Ngaahi Tefitoʻi Moʻoni ʻo e Faiako Hangē ko Kalaisí: Akoʻi ʻa e Tokāteliné

Faiako mei he ngaahi folofolá mo e ngaahi lea ʻa e kau palōfita ʻo e ngaahi ʻaho kimui ní.

Pōtoʻi Ngāué

Teuteuʻi ha ngaahi fakaafe ʻe tokoni ki he kau akó ke fakafehokotaki ʻa e ngaahi moʻoni ʻoku maʻu ʻi he folofolá ki he meʻa ʻoku lea ʻaki ʻe he kau palōfita moʻuí.

Fakamatalaʻi

ʻOku tokoni ʻa e kau palōfita moʻuí ke mahino kiate kitautolu mo fakamahinoʻi ʻa e tokāteliné koeʻuhí ke tau lava ʻo muimui lelei ange kia Sīsū Kalaisi. Te ke lava ʻo fakaafeʻi ʻa e kau akó ke fakafehokotaki ʻa e ngaahi moʻoni ʻoku maʻu ʻi he folofolá ki he ngaahi lea ʻa e kau palōfita moʻuí ke fakaloloto ʻenau mahino ki he meʻa ʻoku akoʻí. ʻOku faʻa kau ʻi he ngaahi fakaafe ko ʻení ha:

• Fakamatala ʻo e moʻoni ʻoku akoʻí.

• Fakaafe ke fekumi ʻi he ngaahi akonaki fakaepalōfitá ki he ngaahi moʻoni ʻoku fekauʻaki mo iá.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua. ʻE toe lelei ange ʻa e akó kapau ʻoku fehokotaki ʻa e ngaahi fakatātāʻí mo e ngaahi faingamālie akoakó ki he ngaahi lēsoni hoko ʻe akoʻi ʻi he naunau fakalēsoní.

Fakatātaaʻi

• ʻOku loto ʻa Sisitā Sosi ke fakaafeʻi ʻa e kau akó ke nau fakafehokotaki ʻa e maʻu fakahaá ʻo hangē ko hono akoʻi ʻi he Tokāteline mo e Ngaahi Fuakava 8:2–3 ki he ngaahi akonaki ʻa e kau palōfita moʻuí. ʻOkú ne teuteuʻi ʻa e fakaafé: “Hili hono ako ʻa e Tokāteline mo e Ngaahi Fuakava 8:2–3, kātaki ʻo kumi ha fakamatala mei he konifelenisi lahi kuo ʻosí ʻoku fekauʻaki mo e maʻu fakahaá.”

• ʻOku loto ʻa Sisitā Sosi ke fakaafeʻi ʻa e kau akó ke nau fakafehokotaki ʻa e maʻu fakahaá ʻo hangē ko hono akoʻi ʻi he Tokāteline mo e Ngaahi Fuakava 8:2–3 ki he lea ʻa Palesiteni Lāsolo M. Nalesoni “Fakahā maʻá e Siasí, Fakahā ki Heʻetau Moʻuí.” ʻOkú ne teuteuʻi ʻa e fakaafé: “Hili hono ako ʻa e Tokāteline mo e Ngaahi Fuakava 8:2–3, kātaki ʻo ako ʻa e lea ʻa Palesiteni Nalesoni mei he konifelenisi lahi ʻo ʻEpeleli 2018 ʻFakahā maʻá e Siasí, Fakahā ki Heʻetau Moʻuí’ pea feinga ke ʻiloʻi ha meʻa ʻokú ne akoʻi fekauʻaki mo hono maʻu ha fakahaá.”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

Fakakaukau ki ha foʻi moʻoni ʻi he naunau fakalēsoní ʻe hoko ko ha konga ʻo ha kalasi ʻi he kahaʻú.

• Teuteu ha fakaafe ʻokú ne tokoniʻi ʻa e kau akó ke nau fakafehokotaki ʻa e foʻi moʻoni ko iá ki he ngaahi lea ʻa ha kau palōfita moʻui ʻoku nau maʻu ʻiate kinautolu pē.

• Teuteu ha fakaafe ʻe tokoni ke fakafehokotaki ʻe he kau akó ʻa e moʻoni ko iá ki he ngaahi lea ʻa e kau palōfita moʻuí ʻi ha lea kuó ke filí.

Fakakau

• Teuteu tuʻo taha ʻi he uike ke tokoni ki he kau akó ke fakafehokotaki ʻa e ngaahi moʻoni ʻoku maʻu ʻi he folofolá ki he kau palōfita moʻuí.

Aleaʻi pe Fakalaulauloto

• Ko e hā ʻokú ke ako fekauʻaki mo e mālohi ʻo hono fakafehokotaki ʻa e ngaahi moʻoni mei he folofolá ki he ngaahi lea ʻa e kau palōfita moʻuí?

• ʻE tokoni fēfē hono fai ʻeni ʻi hoʻo faiako ki hoʻo kau akó ke nau ului lahi ange kia Sīsū Kalaisi?

Fie Ako Lahi Ange?

• Clark G. Gilbert, “Ko Ha Palōfita ʻi he Fonuá: Ngaahi Fakamamafa Fakaepalōfita Lolotonga ki he Kakai Lalahi kei Talavoú” (Fakamafola fakataʻu ʻa e S&I, 27 Sānuali 2023), ChurchofJesusChrist.org

• Neil L. Andersen, “Ko e Palōfita ʻa e ʻOtuá,” Liahona, Mē 2018, 24–27

Pōtoʻi Ngāué

Fakahaaʻi hoʻo ʻofa mo e fakamoʻoni ki he kau palōfitá ʻi hono vahevahe ʻenau ngaahi leá ʻi he kalasí.

