Ngaahi Tefitoʻi Moʻoni ʻo e Faiako Hangē ko Kalaisí: Akoʻi ʻa e Tokāteliné

Tukutaha ʻa e tokangá ki he ngaahi moʻoni ʻoku taki ki he uluí mo langaki ʻa e tui kia Sīsū Kalaisí.

Pōtoʻi Ngāué

ʻEke ha ngaahi fehuʻi ʻe tokoni ki he kau akó ke nau ʻiloʻi mo fakamatalaʻi ʻa e ngaahi tefitoʻi moʻoni fakauluí.

Fakamatalaʻi

Naʻe pehē ʻe Palesiteni Henelī B. ʻAealingi ʻo e Kau Palesitenisī ʻUluakí, “Ko e tefitoʻi fakauluí ē ʻoku iku ki he talangofua ki he finangalo ʻo e ʻOtuá” (“Converting Principles” [remarks at an evening with Elder L. Tom Perry, Feb. 2, 1996], 1). Ko e founga ʻe taha ke tokoniʻi ai ʻa e kau akó ke nau ʻiloʻi mo fakamatalaʻi ʻa e ngaahi tefitoʻi moʻoni fakauluí ko hono fai ange ha fehuʻi fekumi ʻoku poupouʻi ai kinautolu ke kumi ʻa e ngaahi kupuʻi lea ʻokú ne tokoniʻi kitautolu ke fakatupulaki ʻetau tuí mo e talangofua ki he finangalo ʻo e ʻOtuá. Ko e founga ʻe taha ke tokoniʻi ai kinautolu ke ʻiloʻi mo fakamatalaʻi ʻa e ngaahi tefitoʻi moʻoni fakauluí ko hono fai ha ngaahi fehuʻi vakaiʻi hili hano vahevahe ʻe ha tokotaha ako ha talanoa, aʻusia, pe fakamatala. ʻOku fakaafeʻi ʻa e kau akó ʻi he ngaahi fehuʻi vakaiʻí ke toe fakamatalaʻi ʻenau talí ʻi ha founga faingofua ʻoku langaki ai ʻa e tui kia Kalaisí mo ha loto-fiemālie ke talangofua ki he finangalo ʻo e ʻOtuá.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

Ngaahi fehuʻi fekumí:

1. ʻI hoʻo fekumi ʻi he Tokāteline mo e Ngaahi Fuakava 121:41–46, ko e hā ha ngaahi kupuʻi lea ʻokú ke vakai ki ai ʻe lava ʻo ueʻi koe ke ke talangofua mo tui ki he finangalo ʻo e ʻOtuá?

2. ʻI hoʻo lau ʻa e Sōsiua 1:5–9, ko e hā ʻokú ke vakai ki ai ʻoku tokoni ke ke fie fakahoko ʻa e finangalo ʻo e ʻOtuá?

3. Ko e hā ha ngaahi moʻoni ʻokú ke maʻu ʻi he Mātiu 7:7–12 ʻe tokoni ke langaki hoʻo tui kia Sīsū Kalaisí pea muimui kiate Iá?

ʻE lava ke liliu siʻi pē ʻa e ngaahi fehuʻi tatau ko ʻení ke faʻu ʻaki ha ngaahi fehuʻi vakaiʻi ke tokoni ki he kau akó ke fakamatalaʻi ha tefitoʻi moʻoni fakaului.

• Aʻusia ʻa e tokotaha akó: ʻOku vahevahe ʻe Malia ha aʻusia ʻa ia naʻe iku ai ʻene fehuʻi ʻi he lotú ki ha tali naʻe ʻikai ke ne fiemaʻu.

• Fehuʻi ʻa e faiakó: “ʻI ha kupuʻi lea ʻe taha, ko e hā naʻá ke ako mei he aʻusia ko iá ʻe lava ʻo tokoniʻi ai ʻa e niʻihi kehé ke nau tui kia Sīsū Kalaisi pea muimui ki Heʻene fakahinohinó?”

• Fakamatala ʻa e tokotaha akó: Naʻe toki vahevahe ʻe Kali ha fakamatala fakaʻofoʻofa mo lōloa ki he meʻa naʻá ne ako ʻi heʻene ako folofola ʻi he pō kimuʻá.

• Fehuʻi ʻa e faiakó: “ʻI ha fakamatala mahinongofua, ko e hā ha meʻa naʻá ke ako ʻe tokoni atu ke ke ofi ange ai ki he Tamai Hēvaní mo Sīsū Kalaisí?”

• Talanoa ʻa e tokotaha akó: ʻOku vahevahe ʻe Katiana ha talanoa fekauʻaki mo ʻene talangofua ki he fono ʻo e vahehongofulú neongo ʻene faingataʻaʻiá.

