Ngaahi Tefitoʻi Moʻoni ʻo e Faiako Faka-Kalaisí: ʻOfa ʻi he Niʻihi ʻOkú ke Akoʻí

Lotua kinautolu ʻaki honau hingoá.

Pōtoʻi Ngāué

Lotu ʻo kole ʻa e founga te ke lava ʻo tokoniʻi ʻaki hoʻo kau akó pea muimui ki he ngaahi ueʻi mei he Laumālie Māʻoniʻoní.

Fakamatalaʻi

ʻE lava ke tokoni hono lotua maʻu pē hoʻo kau akó ke ke ongoʻi lahi ange ʻa e ʻofa ʻa e ʻOtuá kiate kinautolú pea fakatupulaki hoʻo holi ke ʻoange ha feituʻu malu mo fakamāfana te nau lava ʻo ako aí. ʻE fakaʻatā foki ai ʻa e Tamai Hēvaní ke tokoni atu ke mahino lelei ange kiate koe honau ngaahi tūkungá mo e ngaahi fiemaʻú. Neongo he ʻikai ke tau lava ʻo fakamālohiʻi ʻa e ngaahi meʻa fakalaumālié pe ko e tali ki he lotú, ka ʻi hono lotua ʻetau kau akó ʻoku fakaafeʻi ai ʻa e fakahinohino ʻa e Laumālie Māʻoniʻoní pea lava ke fakatupulaki ʻetau malava ke tokoniʻi kinautolú. ʻE lava ke tokoniʻi koe ʻi hoʻo ngāueʻi ʻa e ueʻi fakalaumālie ʻokú ke maʻú ke ke fakatupulaki ʻa e aʻusia fakaako ʻa e tokotaha ako takitaha. Ko e founga ʻe taha ʻe lava ke feinga ai ʻa e kau faiakó ke fakatupulaki ʻa e ʻofa ki heʻenau kau akó ko hono fakakaukauʻi ʻa e meʻa kuo nau ʻosi ʻilo fekauʻaki mo ha tokotaha ako pea fakalaulauloto ʻi he faʻa lotu mo fehuʻi pe te nau fakahaaʻi fēfē ha ʻofa lahi ange ki he tokotaha ako ko iá. ʻI he lotu ʻa e kau faiakó mo fakakaukau ki he ngaahi meʻá ni, ʻoku totonu leva ke nau feinga ke ʻiloʻi pea ngāue ʻo fakatatau ki he ngaahi ueʻi ʻa e Laumālié.

Fakatātaaʻi

Ko ha ngaahi sīpinga ʻeni ʻe niʻihi ʻo e founga te ke lava ʻo lotu ai mo fehuʻi ʻa e founga ke tokoniʻi ai ha tokotaha ako pea muimui ki he ngaahi ueʻi ʻa e Laumālie Māʻoniʻoní:

• Kuó ke fakatokangaʻi naʻe momou ʻa Sione ke kau ʻi he kalasí kimuí ni mai. ʻOkú ke fehuʻi ki he Tamai Hēvaní pe ko e hā ʻa e founga lelei taha te ke lava ʻo tokoniʻi ai iá. ʻOkú ke ongoʻi ʻoku totonu ke ke talanoa ki ai ʻi heʻene haʻu ki he kalasí. ʻOkú ke ongoʻi ʻoku totonu ke ke fehuʻi lahi ange fekauʻaki mo e ngaahi meʻa lolotonga ʻoku mahuʻingaʻia aí kae ʻoua ʻe fehuʻi pē ʻa e ʻuhinga ʻoku ʻikai ke ne loko kau mai ai kimui ní. ʻOkú ke palani ke ke talanoa ki ai kimuʻa ʻi he kalasi ʻapongipongí.

• Kuo vahevahe maʻu pē ʻe Malia ʻene ngaahi fakakaukaú mo ʻene fakamoʻoní ʻi he ngaahi uike siʻi kuohilí. Kimuʻa ʻi he kalasi hokó, ʻokú ke fehuʻi ki he Tamai Hēvaní ʻa e founga te ke lava ʻo tokoniʻi ai ke hokohoko atu ʻene fakalakalaká. ʻOkú ke fakakaukau ke ʻai ke ne ngāue mo ha niʻihi ʻo hono kaungā ako ʻoku ʻikai ke nau faʻa vahevahé pe faingataʻa ke vahevahe tauʻatāina ʻa e ongo ʻoku nau maʻú. ʻI hoʻo lēsoni palani ki ʻapongipongí, ʻokú ke tānaki atu ai ha faingamālie ke fevahevaheʻaki mo ha kaungā ako.

