« សូមប្រាប់ខ្ញុំបន្ថែមទៀតអំពី … »
« តើប្អូនចូលចិត្តអ្វីខ្លះអំពី … »
« ខ្ញុំចង់ដឹងខ្លាំងអំពី … »

នៅពេលគ្រូបង្រៀនមានភាពស្មោះសរ និងស្មោះត្រង់នៅក្នុងសំណួររបស់ពួកគាត់ នោះពួកគាត់អាចរៀនច្រើនពីស្ថានភាពរបស់សិស្សពួកគាត់ និងដឹងពីតម្រូវការនានា ហើយសិស្សនឹងទទួលអារម្មណ៍ថា គ្រូបង្រៀនរបស់ពួកគេពិតជាមានការខ្វាយខ្វល់ ។ ពេលសិស្សទទួលអារម្មណ៍ថា គ្រូបង្រៀនរបស់ពួកគេខ្វាយខ្វល់ដោយអស់ពីចិត្តចំពោះពួកគេ នោះពួកគេទំនងជាមករៀនដោយត្រៀមខ្លួនដើម្បីរៀន និងចែកចាយការយល់ដឹង និងបទពិសោធន៍របស់ពួកគេជាមួយគ្រូបង្រៀនរបស់ពួកគេ និងអ្នកដទៃទៀតក្នុងថ្នាក់រៀន ។

គំរូ

ហើរម៉ាណា ម៉ូនូស្ស ចាំថា រ៉ូហ្សា មានការប្រកួតបាល់ទាត់មួយដ៏ធំដែល រ៉ូហ្សា មានក្តីបារម្ភជាខ្លាំង ។ ពេលគាត់ឃើញ រ៉ូហ្សា នោះហើរម៉ាណា ម៉ូនូស្ស បានឈប់ ហើយសួរនាងអំពីអារម្មណ៍របស់នាងអំពីការប្រកួតនោះ ។
អូរូ បានដាក់កូនសោរបស់គាត់នៅលើតុ ។ ពេលអ្នកដើរកាត់តុគាត់ នោះអ្នកឃើញទង់ជាតិប្រទេសផ្សេងនៅលើបន្តោងសោរបស់គាត់ ។ អ្នកចង់ដឹងខ្លាំងណាស់ ហើយសួរថា « អូរូ សូមប្រាប់ខ្ញុំបន្តិចអំពីទង់ជាតិដែលនៅលើបន្តោងសោរបស់ប្អូននោះ » ។ អូរូ ចែកចាយថា បងស្រីរបស់គាត់បានទៅបម្រើបេសកកម្មនៅប្រទេសប្រេស៊ីល ហើយគាត់បានទៅទទួលបងស្រីគាត់ជាមួយគ្រួសាររបស់គាត់ នៅពេលបងស្រីរបស់គាត់ចប់បេសកកម្ម ។ អ្នកបន្តការសន្ទនានោះដោយសួរថា « តើប្អូនចូលចិត្តអ្វីខ្លះពេលប្អូនទៅទទួលបងស្រីប្អូន ពេលគាត់ចប់បេសកកម្ម ? »

សូមចុចនៅត្រង់នេះដើម្បីមើលវីដេអូអំពីគំរូនេះ ។

អនុវត្ត

អនុវត្ត #១ ៖ នៅក្នុងរូបភាពនីមួយៗ តើអ្នកឃើញអ្វីខ្លះដែលអាចជួយអ្នកឲ្យរៀនអំពីកាលៈទេសៈ ឬតម្រូវការរៀនសូត្រនៃសិស្សទាំងនេះ ?

រូបភាព

យុវនារីកំពុងលេងបាល់បោះ

រូបភាព

យុវនារីកំពុងលេងអ៊ូកាឡេឡេ

រូបភាព

យុវវ័យកំពុងអង្គុយជារាងពាក់កណ្តាលរង្វង់

អនុវត្ត #២ ៖ តើសំណួរអ្វីខ្លះដែលអ្នកអាចសួរបាន ដើម្បីរៀនបន្ថែមទៀតអំពីចំណាប់អារម្មណ៍របស់សិស្សអ្នក ?

ពិភាក្សា ឬសញ្ជឹងគិត

តើអ្នកបានរៀនអ្វីខ្លះនៅពេលអ្នកបានអនុវត្តការសង្កេត និងការសួរអំពីចំណាប់អារម្មណ៍របស់សិស្ស ?
តើការសង្កេត និងការសួរអំពីចំណាប់អារម្មណ៍របស់សិស្សអាចបង្ហាញថា អ្នកស្រឡាញ់សិស្សរបស់អ្នកដោយរបៀបណា ?

