Ngaahi Tefitoʻi Moʻoni ʻo e Faiako Hangē ko Kalaisí: Akoʻi ʻa e Tokāteliné

Tokoniʻi ʻa e kau akó ke nau fekumi, ʻiloʻi, mo mahino kiate kinautolu ʻa e ngaahi moʻoni ʻi he folofolá.

Pōtoʻi Ngāué

Faʻu ha ngaahi sivi fakaekita ʻa e tokotaha akó ʻe tokoni ke nau ʻiloʻi ai ʻenau mahinó mo e ngaahi meʻa ʻoku nau lolotonga malavá fekauʻaki mo e ngaahi taukei ako folofolá.

Fakamatalaʻi

Ko e sivi fakaekitá ko ha founga mahuʻinga ia ʻoku ako ai ʻa e kau akó ke fakaʻaongaʻi ʻenau tauʻatāina ke filí pea maʻu ʻenau ngaahi aʻusia fakaakó. ʻI hono ʻai ke toutou vakaiʻi ʻe he kau akó ʻenau ngaahi taukei ako folofolá, ʻe tokoni ia ke ʻiloʻi ʻe he kau faiakó ʻa e faʻahinga aʻusia fakaako ke faʻu ke tokoni ke fakafalala pē ʻa e kau akó kiate kinautolu ʻi heʻenau ako folofolá. ʻOku sīpinga kehekehe ʻa e ngaahi sivi ko ʻení, hangē ko e meʻa fakafuofuá, ngaahi kupuʻi lea ʻoku lava ke tānaki atu ki aí, pe fakamaaka pē kitá. ʻOku fakaʻatā ai ʻa e kau faiakó ke tokoni ki he kau akó ke nau (1) fakafuofuaʻi ʻenau aʻusia ako folofola lolotongá, (2) ʻiloʻi ʻa e ngaahi fakalelei te nau fie fakahokó, pea (3) fili ha taukei ako ʻe tokoni ke iku ki he ola ʻoku nau fiemaʻú.

Fakatātaaʻi

Ko e ngaahi sīpinga ʻeni ʻo e faʻahinga kehekehe ʻo e siviʻi fakaekita fekauʻaki mo e ngaahi taukei ako folofolá:

• Mei he 1 ki he 10, ʻoku fēfē hoʻo falala kau ki hono maʻu ʻa Sīsū Kalaisi ʻi he vahe kotoa peé?

• ʻOku ou tui te u lava ʻo toe lelei ange ʻi hono ʻiloʻi ʻa Sīsū Kalaisi ʻi he vahe kotoa pē kapau te u …

• Ko ha taukei ako ʻe lava ʻo tokoniʻi au ke u ʻiloʻi ʻa Sīsū Kalaisi ʻi he vahe kotoa pē ko e …

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

Faʻu ha sivi fakaekita ki he taukei ako folofola ʻa e tokotaha akó ʻoku fakakau ai ʻa e ngaahi meʻa ʻe tolu ʻoku lisi atu ʻi he konga “Fakamatalaʻí.” Fakaafeʻi ha taha ke ne toe vakaiʻi ia pea vahevahe pe ʻoku nau pehē ʻe tokoni fēfē.

Aleaʻi pe Fakalaulauloto

• Ko e hā ʻokú ke ako fekauʻaki mo e mahuʻinga ʻo hono tokoniʻi ʻo e kau akó ke vakaiʻi ʻenau taukei ako folofolá?

• ʻE fakatupulaki fēfē ʻa e malava ʻa e kau akó ke maʻu ha aʻusia mahuʻinga ange ʻi he folofola ʻa e ʻOtuá ʻi hono tokoniʻi kinautolu ke fakafuofuaʻi ʻenau taukei ako folofolá?

Fakakau

• Fakaafeʻi ʻa e kau akó ke vakaiʻi fakauike pē ʻenau taukei ako folofola fakatāutahá mei he taimí ni pea mo e fakaʻosinga ʻo e taʻu fakaakó.

Fie Ako Lahi Ange?

• “Lēsoni 5: Ngaahi Founga ke Ola Lelei ai Hono Ako ʻo e Folofolá,” Ako ʻo e Folofolá—Ko e Mālohi ʻo e Folofolá Tohi Lēsoni ʻa e Faiakó, ChurchofJesusChrist.org

• “Daily Scripture Study and Goals,” Inservice Leaders’ Resources

Pōtoʻi Ngāué

Fakakaukau ki he ngaahi fehuʻi siviʻí ke fili fakalelei ʻa e mītiá, ngaahi talanoa fakatāutahá, mo e ngaahi lēsoni fakataumuʻá.

