Ngaahi Tefitoʻi Moʻoni ʻo e Faiako Faka-Kalaisí: ʻOfa ʻi he Niʻihi ʻOkú ke Akoʻí

Feinga ke ʻiloʻi kinautolu—maʻu ha mahino ki honau ngaahi tūkungá, ngaahi fiemaʻú, mo honau mālohingá.

Pōtoʻi Ngāué

Vakaiʻi pea fehuʻi fekauʻaki mo e ngaahi meʻa ʻoku mahuʻingaʻia ai ʻa e kau akó.

Fakamatalaʻi

ʻE lava ke ako ʻa e kau faiakó fekauʻaki mo e ngaahi tūkunga ʻo ʻenau kau akó pea feinga ke ʻiloʻi ha niʻihi ʻo ʻenau ngaahi fiemaʻu fakaakó ʻi heʻenau vakaiʻi mo fehuʻi fekauʻaki mo e ngaahi meʻa ʻoku nau mahuʻingaʻia aí. ʻOku faʻa faingofua taha ke fakahoko ʻa e ngaahi fepōtalanoaʻaki ko ʻení kimuʻa mo e hili ʻa e kalasí, ka ʻe lava foki ke hoko ia lolotonga ʻa e kalasí. ʻOku ʻi ai ha ngaahi founga kehekehe ʻe lava ke fakahoko ai ʻeni ʻe he kau faiakó. ʻE lava ke fakatokangaʻi ʻe ha faiako ha tohi, ngāue, sitika, meʻangāue sipoti, pe ha meʻa kehe ʻoku ʻomi ʻe ha tokotaha ako ki he kalasí. Pe ko hano manatuʻi ʻe ha faiako ha meʻa naʻe kau ki ai ʻa e kau akó pea fehuʻi ange fekauʻaki mo ia. ʻE tokoni ʻa e ngaahi fehuʻi ʻoku tau ʻeké ke tau ʻilo ai ʻa e kau akó mo e ngaahi meʻa ʻoku nau mahuʻingaʻia aí pea fakakau ai ʻa e ngaahi kupuʻi lea hangē ko e:

• “Fakamatala mai angé fekauʻaki mo e …”

• “Ko e hā ʻokú ke saiʻia ai ʻi he …?”

• “ʻOku ou fie ʻilo …”

ʻI he taimi ʻoku fakamātoato mo moʻoni ai ʻa e kau faiakó ʻi heʻenau ngaahi fehuʻí, te nau lava ʻo ako lahi ange fekauʻaki mo e ngaahi tūkunga ʻo ʻenau kau akó mo e ngaahi fiemaʻu fakaakó, pea ʻe ongoʻi ʻe he kau akó ʻoku tokanga moʻoni ʻenau faiakó. ʻI he taimi ʻoku ongoʻi ai ʻe he kau akó ʻoku tokanga moʻoni ʻenau faiakó kiate kinautolú, ʻoku ngalingali te nau haʻu mateuteu ange ki he kalasí ke ako mo vahevahe ʻenau ngaahi fakakaukaú mo e aʻusiá mo ʻenau faiakó mo e niʻihi kehe ʻi he kalasí.

Fakatātaaʻi

1. ʻOku manatuʻi ʻe Sisitā Miniosa naʻe ʻi ai ha vaʻinga soka lahi ʻa Losa naʻe manavasiʻi ki ai. ʻI he sio ʻa Sisitā Miniosa kia Losá, ʻokú ne tuʻu ʻo fehuʻi ange pe naʻá ne ongoʻi naʻe fēfē ʻa e vaʻingá.