រួមបញ្ចូល

នៅក្នុងថ្នាក់នាសប្តាហ៍នេះ សូមរកមើលឱកាសដើម្បីសួរសិស្សអំពីចំណាប់អារម្មណ៍ ព្រឹត្តិការណ៍ ឬកាលៈទេសៈរបស់ពួកគេ ។ សូមបង្ហាញការខ្វាយខ្វល់ដោយស្មោះត្រង់អំពីអ្វីដែលអ្នករៀនពីពួកគេ ។ ជាលទ្ធផល សូមរកមើលរបៀបដែលវាជះឥទ្ធិពលដល់បទពិសោធន៍រៀនសូត្ររបស់សិស្សនោះ ។ សូមចំណាយពេលប្រាំនាទីបន្ទាប់ពីបង្រៀនចប់ ដើម្បីកត់ត្រានូវអ្វីដែលអ្នកបានរៀនអំពីសិស្សរបស់អ្នក និងរបៀបដែលអាចជួយអ្នកឲ្យបង្កើតបទពិសោធន៍រៀនសូត្រ ដែលដឹកនាំទៅរកការប្រែចិត្តជឿ ការទាក់ទង និងការមានភាពជាចំណែក ។

តើចង់បានបន្ថែមទៀតទេ ?

ឡូរី នូបូល « See the One » ( ការចាក់ផ្សាយអំពីការបំពាក់បំប៉នថ្នាក់សិក្ខាសាលា និងថ្នាក់វិទ្យាស្ថាននៃសាសនាប្រចាំឆ្នាំ នៅថ្ងៃទី ១៣ ខែ មិថុនា ឆ្នាំ ២០១៧ ) នៅលើគេហទំព័រ broadcasts.ChurchofJesusChrist.org
ឆាដ អេច វិប « We Have Not Come This Far to Only Come This Far » ( ការចាក់ផ្សាយអំពីការបំពាក់បំប៉នថ្នាក់សិក្ខាសាលា និងថ្នាក់វិទ្យាស្ថាននៃសាសនាប្រចាំឆ្នាំ នៅថ្ងៃទី ៩ ខែ មិថុនា ឆ្នាំ ២០២០ ) នៅលើគេហទំព័រ broadcasts.ChurchofJesusChrist.org
« Reaching the Individual » ( វីដេអូ ) នៅលើគេហទំព័រ ChurchofJesusChrist.org

ជំនាញ

ឈប់បន្តិច សញ្ជឹងគិត ហើយឆ្លើយសំណួរដែលយើងសួរខ្លួនឯង ដែលអញ្ជើញឲ្យមានស្មារតីដឹងខុសត្រូវ សេចក្តីស្រឡាញ់ និងសេចក្តីអាណិតអាសូរដូចព្រះគ្រីស្ទ នៅក្នុងទំនាក់ទំនងរបស់យើង ។

ការបំពាក់បំប៉ននេះបង្ហាញអំពីជំនាញទាក់ទងបីដំបូង ដែលជួយយើងឲ្យយល់ថា សិស្សអាចឃើញសេចក្តីពិតអស់កល្បជានិច្ច មកពីការសន្និដ្ឋានផ្សេងៗខុសពីយើង ។ នៅពេលយើងយល់កាន់តែច្បាស់ពីសិស្សរបស់យើង នោះយើងនឹងអាចឆ្លើយតបបានកាន់តែច្រើនទៅកាន់ពួកគេដោយសេចក្តីស្រឡាញ់ និងសេចក្តីអាណិតអាសូរ នៅពេលយើងជួយពួកគេឲ្យស្ថាបនាសេចក្តីជំនឿលើព្រះយេស៊ូវគ្រីស្ទ ។

ការបំពាក់បំប៉នទាំងនេះរួមមាន ៖

ការស្វែងរកការសន្និដ្ឋានរបស់សិស្សដោយការឈប់បន្តិច សញ្ជឹងគិត និងឆ្លើយសំណួរនានាដែលយើងសួរខ្លួនឯងទាំងអំឡុងពេលរៀបចំមេរៀន និងនៅពេលយើងផ្តោតលើមតិ ឬសំណួររបស់សិស្សក្នុងថ្នាក់
ការព្យាយាមបញ្ជាក់ និងយល់អំពីចេតនាពិតនៃសំណួរ អារម្មណ៍ និងជំនឿរបស់សិស្ស ព្រមទាំង
ការជួយសិស្សឲ្យពិនិត្យមើល ឬរៀបចំការសន្និដ្ឋានរបស់ពួកគេឡើងវិញដោយមានទស្សនវិស័យដ៏អស់កល្បជានិច្ច ។

