Ngaahi Tefitoʻi Moʻoni ʻo e Faiako Hangē ko Kalaisí: Faiako ʻaki ʻa e Laumālié

Toutou fakahoko hoʻo fakamoʻoní, pea fakaafeʻi ʻa e kau akó ke vahevahe ʻenau ngaahi ongó, aʻusiá, mo e fakamoʻoní.

Pōtoʻi Ngāué

Faʻu ha ngaahi sētesi fakaʻaiʻai ʻe tokoni ke fakamatalaʻi ʻe he kau akó ʻenau ngaahi ongó, aʻusiá, mo e fakamoʻoní.

Fakamatalaʻi

ʻI hono vahevahe ʻe he kau akó ʻenau ngaahi ongó, aʻusiá, mo e fakamoʻoní, ʻe fakamoʻoniʻi ʻe he Laumālie Māʻoniʻoní ʻa hono moʻoni ʻo e meʻa ʻoku nau lea ʻakí, ki honau ʻatamaí mo e lotó fakatouʻosi pea ki he niʻihi kehé foki. Ko e sētesi fakaʻaiʻaí ko ha founga ia ʻe taha ke tokoniʻi kinautolu ke nau vahevahé. ʻOku meimei ke konga ua ʻa e ngaahi sētesi fakaʻaiʻai ko ʻení: Ko e konga ʻuluakí ʻoku fakaafeʻi ʻa e kau akó ke nau fakalaulauloto ki heʻenau ngaahi ongó, aʻusiá, mo e fakamoʻoní pea lava ke fakafehokotaki ia ki he ngaahi meʻangāue fakafaiako kehé, hangē ko e ngaahi fakatātaá, fehuʻí, talanoa ke ako mei aí, fanga kiʻi vitioó, mo e ngaahi himí. Ko e konga hono uá ʻoku ʻoange ai ha faingamālie ke kamata vahevahe ʻa e kau akó. ʻE lava ke fai ʻeni ʻaki hono fakaafeʻi ʻa e kau akó ke nau fakakaukau ki he founga te nau fakakakato ai ha kupuʻi lea ʻoku ʻikai kakato. Ko e konga mahuʻinga ʻo e ngaahi sētesi fakaʻaiʻai ko ʻení ko hono tokoniʻi ʻo e kau akó ke nau fetuʻutaki mo e Laumālie Māʻoniʻoní ke tokoni ke nau kamata fakakaukau ki ha founga ke fakamatalaʻi ai ʻenau ngaahi ongó, aʻusiá, mo e fakamoʻoní.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

Laʻitā ʻo e Fakatātāʻí

ʻOkú ke akoʻi ʻa e Tokāteline mo e Ngaahi Fuakava 45:1–5, pea ko e tefitoʻi moʻoní “Ko Sīsū Kalaisi ʻa hotau Taukapo ki he Tamaí.” ʻOkú ke fakaʻaliʻali ki he kau akó ʻa e tā ko ʻeni ʻo Sīsū Kalaisí pea fakaʻaongaʻi ʻa e sētesi “Kapau te u lava ʻo tala kia Sīsū Kalaisi ha ʻuhinga ʻe taha ʻoku ou ʻofa ai ʻiate Iá, te u vahevahe …”

Himi ʻo e Fakatātāʻí

ʻOku mou hivaʻi fakataha mo e kalasí ʻa e “ʻOku Moʻui Hoku Huhuʻí.” ʻOkú ke fakaafeʻi ʻa e kau akó ke nau kumi ʻa e ngaahi laine ʻoku nau saiʻia taha aí ʻa ia ʻoku tokoni ke nau fakakakato ʻa e kupuʻi lea ko ʻení: “ʻOku ou ʻilo ʻoku moʻui ʻa Sīsū Kalaisi ke …”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

• Fakaʻaongaʻi ʻa e miniti ʻe nima ka hokó ke ʻiloʻi ha fakatātā, himi, pe vitiō fekauʻaki mo Sīsū Kalaisi ʻoku fehokotaki mo ha tefitoʻi moʻoni pe tokāteline ʻi ha konga folofola hoko mai. Faʻu ha sētesi fakaʻaiʻai ʻe tokoni ki he kau akó ke nau fakakaukau pea vahevahe ʻenau ngaahi ongó, aʻusiá, pe fakamoʻoni kia Sīsū Kalaisí fekauʻaki mo e tefitoʻi moʻoni pe tokāteline kuo filí.

Aleaʻi pe Fakalaulauloto

• ʻE tokoni fēfē hono ʻoange ha sētesi fakaʻaiʻaí ke vahevahe ʻe he kau akó ʻenau ngaahi ongó, aʻusiá, mo e fakamoʻoní?

• Ko e hā kuó ke ako fekauʻaki mo hono tokoniʻi ʻo e kau akó ke nau ongoʻi loto-falala ange ʻi hono vahevahe ʻo e ngaahi fakamoʻoni mo e ongo ʻoku mahuʻingá?

Fakakau

• Faʻu ha sētesi fakaʻaiʻai ki he lēsoni takitaha ʻi he uiké ni ʻa ia ʻoku tokoni ke vahevahe ʻe he kau akó ʻenau ngaahi ongó, aʻusiá, mo e fakamoʻoní.

Fie Ako Lahi Ange?

