Itudlo ang Doktrina

Pagkat-on sa doktrina ni Jesukristo sa imong kaugalingon.

Kahanas: Paghimo og makapasiksik nga mga pangutana nga dili limitado ang tubag nga makatabang sa mga tigkat-on sa pagdiskobre og mga doktrina ug mga baroganan sa ebanghelyo sa ilang kaugalingon ug ayaw giyahi ang mga estudyante ngadto sa usa ka piho nga tubag.

Pagpasabot

Ang makapasiksik nga mga pangutana nga dili limitado ang tubag modapit sa mga estudyante sa pagdiskobre ug pagsabot sa mga kamatuoran diha sa mga kasulatan sa ilang kaugalingon kay sa giyahan sila ngadto sa usa ka gitino na daan o piho nga tubag. Kini nga pamaagi makahimo sa pagtuon sa estudyante sa kasulatan nga mas mahinungdanon ug makatugot sa Ginoo sa personal nga pagtudlo ug pagdasig kanila. Kini nga mga pangutana (1) naglakip og imbitasyon sa mga estudyante nga mokonsiderar kon unsay personal nga importante kanila, (2) mowala sa panginahanglan sa mga estudyante nga mangita og usa ka piho nga butang nga gihunahuna sa magtutudlo, ug (3) makatugot sa mga estudyante sa pagpamalandong kon sa unsang paagi ang mga kamatuoran nga natino ug nasabtan mahimong magamit sa ilang personal nga mga kinabuhi. Kini nga mga pangutana mahimong gamiton kon dapiton ang mga estudyante sa pagsiksik sa mga bersikulo aron makatino og mga kamatuoran ug sa pagtinguha nga mas makasabot sa mga kamatuoran nga ilang natino.

Modelo

Aniay pipila ka ehemplo kon sa unsa nga paagi ikaw makatabang sa mga estudyante sa pagdiskobre ug pagsabot sa kamatuoran nga sila mismo gamit ang makapasiksik nga mga pangutana nga dili limitado ang tubag:

• Imbes magdapit nga, “Pangitaa ang bersikulo diin ang Ginoo nagtudlo kanato sa kaimportante sa kamasulundon,” mahimo kang mangutana, “Unsa nga baroganan ang importante kanimo niini nga mga bersikulo?”

• Imbes moingon, “Si Jesus mihatag og gibug-aton sa atong panginahanglan nga magbaton og hugot nga pagtuo diha Kaniya niini nga mga bersikulo,” mahimo kang mangutana, “Unsa nga mga baroganan ang atong makat-onan gikan sa mga pagtulon-an ug ehemplo ni Jesus niini nga mga bersikulo?”

• Imbis mangutana og, “Makita ba ninyo kon giunsa sa Ginoo pagpahinumdom kanato nga mag-ampo kanunay niini nga bersikulo?” mahimo kang mangutana, “Unsa nga mensahe mahitungod sa pag-ampo nga gipaningkamotan og tabang sa Ginoo nga inyong masabtan gikan niini nga bersikulo?”

Iklik dinhi aron makakita og bidyo niini nga modelo.

Pagpraktis

Gamita ang usa o dugang pa sa mosunod nga mga pagpraktis aron sa pagpalambo sa imong abilidad sa pagtabang sa mga estudyante sa pagdiskobre ug pagsabot sa mga kamatuoran nga sila mismo:

• Tan-awa ang Moroni 10:32–33. Pagpraktis sa pagtino og sobra pa sa usa ka baroganan aron makita kon sa unsa nga paagi ang mga estudyante mahimong motino og nagkadaiya nga mga baroganan gikan niini nga mga bersikulo. Isulat ang usa ka pangutana nga magtugot sa mga estudyante sa pagdiskobre og daghang baroganan.

• Hunahunaa ang usa ka hut-ong sa kasulatan nga imong giplanohan sa pagtuon uban sa mga estudyante diha sa usa ka umaabot nga leksiyon. Imbes magplano nga ipabasa kini nga mga bersikulo sa mga estudyante ug mangita og piho nga baroganan nga imo nang natino, praktisa sa pagsulat og duha hangtod sa tulo ka makapasiksik nga mga pangutana nga dili limitado ang tubag aron sa pagtabang kanila nga makadiskobre og usa ka baroganan nga sila mismo.

• Tan-awa ang usa ka umaabot nga plano sa leksiyon. Pagpili og usa ka baroganan nga mahimong tinoon sa mga estudyante gikan sa mga bersikulo nga gitun-an. Pagpraktis sa pagsulat og duha o tulo ka yano nga mga pangutana aron sa pagtabang kanila nga mas makasabot pa niini nga baroganan sa usa ka paagi nga dili mogiya kanila ngadto sa usa ka gitino na daan o piho nga tubag.

Hisgoti o Pamalandongi

Pamalandongi kon unsa ang imong nakat-onan gikan niini nga kasinatian. Tingali marekord nimo ang pipila niini nga mga hunahuna diha sa usa ka journal sa pagtuon. Ikonsiderar ang mosunod nga mga pangutana:

• Unsay akong nabuhat kaniadto sa pagtabang sa mga estudyante nga makat-on pinaagi sa makapasiksik nga mga pangutana nga dili limitado ang tubag?

• Unsay akong nakat-onan gikan niini nga kasinatian nga makapalambo sa akong abilidad nga mangutana og makapasiksik nga mga pangutana nga dili limitado ang tubag?

• Unsa ang akong buhaton aron magpadayon sa paglambo?

Iapil

Samtang mangandam ka sa imong mga leksiyon karong semanaha, paghimo og duha o tulo ka makapasiksik nga mga pangutana nga dili limitado ang tubag nga makatabang sa mga tigkat-on sa pagdiskobre og doktrina ug mga baroganan sa ebanghelyo nga sila mismo ug ayaw giyahi ang mga estudyante ngadto sa usa ka piho nga tubag. Isulat kini ug sulayi nga ipangutana ang matag usa ngadto sa usa ka sakop sa pamilya, ngadto sa usa ka kauban, o sa imong kaugalingon lang. Ilha ang usa nga ipangutana diha sa lawak klasehanan, ug gamita kini diha sa imong leksiyon.

Gusto pa og Dugang?

• Chad H. Webb, “Kita Wala Moabot Niining Gilay-ona Aron Igo Lang Mohunong Dinhi,”(Tinuig nga Sibya sa Pagbansay sa S&I, Hunyo 9, 2020), broadcasts.ChurchofJesusChrist.org

• Seksiyon 2.1–2.3, “Unit 2: Teach the One,” Inservice Leaders’ Resources (learner-focused teaching)

• “Tabangi ang mga Tigkat-on nga Makakita sa mga Kamatuoran sa Kasulatan,” diha sa “Itudlo ang Doktrina,” Pagtudlo Sumala sa Pamaagi sa Manluluwas (2016), 21