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

Fakaʻaongaʻi ha founga ʻe taha pe lahi ange ʻi heni ke fakatupulaki hoʻo malava ke lotua ʻa e kau akó pea ngāueʻi ʻa e ngaahi ueʻi ʻe maʻu mei aí:

• Fili ha tokotaha ako ʻokú ke ongoʻi ʻoku ʻikai lahi hano ngaahi kaungāmeʻa ofi ʻi he kalasí. Lotua ʻa e founga lelei taha ke tokoniʻi ai iá. Faʻu ha palani pea ngāueʻi ʻa e ngaahi ongo ʻokú ke maʻú.

• Fili ha tokotaha ako ʻoku lahi ʻene vahevahé ʻi he kalasí. Lotua ia mo e founga ke hokohoko atu ai hono fakaleleiʻi ʻa e aʻusia fakaako ʻa e tokotaha ako ko iá. Ngāue ʻo fakatatau mo e ngaahi ongo ʻokú ke maʻú.

• Fili ha tokotaha ako kuo teʻeki ke ke sio ai kimuí ni ʻi he kalasí. Lotua ia, pea fehuʻi ki he ʻEikí ʻa e founga lelei taha ke tokoniʻi ai ʻa e tokotaha akó ke ne ongoʻi ʻoku ʻofaʻi mo fiemaʻu iá. Faʻu ha palani ʻo makatuʻunga ʻi he ngaahi ongo ʻokú ke maʻú, fili ʻa e taimi te ke lava ʻo ngāueʻi ai ʻa e palani ko iá, pea muimui ki ai.

Aleaʻi pe Fakalaulauloto

Fakalaulauloto ki he meʻa kuó ke ako mei he aʻusia ko ʻení. Mahalo te ke lava ʻo hiki ha niʻihi ʻo e ngaahi fakakaukau ko ʻení ʻi ha tohinoa ako. Fakakaukau ki he ngaahi fehuʻi ko ʻení:

• Ko e hā ha ngaahi ngāue kuó u fai kimuʻa ke lotua ʻeku kau akó?

• Ko e hā kuó u ako ʻi he foungá ni ʻe lava ʻo fakatupulaki ai ʻeku malava ke lotua ʻeku kau akó mo tokoniʻi kinautolu ke fakaleleiʻi ʻenau aʻusia fakaakó?

• Ko e hā te u fakahoko ke hokohoko atu ʻeku fakalakalaká?

Fakakau

Faʻu ha palani ngāue ke lotua mo fehuʻi ʻa e founga te ke lava ʻo tokoniʻi ai hoʻo kau akó pea muimui ki he ngaahi ueʻi mei he Laumālie Māʻoniʻoní. Te ke lava ʻo fakakaukau ki he ngaahi sitepu ʻoku fokotuʻu atu ko ʻení ʻi hoʻo faʻu ha palani ngāué:

• Fili pea tokanga taha ki ha taha ʻo e ngaahi founga fakaangaanga ʻi ʻolungá.

• Fakapapauʻi ʻa e founga te ke fakahoko ai iá.

• Fakataimitēpileʻi ha taimi ke fakahoko ai iá.

• Kole ki he Tamai Hēvaní ke tokoniʻi koe.

Fie Ako Lahi Ange?

• Neil L. Andersen, “A Classroom of Faith, Hope, and Charity” (efiafi mo ha Taki Māʻolunga, 28 Fēpueli, 2014), broadcasts.ChurchofJesusChrist.org

• Chad H Webb, “Sinoemeʻa” (fakamafola ʻo e ako fakataʻu ʻa e Seminelí mo e ʻInisititiuti Fakalotú, 12 Sune, 2019), broadcasts.ChurchofJesusChrist.org

• “ʻOfa ʻi he Niʻihi ʻOkú ke Akoʻí,” Ko e Faiako ʻi he Founga ʻa e Fakamoʻuí (2016), 6

Pōtoʻi Ngāué

Fakaafeʻi ʻa e kau akó ke nau lotua ʻa e kau ako kehé.

