Ngaahi Tefitoʻi Moʻoni ʻo e Faiako Hangē ko Kalaisí: Faiako ʻaki ʻa e Laumālié

Tokoniʻi ʻa e kau akó ke kumi, ʻiloʻi, mo ngāueʻi ʻa e fakahā fakatāutahá.

Pōtoʻi Ngāué

Kimuʻa hono tali ha fehuʻi ʻa ha taha akó, kiʻi taimi ʻo fakakaukau, “Ko e hā te u lava ʻo fehuʻi kiate kinautolú?” pe “Ko e hā te u lava ʻo fakaafeʻi ke nau faí?”

Fakamatalaʻi

ʻI he taimi ʻoku fakamatala ai pe fehuʻi ha tokotaha ako, naʻe akoʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOua ʻe fakakaukau, ʻKo e hā te u talaange kiate kinautolú?ʼ ʻoku totonu ko e tokangá ko e, ʻKo e hā te u ʻeke kiate kinautolú?ʼ Pea ʻikai ngata pē ʻi he ʻKo e hā te u ʻeke kiate kinautolú?ʼ ka ʻKo e hā te u fakaafeʻi ke nau fakahokó?ʼ” (“An Evening with Elder David A. Bednar” [evening with a General Authority, Feb. 7, 2020], broadcasts.ChurchofJesusChrist.org ʻI he taimi ʻoku fehuʻi ai ʻe ha faiako “Ko e hā te u lava ʻo ʻeke kiate kinautolú?” ʻe lava ke tataki ʻa e faiakó ʻe he Laumālie Māʻoniʻoní ke ne maʻu ha fakamatala lahi ange ke lelei ange ʻene vakai ki he tokotaha akó pe ʻilo ʻa e founga ke tokoniʻi ai ia ke fekumi mo ngāueʻi ʻa e fakahā fakatāutahá.

ʻI he taimi ʻoku fehuʻi ai ʻe ha faiako “Ko e hā te u fakaafeʻi ke nau fakahokó?” ʻe lava ke fakafehokotaki ʻa e faiakó mo e Laumālie Māʻoniʻoní ke ʻiloʻi ʻa e fakaafe ke faí, pea ʻe lava ke fakakaukauʻi lelei ange ʻe he tokotaha akó ʻa e founga ke ngāueʻi ai ʻa e fakahā fakatāutahá.

Fakatātaaʻi

Fekumi ki he fakakaukau ʻa e faiakó kimuʻa pea toki talí:

• ʻOku tali ʻa Malia ʻi he ʻosi ʻa e kalasí ke ʻeke ʻa e founga te ne ʻilo ai ʻa e faikehekehe ʻi heʻene fakakaukaú mo e ngaahi ueʻi ʻa e Laumālié.

• Kimuʻa peá u talí, ʻoku ou kiʻi tuʻu ʻo fakakaukau, “Ko e hā te u lava ʻo fehuʻi ʻe fakaafeʻi ai ia ke fekumi ki heʻene talí ʻo fakafou ʻi he fakahā fakatāutahá?” mo e “Ko e hā te u lava ʻo fakaafeʻi ia ke fakahoko kae lava ke ne ako e talí ʻiate ia pē?”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

• ʻOku fakahoko ʻe Safali ʻa e fehuʻi ko ʻení ʻi he kalasí: “Te u fakaʻaongaʻi fēfē ʻa e Fakalelei ʻa Sīsū Kalaisí ke tokoniʻi au ʻi ha ngaahi meʻa kehe mei he fakamolemolé?”

  Kimuʻa pea faʻu hoʻo talí, kiʻi taʻofi ʻo fakakaukau, “Ko e hā te u lava ʻo faí …”

Fakatokangaʻi ange: ʻOku ʻikai fakahoko ʻe he akoakó ʻa e fehuʻí pe fakaafé. ʻOku kole atu ia ke ke kiʻi taimi ʻo fakakaukau, “Ko e hā te u lava ʻo kole ange pe fakaafeʻi ia ke ne fakahokó kae lava ke ne fetuʻutaki mo e Laumālie Māʻoniʻoní pea ako ʻa e talí ʻiate ia pē?”

• ʻOku pehē ʻe ʻEni, “He ʻikai ke u teitei mali. Kuo fuʻu tokolahi e kau mēmipa hoku fāmilí kuo nau ʻosi vete mali, ko ia ʻoku ʻikai hano ʻaonga.”

