Ngaahi Tefitoʻi Moʻoni ʻo e Faiako Hangē ko Kalaisí: Faiako ʻaki ʻa e Laumālié

Mateuteu maʻu pē ke ke tali ʻa e ngaahi ueʻi fakalaumālie fekauʻaki mo e ngaahi fiemaʻu ʻa e kau akó.

Pōtoʻi Ngāué

ʻEke ha fehuʻi ke siviʻi ʻa e akó kimuʻa pea hoko atu ʻa e lēsoní.

Fakamatalaʻi

ʻOku fakaafeʻi kitautolu ʻe he Ko e Faiako ʻi he Founga ʻa e Fakamoʻuí ke tau fakalaulauloto ki he fehuʻi ko ʻení: “ʻOku ʻiloʻi nai ʻe kinautolu ʻokú ke akoʻí ʻokú ke mahuʻingaʻia ange ʻi heʻenau akó kae ʻikai ko hono fakakakato ha lēsoní?” ʻE lava ke fakahaaʻi ʻe he kau faiakó ʻoku nau mahuʻingaʻia ʻi he ako ʻa e kau akó ʻaki haʻanau ʻeke ha ngaahi fehuʻi fakamahino kimuʻa pea toki hoko atu ki he konga hoko ʻo ha lēsoni. Ke fai ʻení, ʻe toʻo ʻe he faiakó ha ngaahi miniti siʻi hili hono aleaʻi ha tefitoʻi moʻoni, tefito pe fehuʻi ke ne ʻeke ha fehuʻi ke fakamahinoʻi ʻa e meʻa ʻoku mahino ki he kau akó. ʻOku kau ʻi he sīpinga ʻo e ngaahi fehuʻi ko ʻení ʻa e:

• Ko e hā ʻokú ke akó?

• Ko e hā ha ngaahi fehuʻi ʻokú ke kei maʻu fekauʻaki mo e meʻa ʻoku tau akó?

• ʻOku ʻi ai mo ha toe meʻa ʻokú ke fifili ki ai?

• Naʻe fakapuputuʻu nai pe taʻe mahino ha meʻa heni?

ʻOku vakaiʻi ʻe he ngaahi fehuʻi ko ʻení ʻa e ako mo e mahino ʻa e kau akó pea ʻoku ʻikai totonu ke fai ia ʻi ha founga te ne fakamaaʻi kinautolu. ʻOku fakaafeʻi ʻe he tali ki he ngaahi fehuʻi ko ʻení ʻa e Laumālie Māʻoniʻoní ke tokoni ki ha faiako ke ne ʻiloʻi ʻa e founga ke tali ʻaki ʻa e ngaahi fiemaʻu ʻa e kau akó.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

• Hili ha fealeaʻaki ʻi he tuí, naʻe kiʻi taʻofi ai ʻa Sisitā Lōpinisoni peá ne fehuʻi ange: “Kimuʻa pea tau hoko atu ki he konga folofola hokó, ʻoku ʻi ai mo ha toe meʻa kehe ʻoku mou fifili ki ai fekauʻaki mo e tuí?”

• Hili hono ako ʻa e ngaahi potufolofola fekauʻaki mo e Hāʻele ʻAnga Ua Maí, ʻoku fehuʻi ʻe Brother Māhina, “Te ke fakamatalaʻi fēfē ʻa e meʻa ʻokú ke ako fekauʻaki mo e Hāʻele ʻAnga Ua Maí?”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

1. Ko e hā ha ngaahi fehuʻi te ke lava ʻo ʻeke ke vakaiʻi ʻa e mahino ʻa e kau akó hili ha fealeaʻaki fekauʻaki mo e fakahā ʻi he Tokāteline mo e Ngaahi Fuakava 8:2–3?

2. Vakai ki ha lēsoni ʻoku teu fakahoko ʻi he naunau fakalēsoní. Hiki ha ngaahi fehuʻi te ke lava ʻo ʻeke ke vakaiʻi ʻa e mahino ʻa e kau akó ki ha tefito kimuʻa pea hoko atú.

Aleaʻi pe Fakalaulauloto

• ʻE tokoniʻi fēfē koe ʻe he faʻahinga fehuʻi pehení ke ke mateuteu ke tali ʻa e ngaahi ueʻi fakalaumālie fekauʻaki mo e ngaahi fiemaʻu hoʻo kau akó?

Fakakau

• ʻI he uike ʻe ua ka hokó, feinga ke fai ha ngaahi fehuʻi ke vakaiʻi ʻa e ako ʻa e kau akó kimuʻa pea nau toki hiki ki he tefito hoko ʻi he lēsoní. Tokanga ki he ngaahi tali ʻa e kau akó mo e ngaahi ueʻi ʻa e Laumālie Māʻoniʻoní ʻi hoʻo fakakau ʻa e taukei ko ʻení ki he aʻusia fakaloki akó.

Fie Ako Lahi Ange?

• “An Evening with Elder David A. Bednar” (Evening with a General Authority, Feb. 7, 2020), ChurchofJesusChrist.org

Pōtoʻi Ngāué

Fakafanongo pea tokanga ki he kau akó ke nau fai ha ngaahi fehuʻi vakaiʻi.