2. ʻOku tuku ʻa e kī ʻa ʻAuló ʻi he funga tēpilé. ʻI hoʻo lue atu aí, ʻokú ke fakatokangaʻi ha fuka mei ha fonua kehe ʻi heʻene tautauʻanga kií. ʻOkú ke fie ʻilo mo pehē ange, “ʻAulo, ko e hā e fuka ʻi hoʻo tautauʻanga kií.” ʻOku vahevahe ʻe ʻAulo naʻe ngāue fakafaifekau hono tuofefiné ki Palāsila, pea naʻá ne ʻalu mo hono fāmilí ke nau foki mai ʻi he fakaʻosinga ʻo ʻene ngāue fakafaifekaú. ʻOku hoko atu hoʻo talanoá ʻo fehuʻi ange, “Ko e hā naʻá ke saiʻia ai ʻi hoʻo ʻalu ʻo sio ki hoʻo tuofefiné ʻi heʻene ngāue fakafaifekaú?

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

Akoako #1: Ko e hā ʻokú ke vakai ki ai ʻi he ngaahi fakatātā takitaha ko ʻení, ʻe lava ʻo tokoni atu ke ke ako fekauʻaki mo e ngaahi tūkunga pe ngaahi fiemaʻu fakaako ʻa e kau ako ko ʻení?

Akoako #2: Ko e hā ha ngaahi fehuʻi te ke lava ʻo ʻeke ke ako lahi ange ai fekauʻaki mo e ngaahi meʻa ʻoku mahuʻingaʻia ai hoʻo kau akó?

Aleaʻi pe Fakalaulauloto

• Ko e hā kuó ke ako ʻi hoʻo akoako ke vakaiʻi mo fehuʻi fekauʻaki mo e ngaahi meʻa ʻoku mahuʻingaʻia ai ʻa e kau akó?

• ʻE fakahaaʻi fēfē ʻi he vakaiʻi mo e fehuʻi fekauʻaki mo e ngaahi meʻa ʻoku mahuʻingaʻia ai ʻa e kau akó ʻokú ke ʻofa ʻi hoʻo kau akó?

Fakakau

• Kumi ha ngaahi faingamālie ʻi he kalasi ʻi he uike ní, ke fehuʻi ki he kau akó fekauʻaki mo e ngaahi meʻa ʻoku nau mahuʻingaʻia aí, ngaahi polokalama ʻoku nau kau ki aí, pe ngaahi tūkungá. Fakahaaʻi moʻoni hoʻo tokanga ki he meʻa ʻokú ke ako meiate kinautolú. Fekumi ki he founga ʻoku kaunga lelei ai ia ki he aʻusia fakaako ʻa e tokotaha akó. Fakaʻaongaʻi ha miniti ʻe nima hili ʻa e kalasí ke hiki ʻa e meʻa naʻá ke ako fekauʻaki mo hoʻo kau akó mo e founga ʻe lava ke tokoniʻi ai koe ke ke faʻu ha ngaahi aʻusia fakaako ʻoku fakaiku ki he fakauluí, felāveʻí, mo e kau maí.

Fie ako lahi ange?

• Lori Newbold, “Vakai ki he Tahá” (Fakamafola ʻo e ako fakataʻu ʻa e Seminelí mo e ʻInisititiuti Fakalotú, 13 Sune 2017), broadcasts.ChurchofJesusChrist.org

• Chad H Webb, “Ne ʻIkai ke Tau Fononga Lōloa Maí ke Tau Ngata Pē Heni” (Fakamafola ʻo e ako fakataʻu ʻa e Seminelí mo e ʻInisititiuti Fakalotú, 9 Sune 2020), broadcasts.ChurchofJesusChrist.org

• “Reaching the Individual” (vitiō), ChurchofJesusChrist.org

Pōtoʻi Ngāué

Kiʻi taimi hifo, fakakaukau, pea tali ʻa e ngaahi fehuʻi ʻoku tau fehuʻi loto ʻa ia ʻoku nau fakaafeʻi mai ha laumālie anga faka-Kalaisi ʻo e faʻa ʻiloʻiló, ʻofá, mo e manavaʻofá ʻi heʻetau fengāueʻakí.