Fakamatalaʻi

Ko e ngaahi faingamālie ke lotu ki he Tamai Hēvaní maʻá e kakai kehé ko hano ngāueʻi ia ʻo e tuí ʻoku tau kolea ai ʻa e ngaahi mālohi ʻo e langí, langaki ha feohi fakakaungāmeʻa ʻoku mālohi angé, mo fakamālohia ʻa e haʻi ʻo e ʻofá ʻi he kau akó mo e kau faiakó. ʻE lava ke fakaafeʻi ʻe ha faiako ʻa e kau akó ke nau manatuʻi honau kaungā kalasí ʻi heʻenau lotu fakatāutahá pea mo e fua lotú pe lotu tukú. ʻI ha ngaahi meʻa ʻe niʻihi, ʻe kau ʻi he fakaafé ha ngaahi meʻa pau fekauʻaki mo e fakafoʻituituí ʻi he lotú. ʻI he ngaahi meʻa kehé, ʻe feʻunga pē hono fakahaaʻi honau hingoá ʻi he lotú. ʻE lava ke fai ʻa e fakaafé ko ha fakamanatu kimuʻa pea kamata ʻa e kalasí, toe fakamamafaʻi ʻi he taimi totonu lolotonga ʻo e lēsoní, pea kimuʻa pea fai ʻa e lotu tukú.

(Fakatokangaʻi ange: Fakatatau mo e tokotaha akó pe natula ʻikai fakahāhāholo ʻo ha tūkunga, mahalo ʻe mahuʻinga ke kole ha ngofua ke lotua ha kau ako pau ʻaki honau hingoá.)

Fakatātaaʻi

• Kimuʻa pea fai ʻa e lotu tukú, naʻe fakamanatu ʻe Sisitā Kōtoni ki he kau akó ke nau lotua honau kaungā ako ʻoku nau fakahoko ha sivi hū ki he ʻunivēsití ʻaki haʻanau pehē, “ʻI he tokolahi hotau kaungā-ako ʻoku nau fai ha sivi hū ki he ʻunivēsití ʻi he uike ní, ko ha tāpuaki maʻongoʻonga ia kiate kinautolu ke manatua kinautolu ʻi hoʻomou ngaahi lotú.”

• Naʻe ʻave ʻe Tēvita ha pōpoaki kia Brother Senisesi ʻoku ʻikai ke haʻu ia ki he kalasí ʻi he uiké ni koeʻuhí ko e mālōlō siʻa taha naʻá ne ʻofa ai. ʻI hono fakangofua ʻe Tēvita ʻa Brother Senisesi ke kamata ʻa e kalasí ʻaki ʻene pehē, “Ne mālōlō e Kulenimā ʻa Tēvitá he uike kuo ʻosí. ʻE lava ke mou manatuʻa ʻa Tēvita mo hono fāmilí ʻi hoʻomou ngaahi lotu lolotonga e taimi faingataʻa ko ʻení?”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

Fakaʻaongaʻi ha fakaangaanga ʻe taha pe lahi ange ʻi heni ke fakatupulaki hoʻo malava ke fakaafeʻi ʻa e kau akó ke lotua honau kaungā akó:

• ʻOku hohaʻa ha kau ako ʻe niʻihi fekauʻaki mo ha meʻa ʻoku ʻamanaki ke hoko. Hiki ha fakaafe te ke lava ʻo fai ke poupouʻi ʻa e kau akó ke lotua ʻa kinautolu ʻoku hohaʻa fekauʻaki mo e meʻa ko ʻeni naʻe hokó.

• Fakakaukau ki ha tokotaha ako ʻokú ke ʻiloʻi ʻokú ne fiemaʻu ha tokoni makehe mei he ʻEikí. Hiki ʻa e founga te ke lava ʻo fakaafeʻi ai ʻa e kau akó ke lotu maʻá e tokotaha ako ko iá.

Aleaʻi pe Fakalaulauloto

• ʻI hoʻo akoakó, ko e hā ha ngaahi meʻa kehe naʻá ke fakakaukau ki ai ʻe lava ʻo tokoni atu ke ke fakahoko ʻa e ngaahi fakaafe ko ʻení?

• Ko e fē ha taimi kuo tāpuekina ai ha taha ʻokú ke ʻiloʻi koeʻuhí ko ha lotu naʻe fai ʻe ha taha kehe?

Fakakau

• ʻI he ngaahi uike ka hokó, kumi ha ngaahi faingamālie ke fai ha fakaafe ki he kau akó ke nau lotua honau kaungāakó. Fai leva ʻa e fakaafé.

Fie Ako Lahi Ange?

• “Naʻe Lotua ʻe he Fakamoʻuí ʻa Kinautolu naʻá Ne Akoʻí,” ʻi he “ʻOfa ʻi he Niʻihi ʻOkú ke Akoʻí,” Ko e Faiako ʻi he Founga ʻa e Fakamoʻuí (2022), Gospel Library

• David A. Bednar, “Tefitoʻi Moʻoni #3,” ʻi he “Lotu Maʻu Ai Pē,” Liahona, Nōvema 2008, 43–44