Fakamatalaʻi

Ko e kau faiako ko ia ʻoku nau fai ha ngaahi fehuʻi vakaiʻi leleí, ʻoku nau siofi fakalelei ʻenau kau ako ʻi he kalasí pea fakafanongo lelei ki heʻenau ngaahi talí mo e ngaahi fehuʻí. Ko e niʻihi ʻo e ngaahi founga ke teuteuʻi ai ʻa e ngaahi fehuʻi vakaiʻí ko e:

• Fakafanongo fakalelei, ʻo tokanga taha ki he meʻa ʻoku lea ʻaki ʻe he tokotaha akó, kau ai ʻa e fakafōtungá mo e ongó.

• Vakai ki he ngaahi fakafōtunga ʻo e fofongá, lea ʻo e sinó, pe meʻa ʻoku fai ʻe ha tokotaha ako.

• Lolotonga hoʻo fakafanongó mo e sió, fehuʻi pē kiate koe, “Ko e hā ʻoku ou fie ʻilo lahi ange ki ai fekauʻaki mo e fakamatalá, fehuʻí, pe ko e tokotaha akó?” Hili iá pea fehuʻi ki he tokotaha akó fekauʻaki mo e meʻa ʻokú ke fie ʻiló.

ʻE lava ke kamata ha fehuʻi vakaiʻi ʻo pehē, “Fakamatala lahi ange fekauʻaki mo e …” pe “Naʻá ku fakatokangaʻi ha ongo ʻi hoʻo vahevahé. Te ke lava nai ʻo tokoni mai ke mahino kiate au ʻa e meʻa ʻokú ke ongoʻí?” ʻOku lava heni ke nofotaha ʻa e faiakó ʻi he tokotaha akó pea ʻoange ki he tokotaha akó ha faingamālie ke kau ʻi ha tuʻunga ʻoku loloto angé. ʻIkai ngata aí, ʻokú ne fakaafeʻi ha fakahā mei he Laumālié, ki he tokotaha akó mo e faiakó fakatouʻosi.

Fakatātaaʻi

• ʻOku vahevahe ʻe Sione ha aʻusia fekauʻaki mo ha lotu naʻe fai ʻe hono fāmilí. Fakatatau mo e ongo naʻá ne maʻu ʻi hono leʻó, ʻoku hangē ʻoku mahuʻinga lahi kiate ia ʻa e lotú. ʻI he fakafanongo ʻa Sisitā Livielá, ʻokú ne fehuʻi loto pē, “Ko e hā ʻoku ou fie ʻilo lahi ange ki ai mei he aʻusia ko ʻení?” ʻOku fie ʻilo ʻa Sisitā Liviela ki he meʻa naʻá ne ako fekauʻaki mo e Tamai Hēvaní, ko ia naʻá ne fehuʻi ange, “Uani, ko e hā naʻá ke ako fekauʻaki mo e Tamai Hēvaní mei he meʻa naʻá ke aʻusia ʻi he lotú?”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

ʻI hoʻo lau ʻa e ngaahi fakamatala ko ʻeni mei he kau akó, fehuʻi pē kiate koe, “Ko e hā ʻoku ou fie ʻilo lahi ange ki aí?” Hiki ha fehuʻi vakaiʻi te ke lava ʻo fai ki he tokotaha ako ko ʻení.

• ʻOku pehē fiefia ʻe ha tokotaha ako, “Naʻá ku lau e folofolá ʻi ha ʻaho ʻe taha peá u maʻu ai ha kupuʻi lea naʻe fuʻu fiemaʻu ke u fanongo ki ai.”

• ʻI he fofonga taʻefiemālie ʻa ha taha ako, naʻá ne fehuʻi ange, “Te u ʻiloʻi fēfē ʻa e taimi ko e fakakaukau pē ia ʻaʻakú pe ko e lea mai ia ʻa e Laumālie Māʻoniʻoní?”

• ʻOku pehē ʻe ha tokotaha ako, “ʻOku fakamanatu mai ʻe he potufolofola ko ʻení kiate au ʻa e meʻa naʻe lea ʻaki ʻe Palesiteni Nalesoni fekauʻaki mo e faʻa fakaleleí.”

Aleaʻi pe Fakalaulauloto

• Ko e hā ʻoku mahuʻinga ai ʻa e fakafanongó mo e sió ʻi he taimi ʻoku fai ai ha fehuʻi vakaiʻí?

• Ko e hā ʻoku hoko ai hono fai ʻo e ngaahi fehuʻi vakaiʻí ko ha konga mahuʻinga ʻo e aʻusia fakaakó?

Fakakau

• Faʻu ha palani ʻe lava ʻo tokoni atu ke hokohoko atu hoʻo fakafanongó mo tokanga ke fai ha ngaahi fehuʻi vakaiʻí.

Fie Ako Lahi Ange?

• David A. Bednar mo Chad H Webb, “Discussion,” (evening with a General Authority, Feb. 7, 2020), Gospel Library