Fakamatalaʻi

ʻOku haʻu ʻa e tokotaha ako kotoa pē ki he kalasí mo ha ngaahi aʻusia kehekehe ʻo e moʻuí mo ha ngaahi vā fetuʻutaki ʻokú ne fakafōtunga ʻa e anga ʻo ʻenau fakakaukau mo e ongoʻi kau ki he ngaahi moʻoni ʻo e ongoongoleleí. ʻOku fakatupu ʻe he ngaahi fakakaukau ko ʻení ha kamataʻanga, ʻoku faʻa ui ko ha makatuʻunga, ki ha fakakaukau ʻa ha taha. ʻE lava ke tokoni hono ʻiloʻi ha fakakaukau ʻa ha taha ke tau akoʻi ʻa e moʻoní ʻi he manavaʻofa mo e ʻofa, ʻo hangē ko ia ʻoku fakahoko ʻe Sīsū Kalaisí. ʻOku ʻikai liliu ʻe he ngaahi fakakaukau kehekehé ʻa e tokāteliné; ka ʻoku fakaʻatā ai ke tau vakai ki ha fakakaukau ʻa ha taha kehe ʻi ha founga ʻoku tokoni ke fakatupulaki ʻetau mahino ki he ngaahi fiemaʻu ʻa e tokotaha ako takitaha, ke fakatupulaki ai ʻa e tui kia Sīsū Kalaisí.

Lolotonga hono teuteuʻi ʻo e lēsoní, ʻe lava ke fakakaukauʻi ʻe he kau faiakó ʻa e ngaahi moʻoni taʻengatá ʻi heʻenau kiʻi taimi, fakakaukauloto, pea tali ʻa e ngaahi fehuʻi ko ʻení:

• ʻE fakafōtunga fēfē ʻe he ngaahi aʻusia mo e vā fetuʻutaki ʻo ʻeku kau akó ʻa e anga ʻenau fakakaukaú, ongoʻí, mo hono moʻui ʻaki ʻa e ngaahi moʻoni ko ʻení?

• ʻI heʻemau ako ʻa e moʻoni ko ʻení, ʻe lava nai ha taha ʻo ʻeku kau akó ʻo ongoʻi ʻoku tuenoa, puputuʻu, pe loto-mamahi koeʻuhí ko hono ngaahi tūkungá?

Lolotonga ʻo e tokanga taha ki ha fakamatala pe fehuʻi ʻa e tokotaha akó ʻi he lolotonga ʻo e kalasí pe ʻi ha fepōtalanoaʻaki, ʻe lava ke fehuʻi loto ʻe he kau faiakó:

• “Ko e hā ha ngaahi aʻusia mo e vā fetuʻutaki ʻe ala maʻu ʻe he tokotaha ako ko ʻení ʻe kehe ai ʻene fakakaukaú meiate aú?”

• “Ko e hā mo ha toe meʻa ʻoku fiemaʻu ke u ʻilo ke mahino kakato kiate au ʻa e fakakaukau ʻokú ne maʻú?”

ʻE lava ke fakaafeʻi mai ʻa e Laumālie Māʻoniʻoní ʻi he ngaahi fehuʻi ko ʻení mo fakaafeʻi mai ha laumālie faka-Kalaisi ʻo e faʻa ʻiloʻiló, ʻofá, mo e manavaʻofá ki heʻetau ngaahi fengāueʻakí. Te nau toe lava foki ʻo tokoni ke tau fakaʻehiʻehi mei he tali ki he kau akó ʻi ha founga tulitonuhia, fakamaau, pe fakakikihi. Te nau lava ʻo tokoni ke tau akoʻi ʻa e moʻoní ʻi ha founga te ne lava ʻo tāpuekina ʻa e kalasí mo tokoniʻi ʻa e niʻihi kehé ke langaki ʻenau tui kia Sīsū Kalaisí.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi (lolotonga hono teuteuʻi ʻo e lēsoní)

Lolotonga hono teuteuʻi ha lēsoni ki he muimui ki he ngaahi ueʻi ʻa e Laumālie Māʻoniʻoní, ʻoku ou fakakaukau ki he ngaahi fehuʻi ko ʻení: “ʻE founga fēfē hano fakafōtunga ʻe he ngaahi aʻusia mo e vā fetuʻutaki ʻo ʻeku kau akó ʻa e anga ʻo ʻenau fakakaukaú, ongoʻí, mo hono moʻui ʻaki ʻa e ngaahi moʻoni ko ʻení?” pea “ʻI heʻemau ako ʻa e moʻoni ko ʻení, ʻe lava nai ha taha ʻo ʻeku kau akó ʻo ongoʻi ʻoku tuenoa, puputuʻu, pe loto-mamahi koeʻuhí ʻoku ʻikai haohaoa hono ngaahi tūkungá ʻi hono fakafekauʻaki mo e tokāteline ko ʻení?

