Fitsipiky ny fampianarana tahaka ny an’i Kristy: Tiavo ireo izay ampianarinao

Mamoròna tontolo azo antoka izay hanajana ny rehetra sy hahafantaran’izy ireo fa sarobidy ny anjara biriky entin’izy ireo.

Fahaiza-manao

Ampitao fa manome lanja ny mpianatra ianao alohan’ny hanehoany hevitra na rehefa manangana ny tanany izy ireo mba haneho hevitra.

Mamaritra

Afaka maneho fitiavana ho an’ireo mpianatsika isika amin’ny alalan’ny fampitana amin’izy ireo fa omentsika lanja ny fandraisan’izy ireo anjara. Indraindray rehefa manao fanamarihana ny mpianatra dia mety ho toy ny tsy liana amin’izany isika na variana amin’ny fieritreretana ny zavatra handeha holazaintsika manaraka. Mora ny hitodihantsika any an-kafa na hanombohantsika mijery ny ao anatin’ny soratra masintsika rehefa mieritreritra ny fomba hamaliana isika. Zava-dehibe ny mitadidy fa te hahatsapa ho henoina sy raisina tsara ary misy mahita ny mpianatra. Azontsika atao ny manampy ny mpianatra hahatsapa izany amin’ny alalan’ny fifantohana tanteraka amin’izy ireo rehefa mizara fanamarihana izy. Fomba iray hanatanterahana izany ny fampitodihana ny vatanao hanatrika azy ireo, mijery ny masony, ary mifantoka amin’izy ireo mandritra ny fotoana rehetra hizarany ny heviny. Fomba iray hafa ny filazana am-bava fa manome lanja ny fandraisan’izy ireo anjara ianao na dia alohan’ny hanehoan’izy ireo hevitra aza. Rehefa manangan-tanana ny mpianatra dia afaka miteny zavatra toy izao ianao: “Jordan a, tianay ny hihaino ny hevitrao. Mba lazao anay ny zavatra eritreretinao,” na “Thabo a, faly izahay ny hiana-javatra avy aminao. Inona no mba tianao hozaraina?” Ireo fihetsika tsotra ireo dia afaka mampita amin’ny mpianatra fa omena lanja ny fandraisan’izy ireo anjara ary ilaina amin’ny traikefa amin’ny fianarana.

Lamina hakan-tahaka

Jereo ny fihetsik’ity mpampianatra ity rehefa mihaino ny fanehoan-kevitry ny mpianatra iray izy. Mifanatrika sy mijery ilay mpianatra izy. Tsy mifantoka amin’ny mpianatra hafa, na ny soratra masina, na ny zavatra hafa izy. Mbola misy zavatra hafa ve azonao ianarana avy amin’ity sary ity momba ny fampitana amin’ny mpianatra fa omena lanja izy ireo?

Tsindrio eto raha hijery horonan-tsary maneho io lamina hakan-tahaka io.

Manazatra tena

• Amin’ity herinandro ity dia ampiharo io fahaiza-manao io amin’ny alalan’ny fifantohana amin’ny fanakalozan-kevitra ataonao miaraka amin’ny olona hafa sy ny fampitana fa manome lanja ny fandraisan’izy ireo anjara ianao. Mifanatreha amin’ilay olona dia jereo ny masony rehefa miresaka aminy ianao. Esory ireo zavatra tsy mampifantoka rehetra ary mifantoha tanteraka amin’ilay olona.

Mifanakalo hevitra na misaintsaina

• Inona no nianaranao momba ny maha-zava-dehibe ny fampitan-javatra amin’ny fomba hafa na am-bava rehefa milaza amin’ny hafa fa manome lanja azy ireo ianao?

• Inona avy ireo fomba sasany ahafahanao milaza amin’ny mpianatra fa manome lanja ny fanehoan-kevitr’izy ireo ianao?

• Makà fotoana kely dia mieritrereta fotoana nanehoan’ny Mpamonjy io fahaiza-manao io tamin’ny alalan’ny ohatra.