• Fehuʻi ʻa e Faiakó: “ʻI ha sētesi ʻe taha, ko e hā ha meʻa ʻi he aʻusia ko iá ʻe tokoni ke hokohoko atu hoʻo tui kia Kalaisí ʻi he taimi ʻe faingataʻa ai ke muimui kiate Iá?”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

Hiki ha ngaahi fehuʻi fekumi ki he ngaahi potufolofola ko ʻení:

• Sēmisi 1:5–6

• 2 Nīfai 32:8–9

• Siosefa Sāmita—Hisitōlia 1:11–13

Hiki ha fehuʻi vakaiʻi ki he tūkunga takitaha ke tokoni ke fakamatalaʻi ʻe he kau akó ha tefitoʻi moʻoni fakaului:

• Naʻe vahevahe ʻe ʻElina ha aʻusia fakataautaha maʻongoʻonga ʻi heʻene muimui ki ha ueʻi mei he Laumālié.

• Naʻe fai ʻe Kulisi ha fakamatala fakaʻofoʻofa ki he meʻa naʻá ne ako mei he talanoa ʻo Tēvita mo Kolaiaté.

• Naʻe vahevahe ʻe Mele ha talanoa fakataautaha ʻo ʻene tafoki kia Sīsū Kalaisi ʻi he taimi naʻe mālōlō ai ha mēmipa ʻo e fāmilí.

Aleaʻi pe Fakalaulauloto

• Ko e hā ʻokú ke ako fekauʻaki mo hono tokoniʻi ʻo e kau akó ke nau nofotaha ʻi he ngaahi tefitoʻi moʻoni fakauluí?

• ʻE tokoni fēfē ʻa e fakaangaanga ko ʻení ke akoʻi ʻe he kau akó ʻa e tokāteliné ʻo hangē ko ʻene hā ʻi he folofola ʻa e ʻOtuá?

Fakakau

• Kuó ke fakaangaanga ʻi he ako ko ʻení ha taukei ʻe ua ʻe tokoni ki he tokotaha akó ke ne ʻiloʻi mo fakamatalaʻi mahino ʻa e ngaahi tefitoʻi moʻoni fakauluí: ngaahi fehuʻi fekumí mo e ngaahi fehuʻi vakaiʻí. ʻI hoʻo fakakaukau ki hoʻo kau akó, fili ha taukei ʻe taha ke fakaʻaongaʻi ʻa ia ʻe ʻaonga taha kiate kinautolú. ʻI hoʻo teuteu ʻa e potufolofola takitaha ʻi he uike ní, fehuʻi loto maʻu pē, “Te u tokoniʻi fēfē ʻa e tokotaha akó ke ne ʻiloʻi mo fakamatalaʻi ha tefitoʻi moʻoni fakaului?” ʻE lava ke ke hiki ʻa e fehuʻi ko iá ko ha fakamanatu kiate koe ʻi hoʻo teuteú.

• Hili hoʻo hiki ha fehuʻi ʻoku tokoni ki he tokotaha akó ke ne ʻiloʻi pe fakamatalaʻi ha tefitoʻi moʻoni fakauluí, ʻahiʻahi fakakaukau pe ʻe tali fēfē ia ʻe he kau akó. Kapau ʻokú ke fakakaukauloto te nau fakamatalaʻi ha tefitoʻi moʻoni fakaului, tauhi ia. Kapau ʻokú ke fakakaukauloto ʻe faingataʻa ke fakamatalaʻi ʻe he kau akó ha tefitoʻi moʻoni fakaului, liliu ʻa e fehuʻí ke tokoni ke aʻusia ʻa e ola naʻe fakataumuʻa ki aí.

Fie ako lahi ange?

• David A. Bednar, “Ko e Ngaahi Tefitoʻi Moʻoni ʻo ʻEku Ongoongoleleí,” Liahona, Mē 2021, 123–26

• Henry B. Eyring, “The Power of Teaching Doctrine,” Ensign, May 1999, 73–75

Pōtoʻi Ngāué

Tali ʻa e ngaahi fehuʻí ʻi ha founga ʻoku fakaʻehiʻehi ai mei he fakamahamahaló mo e ngaahi fakakaukau fakafoʻituitui ʻoku ʻikai fakatokāteliné.