Peá u tali leva: “Mahalo ʻe ʻi ai haʻaku kau ako ʻoku nau ongoʻi kuo teʻeki ai ke nau maʻu ha ueʻi kimuʻa, pe ʻoku ʻikai ke nau ongoʻi ʻoku folofola mai ʻa e Laumālie Māʻoniʻoní kiate kinautolu. Mahalo ʻoku ʻi ai haʻaku kau ako ʻe niʻihi ʻoku nau ongoʻi ʻoku ʻikai ke nau taau. Mahalo naʻa ʻi ai ha ngaahi taimi ʻoku ʻikai fakapapauʻi ai ʻe heʻeku kau akó pe naʻe maʻu ʻa e ueʻí mei he Laumālie Māʻoniʻoní. Mahalo ʻe ʻi ai ha kau ako ʻoku helaʻia ʻi he fanongo ki he ngaahi talanoa mei he niʻihi kehé fekauʻaki mo e muimui ki he Laumālié koeʻuhí he ʻoku ngali fakaofo maʻu pē ia pea ʻoku teʻeki hoko ʻa e ngaahi meʻa ko iá kiate kinautolu.”

Akoako (lolotonga hono teuteuʻi ʻo e lēsoní)

Lolotonga hono teuteuʻi ha lēsoni ʻi he 1 Nīfai 3:7, “Te u ʻalu ʻo fai ʻa e ngaahi meʻa kuo fekau ʻe he ʻEikí”:

• Fakakaukauloto pea tali: “ʻE founga fēfē hano fakafōtunga ʻe he ngaahi aʻusia mo e vā fetuʻutaki ʻo ʻeku kau akó ʻa e anga ʻo ʻenau fakakaukaú, ongoʻí, mo hono moʻui ʻaki ʻa e ngaahi moʻoni ko ʻení?” pea “ʻI heʻemau ako ʻa e moʻoni ko ʻení, ʻe lava nai ha taha ʻo ʻeku kau akó ʻo ongoʻi ʻoku tuenoa, puputuʻu, pe loto-mamahi koeʻuhí ʻoku ʻikai haohaoa hono ngaahi tūkungá ʻi hono fakafekauʻaki mo e tokāteline ko ʻení?”

Lolotonga hono teuteuʻi ha lēsoni fekauʻaki mo e tuʻunga tangata pe fefiné ko ha ʻulungaanga mahuʻinga ia ʻo hotau tuʻunga mo e taumuʻa taʻengatá ʻi he lēsoní ko e “Tuʻunga Tangata pe Fefiné mo e Tuʻunga Taʻengatá”:

• Fakakaukauloto pea tali: “ʻE founga fēfē hano fakafōtunga ʻe he ngaahi aʻusia mo e vā fetuʻutaki ʻo ʻeku kau akó ʻa e anga ʻo ʻenau fakakaukaú, ongoʻí, mo hono moʻui ʻaki ʻa e ngaahi moʻoni ko ʻení?” pea “ʻI heʻemau ako ʻa e moʻoni ko ʻení, ʻe lava nai ha taha ʻo ʻeku kau akó ʻo ongoʻi ʻoku tuenoa, puputuʻu, pe loto-mamahi koeʻuhí ʻoku ʻikai haohaoa hono ngaahi tūkungá ʻi hono fakafekauʻaki mo e tokāteline ko ʻení?”