  Kimuʻa pea faʻu hoʻo talí, kiʻi taʻofi ʻo fakakaukau, “Ko e hā te u lava ʻo faí …”

• ʻOku fehuʻi ʻe Niki, “Ko e hā e meʻa lelei taha te u lava ʻo fai ke teuteu ai ki he ngāue fakafaifekaú?”

  Kimuʻa pea faʻu hoʻo talí, kiʻi taʻofi ʻo fakakaukau, “Ko e hā te u lava ʻo faí …”

Aleaʻi pe Fakalaulauloto

• Ko e hā hoʻo tali angamahení hili hano ʻeke atu ʻe ha taha ha fehuʻi?

• Ko e hā kuó ke ako fekauʻaki mo hono tataki ʻa e kau akó ke nau fekumi mo ngāueʻi ʻa e fakahā fakatāutahá?

Fakakau

• Fakakaukauloto ʻi he ʻaho kotoa pē ʻi he uiké ni ʻoku fakahoko atu ʻe ha tokotaha ako ha fehuʻi. Kimuʻa peá ke talí, lea fakalongolongo pē kiate koe, “Ko e hā te u lava ʻo kole ange pe fakaafeʻi ia ke ne fakahokó kae lava ke ne fetuʻutaki mo e Laumālie Māʻoniʻoní pea ako ʻa e talí ʻiate ia pē?” Pea ʻi he lolotonga ʻo e uiké, ʻi he taimi ʻoku fai atu ai ʻe ha tokotaha ako ha fehuʻi pe fakamatala, kiʻi taimi ʻo fakakaukau pe ko e hā ha fehuʻi pe fakaafe te ke lava ʻo fai ange kae ʻikai ko e meʻa te ke talaangé.

Fie ako lahi ange?

• David A. Bednar, “An Evening with Elder David A. Bednar” (evening with a General Authority, Feb. 7, 2020), broadcasts.ChurchofJesusChrist.org

Pōtoʻi Ngāué

Vahevahe ha ngaahi fakamatala ʻe tokoni ke ʻiloʻi ʻe he kau akó ʻa e taimi ʻoku fakahoko ai ʻe he Laumālie Māʻoniʻoní Hono fatongiá pe ngāué.

Fakamatalaʻi

“ʻI heʻetau moʻui ʻi ha māmani ʻoku ʻikai faʻa tokanga ki he ngaahi meʻa fakalaumālié, ʻoku tau fiemaʻu kotoa ha tokoni ke ʻiloʻi e leʻo ʻo e Laumālié. Mahalo naʻa tau ongoʻi ʻa e Laumālié kae ʻikai ke tau fakatokangaʻi ia. … Ko e taha ʻo e ngaahi meʻaʻofa maʻongoʻonga taha te ke lava ʻo foaki ko ha faiakó, ko hoʻo tokoniʻi kinautolu ʻokú ke akoʻí ke nau fakalakalaka ʻi he fekumi ko ʻeni ki he fakahā fakatāutahá ʻi he kotoa ʻo ʻenau moʻuí” (Ko e Faiako ʻi he Founga ʻa e Fakamoʻuí [2022], Gospel Library). ʻI he taimi ʻoku fakahoko ai ʻe he Laumālie Māʻoniʻoní ha taha ʻo Hono ngaahi fatongiá pe ngāué, ʻe lava ke fakahaaʻi ʻe he faiakó ʻa e fatongia pe ngāue ko iá pea fakamoʻoni ki he founga ʻokú Ne fakahoko ai iá. ʻOku ʻaonga ʻaupito ʻeni hili hano vahevahe ʻe ha tokotaha ako ha meʻa, ka ʻe lava foki ke hoko ia ʻi ha faʻahinga taimi pē ʻi he kalasí. ʻE lava ke tokoni hono fai ʻení ke ʻiloʻi ʻe he kau akó ʻa e taimi ʻoku ʻi he kalasí ai ʻa e Laumālie Māʻoniʻoní pea ʻi he toenga ʻo ʻenau moʻuí.

ʻE lava ke maʻu e ngaahi fatongia mo e ngaahi ngāue kehekehe ʻa e Laumālie Māʻoniʻoní ʻi he:

• “Faiako mo Ako ʻaki ʻa e Laumālié,” ʻi he “Tokangaʻi ʻo e Loki Akó,” Ngaahi Maʻuʻanga Tokoni Kehe ʻa e Faiakó

• “Fekumi mo Falala ki he Laumālié,” Malanga ʻAki ʻEku Ongoongoleleí (2019), 101–111

Fakatātaaʻi

• Tokotaha Akó: “ʻOku fakamanatu mai ʻe he potufolofola ko ʻení kiate au ʻa e lea konifelenisi ko ia ʻe taha meia Palesiteni Nalesoni ʻi he ʻi Heʻene fakaafeʻi kitautolu ke tuku ke lāngilangiʻia ʻa e ʻOtuá.”