Fakamatalaʻi

ʻE lava ke fakaloloto ʻa e holi ʻa e kau akó ke muimui ki he kau palōfita ʻa e ʻOtuá ʻi heʻenau mamata, fanongo, mo ongoʻi ʻa e ʻofa mo e fakamoʻoni ʻa ha faiako ki he kau palōfitá. Kimuʻa pe hili hono vahevahe ʻa e ngaahi lea ʻa ha palōfita ʻi he kalasí, ʻe lava ke fakahaaʻi ʻe he kau faiakó ʻenau ʻofa pe fakamoʻoni ki he palōfita ko iá. ʻOku ʻomi heni ha faingamālie ki he Laumālie Māʻoniʻoní ke ne fakapapauʻi ʻa e ngaahi lea mo e ngaahi ongo ʻa e faiakó ki he loto mo e ʻatamai ʻo e kau akó pea fakaʻatā ʻa e kau akó ke nau fakakaukau ki heʻenau fakamoʻoni mo e ngaahi ongo fekauʻaki mo e kau palōfitá.

Ko e ngaahi fakatātaaʻi mo e ngaahi akoako ʻi laló ko ha ngaahi sīpinga fakalūkufua kinautolu. ʻE toe lelei ange ʻa e akó kapau ʻoku fehokotaki ʻa e ngaahi fakatātaaʻi mo e ngaahi faingamālie akoakó ki he ngaahi lēsoni ka hokó ʻa ia ʻe akoʻi ʻi he naunau fakalēsoní.

Fakatātaaʻi

• ʻI he teuteu ʻa Sisitā ʻAkelo ke vahevahe ha kupuʻi lea ʻi he kalasí meia Palesiteni Lāsolo M. Nalesoní, ʻokú ne talaange ki heʻene kau akó, “ʻOku ou fie fakahā atu ʻa e lahi ʻo ʻeku ʻofa ʻia Palesiteni Nalesoní pea ʻoku ou poupouʻi ia ko e palōfita ʻa e ʻEikí ʻi he ʻaho ní.” Naʻá ne kole leva ki ha tokotaha ako ke ne lau leʻolahi ʻa e kupuʻi leá.

• Kuo toki lau ʻe he kalasí ʻa e 1 Nīfai 3:7, pea ʻoku pehē ʻe he faiakó, “ʻOku ueʻi au ʻe Nīfai ke u ʻʻalu ʻo fai’ ʻa e meʻa kuo fekau ʻe he ʻEikí, pea ʻoku ou saiʻia ʻi heʻene sīpinga mālohi ʻo e talangofuá.”

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

Hiki pe vahevahe mo ha taha ha founga te ke fakahaaʻi ai hoʻo ʻofa ki he kau palōfitá pe ko hoʻo fakamoʻoni kiate kinautolú ʻi he ngaahi meʻá ni:

• ʻOku mou aleaʻi ʻa e Mōsaia 3:17, pea ʻoku ʻai ke mou vahevahe ʻa e lea ko ʻeni meia ʻEletā Niila L. ʻEnitaseni: “Naʻe ʻikai ngata pē hono fakahaofi kitautolu ʻe hotau ʻEiki mo e Fakamoʻui ko Sīsū Kalaisí, ʻi Heʻene meʻaʻofa taʻe-mafakatataua ʻo ʻEne Fakaleleí, mei he maté ka naʻá Ne foaki mai, tuʻunga ‘i he fakatomalá, ha fakamolemole ʻo ʻetau ngaahi angahalá, mo tuʻu mateuteu foki ke fakahaofi kitautolu mei he loto-mamahi mo e mamahi ʻo hotau laumālie kuo kafó” (“Kuo Kafo,” Liahona, Nōvema 2018, 85).

• ʻOku vahevahe ʻe ha tokotaha ako ko e taha ʻo e ngaahi potufolofola ʻokú ne saiʻia taha aí ko e taimi ʻoku pehē ai ʻe Molomona, “Vakai, ko ha ākonga au ʻa Sīsū Kalaisi …” (3 Nīfai 5:13).

• Lolotonga ʻa e lēsoni hoko te ke akoʻí.

Aleaʻi pe Fakalaulauloto

• Ko e hā ʻokú ke ako ʻi hoʻo akoako fakahoko ʻa e taukei ko ʻení?

• Kuo tākiekina fēfē koe ʻe ha ʻofa pe fakamoʻoni ʻa ha taha ki he kau palōfita ʻa e ʻOtuá?

Fakakau

• Palani ke vahevahe hoʻo ʻofa ki he kau palōfitá, hoʻo fakamoʻoni kiate kinautolú, pe fakatouʻosi ʻi he taimi kotoa pē ʻoku vahevahe ai ʻenau ngaahi leá ʻi ha lēsoni ka hoko maí. Fakafehoanaki ʻa e aʻusia ko ʻení ki ha ngaahi momeniti kehe kuo vahevahe ai ha ngaahi lea fakaepalōfita ʻo ʻikai fakahaaʻi ha ʻofa pe fakamoʻoni.

Fie Ako Lahi Ange?

• Ngaahi Tefitó mo e Ngaahi Fehuʻí, “Fakamoʻoní,” Gospel Library.

• Ulisses Soares, “ʻOku Lea ʻa e Kau Palōfitá ʻi he Mālohi ʻo e Laumālie Māʻoniʻoní,” Liahona, Mē 2018, 98–99