Fakatātaaʻi (lolotonga ʻa e kalasí)

• ʻI hono aleaʻi ʻa e tokāteline ʻo e ʻaho Sāpaté, ʻoku pehē ʻe ha tokotaha ako, “ʻOku fiefia hoku fāmilí ke mamata ʻi ha ngaahi sipoti ʻi he Sāpaté.” ʻI hoʻo tokanga taha ki he fakamatala ʻa hoʻo kau akó, ʻokú ke fakakaukau, “Ko e hā ha ngaahi aʻusia mo e vā fetuʻutaki ʻe ala maʻu ʻe he tokotaha ako ko ʻení ʻe kehe ai ʻene fakakaukaú meiate au?” pe “Ko e hā mo ha toe meʻa ʻoku fiemaʻu ke u ʻilo ke mahino kakato kiate au ʻa e fakakaukau ʻokú ne maʻú?”

Lomiʻi heni ke vakai ki ha fakatātaaʻi ʻo e sīpinga ko ʻení.

Akoako (lolotonga ʻa e kalasí)

Lolotonga hono aleaʻi ʻa e ngāue fakafaifekaú, ʻoku fehuʻi ʻe ha tokotaha ako, “Ko e hā ʻa e meʻa mahuʻinga fekauʻaki mo e ngāue fakafaifekau ʻa e talavou kotoa pē?”

• Fakakaukau fakalongolongo, “Ko e hā ha ngaahi aʻusia mo e vā fetuʻutaki ʻe ala maʻu ʻe he tokotaha ako ko ʻení ʻe kehe ai ʻene fakakaukaú meiate au?” pe “Ko e hā mo ha toe meʻa ʻoku fiemaʻu ke u ʻilo ke mahino kakato kiate au ʻa e fakakaukau ʻokú ne maʻú?”

ʻI ha fealeaʻaki fekauʻaki mo e kau palōfitá mo e fakahaá, ʻoku fehuʻi ʻe ha tokotaha ako, “ʻE liliu nai ʻa fē ʻa e Siasí ke fenāpasi ange mo e māmaní mo ʻenau ngaahi tuʻutuʻuní?”

• Fakakaukau fakalongolongo, “Ko e hā ha ngaahi aʻusia mo e vā fetuʻutaki ʻe ala maʻu ʻe he tokotaha ako ko ʻení ʻe kehe ai ʻene fakakaukaú meiate au?” pe “Ko e hā mo ha toe meʻa ʻoku fiemaʻu ke u ʻilo ke mahino kakato kiate au ʻa e fakakaukau ʻokú ne maʻú?”

Aleaʻi pe Fakalaulauloto

• Ko e hā ʻokú ke ako fekauʻaki mo hono akoʻi ʻa e moʻoní ʻi he manavaʻofa ʻi hoʻo akoako ki hono ʻiloʻi ʻa e fakakaukau ʻa e kau akó kimuʻa mo e lolotonga ʻa e kalasí?

• ʻE tokoniʻi fēfē koe ʻe he akoako ko ʻení ke ke faiako ʻo hangē ange ko Sīsū Kalaisí?

Fakakau

Fili ha taha ʻo e ngaahi akoako ʻi ʻolungá ke ke nofotaha ai ʻi he uike ʻe ua ka hokó. Palani ʻa e founga ʻe hokohoko atu ai hoʻo fakaangaanga ʻa e ngaahi taukei ko ʻení. Hangē ko ʻení:

• ʻI he moʻoni takitaha ʻokú ke teuteú, te ke lava ʻo fili ke tuku ha miniti ʻe nima ke kiʻi taimi, fakakaukauloto, pea tali ʻa e ngaahi fehuʻi ʻoku tokoni atu ke ke ʻiloʻi ʻa e fakakaukau ʻa ha tokotaha ako.

• Kimuʻa pea kamata ʻa e kalasí, feinga ke ʻiloʻi ha tokotaha ako pea fakakaukau ki ha fakamatala pe fehuʻi te ne ala maʻu ki he moʻoni takitaha. Pea fakakaukau fakalongolongo leva, “Ko e hā ha ngaahi aʻusia mo e vā fetuʻutaki ʻe ala maʻu ʻe he tokotaha ako ko ʻení ʻe kehe ai ʻene fakakaukaú meiate au?” pe “Ko e hā mo ha toe meʻa ʻoku fiemaʻu ke u ʻilo ke mahino kakato kiate au ʻa e fakakaukau ʻokú ne maʻú?” ʻE teuteuʻi koe heni ke ke fakahoko ʻeni lolotonga ʻa e kalasí ʻi hoʻo tokanga taha ki he ngaahi fakamatala mo e ngaahi fehuʻi ʻa e tokotaha akó.