• Faiako: “Losa, mālō hoʻo vahevahe naʻe fakamanatu atu ʻe he potufolofola ko ʻení ʻa e lea ʻa Palesiteni Nalesoní. Ko e fatongia ʻo e Laumālie Māʻoniʻoní ke fakamanatu mai kiate kitautolu ʻa e meʻa kotoa pē. Naʻe hoko ʻa e Laumālie Māʻoniʻoní ko ha konga ʻo hoʻo manatuʻi ʻa e kupuʻi lea ko iá.”

• Hili hono vahevahe ʻe he kau akó ha ngaahi aʻusia ʻo ha moʻoni ne nau ako ʻi he kalasí, ʻoku pehē ʻe Sisitā Lopesi, “Kalasi, ʻoku fakamoʻoniʻi ʻe he Laumālie Māʻoniʻoní ʻa e moʻoní, pea ʻoku ou houngaʻia ʻi he ngaahi moʻoni kuó Ne fakamoʻoniʻi he ʻaho ní ʻo fakafou ʻi hoʻo ngaahi aʻusiá.”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

Fakaʻaongaʻi ʻa e fatongia pe ngāue ʻa e Laumālie Māʻoniʻoní pea mo e fakamatala ʻa e tokotaha akó ʻi he tēpile ʻi laló ke akoako fakahoko ʻa e meʻa te ke ala lea ʻakí ke ke fakatokangaʻi ʻa e fatongiá pe ngāué.

Fatongia pe Ngāue ʻa e Laumālie Māʻoniʻoní	Fakamatala ʻa e Tokotaha Akó	Fakamatala ʻa e Faiakó
Fatongia pe Ngāue ʻa e Laumālie Māʻoniʻoní ‘Okú Ne fakamoʻoni ki he ‘Otua ko e Tamaí mo Hono ‘Alo ko Sīsū Kalaisí (vakai, 1 Kolinitō 12:3; ʻEta 12:41).	Fakamatala ʻa e Tokotaha Akó “Naʻá ku ako ʻi he ngaahi veesi ko ʻení, ʻoku fakamoʻui ʻe Sīsū Kalaisi ʻa kinautolu ʻoku kumi tokoni kiate Iá.”	Fakamatala ʻa e Faiakó
Fatongia pe Ngāue ʻa e Laumālie Māʻoniʻoní ‘Okú Ne fakamāmaʻi (hiki hake pe langaki fakalaumālie) ‘a e faiakó mo e tokotaha akó fakatouʻosi (vakai, 1 Kolinitō 14:12; Tokāteline mo e Ngaahi Fuakava 50:22–23).	Fakamatala ʻa e Tokotaha Akó “Naʻá ku saiʻia ʻaupito ʻi he meʻa naʻe lea ʻaki ʻe Siaosi fekauʻaki mo e temipalé pea ʻoku ou fie tānaki atu ki ai …”	Fakamatala ʻa e Faiakó
Fatongia pe Ngāue ʻa e Laumālie Māʻoniʻoní ‘Okú Ne foaki ‘a e “fua ‘o e Laumālié,” ‘a ia ‘oku kau ai ‘a e ngaahi meʻa hangē ko e fiefiá, ʻofá, nongá, faʻa kātakí, mo e angavaivaí (Kalētia 5:22–23).	Fakamatala ʻa e Tokotaha Akó “Kuó u feinga ke u angalelei ki hoku tokouá.”	Fakamatala ʻa e Faiakó

Aleaʻi pe Fakalaulauloto

• Ko e hā ʻokú ke ako ʻi hoʻo akoako fakahoko ʻa e fakamatala takitaha?

• ʻE tokoni fēfē ʻa e ngaahi fakamatala faingofua ko ʻení ke mahino mo fakatokangaʻi ʻe heʻetau kau akó ʻa e founga ʻoku lea ai ʻa e Laumālie Māʻoniʻoní kiate kinautolú?

Fakakau

• ʻE founga fēfē haʻo hokohoko atu ke ako mo fakamatalaʻi ʻa e ngaahi fatongia mo e ngaahi ngāue ʻa e Laumālie Māʻoniʻoní ʻi heʻenau ʻi he loki akó?

Fie Ako Lahi Ange?

• Gary E. Stevenson, “ʻE Tokoniʻi Fēfē Koe ʻe he Laumālie Māʻoniʻoní?,” Liahona, Mē 2017, 117–120