ការបំពាក់បំប៉នទីពីរ និងទីបីនឹងត្រូវបំពាក់បំប៉នបន្តបន្ទាប់គ្នា ។

ការបំពាក់បំប៉ននេះនឹងផ្ដោតលើជំនាញដូចតទៅនេះ ៖

ការស្វែងរកការសន្និដ្ឋានរបស់សិស្សដោយការឈប់បន្តិច សញ្ជឹងគិត និងឆ្លើយសំណួរនានា ដែលយើងសួរខ្លួនឯងទាំងអំឡុងពេលរៀបចំមេរៀន និងនៅពេលយើងផ្តោតលើមតិ ឬសំណួររបស់សិស្សក្នុងថ្នាក់ ។

កំណត់និយមន័យ

សិស្សគ្រប់រូបមកថ្នាក់រៀនដោយមានបទពិសោធន៍ និងទំនាក់ទំនងក្នុងជីវិតខុសៗគ្នា ដែលរៀបចំរបៀបដែលពួកគេគិត និងទទួលអារម្មណ៍អំពីសេចក្តីពិតនៃដំណឹងល្អ ។ ទស្សនៈទាំងនេះបង្កើតចំណុចចាប់ផ្តើមមួយ ជារឿយៗត្រូវបានហៅថា ការសន្និដ្ឋាន សម្រាប់ការគិតរបស់បុគ្គលម្នាក់ៗ ។ ការស្វែងរកការសន្និដ្ឋានរបស់បុគ្គលម្នាក់ៗអាចជួយយើងឲ្យបង្រៀនសេចក្តីពិតដោយសេចក្តីអាណិតអាសូរ និងសេចក្តីស្រឡាញ់ ដូចជាព្រះយេស៊ូវគ្រីស្ទបានបង្រៀនដែរ ។ ការសន្និដ្ឋានផ្សេងៗមិនផ្លាស់ប្តូរគោលលទ្ធិទេ ផ្ទុយទៅវិញការសន្និដ្ឋានទាំងនោះអនុញ្ញាតឲ្យយើងឃើញទស្សនវិស័យរបស់បុគ្គលម្នាក់ផ្សេងទៀត ក្នុងរបៀបមួយដែលជួយបង្កើនការយល់ដឹងរបស់យើង អំពីតម្រូវការរបស់សិស្សម្នាក់ៗ ដែលជាលទ្ធផលបង្កើនសេចក្តីជំនឿលើព្រះយេស៊ូវគ្រីស្ទ ។

អំឡុងពេលរៀបចំមេរៀន គ្រូបង្រៀនអាចពិចារណាអំពីសេចក្តីពិតដ៏អស់កល្ប នៅពេលអ្នកឈប់បន្តិច សញ្ជឹងគិត និងឆ្លើយសំណួរខាងក្រោមនេះ ៖

តើបទពិសោធន៍ និងទំនាក់ទំនងរបស់សិស្សខ្ញុំអាចរៀបចំផ្លូវដែលពួកគេគិត ទទួលអារម្មណ៍ និងរស់នៅតាមសេចក្តីពិតទាំងនេះដោយរបៀបណា ?
នៅពេលយើងសិក្សាសេចក្តីពិតនេះ តើសិស្សរបស់ខ្ញុំណាខ្លះអាចមានអារម្មណ៍ថា មិនចុះចំណោមគេ អំពល់ចិត្ត ឬឈឺចាប់ដោយសារតែកាលៈកាសៈរបស់ពួកគេ ?

ខណៈផ្តោតលើមតិ ឬសំណួររបស់សិស្សអំឡុងពេលបង្រៀន ឬនៅក្នុងការសន្ទនា គ្រូបង្រៀនអាចសួរខ្លួនឯងដូចជា ៖

« តើបទពិសោធន៍ និងទំនាក់ទំនងអ្វីខ្លះដែលសិស្សនេះអាចមាន ដែលនឹងបណ្តាលឲ្យគាត់គិតផ្សេងពីអ្វីដែលខ្ញុំគិត ? »
« តើមានអ្វីទៀតដែលខ្ញុំត្រូវដឹង ដើម្បីយល់កាន់តែច្បាស់អំពីកម្រិតយល់ដឹងដែលគាត់មាន ? »