Mampiditra fahalalana

• Mandritra ny lesonao manaraka dia ampiharo io fahaiza-manao io amin’ny alalan’ny fanatrehana ny mpianatrao, ny fametrahana ny soratra masinao, ary ny fijerena ny mpianatra amin’ny maso rehefa mizara hevitra izy ireo.

Te hianatra misimisy kokoa ve ianao?

• Lohahevitra sy fanontaniana, “Fifandraisana,” topics.ChurchofJesusChrist.org

• &

Fahaiza-manao

Ampitao fa tsy vitan’ny hoe raisina an-tanan-droa fotsiny ireo mpianatra fa ilaina ihany koa izy ireo.

Feed My Sheep [Fahano ny ondriko], nataon’i Kamille Corry

Mamaritra

Mila mahatsapa ho ilaina ny mpianatra. Ny Mampianatra araka ny fomban’ny Mpamonjy dia milaza hoe: “Mety tena azo antoka fa saika ny olona rehetra asaina ampianarinao dia sahirana amin’ny lafiny iray eo amin’ny fahazoana fahatsapana ho voahaja sy ho omena lanja. Amin’ny alalan’ny fomba entinao mitia sy manaja azy ireo no ahafahanao mampita fa tsy hoe raisina an-tanan-droa fotsiny izy ireo fa ilaina ihany koa.” Maro ireo fomba ahafahan’ny mpampianatra manampy mpianatra iray hahatsapa fa ilaina ao an-dakilasy izy. Fomba iray hanaovana izany ny filazana tsotra fotsiny ilay fahatsapana amin’ny teny. Azo atao amin’ny fotoana rehetra izany amin’ny alalan’ny fampitana amin-kitsimpo amin’ny mpianatra iray, na amin’ny iray kilasy manontolo, ny fomba nanatsaran’ny fanatrehan’ny mpianatra iray na ny fandraisan’izy ireo anjara amin’ny fianarana ao an-dakilasy

Lamina hakan-tahaka

• Vao avy nizara tamin’ny iray kilasy ny antony itiavany mamaky ny soratra masina i Beth. Hoy Rahalahy Singh: “Ry ranabavy sy rahalahy, feno fankasitrahana aho fa isan’ny ato amin’ny kilasintsika i Beth mba hamporisika antsika rehetra hitia ny soratra masina.”

• Miarahaba an’i María Rahavavy Villar dia miteny hoe: “Tena faly aho fa eto ianao. Mampamiratra foana ny androko ny tsikinao. ”

Tsindrio eto raha hijery horonan-tsary maneho io lamina hakan-tahaka io.

Manazatra tena

Ahoana no mety hanehoanao fa ilaina ny mpianatra iray rehefa mahita ireto toe-javatra manaraka ireto ianao?

• Nanolo-tena hanao ny vavaka fanombohana i Marco.

• Tsy dia mandray anjara firy i Sondra, saingy tonga ara-potoana ao an-dakilasy foana izy.

• Nanasa namana iray hianatra i Amara.

Mifanakalo hevitra na misaintsaina

• Inona no zavatra niainanao tamin’ny fampiharana io fahaiza-manao io, ary inona no nianaranao?

• Rehefa avy nampihatra io fahaiza-manao io ianao dia inona no fahasamihafana tsapanao fa misy eo amin’ny fahatsapana ho voaray an-tanan-droa sy ny fahatsapanaho ilaina?

Mampiditra fahalalana

• Mitadiava mpianatra iray farafahakeliny amin’ity herinandro ity izay hanehoanao fa ilaina izy. Tohizo ny fanaovana izany isan-kerinandro na matetika kokoa, raha azo atao.

Te hianatra misimisy kokoa ve ianao?

• Jean B; Bingham, “Hoentiko ao an-tokantranoko ny fahazavan’ny filazantsara,” Liahona, nôv. 2016, 6–9

• (Quentin L. Cook, “Fo mifamihina ao amin’ny fahamarinana sy firaisan-kina,” Liahona, nôv. 2020, 18–21)