Fakamatalaʻi

Naʻe fakatokanga ʻa ʻEletā Niila L. ʻEnitaseni ki he kau faiako seminelí mo e ʻinisititiutí ke nau “tokanga ki he mītia, ngaahi talanoa fakataautaha, mo e ngaahi lēsoni fakataumuʻa ʻoku mou filí. ʻI hono fakaʻaongaʻi leleí, ʻoku nau ʻai ke mahuʻinga mo loloto ange [hoʻomou akó]. Ka fuʻu tōtuʻa, ʻe lava ke ne toʻo e tokangá mei hoʻomou kalasí. ʻE lava ʻe he foungá ʻo ikunaʻi ʻa e pōpoakí” (“Ko e Mālohi ʻo Sīsū Kalaisí mo e Tokāteline Haohaoá” [lea ki he kau faiako fakalotu ʻa e Potungāue Ako ʻa e Siasí, 11 Sune, 2023], Gospel Library). ʻE lava ke tokanga ʻa e kau faiakó ki he faleʻi ko ʻení ʻaki haʻanau fakakaukau ki he ngaahi fehuʻi ki he siví ʻe tokoni kiate kinautolu ke fakapapauʻi ʻenau ngaahi filí. Ko ha ngaahi sīpinga ʻeni ʻo ha ngaahi fehuʻi te ke lava ʻo fehuʻi pē kiate koe:

1. ʻOku tānaki atu nai heni ʻa e tokangá pe fakaʻaulilikí ʻi ha founga ʻoku ʻikai ke ne toʻo ʻa e tokangá mei he meʻa ʻoku akoʻí?

2. ʻE tokoni nai ʻeni ke mahino ki he kau akó ʻa e kakano ʻo e lēsoní?

3. Te ne toʻo lahi nai ʻa e taimí?

4. ʻOkú ne fakafehokotaki nai ʻa e kalasí ki he Fakamoʻuí mo e pōpoakí pe tohoakiʻi kitautolu ke mamaʻo?

ʻI he taimi ʻoku kiʻi taʻofi ai ʻa e kau faiakó lolotonga ʻenau teuteu lēsoní ke fakakaukau ki he meʻa ʻoku nau taumuʻa ke fakaʻaongaʻi ʻi he mītiá, ngaahi talanoá, pe ngaahi lēsoni fakataumuʻá, ʻe tokoniʻi kinautolu ʻe he Laumālie Māʻoniʻoní ke nau tokanga pea ʻoua naʻa tohoakiʻi ʻa e tokangá mei he taumuʻa ʻo e pōpoakí.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

• ʻOku teuteu ʻe Sisitā Tulū ha lēsoni ʻi he ʻAlamā 5. ʻOkú ne fie vahevahe ha lēsoni fakataumuʻa. ʻI heʻene fokotuʻutuʻu ʻa e ʻekitivitií mo tānaki ʻa e ngaahi naunaú, ʻokú ne fehuʻi kiate ia pē ʻa e fehuʻi ko ʻení: “ʻE fakafehokotaki nai ʻe he lēsoni fakataumuʻa ko ʻení ʻa e kalasí ki he Fakamoʻuí mo e pōpoakí pe tohoakiʻi kitautolu ke mamaʻo?” ʻOkú ne pehē te ne fakafehokotaki ʻa e kau akó kia Sīsū Kalaisi pea fakakau ia ʻi heʻene palani lēsoní.

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

• ʻOkú ke teuteu ke akoʻi ʻa e tefitoʻi moʻoni ʻo e lotú. ʻOku ʻi ai haʻo foʻi vitiō naʻe faʻu ʻe he Siasí fekauʻaki mo e lotú ʻokú ke fie vahevahe. Ko e hā ha ngaahi fehuʻi te ke lava ʻo fakakaukau ki ai ke fakapapauʻi pe te ke fakaʻaongaʻi ʻa e vitiō ko ʻení? Fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi ʻolungá pe ko haʻo fehuʻi pē ʻaʻau ke fakapapauʻi pe te ke fakaʻaongaʻi ʻa e vitioó pe ʻikai.

• Ki ha lēsoni ka hoko mai, feinga ke ʻiloʻi ʻa e taimi ke fakaʻaongaʻi ai ʻa e mītiá, ngaahi talanoa fakatāutahá, mo e ngaahi lēsoni fakataumuʻá. Ko e hā ha ngaahi fehuʻi te ke lava ʻo fakakaukau ki ai ke fili ʻa e meʻa ke fakaʻaongaʻí?

Aleaʻi pe Fakalaulauloto

• Ko e hā na‘á ke ako pe ongoʻi ‘i hoʻo akoako ʻa e taukeí ni?

• Ko e hā ha faikehekehe ʻe hoko ʻi he aʻusia fakaakó ke tuku ha taimi ke vakaiʻi ai hoʻo fakaʻaongaʻi ʻo e mītiá, ngaahi talanoá, mo e ngaahi lēsoni fakataumuʻá?

Fakakau

• Ko e taimi kotoa pē ʻokú ke teuteu ai ha lēsoni, tuku ha taimi ke kiʻi taʻofi ai ʻo fakakaukau ki hoʻo ngaahi taumuʻa ki hono fakaʻaongaʻi ʻo e mītiá, ngaahi talanoa fakatāutahá, mo e ngaahi lēsoni fakataumuʻá. Loto-fiemālie ke liliu ʻo fakatatau mo e fakahinohino ʻa e Laumālié.

Fie Ako Lahi Ange?

• Neil L. Andersen, “Ko e Mālohi ʻo Sīsū Kalaisí mo e Tokāteline Haohaoá” [lea ki he kau faiako fakalotu ʻa e Potungāue Ako ʻa e Siasí, 11 Sune 2023], Gospel Library