សំណួរទាំងនេះអាចយាងអញ្ជើញព្រះវិញ្ញាណបរិសុទ្ធ ហើយអញ្ជើញឲ្យមានស្មារតីដឹងខុសត្រូវ ស្រឡាញ់ និងសេចក្តីអាណិតអាសូរដូចព្រះគ្រីស្ទ នៅក្នុងទំនាក់ទំនងរបស់យើង ។ សំណួរទាំងនេះក៏អាចជួយយើងឲ្យចៀសវាងពីការបែរចេញ ការវិនិច្ឆ័យ ឬវិធីការពារចំពោះសិស្សផងដែរ ។ សំណួរទាំងនេះអាចជួយយើងបង្រៀនសេចក្តីពិតតាមរបៀបមួយដែលអាចផ្តល់ពរដល់ថ្នាក់រៀន និងជួយមនុស្សដទៃឲ្យស្ថាបនាសេចក្ដីជំនឿលើព្រះយេស៊ូវគ្រីស្ទ ។

គំរូ ( អំឡុងពេលរៀបចំមេរៀន )

ខណៈរៀបចំមេរៀនស្តីពីការធ្វើតាមការបំផុសគំនិតអំពីព្រះវិញ្ញាណបរិសុទ្ធ នោះខ្ញុំសញ្ជឹងគិតអំពីសំណួរដូចតទៅនេះ ៖ « តើបទពិសោធន៍ និងទំនាក់ទំនងរបស់សិស្សខ្ញុំអាចរៀបចំរបៀបដែលពួកគេគិត ទទួលអារម្មណ៍ និងរស់នៅតាមសេចក្តីពិតទាំងនេះដោយរបៀបណា ? » និង « នៅពេលយើងសិក្សាសេចក្តីពិតនេះ តើសិស្សណាខ្លះរបស់ខ្ញុំដែលពិបាក ឬទទួលអារម្មណ៍ថា មិនចុះចំណោម អំពល់ចិត្ត ឬឈឺចាប់ដោយសារកាលៈទេសៈរបស់ពួកគេមិនល្អដូចការរំពឹងទុក ដែលទាក់ទងនឹងគោលលទ្ធិនេះ ? »

នោះខ្ញុំឆ្លើយថា ៖ « ខ្ញុំប្រហែលជាមានសិស្សដែលទទួលអារម្មណ៍ថា ពួកគេមិនធ្លាប់ទទួលបានការបំផុសគំនិតពីមុន ឬពួកគេមិនទទួលអារម្មណ៍ថា ព្រះវិញ្ញាណបរិសុទ្ធមានបន្ទូលទៅកាន់ពួកគេទេ ។ ខ្ញុំប្រហែលជាមានសិស្សមួយចំនួនដែលទទួលអារម្មណ៍ថា ពួកគេមិនស័ក្តិសម ។ ប្រហែលជាមានគ្រានានាដែលសិស្សខ្ញុំមិនប្រាកដចិត្តថា តើការបំផុសគំនិតកើតមកពីព្រះវិញ្ញាណបរិសុទ្ធដែរឬទេ ។ ប្រហែលជាមានសិស្សជាច្រើនដែលធុញទ្រាន់នឹងស្តាប់ដំណើររឿងនានាពីអ្នកដទៃប្រាប់ពីការធ្វើតាមព្រះវិញ្ញាណ ដោយសាររឿងទាំងនោះហាក់ដូចជាអព្តូហេតុជានិច្ច ហើយរឿងទាំងនោះមិនធ្លាប់កើតឡើងចំពោះពួកគេទេ » ។

អនុវត្ត ( អំឡុងពេលរៀបចំមេរៀន )

ខណៈរៀបចំមេរៀនស្តីពី នីហ្វៃទី១ ៣:៧ « ខ្ញុំនឹងទៅ ហើយធ្វើនូវអ្វីៗដែលព្រះអម្ចាស់ទ្រង់បានបញ្ជា » ៖

សូមសញ្ជឹងគិត និងឆ្លើយសំណួរ ៖ « តើបទពិសោធន៍ និងទំនាក់ទំនងរបស់សិស្សខ្ញុំអាចដុះខាត់របៀបដែលពួកគេគិត ទទួលអារម្មណ៍ និងរស់នៅតាមសេចក្តីពិតទាំងនេះដោយរបៀបណា ? » និង « នៅពេលយើងសិក្សាសេចក្តីពិតនេះ តើសិស្សណាខ្លះរបស់ខ្ញុំដែលពិបាក ឬទទួលអារម្មណ៍ថា មិនចុះចំណោម អំពល់ចិត្ត ឬឈឺចាប់ដោយសារកាលៈទេសៈរបស់ពួកគេមិនល្អដូចការរំពឹងទុក ដែលទាក់ទងនឹងគោលលទ្ធិនេះ ? »