• “Tataki e Ngaahi Fealeaʻaki Fakalaumālié,” Ko e Faiako ʻi he Founga ʻa e Fakamoʻuí (2016), 33–34

Pōtoʻi Ngāué

Toutou fakamoʻoniʻi lahi ange mo mālohi ange kia Sīsū Kalaisi.

Fakamatalaʻi

Naʻe fakaafeʻi ʻe ʻEletā Niila L. ʻEnitaseni ʻa e kau faiako mo e kau taki ʻo e Potungāue Ako ʻa e Siasí ke nau “toutou fkaamoʻoni lahi ange mo mālohi ange kia Sīsū Kalaisi” (“The Power of Jesus Christ and Pure Doctrine” [address to Church Educational System religious educators, June 11, 2023], Gospel Library). ʻE lava ke maʻu ʻa e ngaahi faingamālie ke fai ai ha fakamoʻoní ʻi he kotoa ʻo e kalasí ʻi he taimi ʻoku vahevahe ai ʻa e ngaahi moʻoni fekauʻaki mo e Fakamoʻuí, kae ʻikai ʻi he kamataʻanga pē pe ngataʻanga ʻo e kalasí. Te ke lava ʻo fakaʻaongaʻi ʻa e ngaahi fehuʻi ko ʻení ke tokoni atu ke ke ʻiloʻi ha fakamoʻoni nounou mo mālohi te ke lava ʻo vahevahe:

• Ko e hā ʻoku ou ʻilo fakataautaha fekauʻaki mo e meʻa ʻoku akoʻi fekauʻaki mo e Fakamoʻuí?

• Kuó u ongoʻi fēfē nai ʻa e mālohi ko ʻeni ʻo Sīsū Kalaisí ʻi heʻeku moʻuí?

• Ko e hā ha founga faingofua mo ongo moʻoni te u lava ai ʻo vahevahe ʻa e meʻa ʻoku ou ʻilo fekauʻaki mo Sīsū Kalaisí?

ʻE lava ke fakatupu ʻe hono vahevahe hoʻo fakamoʻoni nounou mo toutou fakahoko ki he Fakamoʻuí ha ʻātakai ʻe ongoʻi fiemālie ange ai hoʻo kau akó ke vahevahe mo tokoni ke nau ongoʻi hono fakapapauʻi ʻe he Laumālie Māʻoniʻoní hoʻo fakamoʻoni ki he moʻoní.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

Lolotonga ha lēsoni ki hono ʻaloʻi ʻo Sīsū Kalaisí, naʻe fakakaukau ʻa Brother Senitela ki he meʻa ʻokú ne ʻilo fekauʻaki mo e Fakamoʻuí pea mo ʻEne Tamaí mo ne pehē, “Ko Sīsū Kalaisi ʻa e ʻAlo ʻo e ʻOtuá.”

Ko e ngaahi kupuʻi lea kehe ke fakakaukau ki ai mo fakaʻaongaʻí ko e:

• Kuó u ʻiloʻi maʻaku pē ko Sīsū Kalaisi …

• ʻOku ou ʻiloʻi ko e Fakamoʻuí …

• Kuó u ongoʻi ʻa e mālohi ʻo e Fakamoʻuí ke … ʻi heʻeku moʻui ʻi he taimi …

Lomiʻi heni ke vakai ki ha vitiō ʻo e sīpinga ko ʻení.

Akoako

Hiki ʻi he ngaahi moʻoni takitaha ko ʻení ha fakamoʻoni nounou mo mālohi te ke lava ʻo vahevahe. Te ke lava ʻo fakaʻaongaʻi ʻa e ngaahi fehuʻi pe ngaahi ueʻi mei he fakaʻuhinga mo e sīpinga ʻi ʻolungá ke tokoni kiate koe.

• Ko Sīsū Kalaisi ʻa e maama ʻo e māmaní

• Naʻe mamahi ʻa Sīsū Kalaisi ke fakahaofi kitautolu mei he angahalá mo e maté pea mo tokoniʻi kitautolu ʻi he ngaahi faingataʻa ʻo e moʻui fakamatelié.

• Ko ha foʻi moʻoni ʻe akoʻi ʻi hoʻo lēsoni hokó.

Aleaʻi pe Fakalaulauloto

• Ko e hā ʻokú ke ako ʻi hoʻo fakahoko ʻa e ngaahi fakamoʻoni faingofua mo mālohi ko ʻeni ʻo Sīsū Kalaisí?

• Ko e hā te ke lava ʻo fai ke fakapapauʻi ʻoku kei fakamātoato mo ongo moʻoni pē hono toutou fakahoko hoʻo fakamoʻoní?

Fakakau

• ʻI hoʻo teuteu mo akoʻi hoʻo lēsoní pe ngaahi lēsoni ʻi he uike ka hoko maí, kumi ha ngaahi faingamālie ke fakamoʻoni ai kia Sīsū Kalaisi. Pea vahevahe leva hoʻo fakamoʻoni faingofua mo fakamātoato kiate Iá.

Fie Ako Lahi Ange?

• Gary E. Stevenson, “Ko Hono Tanumaki mo Vahevahe Hoʻo Fakamoʻoní,” Liahona, Nōvema 2022, 111–114

• “Vahevahe Hoʻo Fakamoʻoní,” ʻi he “Tokoni‘i ʻa e Kakaí ke Nau Fakahoko mo Tauhi ʻa e Ngaahi Tukupaá?,” Malanga ʻAki ʻEku Ongoongoleleí (2019), 201–202