Fie Ako Lahi Ange?

• Chad H Webb, “Ko e Manavaʻofá” (Fakamafola ʻo e ako fakataʻu ʻa e Seminelí mo e ʻInisititiuti Fakalotú, 26 Sānuali 2021), broadcasts.ChurchofJesusChrist.org

• Jean B. Bingham, “Akoʻi ʻa e Moʻoní ʻi he Lea ʻo e ʻOfá” (Fakamafola ʻo e ako fakataʻu ʻa e Seminelí mo e ʻInisititiuti Fakalotú, 19 Sānuali 2021), broadcasts.ChurchofJesusChrist.org

Pōtoʻi Ngāué

Feinga ke fakamahinoʻi mo mahino ʻa e taumuʻa moʻoni ʻo e ngaahi fehuʻi, ongo, mo e tui ʻa e tokotaha akó.

Fakamatalaʻi

ʻOku kau ʻi he feinga ko ia ke fakamahinoʻi mo mahino ʻa e taumuʻa moʻoni ʻo e ngaahi fehuʻi, ongo, mo e tui ʻa ha tokotaha ako, ʻa e feinga ke ʻilo lahi ange ki he aʻusia, tūkunga, pe ongo naʻá ne ueʻi hake ʻa e fehuʻí. Hili hono vahevahe ʻe ha tokotaha ako ha fehuʻi, ongo, pe tui, te ke lava ʻo fakamālō kiate ia ʻi he meʻa naʻe vahevahé pea fehuʻi ange leva pe ʻoku loto ʻa e tokotaha akó ke tali ha ngaahi fehuʻi vakaiʻi. Kapau ʻe tali ʻikai ʻa e tokotaha akó, fakapapauʻi ange ki ai ʻoku sai pē, pea toe ʻeke pē ʻa e fehuʻi pe fakamatala naʻe fuofua faí. Kapau ʻe tali ʻio ʻa e tokotaha akó, ʻeke ha fehuʻi vakaiʻi te ne fakaafeʻi ʻa e tokotaha akó ke vahevahe lahi ange fekauʻaki mo e meʻa naʻá ne ueʻi ʻa e fehuʻí pe fakamatalá. ʻE lava ke tokoni hono fai ʻení ke ke toe femahinoʻaki lelei ange ai mo e niʻihi kehe ʻi hoʻo kalasí pea mo tali ʻi he manavaʻofa mo e ʻofa.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātāí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

1. ʻOku faiako ʻa Sisitā Kāniā fekauʻaki mo e lakanga fakataulaʻeikí ʻi he folofolá ʻi he fehuʻi atu ha taha ʻo ʻene kau akó, “Ko e hā naʻe ʻikai fakangofua ai ʻa e kau tangata ʻUliʻulí ke maʻu ʻa e lakanga fakataulaʻeikí kae ʻoua kuo aʻu ki he 1978?”

   • Sisitā Kāniā: Fakamālō atu ʻi hoʻo fehuʻí. Ko ha fehuʻi ʻeni kuo fakakaukau ki ai hatau tokolahi. ʻE lava ke u fai atu ha ngaahi fehuʻi vakaiʻi?

   • Tokotaha Akó: Sai ʻaupito!

   • Sisitā Kāniā: Ko e hā naʻá ne fakatupu hoʻo fakakaukau ki he fehuʻi ko ʻení?

2. ʻOku faiako ʻa Brother Moneti fekauʻaki mo e lakanga fakataulaʻeikí ʻi he folofolá ʻi he fehuʻi atu ha taha ʻo ʻene kau akó, “Ko e hā naʻe ʻikai fakangofua ai ʻa e kau tangata ʻUliʻulí ke maʻu ʻa e lakanga fakataulaʻeikí kae ʻoua kuo aʻu ki he 1978?”