ខណៈរៀបចំមេរៀនស្តីពីភេទជាបុគ្គលិកលក្ខណៈចាំបាច់នៃអត្តសញ្ញាណ និងគោលបំណងដ៏អស់កល្បជានិច្ចរបស់យើង នៅក្នុងមេរៀនដែលមានចំណងជើងថា « ភេទ និងអត្តសញ្ញាណអស់កល្បជានិច្ច » ៖

សូមសញ្ជឹងគិត និងឆ្លើយសំណួរ ៖ « តើបទពិសោធន៍ និងទំនាក់ទំនងរបស់សិស្សខ្ញុំអាចដុះខាត់របៀបដែលពួកគេគិត ទទួលអារម្មណ៍ និងរស់នៅតាមសេចក្តីពិតទាំងនេះដោយរបៀបណា ? » និង « នៅពេលយើងសិក្សាសេចក្តីពិតនេះ តើសិស្សណាខ្លះរបស់ខ្ញុំដែលពិបាក ឬទទួលអារម្មណ៍ថា មិនចុះចំណោម អំពល់ចិត្ត ឬឈឺចាប់ដោយសារកាលៈទេសៈរបស់ពួកគេមិនល្អដូចការរំពឹងទុក ដែលទាក់ទងនឹងគោលលទ្ធិនេះ ? »

គំរូ ( អំឡុងពេលបង្រៀន )

នៅពេលពិភាក្សាគោលលទ្ធិអំពីថ្ងៃឈប់សម្រាក សិស្សម្នាក់បញ្ចេញមតិថា « គ្រួសារខ្ញុំចូលចិត្តមើលព្រឹត្តិការណ៍កីឡានៅថ្ងៃអាទិត្យ » ។ នៅពេលអ្នកផ្តោតលើមតិរបស់សិស្សអ្នក នោះអ្នកគិតថា « តើបទពិសោធន៍ និងទំនាក់ទំនងអ្វីខ្លះដែលសិស្សនេះអាចមាន ដែលនឹងបណ្តាលឲ្យគាត់គិតខុសអំពីអ្វីដែលខ្ញុំគិត ? » ឬ « តើមានអ្វីទៀតដែលខ្ញុំត្រូវដឹងដើម្បីយល់កាន់តែច្បាស់អំពីកម្រិតយល់ដឹងដែលគាត់មាន ? »

អនុវត្ត ( អំឡុងពេលបង្រៀន )

ពេលពិភាក្សាអំពីកិច្ចការអ្នកផ្សព្វផ្សាយសាសនា សិស្សម្នាក់សួរថា « តើវាសំខាន់ខ្លាំងប៉ុនណាដែលយុវជនគ្រប់រូបត្រូវបម្រើបេសកកម្ម ? »

សូមគិតក្នុងចិត្តថា « តើបទពិសោធន៍ និងទំនាក់ទំនងអ្វីខ្លះដែលសិស្សនេះអាចមាន ដែលនឹងបណ្តាលឲ្យគាត់គិតខុសពីអ្វីដែលខ្ញុំគិត ? » និង « តើមានអ្វីទៀតដែលខ្ញុំត្រូវដឹងដើម្បីយល់កាន់តែច្បាស់អំពីកម្រិតយល់ដឹងដែលគាត់មាន ? »

នៅក្នុងការពិភាក្សាអំពីព្យាការី និងវិវរណៈ សិស្សម្នាក់សួរថា « តើនៅពេលណាដែលសាសនាចក្រនឹងប្តូរគោលនយោបាយទៅតាមពិភពលោកទាំងមូលវិញ ? »

សូមគិតក្នុងចិត្តថា « តើបទពិសោធន៍ និងទំនាក់ទំនងអ្វីខ្លះដែលសិស្សនេះអាចមាន ដែលនឹងបណ្តាលឲ្យគាត់គិតខុសអំពីអ្វីដែលខ្ញុំគិត ? » និង « តើមានអ្វីទៀតដែលខ្ញុំត្រូវដឹងដើម្បីយល់កាន់តែច្បាស់អំពីកម្រិតយល់ដឹងដែលគាត់មាន ? »

សូមចុចនៅត្រង់នេះដើម្បីមើលវីដេអូអំពីគំរូនេះ ។

ពិភាក្សា ឬសញ្ជឹងគិត

តើអ្នកកំពុងរៀនអ្វីខ្លះអំពីការបង្រៀនសេចក្តីពិតនេះដោយសេចក្តីអាណិតអាសូរ នៅពេលអ្នកអនុវត្តស្វែងរកការសន្និដ្ឋានរបស់សិស្សពីមុន និងអំឡុងពេលបង្រៀន ?
តើការអនុវត្តនេះអាចជួយអ្នកឲ្យបង្រៀនកាន់តែដូចព្រះយេស៊ូវគ្រីស្ទយ៉ាងដូចម្ដេច ?