Fakamatalaʻi

ʻI he taimi ʻoku ʻeke ai ʻe he kau akó ha ngaahi fehuʻi te nau lava ʻo fakatupu ha fakamahamahalo mo ha ngaahi fakakaukau fakafoʻituitui ʻoku ʻikai fakatokāteliné, ʻoku mahuʻinga ke tokangaekina ʻa e tūkungá ʻi ha founga te ne langaki ʻa e tui kia Sīsū Kalaisí pea fakaʻehiʻehi mei hano vahevahe ha ngaahi fakamatala ʻoku ʻikai totonú. ʻOku totonu ke feinga maʻu pē ʻa e kau faiakó ke tokoniʻi ʻa e kau akó ke maʻu ʻa e tali ki heʻenau ngaahi fehuʻí. Ka neongo ia, kapau ʻe ongoʻi ʻe ha faiako ha fehuʻi te ne ala fakatupu ha fakamahamahalo, naʻe ʻomi ʻe ʻEletā Niila L. ʻEnitasoni ha fakahinohino lelei ki he founga ke tali ʻakí. Naʻá ne pehē “Tuku ke tau loto-fiemālie ke pehē, ‘ʻOku ʻikai ke u ʻilo fekauʻaki mo ia, ka ko e meʻa ʻeni ʻoku ou ʻiloʻí.’” ʻE lava ke tokoni hono fai ʻení ke tau “liliu ʻa e ngaahi fehuʻi leleí, ka ko e ngaahi fehuʻi ʻoku nau fakatupu ʻa e fakamahamahaló, ki ha ngaahi tali ʻokú ne langaki ʻa e tui ki hotau Fakamoʻui ko Sīsū Kalaisí” (“Ko e Mālohi ʻo Sīsū Kalaisí mo e Tokāteline Haohaoá” [lea ki he kau faiako fakalotu ʻa e Potungāue Ako ʻa e Siasí, 11 Sune, 2023], Gospel Library).

Fakatātaaʻi

• ʻOku akoʻi ʻe Brother Motisipe ʻa e Fakatupú, pea fehuʻi ʻe ha tokotaha ako, “Ko e hā e fehokotaki ʻa e big bang mo ʻĀtama mo ʻIví?” ʻOku tali ange ʻe Brother Motisipe, “ʻOku ʻikai ke u ʻilo ʻa e tali ki he fehuʻi ko iá, ka ʻoku ou ʻiloʻi naʻe fakatupu ʻa ʻĀtama mo ʻIvi ʻe he Tamai Hēvaní mo Sīsū Kalaisi.”

• ʻOku akoʻi ʻe Sisitā Seni ʻa e “Kaveinga ʻo e Kau Finemuí,” pea fehuʻi ʻe ha tokotaha ako fefine, “Ko e hā ʻoku ʻikai ke tau ʻilo lahi ange ai ki heʻetau Faʻē ʻi Hēvaní?” ʻOku tali ʻe Sisitā Seni, “ʻOku ʻikai ke u ʻilo ʻa e tali ki he fehuʻi ko iá, ka ʻoku ou ʻilo ko ha ʻofefine ʻofeina koe ʻo ha ongomātuʻa fakalangi, mo ha natula faka-ʻOtua mo e ikuʻanga ta‘engata.”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

ʻI hoʻo muimui ki he sīpinga ʻi ʻolungá, te ke tali fēfē nai ʻa e ngaahi meʻa ko ʻení?

• “Brother Palauni, ko e hā ʻoku ʻikai ke tau lotu ai ki he Faʻē ʻi Hēvaní?”

• “Sisitā Pākini, ko e hā naʻe pau ai ke sio ʻa Siosefa Sāmita ki ha loto tātā ke liliu ʻa e Tohi ʻa Molomoná?”

Aleaʻi pe Fakalaulauloto

• Ko e hā ʻokú ke ako ʻi hoʻo akoako fakahoko ʻa e taukei ko ʻení?

• Ko e hā ha ngaahi founga kehe kuó ke ʻilo ke fakaʻehiʻehi ai mei he fakamahamahaló mo hono vahevahe ʻo e ngaahi fakakaukau fakataautaha ʻoku ʻikai fakatokāteliné?

Fakakau

• ʻI hoʻo fakakaukau ki he ngaahi lēsoni ka hokó, fakalaulauloto pe ko e hā ha ngaahi fehuʻi ʻe ala fai atu ʻe hoʻo kau akó ʻe lava ke iku ki ha fakamahamahalo pe vahevahe ai ha ngaahi fakakaukau fakataautaha ʻoku ʻikai fakatokāteline. Hiki ʻa e founga te ke lava ai ʻo tali ʻa e ngaahi fehuʻi ko ʻení, ʻo kamata ʻaki ʻa e “ʻOku ʻikai ke u ʻilo …, ka ko e meʻa ʻeni ʻoku ou ʻiló …”

Fie Ako Lahi Ange?

• Neil L. Andersen, “Ko e Mālohi ʻo Sīsū Kalaisí mo e Tokāteline Haohaoá” [lea ki he kau faiako fakalotu ʻa e Potungāue Ako ʻa e Siasí, 11 Sune 2023], Gospel Library