   • Brother Moneti: Fakamālō atu ʻi hoʻo fehuʻí. Ko ha fehuʻi ʻeni kuo fakakaukau ki ai hatau tokolahi. ʻE lava ke u fai atu ha ngaahi fehuʻi vakaiʻi?

   • Tokotaha Akó: ʻIkai.

   • Brother Moneti: ʻOua te ke tokanga ki ai. ʻOku ou fiefia ʻi hoʻo fehuʻí. Tau talanoa fekauʻaki mo e fehuʻí.

Ko e ngaahi sīpinga kehe ʻo ha fehuʻi vakaiʻi te ke lava ʻo ʻeké ko e:

• ʻOku hounga kiate au hoʻo loto-fiemālie ke vahevahe ia mo kimautolú. ʻOku ʻi ai nai ha aʻusia pe tūkunga naʻá ne ueʻi ʻa e [fehuʻi, fakakaukau, tui] ko iá?

• Mālō hoʻo fehuʻi maí. Te ke lava ʻo fakamatala lahi ange fekauʻaki mo e meʻa naʻá ne fakatupu ʻa e fehuʻi ko ʻení?

• Mālō hoʻo fehuʻi maí. Te ke lava ʻo tokoni mai ke mahino kiate au ʻa e meʻa naʻá ne tataki koe ki he fehuʻi ko iá pe ʻai ke ke fie ʻilo ki aí?

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

Feinga ke mahino mo fakamahinoʻi ʻa e meʻa naʻá ne fakatupunga ʻa e fehuʻi, ongo, pe tui ʻi he ngaahi tūkunga ko ʻení:

1. Lolotonga ha lēsoni fekauʻaki mo e mali ʻi he vahaʻa ʻo ha tangata mo ha fefine ko e tuʻutuʻuni ʻe he ʻOtuá, ʻoku fehuʻi ʻe ha tokotaha ako, “Ko e hā ʻoku ʻikai ke tau saiʻia ai ʻiate kinautolu ʻoku kau ʻi he kakai LGBTQ? Ko e hā ʻoku ʻikai lava ai ke nau mali kapau ʻoku nau feʻofaʻakí?”

2. Lolotonga hano aleaʻi ʻo e ngāue fakafaifekaú, ʻoku vahevahe ʻe ha tokotaha ako, “Naʻá ku pehē ʻoku ʻikai ha fili ʻa e kau talavoú pe te nau ʻalu ʻo ngāue fakafaifekau pe ʻikai ka ʻoku lava pē ʻa e kau finemuí ia ʻo fili.”

Aleaʻi pe Fakalaulauloto

• ʻOku mou pehē ko e hā ʻoku totonu ke tau tuku ai ha taimi ke mahino lelei ʻa e meʻa ʻoku vahevahé? ʻOku mou pehē ʻe liliu fēfē ha aʻusia fakaloki ako ʻe heʻetau feinga ke mahino lelei ʻa e taumuʻa moʻoni ʻa ha tokotaha ako? ʻE tokoni fēfē ʻetau mahino ki he taumuʻa moʻoni ʻa ha tokotaha ako ke fakafehokotaki kinautolu kia Kalaisi?

Fakakau

• Fakafanongo fakalelei ʻi he loki akó ki he meʻa ʻoku vahevahé pea fakakaukau fakalelei ki he meʻa te ke fiemaʻu ke toe fakamahinoʻi atú. Hili hoʻo fakamālō ki he tokotaha ako naʻá ne fai ʻa e fehuʻí, ʻeke ha fehuʻi vakaiʻi te ne fakaʻatā ʻa e tokotaha akó ke fakamahinoʻi atu.

Fie Ako Lahi Ange?

• “Asking Follow-Up Questions” (vitiō), ChurchofJesusChrist.org

• Randall L. Ridd, “Moʻui ʻi he Loto Moʻoni,” Liahona, ʻOkatopa 2015, 12–15