រួមបញ្ចូល

សូមជ្រើសរើសការអនុវត្តមួយខាងលើ ដើម្បីផ្តោតយកចិត្តទុកដាក់លើវារយៈពេលពីរសប្តាហ៍បន្ទាប់ទៀត ។ សូមរៀបចំផែនការអំពីរបៀបដែលអ្នកនឹងអនុវត្តជំនាញទាំងនេះ ។ ឧទាហរណ៍ ៖

ជាមួយសេចក្តីពិតដែលអ្នករៀបចំ នោះអ្នកអាចជ្រើសរើសចំណាយពេលប្រាំនាទីដើម្បីឈប់បន្តិច សញ្ជឹងគិត និងឆ្លើយសំណួរដែលជួយអ្នកឲ្យរកឃើញការសន្និដ្ឋានរបស់សិស្ស ។
ពីមុនបង្រៀន សូមស្វែងរកសិស្សម្នាក់ ហើយគិតអំពីមតិ ឬសំណួរដែលគាត់អាចមានអំពីសេចក្តីពិតនីមួយៗ ។ បន្ទាប់មក សូមគិតក្នុងចិត្តថា « តើបទពិសោធន៍ និងទំនាក់ទំនងអ្វីខ្លះដែលសិស្សនេះអាចមាន ដែលនឹងបណ្តាលឲ្យគាត់គិតខុសអំពីអ្វីដែលខ្ញុំគិត ? » និង « តើមានអ្វីទៀតដែលខ្ញុំត្រូវដឹងដើម្បីយល់កាន់តែច្បាស់អំពីកម្រិតយល់ដឹងដែលគាត់មាន ? » ការណ៍នេះនឹងរៀបចំអ្នកឲ្យធ្វើកិច្ចការនេះអំឡុងពេលបង្រៀន នៅពេលអ្នកផ្តោតលើមតិ និងសំណួររបស់សិស្ស ។

តើចង់បានបន្ថែមទៀតទេ ?

ឆាដ អេច វិប « Empathy » ( ការចាក់ផ្សាយអំពីការបំពាក់បំប៉នថ្នាក់សិក្ខាសាលា និងថ្នាក់វិទ្យាស្ថានសាសនាប្រចាំឆ្នាំ នៅថ្ងៃទី ២៦ ខែ មករា ឆ្នាំ ២០២១ ) នៅលើគេហទំព័រ broadcasts.ChurchofJesusChrist.org
ជីន ប៊ី ប៊ីងហាំ « Teaching Truth in the Language of Love » ( ការចាក់ផ្សាយអំពីការបំពាក់បំប៉នរបស់ថ្នាក់សិក្ខាសាលា និងថ្នាក់វិទ្យាស្ថានសាសនាប្រចាំឆ្នាំ នៅថ្ងៃទី ១៩ ខែ មករា ឆ្នាំ ២០២១ ) នៅលើគេហទំព័រ broadcasts.ChurchofJesusChrist.org

ជំនាញ

ព្យាយាមបញ្ជាក់ និងយល់ពីចេតនាពិតនៃសំណួរ អារម្មណ៍ និងជំនឿរបស់សិស្ស ។

រូបភាព

បុរសម្នាក់កំពុងបង្រៀនសិស្ស

ការបំពាក់បំប៉ននេះបង្ហាញពីជំនាញទាក់ទងបីដំបូង ដែលនឹងជួយយើងឲ្យយល់ថា សិស្សអាចឃើញសេចក្តីពិតដ៏អស់កល្បជានិច្ច មកពីការសន្និដ្ឋានផ្សេងៗខុសពីយើង ។ នៅពេលយើងយល់កាន់តែច្បាស់ពីសិស្សរបស់យើង នោះយើងនឹងអាចឆ្លើយតបបានកាន់តែច្រើនទៅកាន់ពួកគេដោយសេចក្តីស្រឡាញ់ និងសេចក្តីអាណិតអាសូរ នៅពេលយើងជួយពួកគេឲ្យស្ថាបនាសេចក្តីជំនឿលើព្រះយេស៊ូវគ្រីស្ទ ។ ការបំពាក់បំប៉នទាំងនេះក៏អាចជួយយើងឲ្យកែលម្អនៅក្នុងជំហានដំបូងក្នុងការឆ្លើយតបទៅនឹងសំណួរពិបាកដែលសិស្សបានសួរផងដែរ ។ ការបំពាក់បំប៉នទាំងនេះរួមមាន ៖

ការស្វែងរកការសន្និដ្ឋានរបស់សិស្សដោយការឈប់បន្តិច សញ្ជឹងគិត និងឆ្លើយសំណួរនានាដែលយើងសួរខ្លួនឯងទាំងអំឡុងពេលរៀបចំមេរៀន និងនៅពេលយើងផ្តោតលើមតិ ឬសំណួររបស់សិស្សក្នុងថ្នាក់ ។
ការព្យាយាមដើម្បីបញ្ជាក់ និងយល់អំពីចេតនាពិតនៃសំណួរ អារម្មណ៍ និងជំនឿរបស់សិស្ស ។
ការជួយសិស្សឲ្យពិនិត្យមើល ឬរៀបចំការសន្និដ្ឋានរបស់ពួកគេឡើងវិញដោយមានទស្សនវិស័យដ៏អស់កល្បជានិច្ច ។

កំណត់និយមន័យ

ការព្យាយាមដើម្បីបញ្ជាក់ និងយល់អំពីចេតនាពិតនៃសំណួរ អារម្មណ៍ និងជំនឿរបស់សិស្ស ពាក់ព័ន្ធនឹងការដឹងបន្ថែមទៀតអំពីបទពិសោធន៍ ស្ថានភាព ឬអារម្មណ៍ដែលជំរុញឲ្យមានសំណួរនេះ ។ បន្ទាប់ពីសិស្សម្នាក់បានចែកចាយសំណួរ អារម្មណ៍ ឬជំនឿហើយ អ្នកអាចអរគុណគាត់ចំពោះអ្វីដែលត្រូវបានចែកចាយ ហើយបន្ទាប់មក សូមសួរប្រសិនបើសិស្សនោះព្រមបើកចិត្តក្នុងការឆ្លើយតបចំពោះសំណួរតាមដានដែរឬទេ ។ ប្រសិនបើសិស្សថាទេ សូមប្រាប់ពួកគេថា មិនអីទេ ហើយសូមឆ្លើយនឹងសំណួរ ឬសេចក្ដីថ្លែងការណ៍ដើមនោះ ។ ប្រសិនបើសិស្សថាព្រម សូមសួរសំណួរតាមដានដែលអញ្ជើញសិស្សឲ្យចែកចាយបន្ថែមទៀតនូវអ្វីដែលបានបំផុសសំណួរ ឬសេចក្តីថ្លែងការណ៍នោះ ។ ការធ្វើបែបនេះអាចជួយអ្នក និងអ្នកដទៃក្នុងថ្នាក់របស់អ្នកយល់កាន់តែច្បាស់ពីគ្នាទៅវិញទៅមក ហើយឆ្លើយតបដោយការយល់ចិត្ត និងសេចក្ដីស្រឡាញ់ ។

គំរូ

បងស្រី ហ្គានៀ កំពុងបង្រៀនអំពីបព្វជិតភាពនៅក្នុងព្រះគម្ពីរ នៅពេលសិស្សម្នាក់របស់គាត់សួរថា « ហេតុអ្វីបានជាបុរសស្បែកខ្មៅមិនត្រូវបានអនុញ្ញាតឲ្យមានបព្វជិតភាពរហូតដល់ឆ្នាំ ១៩៧៨ ? »
- បងស្រី ហ្គានៀ ៖ អរគុណ ចំពោះការសួររបស់ប្អូន ។ នេះគឺជាសំណួរដែលយើងជាច្រើនបានគិតដល់ ។ តើអ្នកគ្រូអាចសួរប្អូននូវសំណួរតាមដានពីរបីបានទេ ?
- សិស្ស ៖ បាន !
- បងស្រី ហ្គានៀ ៖ តើអ្វីទៅដែលបាននាំឲ្យប្អូនសួរសំណួរនេះ ?
បងប្រុស ម៉ូណែត កំពុងបង្រៀនអំពីបព្វជិតភាពនៅក្នុងព្រះគម្ពីរ នៅពេលសិស្សម្នាក់របស់គាត់សួរថា « ហេតុអ្វីបានជាបុរសស្បែកខ្មៅមិនត្រូវបានអនុញ្ញាតឲ្យមានបព្វជិតភាពរហូតដល់ឆ្នាំ ១៩៧៨ ? »
- បងប្រុស ម៉ូណែត ៖ អរគុណ ចំពោះការសួររបស់ប្អូន ។ នេះគឺជាសំណួរដែលយើងជាច្រើនបានគិតដល់ ។ តើអ្នកគ្រូអាចសួរប្អូននូវសំណួរតាមដានពីរបីបានទេ ?
- សិស្ស ៖ ទេ !
- បងប្រុស ម៉ូណែត ៖ កុំបារម្ភ ! លោកគ្រូរីករាយដែលប្អូនបានសួរ ។ តោះ ចូរជជែកគ្នាអំពីសំណួរនេះ ។

ឧទាហរណ៍នៃសំណួរតាមដានផ្សេងទៀតដែលអ្នកអាចសួរបាន ៖

គ្រូអរគុណចំពោះឆន្ទៈរបស់ប្អូនដើម្បីចែកចាយសំណួរនោះជាមួយយើង ។ តើមានបទពិសោធន៍ ឬស្ថានភាពអ្វីមួយដែលជំរុញឲ្យមាន [ សំណួរ គំនិត ជំនឿ ] ហ្នឹងទេ ?
សូមអរគុណចំពោះសំណួរនេះ ។ តើប្អូនអាចប្រាប់គ្រូបន្ថែមបានទេថា សំណួរនេះមកពីណា ?
សូមអរគុណចំពោះសំណួរនេះ ។ តើប្អូនអាចជួយគ្រូឲ្យយល់ថា តើអ្វីទៅដែលបាននាំប្អូនឲ្យសួរសំណួរនេះ ឬដែលបានធ្វើឲ្យប្អូនចង់ដឹងដូច្នេះ ?

អនុវត្ត

សូមព្យាយាមយល់ និងបញ្ជាក់អំពីអ្វីដែលជំរុញឲ្យមានសំណួរ អារម្មណ៍ ឬជំនឿនេះក្នុងស្ថានភាពដូចខាងក្រោម ៖

អំឡុងមេរៀនមួយអំពីអាពាហ៍ពិពាហ៍រវាងបុរសម្នាក់ និងស្ត្រីម្នាក់ ថាត្រូវបានតែងតាំងឡើងដោយព្រះ សិស្សម្នាក់សួរថា « ហេតុអ្វីក៏យើងមិនចូលចិត្តមនុស្សដែលជាផ្នែកមួយនៃសហគមន៍ LGBTQ ? ហេតុអ្វីពួកគេមិនអាចរៀបការជាមួយគ្នាបាន ប្រសិនបើពួកគេស្រឡាញ់គ្នា ? »
ក្នុងអំឡុងពេលពិភាក្សាអំពីកិច្ចការផ្សព្វផ្សាយសាសនា សិស្សម្នាក់បានចែកចាយថា « ខ្ញុំបានគិតថា យុវជនមិនមានជម្រើសថា តើពួកគេគួរទៅបេសកកម្ម ឬអត់នោះទេ ប៉ុន្តែយុវនារីមាន » ។

ពិភាក្សា ឬសញ្ជឹងគិត

ហេតុអ្វីបានជាអ្នកគិតថា យើងគួរចំណាយពេលដើម្បីយល់ឲ្យបានច្បាស់អំពីអ្វីដែលកំពុងចែកចាយ ? តើអ្នកគិតថា ការខិតខំរបស់យើងដើម្បីយល់ច្បាស់អំពីចេតនាពិតប្រាកដរបស់សិស្សអាចប៉ះពាល់ដល់បទពិសោធន៍ក្នុងថ្នាក់ដោយរបៀបណា ? តើការយល់ដឹងរបស់យើងអំពីបំណងពិតរបស់សិស្សនឹងជួយយើងឲ្យភ្ជាប់ពួកគេទៅនឹងព្រះគ្រីស្ទយ៉ាងដូចម្ដេច ?

រួមបញ្ចូល

នៅក្នុងថ្នាក់រៀន សូមស្តាប់ឲ្យបានដិតដល់នូវអ្វីដែលកំពុងចែកចាយ ហើយពិចារណាដោយប្រុងប្រយ័ត្ននូវកន្លែងដែលអ្នកចង់យល់ឲ្យកាន់តែច្បាស់ ។ បន្ទាប់ពីអរគុណសិស្សដែលបានសួរសំណួរហើយ សូមសួរសំណួរតាមដានដែលនឹងអនុញ្ញាតឲ្យសិស្សឆ្លើយបញ្ជាក់ ។

តើចង់បានបន្ថែមទៀតទេ ?

« Asking Follow-Up Questions » ( វីដេអូ ) នៅលើគេហទំព័រ ChurchofJesusChrist.org
រ៉ានឌល អិល រិដ « Living with Real Intent » Ensign ខែ តុលា ឆ្នាំ ២០១៥ ទំព័រ ១២–១៥